លោក ហ៊ុន ម៉ាណែត សរសេរនៅក្នុងបណ្តេញសង្គមតេឡេក្រាមរបស់លោកដោយអះអាងថា មន្ត្រីរាជការ និងកងកម្លាំងប្រដាប់អាវុធចំនួន ៧៦នាក់ ត្រូវបានបណ្តេញចេញពីក្របខ័ណ្ឌក្រោយធ្វើតេស្ដរកឃើញសារធាតុញៀនតាមទឹកនោម។
លោកបានរៀបរាប់ថា គិតត្រឹមរយៈពេលជាង ២ខែ ចាប់ពីខែកុម្ភៈ មកដល់ថ្ងៃទី២៩ ខែមេសា នេះ ចំនួនមន្ត្រីរាជការ និងកងកម្លាំងប្រដាប់អាវុធដែលត្រូវបានធ្វើតេស្ដរកសារធាតុញៀនតាមទឹកនោមមានចំនួនជាង ៥ម៉ឺននាក់ (៥៦ ៤៤៥នាក់) ក្នុងនោះវិជ្ជមានចំនួន ៧៦នាក់ ដែលត្រូវបានបណ្តេញចេញពីក្របខ័ណ្ឌ។
កាលពីថ្ងៃទី២០ ខែកុម្ភៈ ប្រមុខរដ្ឋាភិបាលកម្ពុជាបានចេញបទបញ្ជាឲ្យមានការធ្វើតេស្ដរកសារធាតុញៀនតាមទឹកនោម ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។
ជាមួយនឹងការដាក់ចេញនូវវិធានការនេះ អាជ្ញាធរជាតិប្រយុទ្ធប្រឆាំងគ្រឿងញៀនបានបន្តអនុវត្តតាមបទបញ្ជា មានដូចជា ការស្វែងរកជំនួយដើម្បីទទួលបានឧបករណ៍ធ្វើតេស្ដបន្ថែម និងកិច្ចសហការជាមួយក្រសួងសុខាភិបាល ដើម្បីបង្កើតក្រុមការងារចំពោះកិច្ចមួយឡើងសម្រាប់ធ្វើតេស្ដឡើងវិញក្នុងករណីមានការតវ៉ាណាមួយ។
ពាក់ព័ន្ធបញ្ហានេះ អាជ្ញាធរជាតិប្រយុទ្ធប្រឆាំងគ្រឿងញៀន បានសហការជាមួយក្រសួងព័ត៌មាន ប្រកាសដាក់ឱ្យប្រើប្រាស់ជាផ្លូវការនូវកម្មវិធីទូរសព្ទ ឬហៅថា APP NO DRUG កាលពីថ្ងៃទី២៣ ខែមេសា ឆ្នាំ២០២៤។ ការដាក់ឱ្យដំណើរការ App នេះ ដើម្បីផ្តល់ព័ត៌មានពីបញ្ហាគ្រឿងញៀនកាន់តែទូលំទូលាយដល់សាធារណជនតាមរយៈវីដេអូកម្សាន្ត អប់រំ ព័ត៌មាន មេរៀន និងការដាក់បញ្ចូលនូវព័ត៌មានរបស់មជ្ឈមណ្ឌលអប់រំកែប្រែទូទាំងប្រទេស រដ្ឋ និងឯកជន។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរីទ្ធ បានថ្លែងកន្លងមកថា ក្នុងន័យរក្សាការពារសមិទ្ធផលដែលសម្រេចក្នុងពេលកន្លងមក ក៏ដូចជាដើម្បីទប់ទល់ទៅនឹងនិន្នាការ និងល្បិចកលថ្មីៗរបស់ក្រុមឧក្រិដ្ឋជន ក្នុងការកាត់បន្ថយ និងឈានទៅលុបបំបាត់គ្រឿងញៀនឱ្យអស់ពីកម្ពុជា។ លោកបន្តថា ក្នុងនាមជាសេនាធិការរបស់រដ្ឋាភិបាល គឺខិតខំប្រឹងប្រែង និងជម្នះគ្រប់ឧបសគ្គតស៊ូប្តូរផ្តាច់ក្នុងការបង្ការ ទប់ស្កាត់ បង្ក្រាប និងដោះស្រាយរាល់បញ្ហាដែលពាក់ព័ន្ធនឹងគ្រឿងញៀន។
ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ នារសៀលថ្ងៃទី២០ ខែកុម្ភៈ ឆ្នាំ២០២៤ លោក ហ៊ុន ម៉ាណែតព្រមានថា រដ្ឋាភិបាលនឹងមានការរៀបចំការធ្វើតេស្ដគ្រឿងញៀនទៅលើមន្ត្រីរាជការទាំងអស់ ទាំងថ្នាក់ជាតិ និងថ្នាក់ក្រោមជាតិ ហើយបើរកឃើញថាមន្ត្រីរូបណាបានប្រើប្រាស់ និងប្រព្រឹត្តបទល្មើសពាក់ព័ន្ធគ្រឿងញៀន គឺត្រូវបណ្ដេញចេញពីក្របខ័ណ្ឌភ្លាមៗ។
គ្រឿងញៀននៅកម្ពុជាត្រូវគេមើលឃើញថា គឺជាថ្នាំពេញនិយមបំផុតសម្រាប់អ្នកមានលុយ និងអ្នកមានអំណាច។ ជាងនេះទៀត គេក៏រកឃើញដែរថា មន្ត្រីធំៗ និងឧកញ៉ាមួយចំនួន សុទ្ធតែបានជួញដូរ រក្សាទុក ចែកចាយ និងប្រើប្រាស់គ្រឿងញៀន ដើម្បីស្វែងរកការសប្បាយ ជាពិសេសគឺដើម្បីបង្កើនចំណង់ផ្លូវភេទ ហើយពួកគេក៏ជាអ្នកផ្គត់ផ្គង់ថ្នាំទាំងនេះនៅក្នុងទីផ្សារស្រុកខ្មែរ ក្រោមការចង្អុលបង្ហាញពីអ្នកមានអំណាចដែលនៅកាងនៅពីក្រោយថែមទៀត។
អ្នកប្រឹក្សាយោបល់ដើម្បីអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ធ្លាប់បានប្រាប់សារព័ត៌មាន The Cambodia Daily កាលពីពេលកន្លងមកថា វិធានការរបស់ក្រសួងមហាផ្ទៃ ដែលបានព្យួរតួនាទី និងបណ្តេញចេញពីក្របខ័ណ្ឌចំពោះមន្ត្រីក្រោមឱវាទដែលជាប់ពាក់ព័ន្ធនឹងគ្រឿងញៀន គ្រាន់តែជាចំណាត់ការមួយជ្រុងតូចប៉ុណ្ណោះ បើប្រៀបធៀបនឹងបទល្មើសគ្រឿងញៀនដែលបានកើតមាននៅកម្ពុជា។
លោកបន្តថា ឱ្យតែមន្ត្រីរដ្ឋាភិបាលមានឆន្ទៈក្នុងការបង្ក្រាបបទល្មើសគ្រឿងញៀននេះដោយសុទ្ធចិត្ត ដោយគ្មានការរើសអើង ក្រោមគោលការណ៍ច្បាប់ មិនខ្លាចញញើតអ្នកមានអំណាច ឬសាច់ញាតិបក្ខពួកខ្លួនឯង នោះការប្រយុទ្ធប្រឆាំងនឹងគ្រឿងញៀននឹងអាចឈានទៅដល់ការលុបបំបាត់ទាំងស្រុងជាមិនខាន ប៉ុន្តែប្រសិនបើអនុវត្តច្បាប់ដើម្បីធ្វើប្រជាភិថុតិ ឬគ្រាន់តែដើម្បីឱ្យល្អមើល ទោះវិធានការនោះធំកម្រិតណាក៏ដោយ ក៏មិនអាចលុបបំបាត់បញ្ហានេះបានដែរ។
ក្រសួងមហាផ្ទៃ កាលពីចុងខែធ្នូ ឆ្នាំ២០២២ បានបញ្ចេញរបាយការណ៍របស់ខ្លួនថា ក្នុងចំណោមអ្នកជាប់ឃុំជិត ៤ម៉ឺននាក់នៅពន្ធនាគារទូទាំងប្រទេស មាន ៥០% ជាប់ឃុំដោយសារបទល្មើសគ្រឿងញៀន ខណៈមួយថ្ងៃ សមត្ថកិច្ចឃាត់ខ្លួនអ្នកប្រើប្រាស់ និងជួញដូរចន្លោះពី ១០ ទៅ ២០នាក់នៅតាមបណ្ដាខេត្តមួយចំនួនទូទាំងប្រទេសដែលពួកគេភាគច្រើនជាយុវជន៕