រដ្ឋាភិបាលកម្ពុជាគ្រោងចំណាយថវិកាលើសពីចំណូលជាង ២ពាន់លានដុល្លារសម្រាប់ឆ្នាំ២០២៣ ដើម្បីដំឡើងប្រាក់ខែដល់មន្ត្រីរាជការគ្រប់កម្រិត ចាប់ពីកិច្ចសន្យាដល់មន្ត្រីរាជការស៊ីវិល ស្របពេលដែលកម្ពុជានឹងរៀបចំការបោះឆ្នោតថ្នាក់ជាតិនៅពេលខាងមុខនេះ។
យោងតាមសេចក្តីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ដែលរដ្ឋសភាបានអនុម័តនៅថ្ងៃទី២៨ ខែតុលា នេះ ឲ្យដឹងថា ឆ្នាំ២០២៣ ខាងមុខនេះ កម្ពុជានឹងទទួលបានចំណូលពីសារពើពន្ធ និងមិនមែនសារពើពន្ធ រួមទាំងចំណូលមូលធនថវិការដ្ឋទាំងក្នុង និងក្រៅប្រទេសប្រមាណ ៧ពាន់លានដុល្លារ ដែលចំណូលនេះស្មើនឹង ២២,៣៣% នៃផលិតផលសរុប និងមានកំណើន ១៤,៥% ធៀបនឹងច្បាប់ឆ្នាំ២០២២។
ប្រភពដដែលឲ្យដឹងថា ត្បិតកម្ពុជាទទួលបានចំណូលប្រមាណ ៧ពាន់លានដុល្លារ ប៉ុន្តែចំណូលនេះមិនអាចបំពេញតម្រូវការបានឡើយ។ ករណីនេះ តម្រូវឲ្យរដ្ឋាភិបាលត្រូវចំណាយថវិកាខ្ទង់ជាង ២ពាន់លានដុល្លារបន្ថែមទៀតនៃចំណូលដែលកម្ពុជាទទួលបាន។
បើតាមក្រសួងសេដ្ឋកិច្ច បង្ហាញក្នុងសេចក្តីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ថា រដ្ឋាភិបាលកម្ពុជាគ្រោងនឹងចំណាយថវិការហូតដល់ ៣៩,២ទ្រីលានរៀល ឬស្មើនឹងប្រមាណ ៩,៦ពាន់លានដុល្លារអាមេរិកសម្រាប់ឆ្នាំក្រោយនេះ ដែលការចំណាយភាគច្រើនផ្ដោតលើមនុស្ស ខណៈទំហំនៃការចំណាយប្រចាំឆ្នាំនេះលើសចំណូលជាតិដល់ជាង ២ពាន់លានដុល្លារអាមេរិក។
ក្រសួងសេដ្ឋកិច្ច បញ្ជាក់ថា ការចំណាយប្រចាំឆ្នាំ២០២៣ លើសពីចំណូលជាតិដល់ជាង ២ពាន់លានដុល្លារ ក្រោមហេតុផលថា រដ្ឋមានបន្ទុកចំណាយច្រើន ជាពិសេសផ្ដោតលើការដំឡើងប្រាក់ខែដល់មន្ត្រីរាជការគ្រប់កម្រិត ចាប់ពីមន្ត្រីជាប់កិច្ចសន្យាដល់មន្ត្រីរាជការស៊ីវិល។
ក្រៅពីចំណាយដល់ការដំឡើងប្រាក់ខែដល់មន្ត្រីរាជការហើយ ក្រសួងសេដ្ឋកិច្ច អះអាងថា រដ្ឋត្រូវចំណាយថវិកាក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលទី៧ និងការធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ (SEA GAME) លើកទី៣២ និងអាស៊ានប៉ារ៉ាហ្គេម លើកទី១២ រួមទាំងចំណាយសំខាន់ផ្សេងៗទៀតដែលទ្រទ្រង់និរន្តរភាពនៃប្រតិបត្តិការរបស់រដ្ឋ៕