ក្រសួងសុខាភិបាលប្រទេសចិន ចាប់ផ្ដើមទទួលស្គាល់នូវភាពកម្សោយរបស់ខ្លួនចំពោះការទប់ស្កាត់មិនបានសម្រេចនូវការរីករាលដាលការឆ្លងជំងឺកូវីដ-១៩។
បើតាមការចុះផ្សាយរបស់បណ្ដាញផ្សាយព័ត៌មាន Bloomberg ឲ្យដឹងថា ៨០ភាគរយនៃចំនួនប្រជាជនចិន ១៤១០លាននាក់ បានឆ្លងជំងឺនេះនៅទូទាំងប្រទេស ហើយតួលេខនេះគឺជាការបញ្ជាក់របស់អ្នកជំនាញចិន Wu Zunyou ដែលជាប្រធាននៃមជ្ឈមណ្ឌលជាតិចិនគ្រប់គ្រង និងបង្ការជំងឺឆ្លង។ តែលោកបញ្ជាក់ថា ទោះជាបែបនេះក្ដី ពលរដ្ឋចិនបានធន់នឹងជំងឺនេះហើយ។ ដូចនេះ វាមិនសូវជាធ្ងន់ធ្ងរពេកនោះទេ។
ការបញ្ជាក់របស់អ្នកជំនាញនេះ ទំនងឆ្លើយតបទៅអង្គការសុខភាពពិភពលោកដែលបារម្ភខ្លាំងថា រដូវចូលឆ្នាំចិននៅរដូវត្រជាក់នេះ នឹងនាំឲ្យមេរោគផ្លូវដង្ហើមស្ទុះឆ្លងរីករាលដាលខ្លាំងនៅក្នុងប្រទេសចិន។
ក្រសួងសុខាភិបាលចិន បានរាយការណ៍ឱ្យដឹងថា មនុស្សជិត ១ម៉ឺន ៣ពាន់នាក់បានស្លាប់ដោយសារជំងឺកូវីដ-១៩ នៅក្នុងមន្ទីរពេទ្យចន្លោះពីថ្ងៃទី១៣ ដល់ថ្ងៃទី១៩ ខែមករា នេះ បន្ទាប់ពីអ្នកជំនាញសុខភាពចិន Wu Zunyou បានទទួលស្គាល់ថាប្រជាជនចិនភាគច្រើនបានឆ្លងជំងឺនេះ។
នៅក្នុងសេចក្ដីថ្លែងការណ៍របស់ខ្លួនចេញផ្សាយកាលពីថ្ងៃសៅរ៍ចុងសប្ដាហ៍នេះ មជ្ឈមណ្ឌលគ្រប់គ្រង និងបង្ការជំងឺឆ្លងនៃប្រទេសចិន បានឱ្យដឹងថា អ្នកជំងឺសម្រាកព្យាបាលនៅមន្ទីរពេទ្យ ៦៨១នាក់បានស្លាប់ដោយសារមានបញ្ហាផ្លូវដង្ហើមធ្ងន់ធ្ងរ ដែលបង្កឡើងដោយកូវីដ-១៩ និង ១១៩៧៧នាក់បានស្លាប់ដោយសារជំងឺដទៃទៀតពាក់ព័ន្ធនឹងការឆ្លងកូវីដ-១៩។
តែជាមួយគ្នានេះ មជ្ឈមណ្ឌលនេះបានបញ្ជាក់ថា តួលេខនេះមិនបានរាប់បញ្ចូលអ្នកដែលស្លាប់ដោយសារកូវីដ-១៩ នៅតាមផ្ទះនោះទេ។ លើសពីនេះទៅទៀត ការប្រកាសតួលេខអ្នកស្លាប់នេះទៀតកើតមានឡើងក្រោយប្រធានមជ្ឈមណ្ឌលគ្រប់គ្រង និងបង្ការជំងឺឆ្លង លោក Wu Zunyou បាននិយាយថា ៨០ភាគរយនៃប្រជាជនចិនបានឆ្លងកូវីដ-១៩។
តែកាលពីរវាងថ្ងៃទី៨ ដល់ថ្ងៃទី១២ មករា មជ្ឈមណ្ឌលដដែលនេះបានឱ្យដឹងថា អ្នកជំងឺស្លាប់ដោយសារកូវីដមានជិត ៦ម៉ឺននាក់។
បើតាមតួលេខថ្មីនេះ គឺអ្នកស្លាប់មានការថយចុះ តែអ្នកឆ្លងមានការហក់ឡើងខ្លាំង។ តែបែបនេះក្ដី ប្រទេសចិននៅតែអះអាងថា មនុស្សស្លាប់ដោយសារជំងឺកូវីដ-១៩ រយៈពេលជាង ១ខែនេះ គឺស្លាប់មនុស្ស ៦ម៉ឺននាក់ប៉ុណ្ណោះ។ តែតួលេខនេះត្រូវបានអ្នកជំនាញផ្សេងទៀតនៅមិនទាន់ជឿទុកចិត្ត ហើយគិតថាចំនួនមនុស្សស្លាប់នៅចិនព្រោះតែជំងឺកូវីដច្បាស់ជាច្រើនជាងតួលេខនេះឆ្ងាយណាស់។ ម្យ៉ាងទៀត មានការសង្ស័យថា រដ្ឋអំណាចចិន មិនបានស្រង់ចំនួនអ្នកស្លាប់នៅតាមផ្ទះនោះទេ។
នៅមុនចូលឆ្នាំចិន ប្រធានាធិបតី ស៊ី ជីនពីង បានអំពាវនាវឱ្យពលរដ្ឋចិនមានការប្រុងប្រយ័ត្នចំពោះការរីករាលដាលនៃជំងឺនេះ។ លោកថា លោកមានការបារម្ភអំពីការឆ្លងលឿននៅតាមជនបទ។ តែយ៉ាងណា លោកមិនបានចេញបម្រាមក្នុងការជួបជុំក្នុងពិធីបុណ្យចូលឆ្នាំនោះទេ។
ក្នុងឱកាសបុណ្យចូលឆ្នាំចិន ឆ្នាំ២០២៣ នេះ គេសង្កេតឃើញប្រជាជនចិនសប្បាយរីករាយនឹងការដើរហើរពីខេត្តមួយទៅខេត្តមួយ ពីទីក្រុងទៅជនបទ ព្រោះតែជាឱកាសត្រឡប់ទៅលេងស្រុកកំណើត ស្រុកដូនតារបស់ពួកគេ ដើម្បីជួបជុំគ្នា។
បុណ្យចូលឆ្នាំថ្មីនៅឆ្នាំនេះ ពលរដ្ឋចិនខកខានមិនបានប្រារព្ធអស់ពេល ៣ឆ្នាំទៅហើយតាំងពីឆ្នាំ២០២០ មក ព្រោះតែប្រទេសនេះផ្ទុះជំងឺឆ្លងនេះដែលនាំឱ្យរដ្ឋអំណាចចិនបិទប្រទេស បិទខ្ទប់ចរាចរណ៍ និងពង្រឹងវិធានការតឹងរ៉ឹង ដោយការអនុវត្តនយោបាយកូវីដសូន្យ ដែលលោក ស៊ី បានទម្លាក់ឱ្យអនុវត្ត។ យ៉ាងណា វិធានការនេះទើបតែត្រូវបើកឡើងវិញក្រោយពីពលរដ្ឋចិនរាប់ម៉ឺននាក់ធ្វើបាតុកម្មតវ៉ាប្រឆាំង ហើយរដ្ឋអំណាចចិនក៏សម្រេចលុបចោលទៅវិញនៅចុងឆ្នាំ២០២២។
បែបនេះក្ដី អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បានរិះគន់ថា ប្រទេសចិនកំពុងប្រឈមនឹងការឆ្លងយ៉ាងខ្លាំងនាពេលបច្ចុប្បន្ននេះ ដែលលោកទទូចថា ចិនត្រូវរកមធ្យោបាយជួយទប់ស្កាត់ឱ្យបានជោគជ័យ។
សម្រាប់អ្នកជំនាញម្នាក់មកពីសាកលវិទ្យាល័យប៉េកាំង លោក Michael Pettis សរសេរនៅលើ Twitter របស់លោកថា ទាំងប្រជាជន ទាំងរដ្ឋាភិបាល និងអ្នកជំនាញចិន គិតថាចិនពិតជាទប់ស្កាត់បាននូវជំងឺឆ្លងផ្លូវដង្ហើមនេះ តែវាជារឿងធ្វេសប្រហែសទៅវិញទេ។
លោកបន្តថា នៅពេលនេះប្រព័ន្ធសុខាភិបាលសាធារណៈចិនដូចដើរចូលក្នុងអន្ទាក់នៃជំងឺនេះហើយ។ ឥឡូវនេះ វាផ្ទុះសឹងតែពាសពេញប្រទេសទៅហើយ ដែលមន្ទីរពេទ្យតាមទីក្រុង និងបណ្ដាខេត្តរកគ្រែសម្រាប់អ្នកជំងឺសឹងតែលែងបានទៅហើយ។
ក្រុមអ្នកជំនាញខាងជំងឺឆ្លងនៃក្រុមបស្ចិមប្រទេស ព្រមានថា ពលរដ្ឋចិនអាចស្លាប់ដល់ទៅជាង ២លាននាក់នៅអំឡុងឆ្នាំ២០២៣ នេះ បើការឆ្លងកាន់តែមានអត្រាខ្ពស់ដូចនេះ៕