27 C
Phnom Penh

លោក ហ៊ុន សែន អាច​កំពុង​ប្រើប្រាស់​គណនី​ហ្វេសប៊ុក​ក្លែងក្លាយ​ឈ្មោះ​ថា កុមារ​ទេព

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​លោក ហ៊ុន សែន ទំនង​អាច​កំពុង​លួច​ប្រើប្រាស់​គណនី​ហ្វេសប៊ុក​ក្លែងក្លាយ​មួយ​ដែល​មាន​ឈ្មោះ​ថា «កុមារ​ទេព» ឬ​គណនី​ហ្វេសប៊ុក​នេះ​អាច​ជា​របស់​សមាជិក​ណា​មួយ​នៃ​គ្រួសារ​របស់​លោក។

គណនី​ហ្វេសប៊ុក​ដែល​មាន​ឈ្មោះ​ថា «កុមារ​ទេព» ដែល​គេ​សង្ស័យ​ថា​ជា​ហ្វេសប៊ុក​ផ្ទាល់ខ្លួន​របស់​លោក ហ៊ុន សែន នៅ​ថ្ងៃទី​៧ កក្កដា នេះ បាន​បង្ហោះ​សារ​ជេរប្រមាថ​ទៅ​សកម្មជន​បក្ស​ប្រឆាំង​លោក ស៊ន តារា ដែល​បាន​លើកឡើង​បែប​ចំអក​ទៅ​កាន់​មេដឹកនាំ​បក្ស​កាន់​អំណាច លោក ហ៊ុន សែន ទាក់ទិន​នឹង​ទំព័រ​ហ្វេសប៊ុក​ផ្លូវការ​របស់​គាត់​ត្រូវ​បាន​ក្រុមហ៊ុន​មេតា​ហ្វេសប៊ុក​ប្រកាស​ព្យួរ​កាលពី​ចុងខែ​មិថុនា កន្លងទៅ​នេះ។

ម្ចាស់​គណនី​ហ្វេសប៊ុក​ឈ្មោះ «កុមារ​ទេព» បាន​យក​សំណេរ​របស់​លោក ស៊ន តារា មក​បង្ហោះ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃទី​៧ កក្កដា នេះ ដែល​លោក ស៊ន តារា បាន​សរសេរ​ថា «អបអរ​សាទរ! ទៅ​សោយរាជ្យ​នៅ​ឋាន​តេឡេក្រាម និង​តិកតុក​ឲ្យ​ស្រឡះ​ចុះ កុំ​អើត​មុខ​មក​ហ្វេសប៊ុក​ទៀត នាំ​តែ​ក្មេង​យំ» ក្នុង​នោះ​ម្ចាស់​គណនី​ហ្វេសប៊ុក​ឈ្មោះ «កុមារ​ទេព» បាន​ភ្ជាប់​នឹង​សំណេរ​របស់​ខ្លួន​នៅ​ខាងលើ​ថា «កុំ​យល់​ច្រឡំ​ឱ្យ​សោះ អា​ក្មេង​ពាល! ហ៊ុន សែន ប្រើ​ត្រឹមតែ​តេឡេក្រាម និង​តិកតុក ក៏​មាន​ការ​គាំទ្រ​ច្រើន​លើសលប់​ដែរ។»

ម្ចាស់​គណនី​ហ្វេសប៊ុក «កុមារ​ទេព» សរសេរ​បន្ថែម​ថា «ចំពោះ​ការ​គាំទ្រ មិន​ថា​ហ្វេសប៊ុក មិន​ថា​តេឡេក្រាម ឬ​តិកតុក​ទេ គឺ​មាន​អ្នកគាំទ្រ​ច្រើន​សន្ធឹកសន្ធាប់​រហូត ជាពិសេស​បណ្ដាញ​សង្គម​មួយ​ណា​ក៏ ហ៊ុន សែន ប្រើប្រាស់​សម្រាប់​ដោះស្រាយ​បញ្ហា​គ្រប់​បែប​យ៉ាង​របស់​ពលរដ្ឋ និង​ប្រើប្រាស់​ដើម្បី​ផ្ដល់​ព័ត៌មាន​ច្បាស់លាស់ ពិតប្រាកដ​ជូន​ពលរដ្ឋ​ឲ្យ​បាន​ដឹង​ដែរ មិនមែន​ប្រើប្រាស់​ដើម្បី​ប្រមូល​លុយ​រត់​ចោល​ស្រុក​ដូច​សន្ដាន​ពួក​ឯង​នោះ​ទេ។»

