រាជរដ្ឋាភិបាលសម្រេចបញ្ចុះតម្លៃសេវាប្រើប្រាស់ផ្លូវចេញចូលអាកាសយានដ្ឋានអន្តរជាតិសៀមរាបអង្គរ រយៈពេល ២ឆ្នាំ ប៉ុន្តែចំណតយានយន្តនៅតែរក្សាតម្លៃដដែល ដោយគិតលុយចាប់ពីការចតក្នុងរយៈពេលចាប់ពី ១៥នាទីឡើងទៅជំនួសវិញ។ នេះបើតាមសេចក្តីប្រកាសព័ត៌មាន កាលពីថ្ងៃទី១១ ខែមករា ឆ្នាំ២០២៤។
ក្រុមហ៊ុនដែលគ្រប់គ្រងអាកាសយានដ្ឋានអន្តរជាតិសៀមរាបអង្គរ បានយល់ព្រមបញ្ចុះតម្លៃបន្ថែមក្នុងរយៈពេល ២ឆ្នាំ គឺឆ្នាំ២០២៤ និងឆ្នាំ២០២៥។
សេចក្តីប្រកាសព័ត៌មាន បន្ថែមថា ប្រភេទរថយន្តដែលត្រូវបង់លុយថ្លៃផ្លូវ ៣ដុល្លារ ឬ ១២០០០រៀល និងតម្លៃចំណត ១ដុល្លារ ឬ ៤០០០រៀល ត្រូវបានបញ្ចុះមកត្រឹម ២ដុល្លារ ឬ ៨០០០ពាន់រៀល ខណៈតម្លៃចំណតរក្សានៅដដែល ប៉ុន្តែត្រូវគិតលុយចាប់ពីការចតក្នុងរយៈពេលចាប់ពី ១៥នាទីឡើងទៅជំនួសវិញ។
ប្រភពដដែលអះអាងថា ចំណែកឯប្រភេទរថយន្តដែលត្រូវបង់ថ្លៃផ្លូវ ៦ដុល្លារ ឬ ១៦០០០រៀល និងត្រូវបង់ថ្លៃចំណត ១,២៥ដុល្លារ ឬ ៥០០០រៀល ត្រូវបង់ត្រឹមតែ ៤ដុល្លារវិញ ខណៈតម្លៃចំណតរក្សានៅដដែល ប៉ុន្តែត្រូវគិតលុយចាប់ពីការចតក្នុងរយៈពេលចាប់ពី ៣០នាទីឡើងទៅ។ ជាងនេះទៀត ប្រភេទរថយន្តដែលត្រូវបង់ថ្លៃផ្លូវ ៩ដុល្លារ ឬ ៣៦០០០រៀល និងត្រូវបង់ថ្លៃចំណត ២ដុល្លារ ឬ ៨០០០រៀល ត្រូវបញ្ចុះមកត្រឹម ៦ដុល្លារ ឬ ១៦០០០រៀលវិញ ក្នុងនោះតម្លៃចំណតត្រូវគិតដូចរថយន្តប្រភេទទី២ ខាងលើនេះដែរ។
សេចក្តីប្រកាសព័ត៌មាននោះ បញ្ជាក់ថា ដោយឡែកប្រភេទរថយន្តដែលត្រូវបង់ថ្លៃផ្លូវចូលទៅព្រលានថ្មីនេះ ១២ដុល្លារ ឬ ៤ម៉ឺន ៨ពាន់រៀល នឹងត្រូវតម្រូវឱ្យបង់ថ្លៃផ្លូវត្រឹមតែ ៨ដុល្លារ ឬ ៣២០០០រៀលវិញ ខណៈថ្លៃចំណតនឹងមិនគិតលុយទេបើចតក្រោមរយៈពេល ៣០នាទីនោះ។
ការចេញសេចក្តីប្រកាសព័ត៌មាននេះ ធ្វើឡើងបន្ទាប់ពីមានការតវ៉ា និងការរិះគន់យ៉ាងខ្លាំងពីការកំណត់តម្លៃផ្លូវចំពោះរថយន្តដែលដឹកភ្ញៀវទេសចរទៅកាន់ព្រលានយន្តហោះថ្មីនេះ។
