ឧបការីរដ្ឋមន្ត្រីក្រសួងការបរទេសសហរដ្ឋអាមេរិក Kritenbrink និងលោក Jed Royal ឧបការីរងរដ្ឋមន្ត្រីក្រសួងការពារជាតិសហរដ្ឋអាមេរិក ទទួលបន្ទុកកិច្ចការសន្តិសុខនៅតំបន់ឥណ្ឌូប៉ាស៊ីហ្វិក បានជួបជាមួយលោក ហ៊ុន ម៉ាណែត នៅរាជធានីភ្នំពេញ ដើម្បីពិភាក្សាអំពីការធ្វើឲ្យទំនាក់ទំនងទ្វេភាគីសហរដ្ឋអាមេរិក និងកម្ពុជា មានភាពស៊ីជម្រៅ និងដើម្បីដោះស្រាយបញ្ហាដែលជាកង្វល់រួម។
ភាគីទាំងពីរបានពិភាក្សាអំពីកិច្ចសហប្រតិបត្តិការកំពុងមាន ដែលរួមមាន ការអនុវត្តទណ្ឌកម្មរបស់អង្គការសហប្រជាជាតិប្រឆាំងនឹងប្រទេសកូរ៉េខាងជើង ការថ្កោលទោសការឈ្លានពានទៅលើប្រទេសអ៊ុយក្រែន ពីសំណាក់ប្រទេសរុស្ស៊ី កម្មវិធីជំនួយបរទេស ការរុករកឈ្លើយសឹក និងយុទ្ធជនបាត់ខ្លួនក្នុងសង្គ្រាម និងការពង្រឹងការអនុវត្តច្បាប់។
ទន្ទឹមនឹងនោះ ភាគីទាំងពីរក៏បានពិនិត្យទៅលើវិស័យនានាសម្រាប់វឌ្ឍនភាពនាពេលខាងមុខនៅកម្ពុជាដែរ ដូចជា លទ្ធិប្រជាធិបតេយ្យ និងសិទ្ធិមនុស្ស ការជួញដូរមនុស្ស ការបង្កើតលទ្ធភាពសម្រាប់ប្រព័ន្ធផ្សព្វផ្សាយឯករាជ្យ និងមានភាពសេរី ព្រមទាំងបញ្ហាសន្តិសុខតំបន់។
នៅក្នុងកិច្ចពិភាក្សាគ្នានោះ លោកឧបការីរដ្ឋមន្ត្រីការបរទេសអាមេរិក បានអះអាងថា អាមេរិកនៅតែប្ដេជ្ញាចិត្តចំពោះប្រជាជនកម្ពុជា និងបំណងប្រាថ្នារបស់គេក្នុងការចង់ឲ្យប្រទេសរបស់គេមានវិបុលភាព លទ្ធិប្រជាធិបតេយ្យ និងឯករាជ្យ ដែលក្នុងនោះ សំឡេងទាំងអស់ត្រូវបានគេស្តាប់ និងគោរព ហើយអធិបតេយ្យភាពរបស់កម្ពុជាត្រូវបានការពារ។
ក្នុងដំណើរទស្សនកិច្ចនៅកម្ពុជា លោកឧបការីរដ្ឋមន្ត្រីការបរទេស Kritenbrink ក៏បានជួបប្រាស្រ័យជាមួយយុវជនកម្ពុជា ក្នុងគម្រោងស្ដីពីគំនិតផ្ដួចផ្ដើមនៃមេដឹកនាំយុវជនវ័យក្មេងនៅតំបន់អាស៊ីអាគ្នេយ៍ (YSEALI) ក្នុងន័យអបអរខួបលើកទី១០ នៃកម្មវិធីផ្លាស់ប្ដូរថ្នាក់តំបន់មួយនេះ៕