កម្មករនិយោជិតរបស់រោងចក្រ អឹមអិល (ML) ក្នុងក្រុងប៉ោយប៉ែត ត្អូញត្អែរអំពីការរំលោភសិទ្ធិកម្មករ ដោយសារការបញ្ឈប់ពីការងារភ្លាមៗ ហើយកម្មករណាដែលហ៊ានចេញមុខតវ៉ាករណីបើកប្រាក់ខែមិនទៀងទាត់នោះ ក៏ត្រូវរងនូវការចោទប្រកាន់នានាពីសំណាក់ថៅកែក្រុមហ៊ុនថែមទៀត។
មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ដែលហៅកាត់ថា សង់ត្រាល់ បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២០ ខែវិច្ឆិកា ឆ្នាំ២០២៣ តាមការរៀបរាប់របស់កម្មករដែលរងគ្រោះពីការរំលោភសិទ្ធិការងារក្នុងរោងចក្រ អឹមអិល (ML) ក្នុងលក្ខខណ្ឌមិនបញ្ចេញឈ្មោះ ឲ្យដឹងថា ថៅកែ និងរដ្ឋបាលរោងចក្រ អឹមអិល (ML) ក្នុងតំបន់សេដ្ឋកិច្ចពិសេសសង្កាត់អូរនាង ក្រុងប៉ោយប៉ែត ខេត្តបន្ទាយមានជ័យ តែងចោទប្រកាន់កម្មករនិយោជិតណាដែលពាក់ព័ន្ធនឹងការតវ៉ាទាមទារចំពោះការបើកប្រាក់ខែកម្មករមិនទៀងទាត់កន្លងមក។
អង្គការសង់ត្រាល់ លើកឡើងថា កម្មកររោងចក្រ អឹមអិល រូបនោះបានប្រាប់ខ្លួនតាមប្រព័ន្ធតេឡេក្រាមថា រដ្ឋបាលក្រុមហ៊ុនរោងចក្រ អឹមអិល (ML) បានកោះហៅលោក គឹម តូនិច ចូលទៅជួប ដើម្បីសួរដេញដោលអំពីការធ្វើការតវ៉ាទាមទារប្រាក់ខែកាលពីថ្ងៃទី៨ ខែវិច្ឆិកា ឆ្នាំ២០២៣ កន្លងទៅថ្មីៗនេះ ក្នុងនោះ ខាងរដ្ឋបាលរបស់ក្រុមហ៊ុន ML បានចោទប្រកាន់ទៅលោកវិញថាជាអ្នកដឹកនាំកម្មករធ្វើការតវ៉ាឱ្យមានការទាមទារប្រាក់ខែ។
ប្រភពដដែលបានរៀបរាប់ថា ការចោទប្រកាន់លោក គឹម តូនិច ថាជាអ្នកនៅពីក្រោយនៃការតវ៉ាកាលពីថ្ងៃទី៨ វិច្ឆិកា នោះ បន្ទាប់ពីក្រុមហ៊ុនពន្យារពេលបើកប្រាក់ខែឲ្យកម្មករចំនួនពីរថ្ងៃ ប៉ុន្តែខាងកម្មករទាំងអស់បានបដិសេធថា ការតវ៉ាទាមទារប្រាក់ខែនោះ គឺកម្មករម្នាក់ៗធ្វើការទាមទារដោយស្ម័គ្រចិត្តដោយខ្លួនឯង គ្មានអ្នកណាបង្ខំឡើយ។
កម្មកររូបនោះអះអាងថា រដ្ឋបាលក្រុមហ៊ុនរបស់រោងចក្រ អឹមអិល បានព្រមានថា អ្នកដែលចេញមុខជាងគេក្នុងការតវ៉ាទាមទារប្រាក់ខែ នឹងត្រូវបញ្ឈប់កិច្ចសន្យាដោយគ្មានការលើកលែង មិនថាកម្មកររូបនោះមានឋានៈអ្វីនៅក្នុងកិច្ចសន្យាការងារនោះឡើយ។
ប្រភពដដែលបញ្ជាក់ថា លុះដល់ថ្ងៃទី១៦ ខែវិច្ឆិកា ឆ្នាំ២០២៣ ខាងក្រុមហ៊ុនបានប្រកាសហៅឈ្មោះកម្មករទាំងអស់ដែលពាក់ព័ន្ធធ្វើការតវ៉ាទាមទារប្រាក់ខែកាលពីថ្ងៃទី៨ វិច្ឆិកា ក្នុងនោះមានកម្មករចំនួន ៥នាក់ត្រូវបានរដ្ឋបាលក្រុមហ៊ុនបញ្ឈប់ភ្លាមៗ ដោយគ្មានការជូនដំណឹងជាមុនឡើយ ហើយក្នុងចំណោម ៥នាក់នោះ មានកម្មករ ៣នាក់ជាកម្មករមានកិច្ចសន្យាការងារពេញសិទ្ធិ គឺជាកម្មករមានកិច្ចសន្យាមិនមានកំណត់ ឬយូឌីស៊ី (UDC) ផងដែរ។
