កាលពីថ្ងៃសុក្រសប្ដាហ៍មុននេះ លោក ស៊ី ជីនពីង បុរសខ្លាំងរបស់ប្រទេសចិន ត្រូវបានសមាជិកសភារបស់បក្សកុម្មុយនីស្តចិន ប្រកាសឲ្យលោកបន្តអាណត្តិដឹកនាំបន្តទៀត។
អ្នកណាក៏ដឹងដែរថា សភាប្រជាជនចិនដែលអនុម័តឱ្យលោក ស៊ី ក្លាយជាប្រធានាធិបតីបន្ត ៥ឆ្នាំទៀត ក៏បានបោះឆ្នោតដោយគ្មានសំឡេងជំទាស់សូម្បីមួយសំឡេងក៏គ្មានផង គឺ ២៩៥២សំឡេងទល់នឹងសូន្យ។
លោក ស៊ី នៅឆ្នាំនេះមានអាយុ ៦៩ឆ្នាំហើយ ហើយលោកបន្តអង្គុយលើអាសនៈប្រធានាធិបតីចិនដ៏មានអំណាចនេះរហូតអស់មួយជីវិត ឬរហូតដល់លោកអស់ចិត្តលែងចង់កាន់តំណែងនេះ។
លោកមិនត្រឹមជាប្រធានាធិបតីនោះទេ លោកក៏ជាអគ្គលេខាបក្សកុម្មុយនីស្តចិនទៀតផង។ បុរសរូបនេះឡើងកាន់អំណាចនៅឆ្នាំ២០១២ ចំពេលដែលប្រទេសចិន មានកម្លាំងខ្លាំងផ្នែកសេដ្ឋកិច្ច ផ្នែកកងទ័ព និងការទូតក្រោមការកែទម្រង់របស់អតីតប្រធានាធិបតី ហូ ជិនតាវ។ ក្នុងអំឡុងពេល ១០ឆ្នាំនៃការកាន់អំណាច បុរសរដ្ឋមហាយក្សចិនរូបនេះតែងចាប់ដៃសមភាគីបរទេស ដោយងាកមុខចេញ ហើយញញឹមខ្ជឹបដាក់កាមេរ៉ា។
អ្នកសង្កេតការណ៍តាមមើលចរិតរបស់លោក ស៊ី ថាជាមេដឹកនាំចិនម្នាក់ស្លូតខាងក្រៅ តែមានបេះដូងកាចសាហាវ។ មន្ត្រីរបស់គាត់ណាដែលមិនស្អាតស្អំ មិនរណបគាត់ នឹងត្រូវខ្ទាត់ចេញពីបក្ស និងអស់បុណ្យស័ក្តិភ្លាមៗ។
នៅក្នុងសម័យប្រជុំបក្សកាលពីខែតុលា ឆ្នាំ២០២២ កម្មាភិបាលបក្សម្នាក់ជារៀមច្បងរបស់លោក គឺអតីតប្រធានាធិបតី ហូ ជិនតាវ ត្រូវបានកងសន្តិសុខចូលមកគ្រៀក ហើយនាំខ្លួនចេញពីសាលប្រជុំ។ ការគ្រៀកលោក ហូ ជិនតាវ ចេញពីសាលប្រជុំ គេឃើញលោក ហូ ជិនតាវ និងលោក ស៊ី អង្គុយជាប់គ្នា។ លោក ស៊ី ដែលមានអំណាចជាប្រធានាធិបតីដូចជាមិនបានឃាត់ ឬសួរនាំកងសន្តិសុខបន្តិចណានោះទេ ប៉ុន្តែលោក ស៊ី អាចប្រាប់លោក ហូ ជិនតាវ ថាកុំក្រាញអង្គុយក្នុងសាលប្រជុំនេះទៀត គឺត្រូវស្របខ្លួនតាមស្ថានភាពជាក់ស្ដែង។
