ប្រព័ន្ធផ្សព្វផ្សាយក្នុងស្រុកថៃ បានអះអាងថា នៅថ្ងៃចន្ទ ទី៤ ខែមីនា នេះ តុលាការកំពូលនៃប្រទេសថៃ បានសម្រេចឱ្យអតីតនាយករដ្ឋមន្ត្រីថៃ អ្នកស្រី យីងឡាក់ ដែលបច្ចុប្បន្នកំពុងរស់នៅនិរទេសខ្លួន រួចផុតពីការចោទប្រកាន់ក្នុងសំណុំរឿងមួយទៀតដែលពាក់ព័ន្ធទៅនឹងការកាន់អំណាចជានាយករដ្ឋមន្ត្រីថៃលោកស្រីកាលពីឆ្នាំ២០១៣។
អ្នកស្រី Yingluck ដែលត្រូវជាប្អូនស្រីបង្កើតរបស់លោក Thaksin Shinawatra បាននិងកំពុងរស់នៅឯក្រៅប្រទេសអស់រយៈពេល ៦ឆ្នាំមកនេះ ដោយសារតែគេចពីការផ្ដន្ទាទោសដាក់ពន្ធនាគារ បន្ទាប់ពីរដ្ឋាភិបាលរបស់អ្នកស្រីត្រូវបានផ្តួលរំលំដោយរដ្ឋប្រហារយោធាឆ្នាំ២០១៤។
ចំណែកលោក Thaksin ក៏ជាអតីតនាយករដ្ឋមន្ត្រីថៃ ដែរ ហើយធ្លាប់ត្រូវគេធ្វើរដ្ឋប្រហារយោធាដូចគ្នាកាលពីឆ្នាំ២០០៦។ លោក Thaksin Shinawatra ទើបតែត្រូវបានដោះលែងនាពេលថ្មីៗនេះ គឺ ៦ខែបន្ទាប់ពីរូបលោកបានជាប់ឃុំឃាំងនៅមន្ទីរពេទ្យមួយនៅក្រុងបាងកក ចាប់តាំងពីត្រឡប់ចូលស្រុកវិញ ក្រោយរស់នៅនិរទេសខ្លួនអស់ជាច្រើនឆ្នាំ។
សំណុំរឿងរបស់អ្នកស្រី Yingluck ផ្តើមចេញមកពីពាក្យបណ្តឹងមួយកាលពីឆ្នាំ២០២២ ធ្វើឡើងដោយគណៈកម្មការជាតិបង្ក្រាបអំពើពុករលួយរបស់ប្រទេសថៃ ប្រឆាំងលើរូបអ្នកស្រី និងបុគ្គល ៤នាក់ទៀត ដែលបានចោទប្រកាន់ថា អ្នកទាំង៥ បានធ្វើឱ្យប្រទេសជាតិរងការខាតបង់តាមរយៈការមិនអនុវត្តតាមដំណើរការដេញថ្លៃ ក្នុងការផ្តល់កិច្ចសន្យាមួយរបស់រដ្ឋាភិបាលដែលមានតម្លៃ ២៥០លានបាត ឬស្មើនឹង ៦,៧១លានដុល្លារ។
មេធាវីអ្នកស្រីបានអះអាងថា តុលាការកំពូលថៃ បានសម្រេចទម្លាក់ចោលសំណុំរឿងនេះ ក្រោយរកឃើញថា អ្នកទាំង៥ បានបំពេញភារកិច្ចរបស់ខ្លួនស្របទៅតាមច្បាប់ ហើយពុំបានទទួលអត្ថប្រយោជន៍អ្វីឡើយ។
ដោយឡែកកាលពីឆ្នាំ២០១៧ អ្នកស្រី Yingluck ត្រូវបានតុលាការផ្ដន្ទាទោសកំបាំងមុខពីបទធ្វេសក្នុងការបំពេញតួនាទី ហើយត្រូវជាប់ពន្ធនាគារ ៥ឆ្នាំ ពាក់ព័ន្ធគម្រោងរបស់រដ្ឋាភិបាលលោកស្រីស្ដីពីការជួយទិញស្រូវអង្ករប្រជាពលរដ្ឋ ដែលធ្វើឱ្យរដ្ឋខាតប្រាក់សរុបខ្ទង់រាប់ពាន់លានដុល្លារក្នុងវិស័យកសិកម្ម។
