មន្ត្រីជាន់ខ្ពស់របស់រដ្ឋាភិបាលកម្ពុជានៅថ្ងៃទី១៤ ខែធ្នូ អះអាងថា នាយករដ្ឋមន្ត្រីកម្ពុជាមិនបានអនុញ្ញាតឲ្យក្រុមហ៊ុន Vingroup របស់វៀតណាម មកវិនិយោគតាក់ស៊ីអគ្គិសនីចំនួន ២៥០០គ្រឿងនៅកម្ពុជាឡើយ ខណៈខ្លឹមសារព័ត៌មានមួយចំនួនលើទំព័រហ្វេសប៊ុករបស់លោក ហ៊ុន ម៉ាណែត ស្ដីពីជំនួបជាមួយក្រុមហ៊ុន Vingroup នេះ ក៏ត្រូវបានលុបចេញវិញដែរនៅថ្ងៃនេះ។
អង្គភាពអ្នកនាំពាក្យរដ្ឋាភិបាល បានចេញសេចក្ដីថ្លែងការណ៍មួយនៅថ្ងៃទី១៤ ខែធ្នូ នេះថា រដ្ឋាភិបាលកម្ពុជាមិនមានគម្រោងឲ្យក្រុមហ៊ុន Vingroup របស់វៀតណាម មកបណ្ដាក់ទុនលើរថយន្តតាក់ស៊ីអគ្គិសនីនៅកម្ពុជានោះទេ។ អង្គភាពដដែលលើកឡើងថា ក្នុងជំនួបនោះ ក្រុមហ៊ុនគ្រាន់តែលើកសំណើនេះប៉ុណ្ណោះ ខណៈសំណើនេះមិនត្រូវបានលោក ហ៊ុន ម៉ាណែត ផ្ដល់គោលការណ៍អនុញ្ញាតឡើយ។
ការបញ្ជាក់នេះ ដើម្បីច្រានចោលការផ្សព្វផ្សាយថា ក្រុមហ៊ុន Vingroup នេះ នឹងមកបើកក្រុមហ៊ុនតាក់ស៊ីអគ្គិសនីដោយប្រើរថយន្តចំនួន ២៥០០គ្រឿងក្នុងឆ្នាំ២០២៤ ខាងមុខ។
ទន្ទឹមនឹងការច្រានចោលព័ត៌មានរបស់អ្នកនាំពាក្យរដ្ឋាភិបាល ខ្លឹមសារព័ត៌មានមួយចំនួនលើទំព័រហ្វេសប៊ុកលោក ហ៊ុន ម៉ាណែត ស្ដីពីជំនួបជាមួយក្រុមហ៊ុន Vingroup នេះ ក៏ត្រូវបានលុបចេញវិញផងដែរនៅថ្ងៃទី១៤ ខែធ្នូ នេះ។
យោងតាមខ្លឹមសារជំនួបមួយរវាងលោក ហ៊ុន ម៉ាណែត និងអគ្គនាយកក្រុមហ៊ុន Vingroup ដែលបានផ្សព្វផ្សាយលើទំព័រហ្វេសប៊ុកផ្លូវការរបស់លោក ហ៊ុន ម៉ាណែត ផ្ទាល់កាលពីថ្ងៃទី១៣ ខែធ្នូ លោក ហ៊ុន ម៉ាណែត បានសម្ដែងការស្វាគមន៍ក្រោយតំណាងក្រុមហ៊ុនលើកពីគម្រោងវិនិយោគលើវិស័យតាក់ស៊ីក្នុងប្រទេសកម្ពុជា។
បន្ទាប់ពីបង្ហោះខ្លឹមសារនេះ ក៏មានការចែករំលែកតៗគ្នានៅលើបណ្ដាញសង្គម និងបង្កឲ្យមានប្រតិកម្មចម្រូងចម្រាសរហូតដល់មានការទាមទារឲ្យក្រសួងមានសមត្ថកិច្ច ធ្វើការដកអាជ្ញាបណ្ណសារព័ត៌មានចំនួនពីរដែលបានធ្វើអះអាងថាខ្លួនបានធ្វើការផ្សព្វផ្សាយច្រឡំ រួមមានគេហទំព័រសារព័ត៌មានអនឡាញថ្មីៗ និងសារព័ត៌មានរណបរដ្ឋាភិបាល Fresh News ផងដែរ។
គណនីហ្វេសប៊ុកឈ្មោះ Oudom Tat បានសរសេរថា លោកសូមសំណូមពរដល់រាជរដ្ឋាភិបាលរបស់លោក ហ៊ុន ម៉ាណែត បិទអង្គភាពទាំងនេះចោល ព្រោះបានចុះផ្សាយព័ត៌មានបំភ្លៃការពិត និងមានចរិតបែបញុះញង់ ដែលបណ្តាលធ្វើឲ្យមហាជនជាច្រើនមានមតិប្រតិកម្ម និងយល់ច្រឡំទៅលើរាជរដ្ឋាភិបាលកម្ពុជា ថាបានអនុញ្ញាតឲ្យក្រុមហ៊ុនវៀតណាមដាក់រថយន្តតាក់ស៊ីអគ្គិសនីនៅកម្ពុជា។
ប្រភពដដែលបានលើកឡើងថា សូមថ្លែងអំណរគុណដល់រដ្ឋាភិបាលក្រោមការដឹកនាំរបស់សម្តេចមហាបវរ ហ៊ុន ម៉ាណែត ក្នុងភាពឆ្លាតវៃ ដែលមិនអនុញ្ញាតឲ្យក្រុមហ៊ុនវៀតណាមមួយនេះមករកស៊ីនៅកម្ពុជា ដែលអាចនឹងប្រឈមផលប៉ះពាល់ដល់អាជីវកម្មបងប្អូនអ្នករត់ Passapp ឬរ៉ឺម៉កកង់៣ របស់ខ្មែរយើង។
យោងតាមការចេញផ្សាយរបស់អង្គភាព Fresh News ដែលបានចេញផ្សាយកាលពីថ្ងៃទី១៣ ខែធ្នូ ថា នៅដើមឆ្នាំ២០២៤ ខាងមុខនេះ ក្រុមហ៊ុន Vingroup របស់វៀតណាម នឹងដាក់ដំណើរការសេវាកម្មតាក់ស៊ីដើរដោយថាមពលអគ្គិសនីចំនួន ២៥០០គ្រឿងនៅនៅភ្នំពេញ។
ចំណែកឯសារព័ត៌មានថ្មីៗបានសរសេរថា ក្រុមហ៊ុន Vingroup នឹងបើកសេវាតាក់ស៊ីថាមពលអគ្គិសនីនៅភ្នំពេញ បន្ទាប់មកនៅសៀមរាប និងព្រះសីហនុ។ អត្ថបទនេះបានធ្វើឱ្យមានការយល់ច្រឡំក្នុងចំណោមពលរដ្ឋ ជាពិសេសអ្នកប្រកបរបររកស៊ីរត់តាក់ស៊ី។ ក្រោយមក សារព័ត៌មានថ្មីៗក៏បានធ្វើការកែតម្រូវ និងបញ្ជាក់ជូនសាធារណជនថា «មិនមានគោលការណ៍អនុញ្ញាតឱ្យក្រុមហ៊ុនតាក់ស៊ី Vingroup បើកនៅកម្ពុជានោះទេ»៕