ក្នុងស្ថានភាពនេះ មានតែលោក លី កែឈាង នាយករដ្ឋមន្ត្រីដែលសភាមិនបន្តអាណត្តិឱ្យលោក មើលទៅដូចជាស្រឡាំងកាំងបន្តិច ខណៈលោកអង្គុយនៅខាងឆ្វេងដៃជាប់នឹងលោក ស៊ី ហើយក្រៅពីនោះស្ថិតក្នុងភាពស្ងប់ស្ងាត់ ហើយម្នាក់ៗរឹងខ្លួនស្ដូក។
កងសន្តិសុខមិនត្រឹមតែទាញលោក តាវ ឱ្យដើរចេញពីកៅអីនោះទេ ក៏បានយកឯកសាររបស់លោក តាវ ទៅជាមួយផងដែរ។ ពេលនោះ លោក ជិនតាវ ដូចជាមិនអស់ចិត្ត ឬមិនយល់ ហើយក៏បាននិយាយបន្តិចទៅលោក ស៊ី ខណៈលោកងក់ក្បាល ដែលពេលនោះកងសន្តិសុខគ្រៀកលោក តាវ ចេញពីសាលប្រជុំ។
តាមការចុះផ្សាយជាច្រើនរបស់ប្រព័ន្ធផ្សព្វផ្សាយបស្ចិមប្រទេស ថាគេមិនទុកឱ្យលោក តាវ អង្គុយក្នុងសាលប្រជុំនេះទេ ព្រោះគេអាចគិតថា លោក តាវ នឹងឡើងជំទាស់លោក ស៊ី មិនឱ្យបន្តអាណត្តិទី៣ ជាប្រធានាធិបតីចិន ដែលលោក តាវ ធ្លាប់បានព្រលយពាក្យថា ជាការមិនល្អចំពោះគោលនយោបាយបក្ស ហើយវាធ្វើឱ្យមេដឹកនាំជំនាន់ក្រោយយកគំរូតាម។
ជាការពិត គឺជារឿងសាមញ្ញ វាគ្មានអ្វីចម្លែកនោះទេចំពោះប្រទេសចិន ដែលបក្សកុម្មុយនីស្តនៅក្រោមអគ្គលេខាបក្ស ដែលលោក ស៊ី កាន់តំណែងនេះ ហើយការពិតលោក ស៊ី បានតែងតាំងខ្លួនលោកជាប្រធានាធិបតីចិនអាណត្តិទី៣ នៅក្នុងសម័យប្រជុំបក្សកាលពីខែតុលា ឆ្នាំ២០២២ ហើយពេលនោះមានតែអតីតប្រធានាធិបតី ហូ ជិនតាវ ម្នាក់គត់ជំទាស់។ កិច្ចប្រជុំសភាប្រជាជនចិន កាលពីថ្ងៃសុក្រសប្ដាហ៍មុននេះ ពុំមានវត្តមានលោក តាវ នោះទេ។ មកដល់ពេលនេះ គេពុំដឹងថាលោក តាវ មានសុខទុក្ខយ៉ាងណានោះទេ។
ពុំមានអ្វីត្រូវភ្ញាក់ផ្អើលដល់មេដឹកនាំពិភពលោកទេ ដែលលោក ស៊ី ត្រូវបានសភាបក្សកុម្មុយនីស្តប្រថាប់ត្រាឱ្យកាន់តំណែង ៥ឆ្នាំទៀត។ ក្រុមមេដឹកនាំបស្ចិមប្រទេស និងមេដឹកនាំប្រទេសដែលប្រកាន់ប្រជាធិបតេយ្យត្រឹមត្រូវ ពុំឃើញបញ្ជូនសារអបអរសាទរលោក ស៊ី នោះទេ។
គេឃើញមានមេដឹកនាំតិចតួចនៃប្រទេសផ្ដាច់ការប៉ុណ្ណោះដែលបញ្ជូនសារអបអរសាទរលោក ស៊ី។ គេឃើញមានមេដឹកនាំផ្ដាច់ការនៅកូរ៉េខាងជើង គីម ជុងអ៊ុន ប្រធានាធិបតីរុស្ស៊ី វ៉្លាឌីមៀ ពូទីន ដែលកំពុងផុងខ្លួនក្នុងសង្គ្រាមអ៊ុយក្រែន ហើយក៏មានលោក ហ៊ុន សែន នាយករដ្ឋមន្ត្រីនៃរាជាណាចក្រកម្ពុជាផងដែរ។
