ខណៈខ្មែរនៅអូស្ត្រាលី ទាមទារចង់បានលទ្ធិប្រជាធិបតេយ្យពិតប្រាកដ ការគោរពសិទ្ធិមនុស្ស សិទ្ធិពលរដ្ឋ បើកលំហសេរីភាពដល់សកម្មជននៃអង្គការសង្គមស៊ីវិលក្នុងប្រទេសកម្ពុជា គណបក្សចំនួន ៣ បានចុះបញ្ជីគណបក្សនយោបាយឈរឈ្មោះបោះឆ្នោត និងបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ឆ្នាំ២០២៤។
យោងតាមសេចក្តីប្រកាសព័ត៌មានពីគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា មានគណបក្សចំនួន ៣ បានចុះបញ្ជីគណបក្សនយោបាយឈរឈ្មោះបោះឆ្នោត និងបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ឆ្នាំ២០២៤។ គណបក្សទាំងបីនោះមានដូចជា គណបក្សប្រជាជនកម្ពុជា គណបក្សឆន្ទៈខ្មែរ និងគណបក្សកម្លាំងជាតិ។
ប្រភពដដែលបានលើកឡើងថា គ.ជ.ប បានបើកឱ្យបណ្ដាបក្សនយោបាយទាំងអស់ដែលមានបំណងចង់ចូលរួមប្រកួតប្រជែងក្នុងសម័យបោះឆ្នោតជ្រើសរើសសមាជិកក្រុមប្រឹក្សាគ្រប់គ្រងរដ្ឋបាលថ្នាក់ក្រោមនាថ្ងៃទី២៦ ខែឧសភា ខាងមុខ ឲ្យចុះបញ្ជីគណបក្ស និងបេក្ខជនឈរឈ្មោះចាប់ពីថ្ងៃទី២ ដល់ថ្ងៃទី៦ ខែមីនា ឆ្នាំ២០២៤។
គ.ជ.ប បានឲ្យដឹងទៀតថា គណបក្សប្រជាជនកម្ពុជា បានដាក់បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាសរុប ៨៦១៨រូប ក្នុងនោះមានបេក្ខជនពេញសិទ្ធិចំនួន ៤២០០នាក់ និងបម្រុង ៤៤១៨នាក់។ បេក្ខជនទាំងនោះបានឈរឈ្មោះនៅ ២៥រាជធានី-ខេត្ត និងទូទាំង ២០៩ក្រុង ស្រុក ខណ្ឌ។
ប្រភពដដែលបានលើកឡើងថា គណបក្សឆន្ទៈខ្មែរ បានដាក់បេក្ខជនឈរឈ្មោះសរុប ៧៤៩រូប ក្នុងនោះបេក្ខជនពេញសិទ្ធិ ៣៧១នាក់ និងបម្រុង ៣៧៨នាក់។ គណបក្សនេះដាក់បេក្ខជនឈរឈ្មោះនៅមណ្ឌលរាជធានី-ខេត្តចំនួន៣ និងក្រុង ស្រុក ខណ្ឌ ចំនួន១៨។
គ.ជ.ប បានឲ្យដឹងបន្ថែមទៀតថា គណបក្សកម្លាំងជាតិ ចុះបញ្ជីបេក្ខជនឈរឈ្មោះសរុប ៤២៧រូប ក្នុងនោះអ្នកពេញសិទ្ធិ ២១៣នាក់ និងបម្រុង ២១៤នាក់។ គណបក្សកម្លាំងជាតិ ឈរឈ្មោះនៅមណ្ឌលរាជធានី-ខេត្តចំនួន២ និងមណ្ឌលក្រុង ស្រុក ខណ្ឌ ចំនួន៩។
ប្រភពដដែលបានលើកឡើងថា នីតិវិធីសម្រាប់ការបោះឆ្នោត គណៈកម្មការរាជធានី-ខេត្តរៀបចំការបោះឆ្នោត នឹងពិនិត្យ ហើយសម្រេចលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោតយ៉ាងយូរ ៥ថ្ងៃ ក្រោយទទួលបានពាក្យស្នើសុំនេះ។
ការបិទផ្សាយលទ្ធផលបណ្ដោះអាសន្នពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ នឹងធ្វើឡើងក្រោយពីរាប់សន្លឹកឆ្នោតនៅថ្ងៃទី២៦ ឧសភា។
ចាប់តាំងពីមានកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ មក កម្ពុជាបានទទួលយករបបប្រជាធិបតេយ្យសេរីពហុបក្សដោយការបោះឆ្នោតជ្រើសរើសមេដឹកនាំ និងមន្ត្រីនៅមូលដ្ឋានរបស់ខ្លួន ដូចជាការបោះឆ្នោតជ្រើសតាំងតំណាងរាស្ត្រ បោះឆ្នោតជ្រើសតាំងសមាជិកព្រឹទ្ធសភា បោះឆ្នោតជ្រើសរើសក្រុមប្រឹក្សារាជធានីខេត្ត ក្រុង ស្រុក ខណ្ឌ និងបោះឆ្នោតជ្រើសរើសក្រុមប្រឹក្សាឃុំ-សង្កាត់ ជាដើម ដែលមានអាណត្តិ ៥ឆ្នាំដូចៗគ្នា។
ប្រទេសកម្ពុជា បោះឆ្នោតជាអសកលជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ បាន ៣ដងរួចមកហើយ ខណៈការបោះឆ្នោតជ្រើសតាំងតំណាងរាស្ត្របានធ្វើឡើង ៧អាណត្តិ ចំណែកការបោះឆ្នោតជ្រើសតាំងសមាជិកព្រឹទ្ធសភា បានធ្វើឡើងបាន ៣ដងដែរ ចំណែកឯការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ បានធ្វើឡើង ៦ដង៕