អ្នកឃ្លាំមើលចាត់ទុកការស្នើរបស់ភាគីជប៉ុន ដែលឲ្យកម្ពុជាចូលរួមទប់ស្កាត់បទល្មើសឆបោកតាមប្រព័ន្ធអនឡាញឲ្យសកម្ម និងខ្លាំងក្លាជាងមុន ថាជាការព្យាយាមរំឭករដ្ឋាភិបាលរបស់លោក ហ៊ុន ម៉ាណែត ដែលកំពុងធ្វើឲ្យកម្ពុជារអិលធ្លាក់ទៅក្នុងវិបត្តិឆបោកទ្រង់ទ្រាយធំបែបម៉ាហ្វីយ៉ានៅកម្ពុជា។
ការលើកឡើងរបស់អ្នកឃ្លាំមើលរូបនេះ ធ្វើឡើងបន្ទាប់ពីនគរបាលជាតិជប៉ុន កាលពីថ្ងៃទី២២ ខែតុលា ឆ្នាំ២០២៣ បានស្នើមកកាន់នគរបាលជាតិកម្ពុជាឲ្យចូលរួមទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញឲ្យបានកាន់តែខ្លាំងក្លា និងសកម្មថែមទៀត។
ក្នុងជំនួបពិភាក្សាការងារទ្វេភាគីរវាងអគ្គស្នងការនគរបាលជាតិកម្ពុជាលោក ស ថេត និងលោក Yoshimi Ogata អគ្គនាយករងទទួលបន្ទុកកិច្ចការបរទេសនៃទីភ្នាក់ងារជាតិនគរបាលជប៉ុន និយាយថា បច្ចុប្បន្ន ពលរដ្ឋជប៉ុនកំពុងរងគ្រោះខ្លាំងពីបទល្មើសនេះ ដែលខាតបង់ទឹកប្រាក់រាប់ពាន់លានដុល្លារ។
ជុំវិញរឿងនេះ អ្នកវិភាគនយោបាយ លោក គឹម សុខ លើកឡើងថា នេះជាការយកចិត្តទុកដាក់របស់ជប៉ុនចំពោះកម្ពុជា ខណៈជប៉ុនកំពុងបង្ហាញការបារម្ភរបស់ខ្លួនអំពីវិបត្តិប្រឈមរបស់កម្ពុជាដែលមានរដ្ឋាភិបាលដឹកនាំផ្ទុយពីស្មារតីនៃកិច្ចព្រមព្រៀងទីក្រុងប៉ារីស ដែលជប៉ុនរួមចំណែកដ៏ធំ ទាំងការចូលរួមកម្លាំង និងថវិកាក្នុងការប្រឹងប្រែងស្ដារប្រទេសកម្ពុជាឡើងវិញ។
លោកយល់ឃើញថា ភាគីជប៉ុនកំពុងព្យាយាមរំឭករដ្ឋាភិបាលដឹកនាំដោយលោក ហ៊ុន ម៉ាណែត កំពុងជ្រមុជកម្ពុជា និងរអិលធ្លាក់ក្នុងវិបត្តិយ៉ាងជ្រៅទៅក្នុងអំពើម៉ាហ្វីយ៉ាឆបោកទ្រង់ទ្រាយធំ និងកម្សោយយុត្តិធម៌ក្នុងប្រព័ន្ធបណ្ដាញអំណាចនៃរដ្ឋាភិបាល។
អ្នកវិភាគរូបនេះថា ជាមូលហេតុដែលបណ្ដាលឲ្យកម្ពុជាក្លាយជាទឹកដីដែលមិត្តបរទេសល្អៗ ទាំងអ្នកទេសចរ និងអ្នកវិនិយោគខ្លាចរអើលខ្លាំងណាស់ ហើយរឿងនេះវាធ្វើឲ្យសេចក្ដីថ្លែងការណ៍របស់លោក ហ៊ុន ម៉ាណែត នៅឯវេទិកាអង្គការសហប្រជាជាតិថ្មីៗនេះអំពីការសន្យានូវការអភិវឌ្ឍប្រកបដោយចីរភាពនោះក្លាយជាអាសាឥតការណ៍។
លោក គឹម សុខ និយាយថា សាររបស់ជប៉ុនជាសញ្ញាដែលបញ្ជាក់អំពីការអស់ភាពអត់ធ្មត់របស់ជប៉ុន ដែលបង្ហាញជំហរងាកចេញកាន់តែច្បាស់ពីកិច្ចសហការរបស់ខ្លួនជាមួយរដ្ឋាភិបាលលោក ហ៊ុន ម៉ាណែត ជាបណ្ដើរៗ និងដកកិច្ចសហប្រតិបត្តិការកាន់តែធំលើសពេលកន្លងមក។
គិតចាប់តាំងពីខែមេសា ដល់ខែតុលា ឆ្នាំ២០២៣ មានជនជាតិជប៉ុន ជិត ៥០នាក់ហើយត្រូវរដ្ឋាភិបាលបណ្ដេញចេញពីកម្ពុជា ដោយសង្ស័យថា អ្នកទាំងនោះបានបង្ខាំងមនុស្ស និងក្នុងអំពើឆបោកតាមទូរសព្ទ។
ការស្នើរបស់អគ្គនាយករងទទួលបន្ទុកកិច្ចការបរទេសនៃទីភ្នាក់ងារជាតិនគរបាលជប៉ុន លោក Yoshimi Ogata លើកឡើងដូច្នេះ ខណៈការិយាល័យអង្គការសហប្រជាជាតិប្រឆាំងគ្រឿងញៀន និងឧក្រិដ្ឋកម្ម ហៅថា UNODC កាលពីចុងខែកញ្ញា បានចេញរបាយការណ៍ថ្មីមួយ ដោយបង្ហាញថា កម្ពុជាជាទីតាំងនៃការជួញដូរមនុស្សបង្ខំឲ្យធ្វើឧក្រិដ្ឋកម្មបោកប្រាស់តាមអនឡាញ។
ចំណែកឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស UN បានចេញរបាយការណ៍មួយដោយរកឃើញថា មនុស្សចំនួន ១០ម៉ឺននាក់កំពុងទទួលរងការបង្ខំឲ្យធ្វើការបោកប្រាស់តាមប្រព័ន្ធអនឡាញនៅកម្ពុជា៕