ប្រមុខរាជរដ្ឋាភិបាលកម្ពុជា លោក ហ៊ុន សែន ប្រកាសលើកលែងកាតព្វកិច្ចពាក់ម៉ាស់ និងការធ្វើតេស្ដរហ័សរកមេរោគកូវីដ-១៩ សម្រាប់ការជួបជុំគ្រប់ប្រភេទទាំងអស់នៅទូទាំងប្រទេសចាប់ពីពេលនេះតទៅ ជាពិសេសការចូលរួមទស្សនាព្រឹត្តិការណ៍ស៊ីហ្គេមនាពេលខាងមុខនេះក៏មិនតម្រូវឱ្យពាក់ម៉ាស់ និងធ្វើតេស្ដរកជំងឺកូវីដ-១៩ ដែរ។
លោក ហ៊ុន សែន ចេញខ្សែអាត់សំឡេងនៅថ្ងៃទី១៩ មេសា នេះថា អ្នកដែលត្រូវចូលរួមក្នុងពិធីណាមួយ មិនតម្រូវឱ្យពាក់ម៉ាស់ទៀតទេ ប៉ុន្តែបុគ្គលម្នាក់ៗអាចពាក់ម៉ាស់តាមភាពចាំបាច់របស់ខ្លួន។ ជាងនេះទៀត ក៏មិនតម្រូវឱ្យធ្វើតេស្តរហ័សណាមួយទៀតដែរសម្រាប់ការជួបជុំនានា ប៉ុន្តែបុគ្គលម្នាក់ៗអាចធ្វើតេស្ដដោយខ្លួនឯងបាន បើមានលក្ខណៈសង្ស័យណាមួយនោះ។
លោក ហ៊ុន សែន លើកឡើងថា ការបន្ធូរបន្ថយកាតព្វកិច្ចនេះ គឺជាការកាត់បន្ថយនូវការចំណាយមួយផ្នែកលើសម្ភារៈសម្រាប់ការពារជំងឺកូវីដ-១៩ ជាពិសេសការចំណាយទៅលើម៉ាស់ និងឧបករណ៍តេស្ដរហ័សពេលចូលរួមពិធីធំៗម្តងៗ ដូចជាពិធីចែកសញ្ញាបត្រដែលលោកនឹងចូលរួមនៅថ្ងៃស្អែកនេះជាដើម។
លោក ហ៊ុន សែន បញ្ជាក់ថា ប្រសិនបើនៅតែបន្តវិធានការពាក់ម៉ាស់ និងធ្វើតេស្ដរហ័សទៀតនោះ នឹងបង្កការលំបាកដល់ក្រុមគ្រូពេទ្យ និងពលរដ្ឋដែលត្រូវចូលរួមទស្សនាព្រឹត្តិការណ៍ស៊ីហ្គេមខាងមុខនេះជាមិនខាន ដូច្នេះការប្រកាសបញ្ចប់កាតព្វកិច្ចមួយចំនួនសម្រាប់ការពារជំងឺកូវីដ-១៩ នៅពេលនេះ ក៏ជាកាដូជូនពលរដ្ឋសម្រាប់ឆ្នាំថ្មីនេះផងដែរ។
ការអះអាងនេះ ធ្វើឡើងបន្ទាប់ពីការឆ្លងថ្មីនៃជំងឺកូវីដ-១៩ ក្នុងរយៈពេលចុងក្រោយនេះកាន់តែតិចទៅៗ ហើយភាគច្រើនគឺមិនមានអ្នកឆ្លងតែម្តង។
ចាប់តាំងពីដើមខែមករា ឆ្នាំ២០២៣ មក ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ តិចតួចបំផុត ទាំងការឆ្លងក្នុងប្រទេស និងការចម្លងមកពីក្រៅប្រទេស ក្នុងនោះថ្ងៃខ្លះរកឃើញត្រឹមតែ ១ករណីទៅ ២ករណីប៉ុណ្ណោះ ប៉ុន្តែភាគច្រើន គឺមិនមានអ្នកឆ្លងថ្មីនោះទេ។
យ៉ាងណាក៏ដោយ ភ្នាក់ងារសារព័ត៌មាន AFP បានចុះផ្សាយកាលពីថ្ងៃអង្គារ ថា អង្គការសុខភាពពិភពលោក (WHO) បានព្រមានថា ជំងឺកូវីដ-១៩ កំពុងស្ថិតនៅក្នុងស្ថានភាពមិនអាចព្យាករបាននៅឡើយ ដែលអាចបង្កជាគ្រោះថ្នាក់គ្រប់ពេលវេលា។
នាយកទទួលបន្ទុកស្ថានការណ៍អាសន្នរបស់ WHO លោក Michael Ryan បានគូសបញ្ជាក់ក្នុងសន្និសីទសារព័ត៌មានមួយកាលពីពេលថ្មីៗនេះថា ពិតមែនមានការថយចុះនៃជំងឺកូវីដ-១៩ មែន ប៉ុន្តែនៅតែមានមនុស្សជាច្រើនបានស្លាប់ និងធ្លាក់ខ្លួនឈឺ ហើយជំងឺនេះបានប្រែពីជំងឺឆ្លងរាតត្បាតសកល ក្លាយជាមេរោគឆ្លងក្នុងតំបន់វិញ ហើយវានឹងមិនរលាយបាត់ទៅណានោះទេ ប៉ុន្តែវាអាចក្លាយជាជំងឺផ្ដាសាយមួយដូចគ្នាទៅនឹងជំងឺផ្ដាសាយ «influenza» ដែរ ដែលអាចនឹងបង្កគ្រោះថ្នាក់ដល់អ្នកដែលមានសុខភាពទន់ខ្សោយ។
គេហទំព័រតាមដានការរីករាលដាលជំងឺកូវីដ-១៩ លើពិភពលោក WORLDOMETER អះអាងថា គិតត្រឹមថ្ងៃទី១៨ ខែមេសា ឆ្នាំ២០២៣ នេះ កម្ពុជាមានអ្នកឆ្លងជាង ១សែន ៣ម៉ឺននាក់ និងអ្នកស្លាប់ចំនួនជាង ៣ពាន់នាក់ ខណៈវៀតណាមនៅតែជាប្រទេសមានចំនួនអ្នកឆ្លងច្រើនជាងគេក្នុងចំណោមប្រទេសក្នុងតំបន់អាស៊ាន បន្ទាប់មកគឺប្រទេសឥណ្ឌូនេស៊ី និងប្រទេសម៉ាទ្បេស៊ី ផងដែរ៕