 ក្នុង ១ឆ្នាំៗ។){kind=link}
សមាគមវាយនភណ្ឌកាត់ដេរកម្ពុជា ដែលហៅកាត់ថា TAFTAC អះអាងថា ប្រាក់ឈ្នួលរបស់កម្មករនិយោជិតផ្នែកវាយនភណ្ឌកាត់ដេរនៅកម្ពុជាម្នាក់ៗទទួលបានប្រាក់ឈ្នួលសរុបជាមធ្យមចំនួន ២៧៥ដុល្លារអាមេរិកក្នុង ១ខែៗ ឬជាង ៣ពាន់ដុល្លារអាមេរិក (៣៣០០ដុល្លារ) ក្នុង ១ឆ្នាំៗ។
សមាគមវាយនភណ្ឌកាត់ដេរកម្ពុជា ចេញលិខិតបំភ្លឺនៅថ្ងៃទី១២ ខែកញ្ញា ឆ្នាំ២០២៣ នេះថា ប្រាក់ឈ្នួលអប្បបរមាមិនមែនជាប្រាក់ឈ្នួលសរុបសម្រាប់កម្មករនិយោជិតផ្នែកវាយនភណ្ឌកាត់ដេរនៅកម្ពុជានោះទេ ព្រោះថាសមាសធាតុនៃប្រាក់ឈ្នួលមានច្រើនបែបច្រើនយ៉ាង ដូចជាប្រាក់ឈ្នួលគោល ប្រាក់រង្វាន់ធ្វើការទៀងទាត់ដែលមានចំនួនទាបបំផុត ១០ដុល្លារ ប្រាក់ឧបត្ថម្ភធ្វើដំណើរ ឬស្នាក់នៅដែលមានចំនួនទាបបំផុត ៧ដុល្លារ។
ជាងនេះទៀត នៅមានប្រាក់អតីតភាពការងារដែលមានចំនួនចាប់ពី ២ដុល្លារដល់ ១១ដុល្លារ ប្រាក់ធ្វើការថែមម៉ោង និងប្រាក់ថ្លៃបាយ ប្រាក់រង្វាន់ ឬប្រាក់បន្ថែមផ្សេងៗទៀត ដូច្នេះប្រាក់ឈ្នួលអប្បបរមាមិនមែនជាប្រាក់ឈ្នួលសរុបរបស់កម្មករនិយោជិតទេ ហើយប្រាក់ឈ្នួលសរុបនេះក៏មិនទាបជាងកម្រិតប្រាក់ឈ្នួលអប្បបរមាដែរសម្រាប់កម្មករនិយោជិតកម្ពុជាសព្វថ្ងៃនេះ។
ប្រភពដដែលលើកឡើងថា បន្ថែមពីលើប្រាក់ឈ្នួល ២៧៥ដុល្លារអាមេរិកក្នុង ១ខែ ឬ ៣៣០០ដុល្លារក្នុង ១ឆ្នាំ កម្មករនិយោជិតក៏ទទួលបាននូវប្រាក់បំណាច់អតីតភាពការងារចំនួន ៥% បន្ថែមទៀតនៅរៀងរាល់ ៦ខែម្តង ហើយក្នុងពេលធ្វើការ កម្មករនិយោជិតទាំងអស់ទទួលបាននូវការធានារ៉ាប់រងពីគ្រោះថ្នាក់ការងារ និងការធានារ៉ាប់រងសុខភាពផងដែរ ខណៈពេលដែលដល់អាយុចូលនិវត្តន៍ កម្មករនិយោជិតទាំងអស់ក៏នឹងទទួលបាននូវប្រាក់សោធននិវត្តន៍ថែមទៀត។
សមាគមខាងលើបញ្ជាក់ថា ចំពោះការកំណត់ប្រាក់ឈ្នួលអប្បបរមា កម្ពុជាមានយន្តការលក្ខណវិនិច្ឆ័យបែបសង្គម និងសេដ្ឋកិច្ចច្បាស់លាស់ទៅលើស្ថានភាពគ្រួសារ អត្រាអតិផរណា និងការចំណាយក្នុងការរស់នៅ ចំណែកលក្ខណវិនិច្ឆ័យបែបសេដ្ឋកិច្ច គឺកម្ពុជាមានការវាយតម្លៃទៅលើផលិតភាពការងារ ភាពប្រកួតប្រជែងរបស់ប្រទេស បម្រែបម្រួលទីផ្សារការងារ និងកម្រិតនៃប្រាក់ចំណេញរបស់វិស័យមួយនេះផងដែរ។