ក្រុមហ៊ុនចិនដែលគ្រប់គ្រងវាលយន្តហោះថ្មីខេត្តសៀមរាប បានចេញតារាងតម្លៃសម្រាប់រថយន្តគ្រប់ប្រភេទដែលបើកបរលើផ្លូវដែលចិន បានសាងសង់ ទៅកាន់អាកាសយានដ្ឋានអន្តរជាតិថ្មីខេត្តសៀមរាប ប្រវែង ២០គីឡូម៉ែត្រ ដោយកំណត់តម្លៃទៅតាមប្រភេទឡាននីមួយៗ ក្នុងនោះ រថយន្តខ្លះត្រូវបង់លុយ ៣ដុល្លារ ក្នុងឆ្នាំ២០២៤ និងឡើងថ្លៃដល់ ៤ដុល្លារនៅឆ្នាំ២០២៦។
ចំណែករថយន្តដែលត្រូវបង់ថ្លៃ ៦ដុល្លារក្នុងឆ្នាំ២០២៤ នឹងត្រូវដំឡើងថ្លៃដល់ ៨ដុល្លារនៅឆ្នាំ២០២៦ ដែរ។ ជាងនេះទៀត រថយន្តដែលត្រូវបង់ថ្លៃ ៩ដុល្លារក្នុងឆ្នាំ២០២៤ នឹងត្រូវឡើងថ្លៃទៅជា ១២ដុល្លារនៅឆ្នាំ២០២៦។ ដោយឡែករថយន្តដែលត្រូវបង់ថ្លៃ ១២ដុល្លារក្នុងឆ្នាំ២០២៤ ក៏នឹងត្រូវដំឡើងថ្លៃដល់ ១៦ដុល្លារនៅឆ្នាំ២០២៦ ផងដែរ។
ក្រៅពីការកំណត់តម្លៃរថយន្តដែលបើកបរលើដងផ្លូវទៅព្រលានយន្តហោះថ្មី ក្រុមហ៊ុនចិនក៏បានចេញកំណត់តម្លៃចំណតរថយន្តក្នុងព្រលានយន្តហោះថ្មីខេត្តសៀមរាប នេះដែរ ក្នុងនោះ រថយន្តដែលចតក្នុងចំណតក្រោម ៣០នាទី ត្រូវបង់ ១ដុល្លារ ប៉ុន្តែបើចតលើសពី ៣០នាទីត្រូវបង់លុយបន្ថែម ២ពាន់រៀល ឬ ០,៥០ដុល្លារបន្ថែមទៀតរាល់ ៣០នាទីម្តង។
ក្នុងតារាងកំណត់តម្លៃចំណត បញ្ជាក់ថា ម្ចាស់រថយន្តត្រូវទទួលខុសត្រូវដោយខ្លួនឯងចំពោះហានិភ័យផ្សេងៗលើរថយន្តរបស់ខ្លួន ព្រោះថាក្រុមហ៊ុនមិនទទួលខុសត្រូវរាល់ការបាត់បង់របស់ផ្ទាល់ខ្លួនណាមួយដែលត្រូវបានរក្សាទុកក្នុងចំណតនៃព្រលានយន្តហោះថ្មីនេះឡើយ។ ជាងនេះទៀត យានជំនិះគ្រប់ប្រភេទត្រូវបានហាមឃាត់ដាច់ខាត ដូចជា កង់បី ម៉ូតូ រ៉ឺម៉ក ស៊ីក្លូ មិនអនុញ្ញាតឱ្យចូលក្នុងបរិវេណព្រលានឡើយ។
