40.6 C
Phnom Penh

លោក ហ៊ុន ម៉ានី ហៅ​ការ​ផ្ទេរ​តំណែង​នាយករដ្ឋមន្ត្រី​ពី​ឪពុក​ទៅ​កូន​ថា​ជា​ការ​លះបង់​ដ៏​ធំធេង

ដោយ ឌឹ ខេមបូឌា ដេលី

បទវិភាគ

កូនប្រុស​ពៅ​របស់​លោក ហ៊ុន សែន គឺ​លោក ហ៊ុន ម៉ានី ហៅ​ការ​លាលែង​ពី​តំណែង​នាយករដ្ឋមន្ត្រី​ដោយ​ផ្ទេរ​ទៅ​ឲ្យ​លោក ហ៊ុន ម៉ាណែត ដែល​ជា​កូនប្រុស​ច្បង​នោះ ថា​ជា​ការ​លះបង់​ដ៏​ធំធេង បើ​ទោះបីជា​ពលរដ្ឋ​ខ្មែរ ឬ​បរទេស​មួយ​ចំនួន​មិន​យល់ស្រប​ចំពោះ​ការ​ផ្ទេរ​តំណែង​របស់​ឪពុក​ខ្លួន​ក៏ដោយ។

ការ​លើកឡើង​របស់​ប្រធាន​សហភាព​សហព័ន្ធ​យុវជន​កម្ពុជា​លោក ហ៊ុន ម៉ានី នៅ​ពេលនេះ ធ្វើឡើង​បន្ទាប់ពី​មេដឹកនាំ សកម្មជន​បក្ស​ប្រឆាំង និង​អ្នក​ឃ្លាំមើល​សង្គម​ទាំង​ក្នុង និង​ក្រៅ​ប្រទេស​បាន​រិះគន់​ចំពោះ​ការ​ផ្ទេរ​អំណាច​ត​ពូជ​ពី​ឪពុក​មក​កូន បើ​ទោះបីជា​លោក ហ៊ុន សែន ដែល​ជា​ឪពុក​បាន​ដឹកនាំ​ប្រទេស​កម្ពុជា​ជិត ៤០​ឆ្នាំ​ហើយ​ក៏ដោយ។

លោក ហ៊ុន ម៉ានី បាន​សរសេរ​លើ​ហ្វេសប៊ុក​ខ្លួន​កាលពី​ថ្ងៃទី​២៦ កក្កដា ថា បើ​ទោះបីជា​ឪពុក​របស់​លោក​នៅ​អាច​បន្ត​ធ្វើ​នាយករដ្ឋមន្ត្រី​បាន​ក៏ដោយ ប៉ុន្តែ​លោក​មិន​បន្ត​កាន់​តំណែង​ជា​នាយករដ្ឋមន្ត្រី​បន្ត​ទៅ​ទៀត ដោយ​លះបង់​ទៅ​ឲ្យ​កូនប្រុស​កាន់​បន្ត​វិញ ដែល​នេះ​ជា​ការ​លះបង់​ធំធេង។

កូនប្រុស​ពៅ​របស់​លោក ហ៊ុន សែន ចាត់ទុក​ការ​លះបង់​តំណែង​ជា​នាយករដ្ឋមន្ត្រី​របស់​ឪពុក​ខ្លួន​នា​ពេលនេះ ដើម្បី​បម្រើ​ដល់​ទស្សនវិស័យ​វែងឆ្ងាយ​ក្នុង​ការ​ត្រួសត្រាយ​ផ្លូវ​ឲ្យ​លោក ហ៊ុន ម៉ាណែត បន្ត​វេន និង​បន្ត​ទទួល​ខុសត្រូវ​លើ​ជោគវាសនា​ប្រទេស​ជាតិ និង​ប្រជាជន​ដោយ​គ្មាន​ស្ទាក់ស្ទើរ និង​មិន​ចុះចាញ់​ចំពោះ​ឧបសគ្គ។

