សហជីពសុំដំឡើងប្រាក់ឈ្នួលកម្មករ ១៣ដុល្លារ តែរដ្ឋាភិបាលយល់ព្រមឲ្យឡើងតែ ២ដុល្លារជាតួលេខប្រហាក់ប្រហែលនឹងការចង់បានរបស់និយោជក ដែលព្រមឡើងត្រឹមតែ ១ដុល្លារ ៥០សេនប៉ុណ្ណោះ ខណៈកិច្ចប្រជុំពិភាក្សាសម្រេចនឹងធ្វើនៅថ្ងៃទី២៨ ខែកញ្ញា ខាងមុខនេះ។
សេចក្ដីប្រកាសព័ត៌មានចុះថ្ងៃទី១៨ ខែកញ្ញា ឆ្នាំ២០២៣ របស់ក្រសួងការងារ និងបណ្ដុះបណ្ដាលវិជ្ជាជីវៈ ឲ្យដឹងថា នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាលើកទី៥ នាថ្ងៃទី១៨ ខែកញ្ញា នេះមានតំណាងសហជីពចូលរួមចំនួន ១៧រូប និងភាគីនិយោជក រួមទាំងភាគីរដ្ឋាភិបាល។
ក្នុងកិច្ចប្រជុំនោះ ភាគីទាំងអស់បានលើកយកតួលេខប្រាក់ឈ្នួលកម្មករផ្សេងៗគ្នា ដោយភាគីតំណាងកម្មករ គឺសហជីពចំនួន ១២ ទាមទារឲ្យដំឡើងប្រាក់ឈ្នួល ៤ដុល្លារ រីឯសហជីព ៥ ទៀត ទាមទារឲ្យដំឡើង ១៣ដុល្លារបន្ថែមពីលើប្រាក់ខែគោល ២០០ដុល្លារដែលមានស្រាប់។
ចំណែកភាគីរដ្ឋាភិបាលវិញ សម្រេចឲ្យដំឡើងតែ ២ដុល្លារប្រហាក់ប្រហែលនឹងនិយោជកដែលយល់ព្រមដំឡើងតែ ១ដុល្លារ ៥០សេនបន្ថែមពីលើប្រាក់ខែគោល ២០០ដុល្លារ។
ក្រសួងការងារថា តួលេខប្រាក់ឈ្នួលគោលកម្មករដែលភាគីទាំងអស់បានលើកយកមកពិភាក្សាកាលពីថ្ងៃទី១៨ ខែកញ្ញា ឆ្នាំ២០២៣ ជាមួយអំណះអំណាងរៀងៗខ្លួន។ តែយ៉ាងណា កិច្ចពិភាក្សាគ្នាលើប្រាក់ឈ្នួលនេះ ភាគីពាក់ព័ន្ធទាំងអស់នឹងប្រជុំសម្រេចចុងក្រោយនៅថ្ងៃទី២៨ ខែកញ្ញា ឆ្នាំ២០២៣ ខាងមុខនេះ។
ក្នុងពិធីជួបសំណេះសំណាលជាមួយកម្មករជិត ២ម៉ឺននាក់នៅខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី៣០ ខែសីហា លោក ហ៊ុន ម៉ាណែត នាយករដ្ឋមន្ត្រីថ្មី បានលើកឡើងថា នឹងដំឡើងប្រាក់ឈ្នួលអប្បបរមាលើប្រាក់ខែបច្ចុប្បន្ន ២០០ដុល្លារក្នុងមួយខែសម្រាប់វិស័យកាត់ដេរ វាយនភណ្ឌ និងផលិតស្បែកជើងនៅឆ្នាំ២០២៤ ខាងមុខនេះ បើទោះការដំឡើងប្រាក់ឈ្នួលឲ្យកម្មករនិយោជិតនេះបានតិច ឬច្រើនក្តី។
ប្រធានសហភាពការងារកម្ពុជាលោក អាត់ ធន់ បានប្រាប់សារព័ត៌មានក្នុងស្រុកបន្ទាប់ពីបញ្ចប់កិច្ចប្រជុំប្រាក់ឈ្នួលនាថ្ងៃទី១៨ ខែកញ្ញា ថា ជារឿងថ្មីមួយទៀតនៃកិច្ចប្រជុំពិភាក្សានេះ ដោយសារភាគីរដ្ឋាភិបាលបង្ហាញពីតួលេខដែលឲ្យដំឡើងប្រាក់ឈ្នួល ខណៈកន្លងមក លោកថាមិនដែលមាននោះទេ។ មួយវិញទៀត លោកថាកន្លងទៅ ភាគីសហជីពធ្លាប់ស្នើទៅរដ្ឋាភិបាលកុំឲ្យឈរ ឬលម្អៀងទៅខាងនិយោជក ធ្វើឲ្យបាត់ផលប្រយោជន៍កម្មករនិយោជិត។
លោក អាត់ ធន់ ថាមូលហេតុដែលគាត់លើកឡើងដូច្នេះ ដោយកាលពីមុន រដ្ឋាភិបាលបានជួយនិយោជកកាត់បន្ថយថ្ងៃធ្វើការ ដូចជាថ្ងៃបុណ្យចំថ្ងៃអាទិត្យ ខណៈបច្ចុប្បន្ន លោកថាភាគីរដ្ឋាភិបាលសន្យាថានឹងមិនធ្វើឲ្យប៉ះពាល់ប្រយោជន៍កម្មករទៀតទេ។
អំឡុងពេលដែលភាគីពាក់ព័ន្ធប្រជុំពិភាក្សាប្រាក់ឈ្នួលអប្បបរមានោះ ក្រុមកម្មករដែលកំពុងបម្រើការងារតាមរោងចក្រនៅកម្ពុជា បាននាំគ្នាធ្វើយុទ្ធនាការលើកបដាទាមទារឲ្យថៅកែដំឡើងប្រាក់ឈ្នួល ១៥ដុល្លារបន្ថែមលើប្រាក់ឈ្នួលគោល ២០០ដុល្លារនៅឆ្នាំ២០២៤ ខាងមុខ។
ការទាមទារដំឡើងនេះ ដោយពួកគេលើកហេតុផលថា ដើម្បីបានត្រឹមតែរស់សមរម្យ និងដោះស្រាយបញ្ហាជីវភាពប្រចាំថ្ងៃតែប៉ុណ្ណោះ ដោយមិនមែនយកទៅធ្វើមានធ្វើបាននោះឡើយ៕