ការចេញលិខិតបំភ្លឺនេះ ធ្វើឡើងបន្ទាប់ពីមានការលើកឡើងអំពីប្រាក់ឈ្នួលរបស់កម្មករនិយោជិតនៅកម្ពុជាថាមានកម្រិតតិចតួចដែលមិនអាចឱ្យកម្មករទាំងនោះរស់នៅក្នុងភាពសមរម្យ និងថ្លៃថ្នូរសព្វថ្ងៃនេះ។
ក្នុងពិធីជួបជាមួយកម្មករនិយោជិតកាលពីថ្ងៃទី២៩ ខែសីហា ឆ្នាំ២០២៣ នាយករដ្ឋមន្ត្រីតពូជថ្មីលោក ហ៊ុន ម៉ាណែត បានបញ្ជាឱ្យរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងក្រុមប្រឹក្សាជាតិប្រាក់ឈ្នួលអប្បបរមា ពិភាក្សាគ្នាដំឡើងប្រាក់ឈ្នួលអប្បបរមាជូនកម្មករនិយោជិតក្នុងវិស័យផ្នែកវាយនភណ្ឌកាត់ដេរសម្រាប់ឆ្នាំ២០២៤ ឱ្យបានមុនបុណ្យភ្ជុំបិណ្ឌ ទោះតិច ឬច្រើនក៏ដោយ។
ក្រោយពីបញ្ជារបស់លោក ហ៊ុន ម៉ាណែត ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំជាលើកទី៣ កាលពីថ្ងៃទី៤ ខែកញ្ញា ឆ្នាំ២០២៣ ដើម្បីពិភាក្សាអំពីការដំឡើងប្រាក់ឈ្នួលអប្បបរមាផ្នែកវាយនភណ្ឌកាត់ដេរសម្រាប់ឆ្នាំ២០២៤ ក្នុងនោះតំណាងភាគីកម្មករនិយោជិតបានលើកឡើងនូវតួលេខចំនួន ២១៥ដុល្លារអាមេរិក ខណៈតំណាងភាគីនិយោជកបានលើកឡើងនូវតួលេខចំនួន ២០១ដុល្លារ ដូច្នេះតំណាងភាគីនិយោជកសម្រេចកំណត់ប្រាក់ឈ្នួលទៅដល់កម្មករនិយោជិតសម្រាប់ឆ្នាំ២០២៤ ត្រឹមតែ ១ដុល្លារអាមេរិកប៉ុណ្ណោះ។
ទាក់ទិននឹងបញ្ហានេះ ទំព័រហ្វេសប៊ុកឈ្មោះ The Kanitha Show បានលើកឡើងកាលពីថ្ងៃទី១០ ខែកញ្ញា នេះថា ប្រាក់ឈ្នួលអប្បបរមាសម្រាប់កម្មករនិយោជិតនៅកម្ពុជាគួរតែទទួលបាន ២១៣ដុល្លារអាមេរិក ព្រោះថាក្រោមកិច្ចព្រមព្រៀងពាណិជ្ជកម្មសេរីកម្ពុជា-ចិន នាពេលកន្លងមក ថៅកែរោងចក្រទទួលបានផលចំណេញច្រើនណាស់ ដោយសារការនាំចូលវត្ថុធាតុដើមទៅកម្ពុជាមិនចាំបាច់បង់ពន្ធឱ្យរដ្ឋាភិបាលកម្ពុជាឡើយ។
