29 C
Phnom Penh

លោក មុត ចន្ថា ថា​ការ​ផ្ទេរ​អំណាច​ជា​ល្បិច​បោស​សម្អាត​អ្នក​ជំទាស់​ទាំង​ក្រៅ​និង​ក្នុង​បក្ស​ប្រជាជន​កម្ពុជា

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ ព្រមាន​ថា ការ​ផ្ទេរ​អំណាច​នៅ​កម្ពុជា​ពី​ឪ​ទៅ​កូន គឺ​ជា​ល្បិច​មួយ​ដែល​បុរស​ខ្លាំង​លោក ហ៊ុន សែន ប្រើ​ដើម្បី​បោស​សម្អាត​ក្រុម​ជំទាស់ ទាំង​ផ្ទៃក្នុង​បក្ស និង​ក្រុម​ប្រឆាំង​ក្រៅ​បក្ស។

អតីត​នាយក​ខុទ្ទកាល័យ​ប្រធាន​គណបក្ស​សង្គ្រោះ​ជាតិ​លោក មុត ចន្ថា បាន​សរសេរ​លើ​គណនី​ហ្វេសប៊ុក​របស់​ខ្លួន​កាលពី​ថ្ងៃទី​១០ សីហា នេះ​ថា ការ​បោស​សម្អាត​ក្រុម​ជំទាស់​នៅ​ក្រៅ​បក្ស ធ្វើឡើង​តាមរយៈ​ការ​ចោទប្រកាន់ និង​ចាប់​ខ្លួន​មេដឹកនាំ​នយោបាយ​ប្រឆាំង រួម​ទាំង​ការ​បិទ​សិទ្ធិ​គណបក្ស​ដែល​មាន​សក្ដានុពល​មិន​ឱ្យ​ចូលរួម​ប្រកួត​ប្រជែង​ក្នុង​សង្វៀន​នយោបាយ​កម្ពុជា​ផង​ដែរ ហើយ​យុទ្ធសាស្ត្រ​នេះ​ត្រូវ​បាន​លោក ហ៊ុន សែន ចាប់ផ្តើម​អនុវត្ត​តាំងពី​ក្រោយ​ការ​បោះឆ្នោត​ឆ្នាំ​២០១៣ មក​ម្ល៉េះ។

លោក មុត ចន្ថា លើកឡើង​ថា ចំណែកឯ​ការ​បោស​សម្អាត​ផ្ទៃក្នុង​បក្ស​កាន់​អំណាច​វិញ គឺ​ត្រូវ​ធ្វើ​ឡើង​តាមរយៈ​នៃ​ការ​បង្ខំ​ឱ្យ​មេដឹកនាំ​ជាន់ខ្ពស់​ចាស់ៗ​ក្នុង​បក្ស​របស់​ខ្លួន​ចូល​និវត្តន៍ ឬ​បង្ខំ​ឱ្យ​ទៅ​កាន់​តំណែង​ដែល​គ្មាន​ឥទ្ធិពល អំណាច និង​គ្មាន​សេដ្ឋកិច្ច ដោយ​ដាក់​ជំនួស​មក​វិញ​នូវ​កូនៗ​របស់​ពួកគេ ដើម្បី​លួង​ចិត្ត​មេដឹកនាំ​ទាំងនោះ ខណៈ​កូនៗ​ទាំងនោះ​មិន​យល់​អំពី​ការងារ និង​មិន​មាន​អំណាច រួម​ទាំង​ឥទ្ធិពល​ទៅ​លើ​មន្ត្រី​ថ្នាក់ក្រោម​ដែល​បម្រើការ​នៅ​ក្នុង​ក្រសួង​ដែល​ពួកគេ​កាន់កាប់​ផង​នោះ។

លោក​បន្ថែម​ថា ដោយសារតែ​ក្មេងៗ​ជំនាន់​ក្រោយ​មិន​យល់​ការងារ​ទាំងនោះ និង​មិន​សូវ​យល់​ពី​កិច្ចការ​ដែល​ខ្លួន​ទើប​នឹង​កាន់កាប់​ថ្មី​នេះ​ហើយ ដែល​ធ្វើ​ឱ្យ​លោក ហ៊ុន សែន ងាយស្រួល​ក្នុង​ការ​ក្តោប​ក្តាប់ គ្រប់គ្រង និង​បញ្ជា ដែល​នេះ​គឺជា​យុទ្ធសាស្ត្រ​ជីក​គ្រឹះ​អំណាច​របស់​គូបដិបក្ខ​នៅ​ផ្ទៃក្នុង​របស់​ខ្លួន ដើម្បី​ត្រួសត្រាយ​ផ្លូវ​ប្រមូលផ្ដុំ​អំណាច​ឱ្យ​ត្រកូល​ខ្លួនឯង​ទៅ​ថ្ងៃ​មុខ។