ម្ចាស់​គណនី​ហ្វេសប៊ុក «កុមារ​ទេព» បញ្ជាក់​ថា ការ​ប្រកាស​ឈប់​ប្រើប្រាស់​បណ្ដាញ​សង្គម​ហ្វេសប៊ុក​ផ្លូវការ​របស់​សម្ដេច​តេជោ​នាយករដ្ឋមន្ត្រី នោះ​គឺ​ក្នុង​ស្មារតី​ប្រកាន់​ភ្ជាប់​នូវ​គោលការណ៍​អធិបតេយ្យភាព​របស់​កម្ពុជា និង​ទប់ស្កាត់​ការ​ជ្រៀតជ្រែក​ចូល​កិច្ច​ការងារ​ផ្ទៃក្នុង​របស់​កម្ពុជា​ទៅវិញ​ប៉ុណ្ណោះ។

គណនី​ហ្វេសប៊ុក​ឈ្មោះ កុមារ ទេព ដែល​គេ​សង្ស័យ​ថា​ជា​គណនី​ក្លែងក្លាយ​របស់​លោក​នាយករដ្ឋមន្ត្រី ហ៊ុន សែន។ (Screenshot)

ម្ចាស់​គណនី​ឈ្មោះ «កុមារ​ទេព» នេះ បាន​ហៅ​ឈ្មោះ​លោក ហ៊ុន សែន ត្រង់​តែម្តង​ដោយ​គ្មាន​ប្រើ​ពាក្យ​លោក គោរមងារ​ណា​មួយ​នោះ​ទេ ដែល​ការ​ហៅ​បែប​នេះ លុះត្រាតែ​ម្ចាស់​ឈ្មោះ​កំពុង​និយាយ​ទៅ​កាន់​បុគ្គល​ណា​ម្នាក់​ដោយ​ខ្លួនឯង​ផ្ទាល់​តែប៉ុណ្ណោះ។ ជាង​នេះ​ទៀត ទាំង​ក្នុង​ក្រុម​គ្រួសារ និង​មន្ត្រី​បក្ស​កាន់​អំណាច គ្មាន​នរណា​ម្នាក់​ហ៊ាន​ហៅ​លោក ហ៊ុន សែន ចំ​ឈ្មោះ​ថា ហ៊ុន សែន នោះ​ឡើយ។ ត្រង់​នេះ​ហើយ​ដែល​គេ​អាច​សម្គាល់​បាន​ថា ម្ចាស់​គណនី​ហ្វេសប៊ុក​ឈ្មោះ «កុមារ​ទេព» នេះ អាច​ជា​របស់​លោក ហ៊ុន សែន ឬ​អាច​ជា​របស់​សមាជិក​ណា​ម្នាក់​នៃ​គ្រួសារ​របស់​លោក​ដែល​លោក​ទុកចិត្ត​យក​មក​ប្រើប្រាស់។

