 លើកម្មវិធី «ព្រះរាជកិច្ចព្រះករុណា និងព្រះមហាក្សត្រី ព្រះវររាជមាតាជាតិខ្មែរ»។){kind=link}
នាយកដ្ឋានថវិកានីយកម្មនៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា កញ្ចប់ថវិកាដែលរដ្ឋាភិបាលត្រៀមចំណាយលើក្រសួងព្រះបរមរាជវាំងសម្រាប់ឆ្នាំ២០២៤ នេះ មានចំនួន ៩២៤៤៣លានរៀល (ជាង ២២,៥លានដុល្លារអាម៉េរិក) លើកម្មវិធី «ព្រះរាជកិច្ចព្រះករុណា និងព្រះមហាក្សត្រី ព្រះវររាជមាតាជាតិខ្មែរ»។
យោងតាមរបាយការណ៍ថវិកាសង្ខេបឆ្នាំ២០២៤ (Budget in Brief, Fiscal Year 2024) បានឲ្យដឹងថា ថវិកាសង្ខេបដែលចងក្រងដោយនាយកដ្ឋានថវិកានីយកម្មនៃក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា គម្រោងចំណាយថវិកាក្រសួងព្រះបរមរាជវាំង គឺលើកម្មវិធី «ព្រះរាជកិច្ចព្រះករុណា និងព្រះមហាក្សត្រី ព្រះវររាជមាតាជាតិខ្មែរ» ដោយមានអនុកម្មវិធី ៣ ដោយក្នុងចំណោមថវិកា ៩២៤៤៣លានរៀល។ ថវិកា ៣០៩៣០លានរៀល ចំណាយលើព្រះរាជសកម្មភាពក្នុងវិស័យសង្គមកិច្ច មនុស្សធម៌ វប្បធម៌ និងសាសនា ថវិកា ៤២១០លានរៀល លើព្រះរាជបេសកកម្មក្រៅប្រទេស និងថវិកា ៥៧៣០៣លានរៀល លើកិច្ចការគាំទ្រថ្វាយព្រះរាជកិច្ច និងការគ្រប់គ្រងរដ្ឋបាលទូទៅ។
ប្រភពដដែលបានឲ្យដឹងថា គម្រោងចំណាយនេះមានគោលបំណងបម្រើការងារឱ្យកាន់តែប្រសើរថ្វាយព្រះមហាក្សត្រ និងសម្តេចព្រះមហាក្សត្រី ក្នុងការបំពេញព្រះរាជបេសកកម្មបម្រើប្រទេសជាតិឱ្យមានការអភិវឌ្ឍ និងមានកិត្តិយសលើឆាកអន្តរជាតិ តាមព្រះរាជកិច្ចរបស់ព្រះអង្គ ដែលរដ្ឋធម្មនុញ្ញបានកំណត់។
កាលពីឆ្នាំ២០២៣ គម្រោងថវិកាជាតិសម្រាប់ក្រសួងព្រះបរមរាជវាំង មាន ៨៥៩០៣លានរៀល ហើយគម្រោងចំណាយដែលខ្ពស់បំផុតសម្រាប់ព្រះមហាក្សត្រ និងសម្តេចម៉ែ គឺក្នុងឆ្នាំ២០០០ ដែលមានចំនួន ១០២៨១៥លានរៀល។
ក្រសួងព្រះបរមរាជវាំងស្ថិតក្នុងចំណោមក្រសួងស្ថាប័នដែលបានអនុវត្តថវិកាកម្មវិធីពេញលេញចាប់ពីឆ្នាំ២០១៨ មក។
សម្រាប់ឆ្នាំ២០២៤ រដ្ឋាភិបាលបានត្រៀមកញ្ចប់ចំណាយចំនួនជាង ៣៧១លានលានរៀល ឬស្មើនឹងប្រមាណ ៩ពាន់លានដុល្លារអាមេរិក ដែលទំហំចំណាយនេះលើសពីចំណូលដល់ជាង ១ពាន់លានដុល្លារ ដោយរដ្ឋរំពឹងរកចំណូលបានជិត ៨ពាន់លានដុល្លារប៉ុណ្ណោះ។
ចំណាយប្រចាំឆ្នាំ២០២៤ ចំនួន ៩០០០លានដុល្លារនេះ គឺស្មើនឹង ២៥,៩៦% នៃផលិតផលក្នុងស្រុកសរុប (ផ.ស.ស) ក្នុងនោះមានប្រមាណ ៦៣០០លានដុល្លារជាចំណាយចរន្តថវិការដ្ឋ ស្មើនឹង ១៨,១១% នៃ ផ.ស.ស។ រីឯប្រមាណ ២៧០០លានដុល្លារទៀត ជាចំណាយមូលធន ស្មើនឹង ៧,៨៥% នៃ ផ.ស.ស។ សម្រាប់ឆ្នាំ២០២៤ រដ្ឋមានបន្ទុកចំណាយច្រើន ជាពិសេសផ្ដោតលើការដំឡើងប្រាក់ដល់មន្ត្រីរាជការគ្រប់កម្រិត ចាប់ពីមន្ត្រីជាប់កិច្ចសន្យាដល់មន្ត្រីរាជការស៊ីវិល។
លើសពីនេះ រដ្ឋាភិបាលគ្រោងចំណាយថវិកាប្រមាណ ១២០លានដុល្លារទៀតសម្រាប់ពង្រឹងសមត្ថភាពរដ្ឋបាលសាធារណៈ ដោយផ្ដោតសំខាន់លើការពង្រឹងគុណភាព ប្រសិទ្ធភាព និងសមិទ្ធកម្មរបស់មន្ត្រី និងស្ថាប័ន តាមរយៈការលើកទឹកចិត្តចំពោះមន្ត្រីមានគុណវុឌ្ឍិដែលមានកិច្ចការនេះស្ថិតក្រោមការដឹកនាំផ្ទាល់ពីសំណាក់លោក ហ៊ុន ម៉ាណែត ប្រមុខរាជរដ្ឋាភិបាល៕