ម្ចាស់អាជីវកម្មមួយចំនួន ត្អូញត្អែរពីវិធានការប្រមូលពន្ធរបស់រដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត ថាវិធានការនេះកំពុងគាបសង្កត់អាជីវកម្មរបស់ពួកគេកាន់តែធ្ងន់ឡើងៗ ស្របពេលដែលមុខជំនួញរបស់ខ្លួនកំពុងប្រឈមនឹងបញ្ហា ប៉ុន្តែរដ្ឋាភិបាលគ្មានដំណោះស្រាយសម្រាប់ពួកគេទាល់តែសោះ។
ម្ចាស់អាជីវកម្មតាមបណ្តាខេត្តមួយចំនួន ដូចជាខេត្តកណ្តាល ខេត្តសៀមរាប និងខេត្តព្រះសីហនុ ជាដើម ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ ដើម្បីសុវត្ថិភាពផ្ទាល់ខ្លួនកាលពីពេលថ្មីៗនេះថា ផែនការប្រមូលពន្ធរបស់រដ្ឋាភិបាលកម្ពុជានៅពេលនេះ បានក្លាយជាបន្ទុកយ៉ាងធ្ងន់ធ្ងរសម្រាប់ម្ចាស់អាជីវកម្មរបស់ពួកគាត់ ព្រោះថាពិតមែនតែគាត់ជាម្ចាស់អាជីវកម្មធំៗ ប៉ុន្តែមិនមែនពួកគាត់មានលុយសម្រាប់ប្រតិបត្តិអាជីវកម្មរបស់ខ្លួនទាំងស្រុងនោះទេ ក្នុងនោះក៏មានការខ្ចីបំណុលពីធនាគារដែរ ដើម្បីដំណើរការជំនួញរបស់ខ្លួន។
ប្រភពខាងលើរៀបរាប់ថា ក្រោយរដ្ឋាភិបាលរឹតត្បិតការប្រមូលពន្ធ ស្រាប់តែខាងធនាគារដែលពួកគេធ្លាប់ខ្ចីលុយ ក៏បានដំឡើងការប្រាក់រាល់កម្ចីទាំងអស់ផងដែរ ក្នុងនោះទំហំទឹកប្រាក់ដែលពួកគាត់ធ្លាប់ខ្ចីប្រមាណជា ៤ម៉ឺនដុល្លារអាមេរិកទៅ ៧ម៉ឺនដុល្លារអាមេរិក ដែលខាងធនាគារធ្លាប់កំណត់ការប្រាក់ត្រឹមតែ ០,៨៩ភាគរយ ទៅ ០,៩០ភាគរយ ស្រាប់តែធនាគារដំឡើងដល់ ១ភាគរយទៅវិញ ក្រោមហេតុផលថា ធនាគារត្រូវគិតទៅលើការបង់ពន្ធដែលរដ្ឋាភិបាលបានដាក់ចេញនូវវិធានការនៅពេលនេះ។
ម្ចាស់អាជីវកម្មខាងលើត្អូញត្អែរថា នៅពេលដែលធនាគារដំឡើងការប្រាក់បែបនេះ ពួកគាត់ដែលបានខ្ចីបំណុលពីធនាគារមកប្រកបអាជីវកម្ម ក៏ត្រូវតែដំឡើងថ្លៃអីវ៉ាន់របស់ខ្លួនដែរ ខណៈប្រជាពលរដ្ឋដែលធ្លាប់តែទិញអីវ៉ាន់របស់ពួកគាត់ បាននាំគ្នារអ៊ូរទាំពីការឡើងថ្លៃនេះ ខណៈម៉ូយដែលធ្លាប់តែកុម្ម៉ង់ទិញអីវ៉ាន់ច្រើនៗ ក៏មានការធ្លាក់ចុះជាបន្តបន្ទាប់ ក្រោមហេតុផលថា លក់មិនសូវដាច់។
ការអះអាងនេះ ធ្វើឡើងបន្ទាប់ពីរដ្ឋាភិបាលថ្មីរបស់កម្ពុជាដែលកំពុងដឹកនាំដោយលោក ហ៊ុន ម៉ាណែត បានដាក់ចេញនូវវិធានការនៃការប្រមូលពន្ធយ៉ាងតក់ក្រហល់ពីប្រជាពលរដ្ឋ ដែលជាហេតុធ្វើឱ្យម្ចាស់អាជីវកម្ម និងប្រជាពលរដ្ឋប្រឈមនឹងបញ្ហា។
មន្ត្រីជាន់ខ្ពស់របស់រដ្ឋាភិបាលលោក ហ៊ុន ម៉ាណែត ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៩ តុលា នេះថា អស់រយៈពេលជិត ២ខែមកហើយដែលលោក ហ៊ុន ម៉ាណែត បានឡើងកាន់តំណែងជានាយករដ្ឋមន្ត្រី ប៉ុន្តែនាយករដ្ឋមន្ត្រីថ្មីនេះមិនទាន់មានគោលនយោបាយអាទិភាពណាមួយក្នុងការជួយដោះស្រាយជីវភាពប្រជាពលរដ្ឋនៅឡើយទេ ដូចជាការបញ្ចុះថ្លៃសាំង និងការបញ្ចុះថ្លៃទំនិញលើទីផ្សារ ជាដើម។