ក្រៅពី​ការ​កត់សម្គាល់​បែប​នេះ ក៏​នៅ​មាន​ភស្តុតាង​ផ្សេង​ទៀត​ដែរ​ដែល​អាច​បញ្ជាក់​ថា គណនី​ហ្វេសប៊ុក​ឈ្មោះ «កុមារ​ទេព» នេះ​ជា​របស់​លោក ហ៊ុន សែន ឬ​ជា​របស់​អ្នក​ដែល​មាន​ភាព​ស្និទ្ធស្នាល​បំផុត​ក្នុង​គ្រួសារ​របស់​លោក គឺ​នៅ​ត្រង់​ចំណុច​ដែល​មាន​ការ​ថត​វីដេអូ​ជា​លក្ខណៈ​គ្រួសារ​ក្នុង​ផ្ទះ​របស់​លោក បង្ហោះ​ក្នុង​គណនី​នេះ​ជា​ញឹកញាប់។ ជាក់ស្តែង មាន​វីដេអូ​ខ្លះ​មាន​ឃើញ​លោក ហ៊ុន សែន ពរ​ចៅ។ វីដេអូ​ខ្លះ​មាន​ឃើញ​អ្នកស្រី ប៊ុន រ៉ានី ត្រូវ​កូន ឬ​ចៅ​បញ្ចុក​នំ​ខេក ហើយ​វីដេអូ​ខ្លះ​មាន​ឃើញ​លោក ហ៊ុន សែន សម្រាក​នៅ​លើ​គ្រែ​ប្រឡែង​លេង​ជាមួយ​ចៅ​របស់​គាត់ ជាដើម ដែល​សកម្មភាព​បែប​នេះ​គ្មាន​នរណា​ម្នាក់​មាន​សិទ្ធិ​ថត​ដើម្បី​យក​មក​បង្ហោះ​ជា​សាធារណៈ​ឡើយ លើកលែងតែ​សាមី​ខ្លួន។

គណនី​ហ្វេសប៊ុក «កុមារ​ទេព» ដែល​តាំង​រូប​នាគ​លើ​ប្រូហ្វាល់ (Profile) ធ្វើ​ជា​រូប​តំណាង ហើយ​ក៏​ជា​រូប​ដែល​លោក ហ៊ុន សែន ស្រឡាញ់​ពេញចិត្ត និង​ជា​រូបតំណាង​ឆ្នាំ​របស់​លោក ហ៊ុន សែន ផង​នោះ បាន​ជេរប្រមាថ​ទៅ​លើ​អ្នក​លេង​បណ្ដាញ​សង្គម​ហ្វេសប៊ុក​ជាច្រើន​នាក់​ផ្សេង​ទៀត ដូច​ដែល​លោក ហ៊ុន សែន ធ្លាប់​ជេរប្រមាថ​អ្នក​ដទៃ​កន្លងមក ដែល​ហ៊ាន​រិះគន់​គណបក្ស​ប្រជាជន​កម្ពុជា ឬ​ហ៊ាន​រិះគន់​លោក ហ៊ុន សែន ដូច្នោះ​ដែរ។

ទាក់ទិន​នឹង​បញ្ហា​នេះ ក្រុម​អ្នកវិភាគ​លើកឡើង​ថា មេដឹកនាំ​បក្ស​កាន់​អំណាច​លោក ហ៊ុន សែន ជា​មនុស្ស​ដែល​ញៀន​នឹង​ហ្វេសប៊ុក​ខ្លាំង​ណាស់ ព្រោះ​បណ្ដាញ​សង្គម​មួយ​នេះ​បាន​ជួយ​ឱ្យ​គណបក្ស​ប្រជាជន​កម្ពុជា​ផ្សព្វផ្សាយ​សកម្មភាព​របស់​ខ្លួន​បាន​យ៉ាង​ច្រើន ប៉ុន្តែ​ការ​សម្រេច​លុប​ទំព័រ​ហ្វេសប៊ុក​ខ្លួនឯង គឺ​ដោយសារតែ​គាត់​ខឹង​នឹង​ក្រុមហ៊ុន​ហ្វេសប៊ុក​ដែល​ព្យួរ​គណនី​របស់​គាត់​ផង និង​ដោយសារតែ​គាត់​មិន​យល់​អំពី​គោលការណ៍​សកល​របស់​ក្រុមហ៊ុន​ហ្វេសប៊ុក​ផង​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស