នាយករដ្ឋមន្ត្រីតត្រកូលលោក ហ៊ុន ម៉ាណែត ប្ដេជ្ញាថានឹងដឹកនាំរាជរដ្ឋាភិបាលថ្មីដោយធ្វើកំណែទម្រង់ស៊ីជម្រៅ ដើម្បីជំរុញបរិយាកាសអំណោយផលដល់អាជីវកម្ម និងការវិនិយោគទុនក្នុងគោលបំណងប្រែក្លាយប្រទេសកម្ពុជា ឱ្យទៅជាគោលដៅទាក់ទាញសម្រាប់ការបណ្ដាក់ទុនពីបរទេស។
នាយករដ្ឋមន្ត្រី ហ៊ុន ម៉ាណែត លើកឡើងក្នុងវេទិកាធុរកិច្ចអូស្ត្រាលី-កម្ពុជា នៃកិច្ចប្រជុំអាស៊ាន-អូស្ត្រាលី ក្នុងទីក្រុងមែលប៊ន នៅថ្ងៃទី៥ ខែមីនា ឆ្នាំ២០២៤ នេះថា រាជរដ្ឋាភិបាលកំពុងអនុវត្តកំណែទម្រង់ស៊ីជម្រៅហើយ ដោយបានធ្វើការយ៉ាងជិតស្និទ្ធជាមួយធុរកិច្ច និងអ្នកវិនិយោគក្នុងស្រុក និងអន្តរជាតិ ដើម្បីដោះស្រាយបញ្ហាប្រឈមនានា ដើម្បីធានាដល់អាជីវកម្ម និងការវិនិយោគឱ្យមាននិរន្តរភាព។
លោក ហ៊ុន ម៉ាណែត អះអាងថា ក្នុងវេទិការវាងរដ្ឋាភិបាល-វិស័យឯកជន កាលពីចុងឆ្នាំ២០២៣ រាជរដ្ឋាភិបាលបានដាក់ចេញនូវគម្រោងកំណែទម្រង់សំខាន់ៗជាច្រើនក្នុងវិស័យចំនួន១០ ដែលទាក់ទងនឹងអាជីវកម្ម ពាណិជ្ជកម្ម និងការវិនិយោគទុន។ លើសពីនេះទៀត ច្បាប់ថ្មីៗនៅប្រទេសកម្ពុជាស្តីអំពីពន្ធដារ ក៏បានបង្ហាញអំពីការជំរុញឲ្យមានតម្លាភាព និងច្បាប់ថ្មីស្ដីពីការវិនិយោគទុន បានផ្តល់ជូននូវគោលការណ៍លើកទឹកចិត្តដ៏ឆ្លាតវៃ និងអំណោយផល ព្រមទាំងសេវាកម្មថែទាំអ្នកវិនិយោគជាច្រើនទៀតផងដែរ។
នាយករដ្ឋមន្ត្រីថ្មីរូបនេះបញ្ជាក់ថា ការវិនិយោគទុនដែលកំពុងដំណើរការនៅប្រទេសកម្ពុជាសព្វថ្ងៃនេះ គឺពឹងផ្អែកលើហេដ្ឋារចនាសម្ព័ន្ធសំខាន់ៗជាច្រើន ដូចជា ផ្លូវល្បឿនលឿន កំពង់ផែទឹកជ្រៅ អាកាសយានដ្ឋានអន្តរជាតិ ក៏ដូចជាមជ្ឈមណ្ឌលដឹកជញ្ជូនដែលបានតភ្ជាប់បណ្ដាញដឹកជញ្ជូនយ៉ាងរលូន ជាមួយនឹងមជ្ឈមណ្ឌលសេដ្ឋកិច្ច និងច្រករបៀងសំខាន់ៗទាំងក្នុងប្រទេស និងតំបន់។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៥ មីនា នេះថា ការសន្យារបស់លោក ហ៊ុន ម៉ាណែត គឺមិនបានផលអ្វីទាំងអស់ ព្រោះក្នុងក្រសែភ្នែកសហគមន៍អន្តរជាតិ គេបានចាត់ទុកលោក ហ៊ុន ម៉ាណែត ជាមេដឹកនាំកខ្វក់រួចទៅហើយ។ ក្រៅពីនេះទៀត ពួកគេក៏ចាត់ទុកការឡើងកាន់អំណាចរបស់លោក ហ៊ុន ម៉ាណែត គឺដូចប្រទេសកុម្មុយនីស្តតពូជកូរ៉េខាងជើង ដែរ។
លោក គឹម សុខ លើកឡើងថា ទោះជាលោក ហ៊ុន ម៉ាណែត អួតអំពីការកែទម្រង់ស៊ីជម្រៅ និងកែច្បាប់យ៉ាងណាក៏ដោយ ក៏មិនអាចទាក់ទាញវិនិយោគទុនបរទេសបានដែរ ឱ្យតែរដ្ឋាភិបាលនេះនៅតែបន្តបិទសិទ្ធិសេរីភាពប្រជាពលរដ្ឋ និងបិទលំហប្រជាធិបតេយ្យដូចសព្វថ្ងៃនេះ។
លោកបន្ថែមថា លោក ហ៊ុន ម៉ាណែត អាចធ្វើកំណែទម្រង់ឱ្យកាន់តែមានប្រសិទ្ធភាពមួយទៀតដែរ ដើម្បីឱ្យអ្នកវិនិយោគបរទេសទុកចិត្ត គឺខ្លួនគាត់ផ្ទាល់ត្រូវប្រកាសទ្រព្យសម្បត្តិជាសាធារណៈ និងអនុវត្តច្បាប់ដោយតម្លាភាពទៅមន្ត្រីគ្រាក់ៗដែលប្រព្រឹត្តអំពើពុករលួយគាបសង្កត់អ្នកវិនិយោគទុនបរទេសឱ្យបានដាច់ខាត។
អ្នកវិភាគនយោបាយរូបនេះបញ្ជាក់ថា អ្នកវិនិយោគបរទេសផ្ដោតទៅលើកត្តាសំខាន់ពីរក្នុងការវិនិយោគទុននៅប្រទេសកម្ពុជា គឺទី១ លើបរិយាកាសនយោបាយ ជាពិសេសការដឹកនាំដោយគ្រួសារហ៊ុនសព្វថ្ងៃនេះ គឺធ្វើឱ្យពួកគេខ្លាចរអា និងទី២ គឺលើការអនុវត្តច្បាប់។ ដូច្នេះ បើលោក ហ៊ុន ម៉ាណែត អាចកែទម្រង់ចំណុចធំៗទាំងពីរនេះបាន ទៅជាការដឹកនាំតាមប្រជាធិបតេយ្យ និងមានការអនុវត្តច្បាប់ដោយត្រឹមត្រូវ នោះអ្នកវិនិយោគបរទេសក៏អាចនឹងសម្លឹងឃើញប្រទេសកម្ពុជាដែរ។
ទោះជាយ៉ាងណាក៏ដោយ កាលពីថ្ងៃទី៣១ ខែមករា ឆ្នាំ២០២៤ លោក ហ៊ុន ម៉ាណែត បានប្រកាសលើកទឹកចិត្តដោយបើកចំហទទួលវិនិយោគទុនបរទេសដែលហ៊ានបណ្ដាក់ទុននៅប្រទេសកម្ពុជារយៈពេលយូរអង្វែង មានទុនចាប់ពី ១សែនដុល្លារអាមេរិកឡើងទៅ (១០០០០០ដុល្លារអាមេរិក) រដ្ឋាភិបាលនឹងផ្តល់ឱ្យនូវទិដ្ឋាការពិសេសរយៈពេល ៣ឆ្នាំ ប៉ុន្តែរហូតដល់ពេលនេះ មិនទាន់មានក្រុមហ៊ុនវិនិយោគធំៗណាមួយចេញមុខប្រកាសទៅបណ្ដាក់ទុននៅក្នុងរាជាណាចក្រកម្ពុជានៅឡើយទេ។
កាលពីពាក់កណ្តាលខែមករា ឆ្នាំ២០២៤ ក្នុងកិច្ចប្រជុំនៃវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស សារព័ត៌មានអន្តរជាតិឈ្មោះ ប៉ូលិទិកូ (POLITOCO) បានចេញផ្សាយអត្ថបទមួយដែលមានចំណងជើងថា The ‘dirty dozen’ of Davos ឬ មេដឹកនាំ និងអ្នកជំនួញកខ្វក់ចំនួន ១២រូប ដែលមានវត្តមានក្នុងទីក្រុងដាវ៉ូស ក្នុងនោះ លោក ហ៊ុន ម៉ាណែត ក៏ត្រូវគេរាប់បញ្ចូលទៅក្នុងចំណោមមេដឹកនាំ និងអ្នកជំនួញកខ្វក់ចំនួន ១២នាក់នោះផងដែរ៕