ក្រុមកូដករក្រុមហ៊ុនណាហ្គាវើលដ៍រាប់សិបនាក់ លើកឡើងថា ការមិនដោះស្រាយវិវាទបុគ្គលិកក្រុមហ៊ុនណាហ្គាវើលដ៍ ដែលរងការរំលោភបំពានសិទ្ធិការងារជាង ២ឆ្នាំមកនេះពីសំណាក់រដ្ឋាភិបាល និងក្រសួងពាក់ព័ន្ធ គឺបង្ហាញពីទង្វើចាត់ទុកកម្មករនិយោជិតរងគ្រោះជាទាសករក្នុងសម័យទំនើប។
ក្រុមកូដករជាច្រើននាក់បានប្រមូលផ្តុំគ្នានៅមុខក្រុមហ៊ុនបនល្បែងស៊ីសងណាហ្គាវើលដ៍២ ស្ថិតក្នុងភូមិ៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១១ ខែកុម្ភៈ ឆ្នាំ២០២៤ ថា ការរំលោភសិទ្ធិការងារពីសំណាក់ថៅកែក្រុមហ៊ុនណាហ្គាវើលដ៍មកលើកម្មករសព្វថ្ងៃនេះ មិនខុសពីចៅហ្វាយនាយធ្វើបាបទាសករក្នុងសម័យបុរាណនោះទេ ព្រោះថៅកែណាហ្គាវើលដ៍បានគាបសង្កត់កម្មករនិយោជិតគ្រប់យ៉ាង ជាថ្នូរផ្តល់ឱ្យកម្មករជាលុយកាក់ស្មើនឹងអាហារ ៣ពេលប៉ុណ្ណោះ ខណៈសិទ្ធិសេរីភាពនានាត្រូវថៅកែក្រុមហ៊ុននេះបំបិទចោលទាំងស្រុង។
ប្រភពដដែលរៀបរាប់ថា កម្មករនិយោជិតក្នុងក្រុមហ៊ុនណាហ្គាវើលដ៍បច្ចុប្បន្ននេះ កំពុងរងនូវការគាបសង្កត់សិទ្ធិសេរីភាពយ៉ាងធ្ងន់ធ្ងរ នៅពេលដែលអវត្តមានសហជីព ក្នុងនោះ បុគ្គលិកកម្មករណាដែលធ្វើការងារខុសបន្តិចបន្តួច តែងរងនូវការកាត់លុយ និងគំរាមបញ្ឈប់ពីការងារ ជាដើម ប្រសិនបើពួកគេចង់តវ៉ាទាមទាររកយុត្តិធម៌ពីការរំលោភបំពានរបស់ក្រុមហ៊ុននោះ។
កម្មករនិយោជិតទាំងនោះលើកឡើងថា ការធ្វើកូដកម្មរបស់ពួកគេនាពេលកន្លងមកនេះ មិនមែនជាការស៊ីឈ្នួលទេ គឺដើម្បីរកយុត្តិធម៌ដែលពួកគេបានរងនូវការរំលោភបំពានលើសិទ្ធិការងារប៉ុណ្ណោះ ព្រោះថាបើពួកគេពិតជាស៊ីឈ្នួលធ្វើកូដកម្មមែន ម្ល៉េះនៅពេលនេះ កម្មករដែលធ្លាប់ចូលរួមធ្វើកូដកម្មជាង ១ពាន់នាក់នាពេលកន្លងមកនោះ មិននាំគ្នាឈប់តវ៉ានោះទេ ហើយការបញ្ឈប់ការតវ៉ានេះ គឺបណ្តាលមកពីជីវភាពខ្វះខាតរបស់ពួកគេយ៉ាងពិតប្រាកដ។
ក្រុមកូដករទាំងនេះបញ្ជាក់ថា ពួកគេមិនចង់បានអ្វីពីក្រុមហ៊ុនក្រៅពីធានានូវសិទ្ធិការងាររបស់ពួកគេដែលមានចែងក្នុងច្បាប់ស្ដីពីការងារ និងច្បាប់ស្ដីពីសហជីពរបស់ប្រទេសកម្ពុជានោះឡើយ។ ជាងនេះទៀត ពួកគេក៏ស្នើសុំឱ្យតុលាការទម្លាក់ចោលរាល់បទចោទលើប្រធានសហជីព កញ្ញា ឈឹម ស៊ីថរ និងសមាជិកសហជីពដទៃទៀតដែលកំពុងត្រូវបានឃុំខ្លួនក្នុងពន្ធនាគារ និងរងនូវការចោទប្រកាន់សព្វថ្ងៃនេះដែរ។
ការអះអាងនេះ ធ្វើឡើងស្របពេលដែលក្រុមកូដករណាហ្គាវើលដ៍បានរងនូវការរំលោភបំពានសិទ្ធិការងារអស់រយៈពេលជាង ២ឆ្នាំ ដោយគ្មានការដោះស្រាយពីសំណាក់រដ្ឋាភិបាល និងស្ថាប័នពាក់ព័ន្ធចាប់តាំងពីចុងឆ្នាំ២០២១ រហូតដល់ដើមឆ្នាំ២០២៤ នេះ។