កាលពីថ្ងៃទី៨ ខែវិច្ឆិកា ឆ្នាំ២០២៣ ក្រុមកម្មករនិយោជិតជាច្រើនបានប្រមូលផ្ដុំគ្នានៅមុខរោងចក្រ អឹមអិល អ៊ិនធីមេត អឹភែរឹល (ML Intimate Apparel) បន្ទាប់ពីថៅកែរោងចក្រនេះលើកថ្ងៃបើកប្រាក់ខែឱ្យកម្មករ ក្នុងនោះក្រុមកម្មករក៏បានទាមទារឱ្យថៅកែរោងចក្របើកប្រាក់រង្វាន់សម្រាប់កម្មករដែលធ្វើការគ្រប់លក្ខខណ្ឌ និងស្នើឱ្យរោងចក្រអនុញ្ញាតឱ្យកម្មករបានឈប់សម្រាកនៅថ្ងៃបុណ្យជាតិផងដែរ ព្រោះថាកន្លងមក រោងចក្រនេះបានតម្រូវឱ្យកម្មករធ្វើការនៅថ្ងៃបុណ្យដោយលើកថ្ងៃសម្រាកទៅថ្ងៃផ្សេង ជាដើម។
ទាក់ទិននឹងបញ្ហានេះ មន្ត្រីជាន់ខ្ពស់ផ្នែកគ្រប់គ្រងសិទ្ធិការងាររបស់អង្គការសង់ត្រាល់ លោក ឃុន ថារ៉ូ ធ្លាប់បានលើកឡើងថា ក្រុមហ៊ុន ML នេះមានបញ្ហាច្រើនណាស់កន្លងមក មិនមែនមានតែបញ្ហាការបើកប្រាក់ឈ្នួលយឺតឱ្យបុគ្គលិកកម្មករប៉ុណ្ណោះទេ គឺមានករណីរំលោភសិទ្ធិការងារធ្ងន់ធ្ងរ រួមទាំងការបញ្ឈប់ថ្នាក់ដឹកនាំសហជីពមិនស្របតាមលក្ខខណ្ឌការងារថែមទៀត។
លោក ឃុន ថារ៉ូ បញ្ជាក់ថា រោងចក្រ ML មិនបានគោរពលក្ខខណ្ឌការងាររបស់ប្រទេសនោះឡើយ ដូចជាការមិនអនុញ្ញាតឱ្យកម្មករឈប់សម្រាកនៅថ្ងៃបុណ្យជាតិ និងការធ្វើទុក្ខបុកម្នេញលើថ្នាក់ដឹកនាំសហជីពដោយគ្មានកំហុស ជាដើម។
ទាក់ទិននឹងបញ្ហានេះ កាលពីថ្ងៃទី២៦ ខែកក្កដា ឆ្នាំ២០២៣ កន្លងទៅ សហព័ន្ធសហជីពសេរីកម្មករកម្ពុជា (FTUWKC) សម្ដែងក្តីបារម្ភយ៉ាងខ្លាំងចំពោះអនាគតកម្មករនិយោជិតកម្ពុជា ក្រោយពីទទួលបានព័ត៌មានពីតំណាងសហជីពមូលដ្ឋានដែលជាសមាជិក ឲ្យដឹងថា នៅតាមបណ្តាក្រុមហ៊ុននានានៅក្នុងប្រទេសកម្ពុជា ថៅកែរោងចក្របានបញ្ចប់កិច្ចសន្យាការងារ និងព្យួរការងារកម្មករនិយោជិតជាបន្តបន្ទាប់ក្រោមមូលហេតុផ្សេងៗ។
សហព័ន្ធសហជីពសេរីកម្មករកម្ពុជា បញ្ជាក់ថា រោងចក្រមួយចំនួនបានបញ្ឈប់បុគ្គលិកពីការងារមិនបានគោរពលក្ខខណ្ឌ និងច្បាប់ការងាររបស់ប្រទេសកម្ពុជានោះទេ ខណៈកម្មករដែលនៅបម្រើការមិនទាន់ត្រូវបានបញ្ឈប់ ត្រូវបានថៅកែរោងចក្របង្ខំឱ្យឈប់សម្រាកពីការងារដោយមិនទទួលបានប្រាក់ឈ្នួល រួមទាំងត្រូវកាត់បន្ថយម៉ោងធ្វើការរបស់ពួកគេថែមទៀត។
ទិន្នន័យសង្គមស៊ីវិល បង្ហាញថា ក្នុងរយៈពេល ៦ខែនៅដើមឆ្នាំ២០២៣ នេះ មានកម្មកររោងចក្រប្រមាណ ២ម៉ឺននាក់ ក្នុងចំណោមរោងចក្រចំនួន ២០ ត្រូវបានថៅកែព្យួរ និងបញ្ឈប់ពីការងារជាបន្តបន្ទាប់ ចំណែករោងចក្រដែលកំពុងបន្តដំណើរការ ក៏បានកាត់បន្ថយបុគ្គលិកជាមធ្យមចន្លោះពី ២០ ទៅ ៣០% ដែរ ដែលធ្វើឱ្យកម្មករបាត់បង់ប្រាក់ចំណូលចន្លោះពី ២៥ ទៅ ៣០% ជាមូលហេតុធ្វើឱ្យពួកគេរងនូវសម្ពាធផ្លូវចិត្តធ្ងន់ធ្ងរ ព្រោះតែគ្មានប្រាក់ចំណូលគ្រប់គ្រាន់ដើម្បីសងបំណុល៕