រដ្ឋាភិបាលកម្ពុជាបានធ្វើបត្យាប័នបញ្ជូនជនជាតិចិន ចំនួន ១៣០នាក់ទៅប្រទេសកំណើតវិញ ដោយសង្ស័យជាក្រុមឧក្រិដ្ឋកម្មអនឡាញក្នុងចំណោមមនុស្សជាង ១ពាន់នាក់ដែលសមត្ថកិច្ចកម្ពុជាបានចាប់ខ្លួនក្នុងប្រតិបត្តិការបង្ក្រាបល្បែងស៊ីសងអនឡាញនៅខេត្តព្រះសីហនុ។
យោងតាមការចុះផ្សាយរបស់កាសែតចិន China Daily បានរាយការណ៍ថា ជនជាតិចិនដែលជាជនសង្ស័យក្នុងឧក្រិដ្ឋកម្មល្បែងស៊ីសង និងឆបោកអនឡាញដែលឈរជើងនៅខេត្តព្រះសីហនុ ចំនួន ១៣០នាក់ ត្រូវបានបញ្ជូនត្រឡប់ទៅប្រទេសចិន វិញ កាលពីថ្ងៃទី១៣ ខែមេសា ឆ្នាំ២០២៤។
ជនជាតិចិន ទាំងនោះ ត្រូវបានចាប់បញ្ជូនទៅប្រទេសកំណើតវិញតាមច្រកអាកាសយានដ្ឋានអន្តរជាតិ Tianhe ក្នុងទីក្រុង Wuhan ខេត្ត Hubei តាមជើងហោះហើរចំនួនពីរ។
ប្រភពដដែលបានលើកឡើងថា ជនជាតិចិន ១៣០នាក់នេះស្ថិតនៅក្នុងចង្កោមជនសង្ស័យសរុប ១០៣០នាក់ដែលចិន និងកម្ពុជា កំពុងត្រៀមធ្វើបត្យាប័នបញ្ជូនទៅប្រទេសចិន វិញជាបន្តបន្ទាប់។
ក្រសួងសន្តិសុខសាធារណៈចិន មានឆន្ទៈពង្រឹងការអនុវត្តច្បាប់ជាមួយប្រទេសជាដៃគូអាស៊ាន ដើម្បីទប់ស្កាត់បទល្មើសល្បែងស៊ីសងអនឡាញ ការក្លែងបន្លំតាមប្រព័ន្ធទូរគមនាគមន៍ និងឧក្រិដ្ឋកម្មអនឡាញផ្សេងៗ។
ជំនួយការនៃតំណាងការិយាល័យផ្នែកគ្រឿងញៀន និងឧក្រិដ្ឋកម្មប្រចាំតំបន់អាស៊ីអាគ្នេយ៍ និងប៉ាស៊ីហ្វិកនៃអង្គការសហប្រជាជាតិ Benedikt Hofman ត្រូវបានដកស្រង់សម្ដីដោយសារព័ត៌មាន South China Morning Post កាលពីថ្ងៃចន្ទ ទី១៨ ខែមីនា ថា ទោះបីអាជ្ញាធរមូលដ្ឋានបង្កើនសកម្មភាពស៊ើបអង្កេត និងបង្ក្រាបយ៉ាងណាក៏ដោយ ក៏កិច្ចប្រឹងប្រែងទាំងនេះមិនទាន់គ្រប់គ្រាន់ដើម្បីកម្ចាត់ប្រតិបត្តិការឆបោកទាំងអស់នោះបាននៅឡើយទេ។
លោក Benedikt Hofman និយាយថា ការផ្ដោតការយកចិត្តទុកដាក់ទៅលើការអនុវត្តច្បាប់បង្ក្រាបទីតាំងទាំងនោះ នឹងនាំទៅការផ្លាស់ប្ដូរទីតាំងភូមិសាស្ត្រ ជាជាងការបង្កឲ្យមានផលវិជ្ជមានជាអចិន្ត្រៃយ៍ ព្រោះថាកន្លងមក ក្រោយស្ងាត់មួយភ្លែត មុខរបរឆបោកនោះបានវិលមកវិញដដែលតែក្នុងរយៈពេលពីរទៅបីខែប៉ុណ្ណោះ។ ម្យ៉ាងទៀត ជនល្មើសដែលអាជ្ញាធរខ្មែរចាប់បានជាមនុស្សរាយរង តូចតាចស្ទើរតែទាំងអស់ ហើយរីឯមេខ្លោងធំៗ សមត្ថកិច្ចចាប់មិនដែលបានម្តងណាឡើយ។