ជុំវិញបញ្ហានេះ ក្រុមអ្នករត់តាក់ស៊ីដឹកភ្ញៀវទៅព្រលានយន្តហោះថ្មីនេះ បានរិះគន់លើបណ្ដាញសង្គមហ្វេសប៊ុកព្រោងព្រាតកាលពីពេលថ្មីៗនេះ ក្នុងនោះ អ្នករត់តាក់ស៊ីម្នាក់បានរិះគន់កាលពីពេលថ្មីៗនេះថា រូបគេបាននាំភ្ញៀវទេសចរមួយក្រុមចូលទៅក្នុងព្រលានយន្តហោះម្តងរួចហើយ ប៉ុន្តែត្រូវចេញមកខាងក្រៅកន្លែងត្រួតពិនិត្យ ឬកុងត្រូលព្រលាន ដើម្បីរង់ចាំយកភ្ញៀវទេសចរមួយក្រុមផ្សេងទៀត តែនៅពេលដែលរូបគេត្រឡប់ចូលទៅក្នុងព្រលានវិញ ស្រាប់តែខាងក្រុមហ៊ុនចិនទាមទារឱ្យរូបគេបង់លុយថ្លៃផ្លូវម្តងទៀត ទាំងដែលរូបគេមិនបានធ្វើដំណើរលើផ្លូវនោះម្តងទៀតផងនោះ។
ម្ចាស់តាក់ស៊ីខាងលើអំពាវនាវឱ្យរដ្ឋាភិបាលកម្ពុជាពិនិត្យលើបញ្ហានេះជាបន្ទាន់ ព្រោះថាកម្ពុជាទើបតែមានភ្ញៀវទេសចរខ្លះៗឡើងវិញ ប៉ុន្តែបើក្រុមហ៊ុនចិនចេះតែដំឡើងតម្លៃគ្រប់មុខបែបនេះ តើកញ្ចប់សេវាកម្មសម្រាប់ទទួលភ្ញៀវទេសចរ នឹងដំឡើងថ្លៃកម្រិតណាទៅ? ដែលនេះគឺជាមូលហេតុដែលនាំឱ្យភ្ញៀវទេសចរមិនហ៊ានមកលេងកម្ពុជា ហើយការវិនិយោគរបស់ក្រុមហ៊ុនចិនបែបនេះ មិនមែនវិនិយោគជួយប្រជាពលរដ្ឋខ្មែរទេ គឺជាការវិនិយោគជាន់កពលរដ្ឋខ្មែរប៉ុណ្ណោះ។
អាកាសយានដ្ឋានអន្តរជាតិសៀមរាបអង្គរ ត្រូវបាននាយករដ្ឋមន្ត្រីថ្មីលោក ហ៊ុន ម៉ាណែត ប្រកាសឱ្យមានដំណើរការជាផ្លូវការកាលពីថ្ងៃទី១៦ ខែវិច្ឆិកា ឆ្នាំ២០២៣ កន្លងទៅ ប៉ុន្តែក្រោយវាលយន្តហោះថ្មីនេះចេញដំណើរការ បានរងនូវការរិះគន់ជាបន្តបន្ទាប់ពីការយកលុយថ្លៃផ្លូវបើកបរទៅវាលយន្តហោះថ្មីនេះ។ ក្រៅពីនេះ ក៏មានការរិះគន់ពីភ្ញៀវអន្តរជាតិជុំវិញការប្រព្រឹត្តអំពើពុករលួយដោយការទាមទារលុយធីបពីភ្ញៀវ និងភាពគ្មានអនាម័យក្នុងអាកាសយានដ្ឋានថ្មីនេះផងដែរ។
ក្រុមអ្នកសង្កេតការណ៍លើកឡើងថា វាលយន្តហោះថ្មីនេះមិនមែនត្រឹមតែមិនផ្តល់ផលប្រយោជន៍ឱ្យកម្ពុជាទេ ថែមទាំងបំផ្លាញកេរ្តិ៍ឈ្មោះ និងសេដ្ឋកិច្ចរបស់កម្ពុជាយ៉ាងធ្ងន់ធ្ងរថែមទៀត អំឡុងពេលក្រុមហ៊ុនចិនកាន់កាប់ព្រលាននេះរយៈពេល ៥៥ឆ្នាំនោះ៕