អ្នកគ្រប់គ្រងផ្នែកសិទ្ធិការងាររបស់អង្គការសង់ត្រាល់ លោក ឃុន ថារ៉ូ ប្រាប់សារព័ត៌មាន The Cambodia Daily កាលពីពេលថ្មីៗនេះថា រយៈពេល ៣ឆ្នាំចុងក្រោយនេះ សង្គមស៊ីវិលសង្កេតឃើញថា សិទ្ធិនិងសេរីភាពរបស់កម្មករមានការរំលោភបំពានគួរឱ្យកត់សម្គាល់ ក្នុងនោះក៏មានការវាយប្រហារយ៉ាងខ្លាំងទៅលើក្រុមចលនាសហជីពឯករាជ្យ និងអង្គការមិនមែនរដ្ឋាភិបាលក្នុងវិស័យការងារផងដែរ។ ជាក់ស្តែង សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ ត្រូវរងនូវការបញ្ឈប់ពីការងារដោយខុសពីច្បាប់ការងាររបស់កម្ពុជាជាបន្តបន្ទាប់។
លោក ឃុន ថារ៉ូ លើកឡើងថា បុគ្គលិកកម្មករ សមាជិក និងថ្នាក់ដឹកនាំសហជីពនៃក្រុមហ៊ុនណាហ្គាវើលដ៍ដែលហ៊ានចេញមុខក្នុងការតវ៉ាទាមទារឱ្យក្រុមហ៊ុនអនុវត្តច្បាប់ការងារ ត្រូវបានភាគីក្រុមហ៊ុនធ្វើទុក្ខបុកម្នេញគ្រប់ទម្រង់ ដែលបង្ហាញឱ្យឃើញពីការរំលោភបំពានសិទ្ធិការងារលើបុគ្គលិកកម្មករ និងបង្ហាញពីការរំលោភបំពានច្បាប់ការងាររបស់ប្រទេសកម្ពុជាយ៉ាងអនាធិបតេយ្យ។
លោក ឃុន ថារ៉ូ បញ្ជាក់ថា កន្លងមក ករណីនៃការបញ្ឈប់ការងាររបស់សមាជិក និងថ្នាក់ដឹកនាំសហជីពទាំងក្រុមហ៊ុនណាហ្គាវើលដ៍ និងក្រុមហ៊ុនដទៃទៀតដែលហ៊ានចេញមុខការពារសិទ្ធិកម្មករ ត្រូវបានសហជីពប្តឹងទៅក្រសួងការងារដែរ ប៉ុន្តែករណីទាំងនោះនៅតែមិនមានដំណោះស្រាយ ខណៈក្រសួងការងារតែងតែចាត់ទុកវិវាទការងារនៃការបញ្ឈប់ថ្នាក់ដឹកនាំសហជីពទាំងនោះទៅជាវិវាទបុគ្គលទៅវិញ ដែលធ្វើឱ្យបញ្ហានេះកាន់តែស្មុគស្មាញ និងចេះតែបន្តកើតមានដល់សព្វថ្ងៃនេះ។
ចាប់តាំងពីចុងឆ្នាំ២០២១ មករហូតដល់ពេលនេះ គឺមានរយៈពេល ៧៨៤ថ្ងៃហើយ (២ឆ្នាំកន្លះ) ប៉ុន្តែបុគ្គលិកកម្មកររងគ្រោះទាំងនេះមិនត្រូវបានក្រុមហ៊ុនណាហ្គាវើលដ៍ទទួលឱ្យចូលធ្វើការងារវិញទេ ខណៈប្រាក់សំណងសម្រាប់ការបញ្ឈប់ពីការងារទៀតសោត ក៏ក្រុមហ៊ុនមិនបានដោះស្រាយដោយយុត្តិធម៌ដែរ ក្នុងនោះ កម្មករខ្លះដែលទ្រាំនឹងជីវភាពខ្វះខាតមិនបាន ក៏បោះបង់ឈប់ធ្វើកូដកម្ម ទៅរកការងារកន្លែងផ្សេងជំនួសវិញ ចំណែកឯកម្មករដែលនៅសល់ ចេះតែនាំគ្នាចេញធ្វើកូដកម្មបន្ត ដើម្បីទាមទារយុត្តិធម៌សម្រាប់ខ្លួនឯងផង និងកម្មករដទៃទៀតផងរហូតដល់ពេលនេះ។
ក្រោយពីការតវ៉ាទាមទារជាបន្តបន្ទាប់ ក្រុមកូដករណាហ្គាវើលដ៍ចំនួន ៩នាក់ បានរងនូវបណ្តឹងតាមផ្លូវតុលាការ ក្រោមបទចោទ “ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម” ដូចជាប្រធានសហជីពទ្រទ្រង់សិទ្ធិការងារកម្មករខ្មែរ កញ្ញា ឈឹម ស៊ីថរ ថ្នាក់ដឹកនាំសហជីព កញ្ញា ឈឹម សុខ និងសកម្មជនសហជីពអ្នកស្រី រី សុវណ្ណឌី ជាដើម៕