អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា (អ.គ.ល.ក) ព្រមានចាត់វិធានការទីតាំងល្បែងផ្សងសំណាងដែលបានបង្កប់សកម្មភាពល្បែងស៊ីសងខុសច្បាប់ផ្សេងៗ ដូចជាល្បែងឆ្នោតកន្ទុយលេខ និងល្បែងខេនណូ ជាដើម។
គណៈកម្មការគ្រប់គ្រងល្បែងពាណិជ្ជកម្មកម្ពុជា បានចេញសេចក្តីណែនាំមួយស្ដីពីការធ្វើប្រតិបត្តិការល្បែងផ្សងសំណាងនៅកម្ពុជា ដែលត្រូវបានផ្សព្វផ្សាយនៅថ្ងៃទី៦ តុលា នេះថាមានភ្នាក់ងារលក់ឆ្នោតរបស់ក្រុមហ៊ុនល្បែងផ្សងសំណាង និងក្រុមជនខិលខូចមួយចំនួន បានធ្វើសកម្មភាពលួចលាក់បង្កប់លេងល្បែងស៊ីសង ដូចជា ឆ្នោតកន្ទុយលេខ ល្បែងខេនណូ (Keno) ខុសច្បាប់ និងប្រភេទល្បែងដទៃទៀតដែលកំពុងជ្រកក្រោមអាជ្ញាប័ណ្ណល្បែងផ្សងសំណាងសព្វថ្ងៃនេះ ដែលធ្វើឱ្យប៉ះពាល់យ៉ាងធ្ងន់ធ្ងរដល់សុវត្ថិភាព សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។
គណៈកម្មាធិការខាងលើលើកឡើងថា សេចក្តីណែនាំនេះមានគោលបំណងជំរុញឱ្យក្រុមហ៊ុនល្បែងផ្សងសំណាងទាំងអស់ ត្រូវធ្វើប្រតិបត្តិការអាជីវកម្មនៅទីតាំងដែលមានបញ្ជាក់នៅលើអាជ្ញាប័ណ្ណរបស់ពួកគេ។ ជាងនេះទៀត ក្រុមហ៊ុនល្បែងផ្សងសំណាងទាំងនោះក៏ត្រូវដាក់តាំងបង្ហាញអាជ្ញាប័ណ្ណល្បែងផ្សងសំណាងច្បាប់ដើមនៅទីតាំងធ្វើអាជីវកម្មរបស់ខ្លួនផងដែរ។
បន្ថែមពីនេះ ត្រូវដំណើរការតែប្រភេទល្បែង និងឧបករណ៍ល្បែងដែលមានការអនុញ្ញាតពីគណៈកម្មការគ្រប់គ្រងល្បែងពាណិជ្ជកម្មកម្ពុជាប៉ុណ្ណោះ ដោយហាមឃាត់ដាច់ខាតនូវរាល់សកម្មភាពលួចលាក់បង្កប់ការលេងល្បែងស៊ីសង ឆ្នោតកន្ទុយលេខ ល្បែងខេនណូ (Keno) ខុសច្បាប់ និងប្រភេទល្បែងដទៃទៀតជាកំហិត។
អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា បញ្ជាក់ថា ក្នុងករណីក្រុមហ៊ុនល្បែងផ្សងសំណាងមិនអនុវត្តតាមសេចក្ដីណែនាំនេះ ត្រូវចាត់ទុកថាបានប្រព្រឹត្តល្មើសទៅនឹងច្បាប់ស្ដីពីការគ្រប់គ្រងល្បែងពាណិជ្ជកម្ម ដែលត្រូវប្រឈមនឹងការដាក់ទណ្ឌកម្មរដ្ឋបាល ឬពិន័យអន្តរការណ៍ស្របតាមការកំណត់ដោយច្បាប់ និងលិខិតបទដ្ឋានគតិយុត្តិជាធរមាន។
ការចេញសេចក្តីណែនាំនេះ ធ្វើឡើងដើម្បីទប់ស្កាត់ល្បែងស៊ីសងខុសច្បាប់ដែលកំពុងជ្រកក្រោមស្លាកល្បែងផ្សងសំណាងរបស់ក្រុមហ៊ុនល្បែងមួយចំនួននៅកម្ពុជាសព្វថ្ងៃនេះ។
កាលពីថ្ងៃទី២១ ខែតុលា ឆ្នាំ២០២១ គណៈកម្មការគ្រប់គ្រងល្បែងពាណិជ្ជកម្មកម្ពុជា បានចេញសេចក្តីប្រកាសមួយស្ដីពីនីតិវិធី បែបបទ និងលក្ខខណ្ឌនៃការផ្ដល់អាជ្ញាប័ណ្ណល្បែងផ្សងសំណាង ក្នុងគោលដៅធានាឱ្យការធ្វើប្រតិបត្តិការរបស់ក្រុមហ៊ុនល្បែងផ្សងសំណាងអាចប្រព្រឹត្តទៅបានស្របតាមច្បាប់ និងស្របទៅនឹងលិខិតបទដ្ឋានគតិយុត្តិនានា។
ទាក់ទិននឹងបញ្ហានេះ អតីតនាយករដ្ឋមន្ត្រីខ្មែរដែលត្រូវជាឪពុកបង្កើតរបស់នាយករដ្ឋមន្ត្រីកម្ពុជាបច្ចុប្បន្ន គឺលោក ហ៊ុន សែន កាលពីថ្ងៃទី១៧ ខែកញ្ញា ឆ្នាំ២០២២ បានចេញបទបញ្ជាទៅកាន់មន្ត្រីថ្នាក់ក្រោមជាតិ និងអាជ្ញាធរពាក់ព័ន្ធ ឱ្យបង្ក្រាបឱ្យអស់នូវល្បែងស៊ីសងខុសច្បាប់នានាដែលមានជាង ២ពាន់កន្លែងកន្លងទៅនៅក្នុងខេត្តកណ្តាល និងរាជធានីភ្នំពេញសព្វថ្ងៃនេះ ប៉ុន្តែទីតាំងល្បែងស្របច្បាប់ដែលលួចលាក់លេងល្បែងខុសច្បាប់ទាំងនោះ នៅតែអាចដំណើរការបានដដែល។
ទាក់ទិននឹងបញ្ហានេះ ស្នងការដ្ឋាននគរបាលរាជធានីភ្នំពេញ បានបង្ហាញរបាយការណ៍របស់ខ្លួនកាលពីពេលកន្លងទៅថា អាជ្ញាធររាជធានីភ្នំពេញបង្ក្រាបបានទីតាំងបនល្បែងខុសច្បាប់ចំនួន ៣៦កន្លែង រួមមានកន្លែងចាក់ឆ្នោតវៀតណាម និងកន្លែងចាក់បាល់តាមប្រព័ន្ធអ៊ីនធឺណិត ជាដើម ប៉ុន្តែសមត្ថកិច្ចមិនបានបង្ហាញពីការដកហូតអាជ្ញាប័ណ្ណទីតាំងល្បែងស្របច្បាប់ដែលបានបង្កប់ការលេងល្បែងខុសច្បាប់នោះទេ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៦ តុលា នេះថា អ្នកដែលនៅពីក្រោយល្បែងស៊ីសងខុសច្បាប់ធំៗនៅកម្ពុជា គឺសុទ្ធសឹងតែជាបក្ខពួក និងជាសាច់ញាតិរបស់គ្រួសារ «ហ៊ុន» ទាំងអស់ ក្នុងនោះ ដូចជាក្មួយប្រុសបង្កើតលោក ហ៊ុន សែន គឺលោក ហ៊ុន តូ ជាដើម។
លោក គឹម សុខ លើកឡើងថា ឧកញ៉ា ហ៊ុន តូ កំពុងគ្រប់គ្រងបនល្បែងនៅខេត្តព្រះសីហនុ និងគ្រប់គ្រងល្បែងស៊ីសងខុសច្បាប់នៅតាមបណ្តាខេត្តជាច្រើនផ្សេងៗទៀត ដូចជា ល្បែងចាក់កន្ទុយលេខ ល្បែងប្រជល់មាន់តាមអនឡាញ និងប្រតិបត្តិការធនាគារងងឹត ជាដើម។
ប្រធានវេទិកាពលរដ្ឋរូបនេះបញ្ជាក់ថា លោក ហ៊ុន សែន បានរៀបចំមនុស្សឱ្យការពារអំពើឧក្រិដ្ឋកម្ម ដូចជា ល្បែងស៊ីសងខុសច្បាប់ ការលាងលុយកខ្វក់ និងការជួញដូរមនុស្ស ជាដើម រួចអស់ហើយ ក្នុងនោះមានដូចជា នាយកមន្ទីរប្រឆាំងបទល្មើសគ្រឿងញៀនលោក ឡឹក វណ្ណៈ និងអគ្គស្នងការរងនៃអគ្គស្នងការដ្ឋាននគរបាលជាតិទទួលបន្ទុកផែនការប្រឆាំងគ្រឿងញៀនលោក ម៉ក់ ជីតូ ជាដើម ដែលធ្វើឱ្យមន្ត្រីជំនាញថ្នាក់ក្រោមមិនអាចអនុវត្តផែនការបោសសម្អាតអំពើឧក្រិដ្ឋកម្មទាំងនោះបានឡើយរហូតដល់ពេលនេះ។
លោក គឹម សុខ គូសបញ្ជាក់ថា បើចង់បង្ក្រាបល្បែងស៊ីសង ទាល់តែលោក ហ៊ុន ម៉ាណែត ហ៊ានអនុវត្តច្បាប់ចាប់សមាជិកគ្រួសារហ៊ុនដែលពាក់ព័ន្ធចូលគុក ដូចជាលោក ហ៊ុន តូ ជាដើម ព្រោះថានៅកម្ពុជាគ្មានជំនួញអបាយមុខណាមួយទាំងតូចទាំងធំ អាចដំណើរការរលូនទៅបាន ក្រៅពីក្រសែភ្នែកគ្រួសារហ៊ុនឡើយ ទោះគ្រឿងញៀន និងគ្រឿងស្រវឹងក៏ដោយ កុំថាឡើយដល់ល្បែងស៊ីសងខុសច្បាប់នោះ៕