តែទោះជាយ៉ាងនេះក្ដី លោក ហ៊ុន សែន មិនចង់កាន់អំណាចអស់មួយជីវិតនោះទេ ដែលខណៈនេះលោកកំពុងរិះរកពេលវេលាដើម្បីផ្ទេរតំណែងរបស់លោកទៅឱ្យកូនប្រុសចម្បង គឺលោកឧត្តមសេនីយ៍ ហ៊ុន ម៉ាណែត។
លោក ស៊ី ជីនពីង រះឡើងចំពេលចិនកំពុងមានអនុភាពខ្លាំងទាំងសេដ្ឋកិច្ច កងទ័ព និងការទូត។ អ្វីដែលលោក ស៊ី មិនទាន់សម្រេចក្នុងរយៈពេល ១០ឆ្នាំដែលលោកកាន់អំណាចជាប្រធានាធិបតីនៃប្រទេសមហាអំណាចមួយនេះ គឺការវាយលុកដើម្បីកាន់កាប់ដែនកោះតៃវ៉ាន់ ដែលក្រុងប៉េកាំង ចាត់ទុកថាជាខេត្តមួយរបស់ចិន។ ម្យ៉ាងទៀត ចិននៅមានឧត្តមភាពខ្សោយជាងអាមេរិក ទាំងសេដ្ឋកិច្ច កងទ័ព និងការទូតនៅលើពិភពលោក។
អ្នកសង្កេតការណ៍ខ្លះលើកឡើងថា ដើម្បីវាយយកកោះតៃវ៉ាន់បាន លុះត្រាតែធ្វើឱ្យអាមេរិកខ្លបខ្លាចកម្លាំងទ័ពរបស់ចិនជាមុនសិន។
ថ្លែងនៅចំពោះមុខសមាជិកសភាប្រជាជនចិន បន្ទាប់ពីលោកបានសម្រេចនូវការលើកខ្លួនឯងជាប្រធានាធិបតីមួយអាណត្តិទៀត លោក ស៊ី ថាប្រទេសចិនត្រូវការពង្រឹងសន្តិសុខដោយការអភិវឌ្ឍ ហើយត្រូវតែធ្វើទំនើបកម្មយោធារបស់ខ្លួនដើម្បីឱ្យក្លាយជាមហាកំផែងដែកថែប។
លោក ស៊ី ក៏បានអំពាវនាវឱ្យចិនបង្កើនសមត្ថភាពការពារសន្តិសុខជាតិ និងគ្រប់គ្រងសន្តិសុខសាធារណៈផ្ទៃក្នុងប្រទេសឱ្យបានរឹងមាំ។ លោកសង្កត់ធ្ងន់ថា៖ កត្តាសន្តិសុខជាមូលដ្ឋានគ្រឹះសម្រាប់ការអភិវឌ្ឍ ចំណែកស្ថិរភាព គឺជាតម្រូវការចម្បងសម្រាប់ភាពរីកចម្រើនរបស់ប្រទេសចិន។
នៅមុនសម័យប្រជុំសភាបោះឆ្នោតប្រថាប់ត្រាឱ្យលោកឡើងកាន់តំណែង ៥ឆ្នាំទៀត ឬអាចអស់មួយជីវិត លោក ស៊ី បានថ្លែងក្នុងវេទិកាមួយរបស់កងទ័ពរំដោះប្រជាជនចិន ដែលលោកថាកម្លាំងទ័ពចិនត្រូវតែខ្លាំង។ លោកព្រមានថា បើតៃវ៉ាន់មិនចូលខ្លួនមកនៅក្រោមដំបូលរបស់ក្រុងប៉េកាំង ទេ គឺចិនត្រូវតែលើកទ័ពវាយកាន់កាប់ដែនកោះនេះឱ្យបានពីក្រុមបំបែកប្រទេសនៅត្រឹមឆ្នាំ២០២៧ តែម្តង៕