គណបក្សនយោបាយដែលមិនបានឈ្នះអាសនៈនៅក្នុងរដ្ឋសភានៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ និងគណបក្សដែលមិនបានចូលរួមបោះឆ្នោតចំនួន ២០ បានដាក់ពាក្យសុំចូលរួមនៅក្នុងឧត្ដមក្រុមប្រឹក្សាពិគ្រោះ និងផ្តល់យោបល់អាណត្តិថ្មីនេះ។
រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកប្រធានលេខាធិការដ្ឋានឧត្ដមក្រុមប្រឹក្សាពិគ្រោះ និងផ្តល់យោបល់ លោក ឈឹម ផលវរុណ បានប្រាប់សារព័ត៌មានក្នុងស្រុកថា គិតមកទល់ពេលនេះមានគណបក្សដែលមិនមានអាសនៈនៅក្នុងរដ្ឋសភាចំនួន ២០ បានដាក់ពាក្យសុំចូលរួមក្នុងឧត្ដមក្រុមប្រឹក្សាពិគ្រោះ និងផ្តល់យោបល់។
កាលពីថ្ងៃទី២៦ ខែសីហា កន្លងទៅ ព្រះមហាក្សត្រខ្មែរព្រះបាទសម្តេចព្រះនរោត្តម សីហមុនី បានឡាយព្រះហស្តលេខាលើព្រះរាជក្រឹត្យបង្កើត និងកំណត់អំពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សាពិគ្រោះ និងផ្តល់យោបល់ ក្នុងគោលបំណងលើកស្ទួយរបបនយោបាយប្រជាធិបតេយ្យសេរីពហុបក្ស ដើម្បីប្រមូលធាតុចូលនៃទស្សនៈពហុគំនិតជាប្រយោជន៍ដល់ការស្ថាបនាជាតិ។
ឧត្ដមក្រុមប្រឹក្សាពិគ្រោះ និងផ្តល់យោបល់នៅក្នុងអាណត្តិថ្មីនេះ មិនត្រឹមតែបើកផ្លូវឲ្យសម្រាប់តែគណបក្សនយោបាយដែលបានចូលរួមបោះឆ្នោត ហើយមិនបានឈ្នះអាសនៈក្នុងរដ្ឋសភាដូចអាណត្តិមុនប៉ុណ្ណោះទេ ប៉ុន្តែបើកផ្លូវទទួលទាំងគណបក្សដែលមិនបានចូលរួមបោះឆ្នោតទាំងអស់ផងដែរ ឲ្យតែបានចុះបញ្ជីត្រឹមត្រូវនៅក្រសួងមហាផ្ទៃ។
នៅក្នុងព្រះរាជក្រឹត្យបញ្ជាក់ថា ចំពោះថវិកាសម្រាប់ចំណាយទៅលើឧត្ដមក្រុមប្រឹក្សាពិគ្រោះ និងផ្តល់យោបល់ ត្រូវបានផ្គត់ផ្គង់ដោយកញ្ចប់ថវិកាជាតិក្នុងខ្ទង់ថវិការបស់ទីស្ដីការគណៈរដ្ឋមន្ត្រី។
លោក ពេជ្រ ស្រស់ ប្រធានគណបក្សយុវជនកម្ពុជា ដែលបានដាក់ពាក្យស្នើសុំចូលរួមក្នុងក្រុមប្រឹក្សាពិគ្រោះ និងផ្តល់យោបល់រួចហើយនោះ ឲ្យដឹងថា ការចូលរួមជាមួយស្ថាប័ននេះមានគុណតម្លៃ និងប្រយោជន៍ច្រើនក្នុងការជួយពលរដ្ឋ។
គណបក្សនយោបាយដែលបានចុះបញ្ជីនៅក្រសួងមហាផ្ទៃមានប្រមាណជាង ៤០គណបក្ស ក្នុងនោះ ១៨គណបក្សបានចូលរួមបោះឆ្នោតជាតិឆ្នាំ២០២៣ នេះ ខណៈគណបក្សភ្លើងទៀនត្រូវបានផាត់ចេញពីការបោះឆ្នោតនេះ ក្រោមហេតុផលខ្វះឯកសារច្បាប់ដើម។
ក្រុមអ្នករិះគន់និយាយថា ការបង្កើតឧត្ដមក្រុមប្រឹក្សាពិគ្រោះ និងផ្តល់យោបល់នេះ គឺជាការចំណាយថវិកាជាតិខ្ជះខ្ជាយ ស្របពេលដែលសេដ្ឋកិច្ចរបស់ប្រទេសកំពុងត្រដាបត្រដួស ហើយជីវភាពរបស់ពលរដ្ឋកំពុងធ្លាក់ទៅក្នុងរណ្តៅនៃភាពក្រីក្រទៅៗ៕