ទាំងលោក ថាក់ស៊ីន និងអ្នកស្រី យីងឡាក់ ត្រូវបានអ្នកវិភាគចាត់ទុកថាជាអ្នកទោសនយោបាយ ព្រោះពួកគាត់សុទ្ធតែត្រូវបានផ្តួលរំលំអំណាចដោយសាររដ្ឋប្រហារយោធា។
រាជាណាចក្រថៃ កំពុងដើរលើផ្លូវផ្សះផ្សាជាតិដ៏ទូលំទូលាយក្រោយពួកយោធាលែងកាន់អំណាច
ទោះជាអំណាចតុលាការក៏ដោយ តែការពិតដោយសារតែពួកយោធាលែងកាន់អំណាចទេ ទើបផ្ដល់ឱកាសមានការបង្រួបបង្រួមជាតិថៃ ដែលគេថានៅក្រោមការដឹកនាំបក្សប្រឆាំងនៃគណបក្សភឿថៃ ហើយឱកាសនេះក៏ធ្វើឡើងដោយសារតែបក្សភឿថៃ នេះបានសម្រេចឱ្យមានរដ្ឋាភិបាលចម្រុះដ៏ទូលំទូលាយមួយដែលសូម្បីបក្សខាងយោធា ក៏មានក្នុងសមាសភាពរដ្ឋាភិបាលថ្មីនេះផងដែរ។
ក្នុងហេតុផលនេះ គេថាពួកយោធាសម្រេចបើកផ្លូវឱ្យអ្នកនយោបាយដែលនិរទេសខ្លួនទាំងអស់ រួមទាំងលោក ថាក់ស៊ីន និងអ្នកស្រី យីងឡាក់ អ្នកនយោបាយដ៏មានឥទ្ធិពលពីររូបនេះក៏បានវិលមករួមរស់ក្នុងសង្គមថៃឡើងវិញ។
ប៉ុន្តែអំណាចតុលាការកំពូលរាជាណាចក្រថៃ នៅពេលនេះ ក៏ត្រូវបានគេមើលឃើញថារត់តាមស្ថានភាពនយោបាយផងដែរ។ វាមានន័យថា បើនយោបាយឆ្ពោះទៅរកការផ្សះផ្សាជាតិ គឺទោះបីជាការចោទប្រកាន់បទល្មើសព្រហ្មទណ្ឌ ឬបទឧក្រិដ្ឋក៏ដោយ ក៏ត្រូវតែទម្លាក់ចោលផងដែរ បើជនជាប់ចោទនោះជាអ្នកនយោបាយ។ ជាក់ស្ដែង អ្នកស្រី យីងឡាក់ និងលោក ថាក់ស៊ីន នៅពេលនេះ។ រាជាណាចក្រថៃ នៅពេលនេះ គឺរដ្ឋាភិបាលនៃប្រទេសនៅតំបន់អាស៊ីអាគ្នេយ៍មួយនេះស្ថិតនៅក្នុងការដឹកនាំនៃគណបក្សប្រកាន់គោលការណ៍ប្រជាធិបតេយ្យ។ ការផ្សះផ្សាជាតិដ៏ទូលំទូលាយនេះ វាពិតណាស់កើតចេញពីការសម្របសម្រួលបញ្ចប់ហិង្សានយោបាយរវាងពួកយោធា និងគណបក្សមាននិន្នាការប្រជាធិបតេយ្យដូចជាគណបក្សភឿថៃ ជាដើមនេះ។
អ្នកសង្កេតការណ៍នៅក្នុងតំបន់មើលឃើញរូបភាពនៅក្នុងរាជាណាចក្រថៃ នៅពេលនេះខុសប្លែកឆ្ងាយណាស់ និងប្រសើរឆ្ងាយណាស់បើធៀបនឹងស្ថានភាពនយោបាយរបស់ប្រទេសជិតខាងថៃ មានដូចជាប្រទេសភូមា ដែលកំពុងធ្លាក់នៅក្នុងការគ្រប់គ្រងពួកយោធា ដែលប្លន់អំណាចរបស់អ្នកប្រជាធិបតេយ្យកាលពីខែកុម្ភៈ ឆ្នាំ២០២១ និងប្រទេសកម្ពុជា ធ្លាក់ក្នុងអំណាចប្រព័ន្ធបក្សមួយផ្ដាច់មុខ។ រាជាណាចក្រនេះបិទឈឹងតែម្ដងការផ្សះផ្សាជាតិ ទោះបីជាមានមេដឹកនាំថ្មីវ័យក្មេងធ្លាប់រៀនសូត្រចេះដឹងពីប្រទេសប្រជាធិបតេយ្យលោកសេរីយ៉ាងណាក៏ដោយ៕