កាលពី​ថ្ងៃទី​១០ ខែ​សីហា ឆ្នាំ​២០២៣ លោក ហ៊ុន សែន បាន​រៀបចំ​ពី​ជួបជុំ​គណៈ​អចិន្ត្រៃយ៍​គណបក្ស​ប្រជាជន​កម្ពុជា​ដែល​មាន​សមាជិក​រាជរដ្ឋាភិបាល​អាណត្តិ​ចាស់ ជាមួយ​នឹង​សមាជិក​រាជរដ្ឋាភិបាល​អាណត្តិ​ថ្មី នៅ​ឯ​វិមាន ៧​មករា បន្ទាប់ពី​លោក ហ៊ុន សែន ចាត់ចែង​មន្ត្រី​ជាន់ខ្ពស់​ទាំងនោះ​ឱ្យ​ដក​ខ្លួន​ចេញពី​មុខនាទី​ដែល​ពួកគេ​ធ្លាប់​កាន់កាប់ ដើម្បី​ឱ្យ​កូនៗ​របស់​ពួកគេ​មក​ដឹកនាំ​កិច្ចការ​ទាំងនេះ​ជំនួស​ខ្លួន ក្នុង​បំណង​ជួយ​ជ្រោមជ្រែង​អំណាច​លោក ហ៊ុន ម៉ាណែត ទៅ​ថ្ងៃ​មុខ ស្រប​ពេល​ដែល​លោក ហ៊ុន សែន នៅតែ​បន្ត​កាន់​តំណែង​សំខាន់ៗ​ទាំង​នៅ​ក្នុង​បក្ស និង​នៅ​ក្នុង​ជួរ​រដ្ឋាភិបាល​ដដែល។

ទាក់ទិន​នឹង​បញ្ហា​នេះ កាលពី​ថ្ងៃទី​៣ ខែ​សីហា ឆ្នាំ​២០២៣ លោក ហ៊ុន សែន អះអាង​ថា ទោះបី​នាយករដ្ឋមន្ត្រី​ថ្មី​ត្រូវ​ដឹកនាំ​រាជរដ្ឋាភិបាល​អាណត្តិ​ទី​៧ ដោយ​លោក ហ៊ុន ម៉ាណែត ក៏ដោយ ក៏​អ្នក​នយោបាយ​ចាស់ៗ​នៅតែ​មិន​ទាន់​ចាកចេញ​ពី​ឆាក​នយោបាយ​នោះ​ដែរ ជាក់ស្តែង​ដូចជា​រូបលោក​ផ្ទាល់ នៅតែ​មាន​តួនាទី​សំខាន់​ក្នុង​កិច្ចការ​នយោបាយ​ដដែល​ក្នុង​នាម​ជា​ប្រធាន​គណបក្ស​ប្រជាជន​កម្ពុជា ដែល​អម​ដោយ​អនុប្រធាន​បក្ស​ចំនួន ៤​រូប​ផ្សេង​ទៀត ព្រមទាំង​សមាជិក​ការិយាល័យ​នយោបាយ​ជាច្រើន​នាក់​ផង​ដែរ។

យ៉ាងណា​ក៏ដោយ ក្រោយ​ការ​បោះឆ្នោត នៅ​ថ្ងៃទី​២៦ ខែ​សីហា ឆ្នាំ​២០២៣ ក្នុង​ពេល​ប្រកាស​លាលែង​តំណែង​ជា​នាយករដ្ឋមន្ត្រី​កម្ពុជា លោក ហ៊ុន សែន អះអាង​ថា ចាប់ពី​ថ្ងៃទី​២២ ខែ​សីហា ឆ្នាំ​២០២៣ តទៅ មន្ត្រី​ជាន់ខ្ពស់​របស់​បក្ស​កាន់​អំណាច​ចាស់ៗ ដូចជា​លោក ស ខេង លោក ហេង សំរិន អ្នកស្រី ម៉ែន សំអន លោក សាយ ឈុំ និង​លោក ទៀ បាញ់ នឹង​ត្រូវ​លាលែង​ពី​តំណែង​ក្នុង​ជួរ​រដ្ឋាភិបាល​ទាំងអស់ មាន​តែ​រូបលោក​ម្នាក់​ប៉ុណ្ណោះ​ដែល​នៅ​បន្ត​កាន់​តំណែង​ជា​ប្រធាន​បក្ស​ប្រជាជន​កម្ពុជា ជា​ប្រធាន​ឧត្តម​ក្រុមប្រឹក្សា​ព្រះមហាក្សត្រ និង​ជា​ប្រធាន​ព្រឹទ្ធសភា​នៅ​ដើម​ឆ្នាំ​២០២៤ ខាងមុខ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស