បុរសខ្លាំងរំលោភអំណាចផ្ដាច់មុខនៅកម្ពុជាលោក ហ៊ុន សែន កំពុងគំរាមមន្ត្រីផ្ទៃក្នុង និងក្រុមឧកញ៉ាឱ្យឈប់ប្រើបណ្ដាញសង្គមហ្វេសប៊ុក ព្រមទាំងគំរាមបិទតំណាងក្រុមហ៊ុនហ្វេសប៊ុកទាំងស្រុងនៅក្នុងប្រទេសកម្ពុជា ដើម្បីផ្តាច់ទំនាក់ទំនងពីក្រុមប្រឆាំងជាមួយនឹងប្រជាពលរដ្ឋនៅក្នុងស្រុក។
ប្រភពផ្ទៃក្នុងគណបក្សប្រជាជនកម្ពុជាដែលគួរឱ្យទុកចិត្តបាន ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៣០ មិថុនា នេះថា មន្ត្រីរាជរដ្ឋាភិបាលជាន់ខ្ពស់ដែលរងនូវការគំរាមពីលោក ហ៊ុន សែន ឱ្យឈប់ប្រើបណ្ដាញសង្គមហ្វេសប៊ុក កំពុងខ្វែងគំនិតគ្នាយ៉ាងខ្លាំង ក្នុងនោះមានការលើកឡើងថា ការបោះបង់លែងប្រើបណ្ដាញសង្គមហ្វេសប៊ុកនឹងធ្វើឱ្យគណបក្សប្រជាជនកម្ពុជាខាតបង់យ៉ាងធំធេង ជាពិសេសក្នុងយុទ្ធនាការបោះឆ្នោតដែលនឹងត្រូវធ្វើឡើងនៅខែកក្កដា ឆ្នាំ២០២៣ ខាងមុខនេះ។
ប្រភពដដែលលើកឡើងថា ក្រៅពីព្រួយបារម្ភចំពោះសកម្មភាពនានាដែលត្រូវបញ្ឈប់ផ្សព្វផ្សាយលើបណ្ដាញសង្គមហ្វេសប៊ុក ពួកគេក៏ព្រួយបារម្ភពីមុខជំនួញតាមអនឡាញធំៗជាច្រើនរបស់ពួកគេដែលកំពុងតែពឹងពាក់លើបណ្ដាញសង្គមហ្វេសប៊ុកផងដែរ ស្របពេលដែលទំព័រហ្វេសប៊ុក (Page) និងគណនីហ្វេសប៊ុក (Account) របស់ពួកគេមិនបានរងនូវការពិន័យពីក្រុមហ៊ុនមេតាហ្វេសប៊ុកផងនោះ។
ប្រភពផ្ទៃក្នុងខាងលើបញ្ជាក់ថា មានមន្ត្រីខ្លះលើកឡើងបែបមិនពេញចិត្តថា បើក្រុមហ៊ុនមេតាហ្វេសប៊ុកបិទទំព័រហ្វេសប៊ុកផ្លូវការរបស់នាយករដ្ឋមន្ត្រី គួរតែបង្កើតទំព័រហ្វេសប៊ុកថ្មីដើម្បីបន្តការផ្សព្វផ្សាយសកម្មភាពដូចពេលកន្លងមក គឺបានហើយ ដើម្បីកុំឱ្យអាក់ខានការផ្សព្វផ្សាយដែលខ្លួនធ្លាប់ធ្វើកន្លងមក និងដើម្បីរង់ចាំទំព័រហ្វេសប៊ុកផ្លូវការត្រឡប់មកវិញផងដែរ ដូច្នេះមិនចាំបាច់ដល់ថ្នាក់បញ្ជាឱ្យពួកគេលែងប្រើបណ្ដាញសង្គមហ្វេសប៊ុកនោះទេ ព្រោះថាធ្វើបែបនេះ គឺមានតែខាតជាន់លើខាតប៉ុណ្ណោះ។
នៅថ្ងៃទី៣០ ខែមិថុនា ឆ្នាំ២០២៣ នេះ ក្នុងពិធីជួបជាមួយកម្មករនៅខេត្តពោធិ៍សាត់ លោក ហ៊ុន សែន ព្រមានបិទក្រុមហ៊ុនមេតាហ្វេសប៊ុកលែងឱ្យដំណើរការនៅក្នុងប្រទេសកម្ពុជាតែម្តង ដើម្បីផ្តាច់ទំនាក់ទំនងក្រុមប្រឆាំងជាមួយប្រជាពលរដ្ឋនៅក្នុងស្រុក ប្រសិនបើក្រុមប្រឆាំងទាំងនោះនៅតែបន្តផ្គើនឱ្យរូបលោកកាន់តែខ្លាំងជុំវិញការបិទទំព័រហ្វេសប៊ុកផ្លូវការរបស់លោកនៅពេលនេះ។