ប្រភពដដែលលើកឡើងថា ក្នុងពេលដែលប្រជាពលរដ្ឋកំពុងតែជួបប្រទះការខ្វះខាតជីវភាព ជំពាក់បំណុលធនាគារវ័ណ្ឌក គ្មានលុយសម្រាប់ផ្គត់ផ្គង់ជីវភាព រដ្ឋាភិបាលលោក ហ៊ុន ម៉ាណែត មិនត្រឹមតែមិនបានជួយសម្រាលបន្ទុករបស់ពួកគេទេ តែបែរជាជំរិតឱ្យប្រជាពលរដ្ឋបង់ពន្ធលើអចលនទ្រព្យដែលជាការដាក់បន្ទុកទៅលើពួកគេកាន់តែខ្លាំងទៅវិញ។
ទាក់ទិននឹងបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ បានលើកឡើងកាលពីពេលថ្មីៗនេះថា ការចេញវិធានការរឹតបន្តឹងការប្រមូលពន្ធរបស់រដ្ឋាភិបាលកម្ពុជានៅពេលនេះ បានបង្ហាញថា រដ្ឋាភិបាលថ្មីនេះកំពុងខ្វះលុយសម្រាប់ប្រើប្រាស់ក្នុងការចំណាយរបស់ខ្លួនធ្ងន់ធ្ងរ ដូច្នេះលោកមិនរំពឹងថា សេដ្ឋកិច្ចកម្ពុជាអាចងើបពីឱនភាពបានទេ ក្នុងនោះប្រជាពលរដ្ឋ និងម្ចាស់អាជីវកម្មនានា ក៏នឹងរងនូវឥទ្ធិពលដ៏អាក្រក់ពីបញ្ហានេះដែរ។
ចំណែកអ្នកស្រាវជ្រាវការអភិវឌ្ឍសង្គម បណ្ឌិត មាស នី បានលើកឡើងកាលពីពេលថ្មីៗនេះដែរថា សេដ្ឋកិច្ចរបស់ប្រទេសកម្ពុជាក្នុងឆ្នាំ២០២៣ នេះ កំពុងប្រឈមនឹងការធ្លាក់ចុះធ្ងន់ធ្ងរ ព្រោះថាឆ្នាំ២០២៣ នេះ រដ្ឋាភិបាលកម្ពុជានៅខ្វះថវិការាប់ពាន់លានដុល្លារអាមេរិកទៀត ដើម្បីបង្គ្រប់ផែនការចំណាយរបស់ខ្លួន ដូច្នេះហើយការដាក់ផែនការរឹតបន្តឹងការប្រមូលពន្ធដើម្បីបង្គ្រប់ការចំណាយក្នុងឆ្នាំនេះ បានដាក់បន្ទុកលើសេដ្ឋកិច្ចរបស់កម្ពុជាដែលកំពុងធ្លាក់ចុះនៅពេលនេះកាន់តែខ្លាំង។
ដោយឡែកអតីតនាយកខុទ្ទកាល័យប្រធានគណបក្សសង្គ្រោះជាតិលោក មុត ចន្ថា បានលើកឡើងកាលពីពេលថ្មីៗនេះថា នាយករដ្ឋមន្ត្រីកម្ពុជាមិនទាន់អនុវត្តគោលនយោបាយណាមួយដើម្បីរកផលប្រយោជន៍សម្រាប់ពលរដ្ឋខ្មែរដូចនាយករដ្ឋមន្ត្រីថៃ នៅឡើយទេ ក្រៅតែពីអួត គឺមានតែកុហកប្រជាពលរដ្ឋខ្មែរប៉ុណ្ណោះ ដូចជា កុហកថាកម្ពុជាមានអត្រាការងាររហូតដល់ជាង ៩៩% ជាដើម ខណៈកម្មករថ្ងូរគ្រប់ទីកន្លែងថាគ្មានលុយសងបំណុលធនាគារ។
កាលពីថ្ងៃទី៩ ខែវិច្ឆិកា ឆ្នាំ២០២២ រដ្ឋសភាឯកបក្សរបស់គណបក្សប្រជាជនកម្ពុជា បានអនុម័តសេចក្តីព្រាងច្បាប់ថវិកាជាតិសម្រាប់ឆ្នាំ២០២៣ ចំនួន ៩,៦ពាន់លានដុល្លារអាមេរិក ក្នុងនោះផែនការប្រមូលចំណូលត្រឡប់មកវិញ រដ្ឋាភិបាលរំពឹងថានឹងប្រមូលឱ្យបាន ៧,២ពាន់លានដុល្លារអាមេរិក ប៉ុន្តែជាក់ស្តែង ក្នុងរយៈពេល ៧ខែនៅដើមឆ្នាំ២០២៣ នេះ រដ្ឋាភិបាលប្រមូលចំណូលពន្ធបានត្រឹមតែជាង ២,៣ពាន់លានដុល្លារអាមេរិកប៉ុណ្ណោះ ដែលបង្ហាញយ៉ាងច្បាស់ថា រដ្ឋាភិបាលគ្មានលទ្ធភាពជួយឱ្យសេដ្ឋកិច្ចរបស់កម្ពុជាងើបពីឱនភាពបានទេសម្រាប់ឆ្នាំ២០២៣ នេះ៕