លោក ហ៊ុន ម៉ានី ថា​ការ​បន្ត​វេន​មុន និង​ក្រោយ​គង់តែ​ត្រូវ​មក​ដល់​ដដែល​ក្រោម​ការ​ដឹកនាំ​របស់​បងប្រុស​ខ្លួន គឺ​លោក ហ៊ុន ម៉ាណែត ដែល​ជា​នាយករដ្ឋមន្ត្រី ហើយ​រាជរដ្ឋាភិបាល​ថ្មី​នឹង​នៅតែ​បន្ត​បម្រើ​ដោយ​ស្មោះស្ម័គ្រ​ចំពោះ​ជាតិ និង​ប្រជាជន​ឥត​ងាករេ ហើយ​មាន​តែ​ការ​ប្រឹងប្រែង​ទ្វេដង​ថែម​ទៀត។

នាយករដ្ឋមន្ត្រី​ខ្មែរ​ដែល​កងទ័ព​វៀតណាម​លើក​បន្តុប​តាំងពី​ឆ្នាំ​១៩៨៥ លោក ហ៊ុន សែន ប្រកាស​លាលែង​តំណែង​ជា​នាយករដ្ឋមន្ត្រី​កម្ពុជា​ចាប់ពី​ថ្ងៃទី​២២ ខែ​សីហា ឆ្នាំ​២០២៣ នេះ​តទៅ ដោយ​លោក ហ៊ុន ម៉ាណែត នឹង​ត្រូវ​ក្លាយ​ជា​នាយករដ្ឋមន្ត្រី​ថ្មី​បន្ទាប់ពី​រដ្ឋសភា​បើក​កិច្ចប្រជុំ​លើកដំបូង ខណៈ​មន្ត្រី​ជាន់ខ្ពស់​របស់​បក្ស​កាន់​អំណាច​ចាស់ៗ​ក៏​ត្រូវ​លាលែង​ពី​តំណែង​ក្នុង​ជួរ​រដ្ឋាភិបាល​ផង​ដែរ។

ប្រធាន​គណបក្ស​ប្រជាជន​កម្ពុជា​ដែល​វៀតណាម​លើក​បន្តុប លោក ហ៊ុន សែន ក៏​បាន​ប្រកាស​ដែរ​ថា បើ​ទោះបីជា​លោក​លាលែង​តំណែង​ជា​នាយករដ្ឋមន្ត្រី​ក៏ដោយ ប៉ុន្តែ​លោក​នឹង​កាន់​តំណែង​ជា​ប្រធាន​បក្ស​ប្រជាជន​កម្ពុជា ជា​ប្រធាន​ឧត្ដមក្រុមប្រឹក្សា​ព្រះមហាក្សត្រ និង​ជា​ប្រធាន​ព្រឹទ្ធសភា​នៅ​ដើម​ឆ្នាំ​២០២៤ ដើម្បី​កាន់​តួនាទី​ជា​ប្រមុខ​រដ្ឋ​ស្តីទី​ពេល​អវត្តមាន​ព្រះមហាក្សត្រ​ផង​ដែរ។

លោក ហ៊ុន សែន ប្រកាស​ផ្ទេរ​តំណែង​នាយករដ្ឋមន្ត្រី​ឲ្យ​កូនប្រុស​ច្បង គឺ​លោក ហ៊ុន ម៉ាណែត ជា​សាធារណៈ​កាលពី​ថ្ងៃទី​២៦ ខែ​កក្កដា ឆ្នាំ​២០២៣ ក្រោយពី​គណបក្ស​ប្រជាជន​កម្ពុជា​ឈ្នះ​ការ​បោះឆ្នោត​កាលពី​ថ្ងៃទី​២៣ ខែ​កក្កដា ភ្លូកទឹក​ភ្លូកដី ដោយសារ​គណៈកម្មាធិការ​ជាតិ​រៀបចំ​ការ​បោះឆ្នោត​ស្ថិត​នៅ​ក្រោម​បញ្ជា​លោក ហ៊ុន សែន បិទ​គណបក្ស​ប្រឆាំង​មិន​ឲ្យ​ចូលរួម​ប្រកួតប្រជែង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស