អាជ្ញាធរខេត្តព្រះសីហនុ បានបណ្តេញជនជាតិវៀតណាម ចំនួន ២៣១នាក់ ចេញពីកម្ពុជា តាមច្រកអន្តរជាតិព្រែកចាក បន្ទាប់ពីរកឃើញថា ពួកគេមានជាប់ពាក់ព័ន្ធពីបទល្មើសឆបោកតាមអនឡាញដែលបានប្រព្រឹត្តនៅ ៣ទីតាំងផ្សេងគ្នាក្នុងខេត្តព្រះសីហនុ។
យោងតាមការចុះផ្សាយរបស់អគ្គនាយកដ្ឋានអន្តោប្រវេសន៍នៅថ្ងៃទី២១ ខែមេសា ឆ្នាំ២០២៤ ឲ្យដឹងថា ប្រតិបត្តិការបង្ក្រាបបទល្មើសតាមប្រព័ន្ធអនឡាញក្នុងខេត្តព្រះសីហនុ បានចាប់ផ្តើមពីថ្ងៃទី១២ ខែមីនា ដល់ថ្ងៃទី៥ ខែមេសា លើទីតាំងចំនួន៣ ដោយចាប់បានជនជាតិវៀតណាម ចំនួន ២៣១នាក់ ក្នុងនោះមានស្រីចំនួន ៤១នាក់។
ប្រភពដដែលអះអាងថា ទីតាំងដែលសមត្ថកិច្ចបានចុះបង្ក្រាប គឺទី១ នៅចំណុចអតីតកាស៊ីណូ ភែរីដល អាយលែន ដោយឃាត់មនុស្សបានចំនួន ១០៨នាក់ ចំណែកទីតាំងទី២ នៅចំណុចថ្មយក្ស ស្ថិតនៅសង្កាត់លេខ៣ ដោយឃាត់មនុស្សបានចំនួន ៣៥នាក់ និងទីតាំងទី៣ នៅសណ្ឋាគារ ធាន អីហ៊ូ អ៊ីនធើណេមិន ដោយឃាត់មនុស្សបានចំនួន ៨៨នាក់។ ជនជាតិវៀតណាម ដែលសមត្ថកិច្ចចាប់បាន ត្រូវបណ្តេញចេញពីកម្ពុជាទាំងអស់តាមច្រកអន្តរជាតិព្រែកចាក។
ទាក់ទងនឹងបទល្មើសតាមអនឡាញនេះ កាលពីថ្ងៃទី១៣ ខែមេសា ឆ្នាំ២០២៤ រដ្ឋាភិបាលកម្ពុជាបានធ្វើបត្យាប័នបញ្ជូនជនជាតិចិន ចំនួន ១៣០នាក់ទៅប្រទេសកំណើតវិញ ដោយសង្ស័យជាក្រុមឧក្រិដ្ឋកម្មអនឡាញក្នុងចំណោមមនុស្សជាង ១ពាន់នាក់ ដែលសមត្ថកិច្ចកម្ពុជាបានចាប់ខ្លួនក្នុងប្រតិបត្តិការបង្ក្រាបល្បែងស៊ីសងអនឡាញនៅខេត្តព្រះសីហនុ។
ប្រភពដដែលបានលើកឡើងថា ជនជាតិចិន ១៣០នាក់នេះស្ថិតនៅក្នុងចង្កោមជនសង្ស័យសរុប ១០៣០នាក់ ដែលចិន និងកម្ពុជា កំពុងត្រៀមធ្វើបត្យាប័នបញ្ជូនទៅប្រទេសចិន វិញជាបន្តបន្ទាប់។
ក្រសួងសន្តិសុខសាធារណៈចិន មានឆន្ទៈពង្រឹងការអនុវត្តច្បាប់ជាមួយប្រទេសជាដៃគូអាស៊ាន ដើម្បីទប់ស្កាត់បទល្មើសល្បែងស៊ីសងអនឡាញ ការក្លែងបន្លំតាមប្រព័ន្ធទូរគមនាគមន៍ និងឧក្រិដ្ឋកម្មអនឡាញផ្សេងៗ។
រដ្ឋមន្ត្រីក្រសួងមហាផ្ទៃលោក ស សុខា លើកឡើងកន្លងមកថា ថ្វីត្បិតតែជនល្មើសប្រព្រឹត្តទង្វើឧក្រិដ្ឋនៅកម្ពុជា ប៉ុន្តែកម្រៃនៃអ្នកទទួលបានមិនមែននៅកម្ពុជាទេ ចុងក្រោយគឺពួកគេបានផ្ទេរលុយទាំងនោះទៅប្រទេសប៉ែកខាងអឺរ៉ុប វិញទាំងអស់។ លោកថា រដ្ឋាភិបាលនៅតែមិនអាចកំណត់ពីភាពជាក់លាក់ទៅលើក្រុមឧក្រិដ្ឋជនទាំងនោះបាននៅឡើយទេ ដោយសារតែពួកគេនៅទីងងឹត ខណៈរដ្ឋាភិបាលនៅទីភ្លឺ ស្របពេលដែលជនល្មើសទាំងនោះបានដើរមួយជំហានមុនរដ្ឋាភិបាលទៅហើយនោះ។
ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយ៕