កាលពីថ្ងៃទី២៨ ខែមិថុនា ឆ្នាំ២០២៣ ប្រមុខរដ្ឋាភិបាលកម្ពុជា លោក ហ៊ុន សែន បានបញ្ចេញសារសំឡេងតាមប្រព័ន្ធទំនាក់ទំនងតេឡេក្រាមផង និងក្នុងពិធីជួបជាមួយកម្មករផងថា ការប្រកាសផ្អាកផ្តល់ព័ត៌មាននានាតាមរយៈទំព័រហ្វេសប៊ុករបស់លោក ដោយសារតែលោកមើលឃើញថា ការប្រើប្រាស់បណ្ដាញទំនាក់ទំនងសង្គមតេឡេក្រាម (telegram) មានប្រសិទ្ធភាពខ្ពស់ជាង ប៉ុន្តែការពិត គឺដោយសារក្រុមហ៊ុនមេតាហ្វេសប៊ុកបានប្រកាសបិទទំព័រហ្វេសប៊ុកផ្លូវការរបស់លោកលែងឱ្យដំណើរការប៉ុណ្ណោះ។
បន្ទាប់ពីមេដឹកនាំខ្មែរឧស្សាហ៍គំរាមសម្លាប់ គឺលោក ហ៊ុន សែន ប្រកាសឈប់ប្រើបណ្ដាញសង្គមហ្វេសប៊ុក ស្រាប់តែឧកញ៉ា ឡេង ណាវ៉ាត្រា ដែលគេស្គាល់ថាជាឧកញ៉ាជួយលាងលុយកខ្វក់ និងជាឧកញ៉ាលើកបន្តុបសម្រាប់ធ្វើជំនួញឱ្យត្រកូលហ៊ុន ក៏ប្រកាសឈប់ប្រើបណ្ដាញសង្គមហ្វេសប៊ុកនៅថ្ងៃនេះដែរ ដែលគេមើលឃើញថាទំនងជាពួកគេមានផែនការផ្ចាញ់ផ្ចាលទៅកាន់ក្រុមហ៊ុនមេតាហ្វេសប៊ុកវិញ បន្ទាប់ពីក្រុមហ៊ុនយក្សមួយនេះបិទទំព័រហ្វេសប៊ុកផ្លូវការរបស់លោក ហ៊ុន សែន។
កាលពីថ្ងៃទី២៩ ខែមិថុនា ឆ្នាំ២០២៣ ក្រុមប្រឹក្សាភិបាលក្រុមហ៊ុនមេតាហ្វេសប៊ុកបានអំពាវនាវឲ្យព្យួរគណនីហ្វេសប៊ុកផ្លូវការរបស់នាយករដ្ឋមន្ត្រីកម្ពុជា លោក ហ៊ុន សែន រយៈពេល ៦ខែ ដោយអះអាងថា វីដេអូមួយដែលបានបង្ហោះតាមទំព័រហ្វេសប៊ុករបស់លោកបានរំលោភវិធានរបស់ក្រុមហ៊ុនមេតាហ្វេសប៊ុកធ្ងន់ធ្ងរ ជុំវិញការគំរាមកំហែងដោយហិង្សា។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៩ មិថុនា ថា ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ត្រូវបានបិទបែបនេះបង្ហាញថា ក្រុមហ៊ុន Meta Facebook ក្លាយជាសាក្សីដ៏សំខាន់មួយក្នុងរឿងឧក្រិដ្ឋកម្មរបស់លោក ហ៊ុន សែន ប្រសិនបើលោក ហ៊ុន សែន ត្រូវតុលាការអន្តរជាតិកាត់ទោសលើសំណុំរឿងឧក្រិដ្ឋកម្មរបស់គាត់នៅថ្ងៃណាមួយនោះ។
លោក គឹម សុខ បញ្ជាក់ថា ក្នុងដំណាក់កាលនេះ ប្រសិនបើលោក ហ៊ុន សែន បិទបណ្ដាញសង្គមហ្វេសប៊ុកឱ្យលែងដំណើរនៅប្រទេសកម្ពុជា ក៏មិនចំណេញដល់លោក ហ៊ុន សែន ដែរ ព្រោះប្រជាពលរដ្ឋនៅមានវិធីច្រើនណាស់សម្រាប់ប្រើប្រាស់បណ្ដាញសង្គមហ្វេសប៊ុកតាមរយៈកម្មវិធីមួយចំនួនផ្សេងទៀត។
ចំណែកអ្នកតាមដានស្ថានការណ៍នយោបាយកម្ពុជា បណ្ឌិត គង់ សេងលី ប្រាប់សារព័ត៌មាន The Cambodia Daily នៅថ្ងៃទី៣០ មិថុនា នេះថា ប្រសិនបើលោកនាយករដ្ឋមន្ត្រី ហ៊ុន សែន សម្រេចបិទលែងឱ្យក្រុមហ៊ុនហ្វេសប៊ុកដំណើរការនៅកម្ពុជា នោះគឺបង្ហាញកាន់តែច្បាស់ពីការរឹតត្បិតសេរីភាពបញ្ចេញមតិកាន់តែខ្លាំង បន្ទាប់ពីគាត់បានបោសសម្អាតសារព័ត៌មានឯករាជ្យជាបន្តបន្ទាប់ក្នុងរយៈពេលកន្លងមកនោះ៕