ការិយាល័យរបស់អង្គការសហប្រជាជាតិ ទទួលបន្ទុកខាងគ្រឿងញៀន និងឧក្រិដ្ឋកម្មអះអាងថា បនល្បែងកាស៊ីណូតាមដងទន្លេមេគង្គ ប្រៀបបាននឹងប្រព័ន្ធធនាគារដែលជួយឧបត្ថម្ភមុខរបរខុសច្បាប់ធ្វើចរាចរណ៍សម្អាតប្រាក់រាប់ពាន់លានដុល្លារ ដែលប្រមូលបានពីសកម្មភាពផ្លូវងងឹត និងមុខរបរឆបោកក្រៅប្រព័ន្ធច្បាប់ ឬហៅថា cryptocurrency។
រដ្ឋមន្ត្រីក្រសួងមហាផ្ទៃលោក ស សុខា លើកឡើងកន្លងមកថា ថ្វីត្បិតតែជនល្មើសប្រព្រឹត្តទង្វើឧក្រិដ្ឋនៅកម្ពុជា ប៉ុន្តែកម្រៃនៃអ្នកទទួលបានមិនមែននៅកម្ពុជាទេ ចុងក្រោយគឺពួកគេបានផ្ទេរលុយទាំងនោះទៅប្រទេសប៉ែកខាងអឺរ៉ុបវិញទាំងអស់។ លោកថា រដ្ឋាភិបាលនៅតែមិនអាចកំណត់ពីភាពជាក់លាក់ទៅលើក្រុមឧក្រិដ្ឋជនទាំងនោះបាននៅឡើយ ដោយសារតែពួកគេនៅទីងងឹត ខណៈរដ្ឋាភិបាលនៅទីភ្លឺ ស្របពេលដែលជនល្មើសទាំងនោះបានដើរមួយជំហានមុនរដ្ឋាភិបាលទៅហើយនោះ។
លោក ស សុខា អះអាងថា ដោយសារតែបញ្ហានេះ រដ្ឋាភិបាលត្រូវតែទប់ស្កាត់គ្រប់ទម្រង់នៃការជួញដូរមនុស្ស ដោយការដាក់ទិសដៅផែនការយកចិត្តទុកដាក់ខ្ពស់លើការបង្ក្រាបបទល្មើសនានាឱ្យមានប្រសិទ្ធភាពថែមទៀត និងការបង្កើនសមត្ថភាពបំពេញតួនាទីរបស់កងកម្លាំងនគរបាល ប៉ុស្តិ៍រដ្ឋបាល និងចលនានានា ជាពិសេសប្រជាការពារតាមបណ្តាឃុំ-សង្កាត់ ដោយបន្តការគាំទ្រស្មារតីនិងការលើកទឹកចិត្តឱ្យមានការចូលរួមទាំងអស់គ្នា ក្នុងគោលដៅភូមិ ឃុំ សង្កាត់ មានសុវត្ថិភាព។
របាយការណ៍មួយចេញផ្សាយដោយអង្គការសហប្រជាជាតិ កាលពីខែសីហា ឆ្នាំ២០២៣ បានឲ្យដឹងថា មានមនុស្សជាង ១០ម៉ឺននាក់បានរងគ្រោះពីករណីឆបោកនៅកម្ពុជា ហើយថាខេត្តព្រះសីហនុ និងរាជធានីភ្នំពេញ ជាទីតាំងនៃការប្រព្រឹត្តបទល្មើសឆបោកតាមអនឡាញច្រើនបំផុត។
ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយ៕