 បានស្នើទៅគណៈកម្មាធិការបេតិកភណ្ឌពិភពលោក ពិនិត្យ និងស្រាវជ្រាវករណីដែលរដ្ឋាភិបាលកម្ពុជាបានបណ្ដេញពលរដ្ឋចេញទាំងបង្ខំនៅតំបន់អង្គរវត្ត ក្រោមលេសថាដើម្បីអភិរក្ស។){kind=link}
អង្គការលើកលែងទោសអន្តរជាតិ (Amnesty International) បានស្នើទៅគណៈកម្មាធិការបេតិកភណ្ឌពិភពលោក ពិនិត្យ និងស្រាវជ្រាវករណីដែលរដ្ឋាភិបាលកម្ពុជាបានបណ្ដេញពលរដ្ឋចេញទាំងបង្ខំនៅតំបន់អង្គរវត្ត ក្រោមលេសថាដើម្បីអភិរក្ស។
ការស្នើនេះ បន្ទាប់ពីអង្គការលើកលែងទោសអន្តរជាតិបានដាក់បញ្ជូនលទ្ធផលស្រាវជ្រាវបឋមទៅអង្គការយូណេស្កូ (UNESCO) មុនសម័យប្រជុំនៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត ចាប់ពីថ្ងៃទី១០ ដល់ថ្ងៃទី២៥ ខែកញ្ញា ខាងមុខនេះ។
លោក Monster Ferrer អនុប្រធានប្រចាំតំបន់នៃអង្គការលើកលែងទោសអន្តរជាតិ បានលើកឡើងនៅក្នុងសេចក្ដីថ្លែងការណ៍របស់ខ្លួនចុះថ្ងៃទី១០ ខែកញ្ញា ឆ្នាំ២០២៣ នេះថា យោងតាមរបាយការណ៍ដែលខ្លួនបានចងក្រងនោះ រដ្ឋាភិបាលកម្ពុជាកំពុងបន្តបណ្ដេញពលរដ្ឋចំនួន ១ម៉ឺនគ្រួសារដែលរស់នៅជុំវិញប្រាសាទអង្គរវត្តចេញទាំងបង្ខំ ក្រោមលេសថាដើម្បីអភិរក្ស។ ដូច្នេះ គណៈកម្មាធិការបេតិកភណ្ឌពិភពលោកក្នុងនាមជាអ្នកអភិរក្សនោះ មិនត្រូវព្រងើយកន្តើយចំពោះការបណ្តេញពលរដ្ឋចេញពីលំនៅឋានទាំងបង្ខំនៅតំបន់ជុំវិញអង្គរវត្តឡើយ។
អង្គការដដែលនេះ ក៏បានលើកយកអំណះអំណាងរបស់រដ្ឋាភិបាលកម្ពុជា ដែលបានអះអាងថា ការបណ្ដេញពលរដ្ឋចេញនេះដោយសារពួកគេរស់នៅខុសច្បាប់ ដែលផ្ទុយពីអ្នកដែលមានការតាំងទីលំនៅជាប្រពៃណី។
លោក Monster អះអាងថា រដ្ឋាភិបាលកម្ពុជាមិនបានបង្ហាញ និងផ្តល់ភាពច្បាស់លាស់ថា អ្នកណាមានសិទ្ធិរស់នៅស្របច្បាប់ឡើយ ស្របពេលមនុស្សជាច្រើនត្រូវបង្ខំចិត្តចាកចេញ បើទោះបីជាគ្រួសាររបស់ពួកគេរស់នៅជុំវិញប្រាសាទអង្គរអស់ជាច្រើនជំនាន់មកហើយក៏ដោយ។
មួយវិញទៀត អង្គការនេះក៏បានចងក្រងឯកសារអំពីស្ថានភាពក្រីក្ររបស់ពលរដ្ឋដែលទៅតាំងទីលំនៅថ្មី ដោយមិនមានលំនៅឋាន ឬបង្គន់អនាម័យ ខណៈប្រជាពលរដ្ឋដែលត្រូវរដ្ឋាភិបាលកម្ពុជាបណ្តេញចេញនោះ ពួកគេសាងសង់ផ្ទះផ្ទាល់ខ្លួនឯង។
