មន្ត្រីសង្គមស៊ីវិលដែលទទួលបន្ទុកការពារសិទ្ធិមនុស្ស លើកឡើងថា ការរំដោះអ្នកទោសជនជាតិចិន នៅខេត្តសៀមរាប ស្ថិតក្នុងការសង្ស័យពីមហាជនពីករណីប្រព្រឹត្តអំពើពុករលួយ ដោយឃុបឃិតពីមន្ត្រីពាក់ព័ន្ធណាម្នាក់ដើម្បីផ្តល់ឱកាសឱ្យមានការរំដោះអ្នកទោស ដែលទាមទារឲ្យស្ថាប័នពាក់ព័ន្ធត្រូវតែបំភ្លឺឱ្យបានច្បាស់លាស់។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៨ សីហា នេះថា បើផ្អែកតាមលិខិតស្នើសុំបញ្ជូនអ្នកទោសទៅព្យាបាលជំងឺ គឺមិនមែនជាលើកទី១ ទេ គឺជាច្រើនលើករួចមកហើយ ព្រោះក្នុងលិខិតនោះបញ្ជាក់ថាទៅព្យាបាលតាមការណាត់របស់គ្រូពេទ្យ ដូច្នេះចម្ងល់គឺនៅត្រង់ថា ហេតុអ្វីបានជាក្រុមឧក្រិដ្ឋជនចេញមករំដោះដោយស្គាល់ទីតាំង ហើយហេតុអ្វីក្រុមឧក្រិដ្ឋជនដឹងពីពេលវេលាដែលអ្នកទោសត្រូវទៅព្យាបាល និងហេតុអ្វីក៏សមត្ថកិច្ចត្រូវការពារពិរុទ្ធជនដែលមានទោសដល់ទៅជាង ៥០ឆ្នាំមានចំនួនតិចតួចត្រឹមតែ ៤នាក់។
លោក ស៊ឹង សែនករុណា លើកឡើងថា តាមលក្ខខណ្ឌច្បាប់ អ្នកទោសដែលត្រូវអនុញ្ញាតឱ្យទៅទទួលការព្យាបាលនៅគ្លីនិកខាងក្រៅពន្ធនាគារ ត្រូវតែមានការអនុញ្ញាតពីព្រះរាជអាជ្ញាជាមុនសិន ប៉ុន្តែលើលិខិតស្នើសុំនោះមិនមានការអនុញ្ញាតពីព្រះរាជអាជ្ញានោះទេ ដូច្នេះទាំងអស់នេះ គឺសុទ្ធសឹងតែជាចំណុចដែលគួរឱ្យសង្ស័យបំផុតចំពោះសមត្ថកិច្ចដែលទទួលខុសត្រូវលើករណីនេះ។
មន្ត្រីសង្គមស៊ីវិលរូបនេះត្អូញត្អែរថា កន្លងមកសកម្មជនសង្គម និងសកម្មជននយោបាយ ជាដើម ដែលមានជំងឺដូចអ្នកទោសជនជាតិចិនខាងលើនេះដែរ មានអ្នកខ្លះឈឺធ្មេញទទួលទានអាហារមិនកើត និងអ្នកខ្លះមានបញ្ហាភ្នែក ជាដើម មិនត្រូវបានមន្ត្រីពន្ធនាគារអនុញ្ញាតឱ្យទៅព្យាបាលនៅគ្លីនិកខាងក្រៅឡើយ ទោះពួកគេមានការឈឺដោយការធ្វើទុក្ខពីជំងឺធ្ងន់ធ្ងររហូតទទួលទានអាហារមិនកើតក៏ដោយ ខណៈទោសរបស់ពួកគេត្រឹមតែ ៤ឆ្នាំទៅ ៥ឆ្នាំនោះ។
លោក ស៊ឹង សែនករុណា អំពាវនាវឱ្យស្ថាប័នពាក់ព័ន្ធអនុវត្តច្បាប់ឱ្យបានត្រឹមត្រូវលើអ្នកទោស ដោយចៀសវាងនូវការអនុវត្តច្បាប់ដែលមានស្តង់ដារពីរ គឺរឹតបន្តឹងតែទៅលើអ្នកទោសដែលអនុវត្តសិទ្ធិដែលបានចែងក្នុងរដ្ឋធម្មនុញ្ញ ប៉ុន្តែបែរជាធូររលុងទៅលើអ្នកទោសដែលជួញដូរគ្រឿងញៀនដូចករណីជនជាតិចិន នៅពេលនេះជាដើម។
កាលពីថ្ងៃទី១៧ ខែសីហា ឆ្នាំ២០២២ មានក្រុមឧក្រិដ្ឋជនចំនួន ៥នាក់ប្រដាប់ដោយអាវុធ បានសម្រុកចូលទៅគ្លីនិកព្យាបាលធ្មេញមួយកន្លែងនៅក្នុងខេត្តសៀមរាប ដើម្បីរំដោះអ្នកទោសជាជនជាតិចិនម្នាក់ដែលមានឈ្មោះថា Chen Hsin Han ក្រោយសមត្ថកិច្ចបញ្ជូនរូបគេទៅព្យាបាលធ្មេញនៅគ្លីនិកខាងលើនោះ។
ទាក់ទិននឹងបញ្ហានេះ កាលពីថ្ងៃទី១៦ ខែសីហា ឆ្នាំ២០២៣ ការិយាល័យអប់រំកែប្រែ និងស្ដារនីតិសម្បទាផ្នែកសុខាភិបាល បានចេញលិខិតមួយដោយស្នើសុំបញ្ជូនអ្នកទោសជនជាតិចិនខាងលើទៅគ្លីនិកធ្មេញ ជុំ ចិន្តា ដែលមានទីតាំងនៅក្នុងក្រុងសៀមរាប ដើម្បីព្យាបាលធ្មេញ ក្រោមហេតុផលថា អ្នកទោសរូបនោះឈឺចាប់មាត់ធ្មេញពិបាកបរិភោគអាហារ និងធ្វើឡើងតាមការណាត់របស់គ្រូពេទ្យ។
នៅលើលិខិតស្នើសុំបញ្ជូនអ្នកទោសទៅព្យាបាលនេះ គឺមានចុះហត្ថលេខាឯកភាពពីមន្ត្រីពេទ្យពន្ធនាគារលោក ពៅ តុងហុង ប្រធានការិយាល័យអគ្គានុរក្ស យឹម សុវណ្ណឡង់ឌី ប្រធានពន្ធនាគារខេត្តលោក សី វណ្ណា និងអនុប្រធានពន្ធនាគារលោក ពេញ រិទ្ធ ប៉ុន្តែមិនឃើញមានការអនុញ្ញាតពីព្រះរាជអាជ្ញាសាលាដំបូងខេត្តសៀមរាប នោះទេ។
ច្បាប់ស្ដីពីពន្ធនាគារមាត្រា៣៨ ចែងថា ជនជាប់ឃុំមានជំងឺធ្ងន់ ហើយតម្រូវឲ្យមានការព្យាបាលនៅមន្ទីរពេទ្យខាងក្រៅតាមសំណើរបស់មន្ត្រីពេទ្យពន្ធនាគារ ត្រូវមានការអនុញ្ញាតពីព្រះរាជអាជ្ញាក្នុងដែនសមត្ថកិច្ចជាដាច់ខាត៕