ទំព័រហ្វេសប៊ុកមួយនេះបញ្ជាក់ថា ការកំណត់ប្រាក់ឈ្នួលអប្បបរមា ២១៣ដុល្លារនេះមិនមែនជាចំនួនច្រើនទេ គ្រាន់តែជាតួលេខសម្រុះសម្រួលគ្នាប៉ុណ្ណោះ ព្រោះចំនួនប្រាក់ឈ្នួលកម្រិតនេះស្ទើរតែមិនអាចឱ្យកម្មករនិយោជិតរស់ផង ដូច្នេះក្រសួងការងារ គួរតែកំណត់តួលេខ ២១៣ដុល្លារនេះសម្រាប់កំណត់ជាប្រាក់ឈ្នួលអប្បបរមាក្នុងឆ្នាំ២០២៤ ខាងមុខនេះ។
ទាក់ទិននឹងបញ្ហានេះ អ្នកគ្រប់គ្រងផ្នែកការងាររបស់អង្គការសង់ត្រាល់ លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី១២ កញ្ញា នេះថា ការលើកទ្បើងពីកម្រិតចំណេញថ្នាក់វិស័យគឺជារឿងរសើបបំផុតសម្រាប់ភាគីថៅកែរោងចក្រ ដូច្នេះដើម្បីធានានូវតម្លាភាព គឺទាមទារឱ្យភាគីក្រុមហ៊ុនបង្ហាញនូវទិន្នន័យអំពីកម្រិតចំណេញរបស់ពួកគេ ដើម្បីធានាការបែងចែកប្រាក់ចំណេញទាំងនោះទៅដល់កម្មករនិយោជិតក្នុងការកំណត់ជាប្រាក់ឈ្នួលអប្បបរមាឱ្យបានសមរម្យ។
លោក ឃុន ថារ៉ូ លើកឡើងថា ជារួម ការអនុគ្រោះពន្ធលើមុខទំនិញ និងវត្ថុធាតុដើម ការផ្គត់ផ្គង់វិស័យឧស្សាហកម្មកាត់ដេរ ភាគច្រើនគឺនាំចូលពីប្រទេសចិន ដោយមិនបង់ពន្ធនោះទេ ដែលធ្វើឱ្យភាគីក្រុមហ៊ុនមានលទ្ធភាពចំណេញច្រើន ព្រោះថាបើផ្អែកតាមការសិក្សាស្រាវជ្រាវ ប្រសិនបើក្រុមហ៊ុនអ្នកបញ្ជាទិញ និងថៅកែរោងចក្រគ្រាន់តែធ្វើការបែងចែកបន្ថែមនៃប្រាក់ចំណេញតែ ០,៥០ដុល្លារអាមេរិកក្នុងតម្លៃទំនិញសម្លៀកបំពាក់ ស្បែកជើង ដែលខ្លួនលក់នៅលើទីផ្សារ វានឹងអាចឱ្យកម្មករទទួលបានប្រាក់ឈ្នួលខ្ពស់ដែលអាចឱ្យពួកគេរស់នៅក្នុងជីវភាពសមរម្យ មិនមែនត្រដាបត្រដួសដូចសព្វថ្ងៃនេះទេ។
ប្រាក់ឈ្នួលអប្បបរមាកម្មករនិយោជិតខាងវិស័យកាត់ដេរមានចំនួន ២០០ដុល្លារអាមេរិកក្នុង ១ខែសម្រាប់ឆ្នាំ២០២៣ ខណៈឆ្នាំ២០២៤ នេះ ស្ថិតក្នុងការពិភាក្សានៅឡើយ ក្នុងនោះភាគីក្រុមហ៊ុនបានកំណត់ ២០១ដុល្លារអាមេរិក ខណៈភាគីកម្មករកំណត់ ២១៥ដុល្លារអាមេរិក ដូច្នេះគេកំពុងរង់ចាំមើលថា តើក្រសួងការងារ នឹងកំណត់យកតួលេខមួយណាក្នុងចំណោមតួលេខទាំងពីរខាងលើនេះ៕