អង្គការលើកលែងទោសអន្តរជាតិចាត់ទុកការបណ្ដេញពលរដ្ឋចេញពីតំបន់ឧទ្យានអង្គរទាំងបង្ខំរបស់រដ្ឋាភិបាលកម្ពុជា ថាធ្វើឡើងផ្ទុយនឹងស្តង់ដារសិទ្ធិមនុស្សអន្តរជាតិ ដែលចែងថា ទីតាំងថ្មីត្រូវតែរួមបញ្ចូលការផ្គត់ផ្គង់ទឹកស្អាត លំនៅឋាន និងអនាម័យ មុនពេលមនុស្សត្រូវផ្លាស់ទីលំនៅ។
កាលពីអំឡុងឆ្នាំ២០២២ រដ្ឋាភិបាលកម្ពុជាបានតម្រូវឲ្យពលរដ្ឋរស់នៅជុំវិញតំបន់អង្គរ ត្រូវរុះរើផ្ទះសម្បែងទៅតំបន់រុនតាឯក វិញ ក្រោមលេសថា អ្នកភូមិទាំងនោះរស់នៅខុសច្បាប់។
ក្រៅពីឲ្យរុះរើហើយ កន្លងទៅ អតីតនាយករដ្ឋមន្ត្រីលោក ហ៊ុន សែន ក៏បានគំរាមពលរដ្ឋរស់នៅតំបន់អង្គរថា ប្រសិនបើពលរដ្ឋមិនព្រមទទួលយកសំណងដីឡូត៍នៅតំបន់រុនតាឯក អាជ្ញាធរនឹងបណ្ដេញពួកគាត់ចេញដោយមិនផ្តល់សំណងអ្វីទាំងអស់។
ជុំវិញរឿងនេះ លោក ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានក្នុងស្រុកថា ការលើកឡើងរបស់អង្គការលើកលែងទោសអន្តរជាតិដោយចោទអាជ្ញាធរកម្ពុជាថាបានបណ្ដេញចេញដោយបង្ខំមកលើពលរដ្ឋនៅតំបន់អង្គរ គឺលោកមិនដឹងថាអង្គការអន្តរជាតិនេះបានសហការ ឬធ្វើការជាមួយស្ថាប័នផ្លូវការណាមួយដែលពាក់ព័ន្ធរឿងនេះទេ។
លោកបានបន្តថា ក្នុងនាមក្រសួងវប្បធម៌ដែលជាស្ថាប័នមួយនៅក្នុងគណៈកម្មាធិការតម្រង់ទិសដើម្បីដោះស្រាយបញ្ហាសំណង់ខុសច្បាប់នៅតំបន់ជុំវិញអង្គរ លោកសុំបដិសេធចំពោះការលើកឡើងបែបនេះ ព្រោះពលរដ្ឋដែលចាកចេញ គឺពួកគាត់សុទ្ធតែស្ម័គ្រចិត្តទាំងអស់។
តែយ៉ាងណា ពលរដ្ឋដែលផ្លាស់ពីតំបន់អង្គរទៅរស់នៅតំបន់អភិវឌ្ឍន៍រុនតាឯក ក្នុងស្រុកបន្ទាយស្រី ខេត្តសៀមរាប បានត្អូញត្អែរពីផលលំបាកដោយសារទឹកជន់លិចផ្ទះនៅរដូវវស្សា និងខ្វះខាតផ្នែកជីវភាព ដោយមិនអាចបង្កើតមុខរបរបាន ព្រោះតែគ្មានរោងចក្រ សហគ្រាស និងផ្សារ ជាដើម ដែលជាបន្ទុកមួយដ៏ធំបន្ថែមទៀតសម្រាប់អ្នករស់នៅតំបន់អភិវឌ្ឍន៍រុនតាឯកនេះ។ ក្រៅពីជួបបញ្ហាផ្នែកជីវភាព និងទឹកលិចផ្ទះ ពួកគេបានស្នើទៅអាជ្ញាធរពន្លឿនការរៀបចំប្រព័ន្ធលូរំដោះទឹកឲ្យបានឆាប់ ដើម្បីបញ្ចៀសជំនន់ទឹកភ្លៀងដែលនឹងកើតមានឡើងក្នុងរដូវវស្សានេះ៕