អតីតអភិបាលក្រុងហ្គ្រែតធឺ ដាដេណង់ (Greater Dandenong) ជាយក្រុងមែលប៊ន (Melbourne) រដ្ឋវិចតូរីយ៉ា (Victoria) នៃប្រទេសអូស្ត្រាលី លោក ជា យូហ៊ន ព្រមានថានឹងដាក់ញត្តិទៅកាន់រដ្ឋាភិបាលអូស្ត្រាលី ដើម្បីបិទទិដ្ឋាការចំពោះមន្ត្រីគណបក្សប្រជាជនកម្ពុជាមួយចំនួន ដូចជា លោក គឹម សន្តិភាព ជាដើម ដែលជ្រៀតជ្រែកកិច្ចការផ្ទៃក្នុងប្រទេសអូស្ត្រាលី ក្នុងបំណងបំបែកបំបាក់សហគមន៍ខ្មែរ។
អតីតអភិបាលក្រុងហ្គ្រែតធឺ ដាដេណង់ ក្នុងប្រទេសអូស្ត្រាលី លោក ជា យូហ៊ន លើកឡើងក្នុងកិច្ចសម្ភាសន៍ពិសេសមួយជាមួយសារព័ត៌មាន The Cambodia Daily នៅថ្ងៃទី៧ ខែមីនា ឆ្នាំ២០២៤ នេះថា លោកនឹងប្រមូលសមាជិកសហគមន៍ខ្មែរក្នុងប្រទេសអូស្ត្រាលី ដាក់ញត្តិទៅរដ្ឋាភិបាលអូស្ត្រាលី ឱ្យពិនិត្យលើសមាសភាពមន្ត្រីគណបក្សប្រជាជនកម្ពុជា ដើម្បីបិទទិដ្ឋាការ បញ្ឈប់ការចេញចូលប្រទេសអូស្ត្រាលី ជាអចិន្ត្រៃយ៍ និងពិនិត្យលើសមាសភាពមន្ត្រីគណបក្សប្រជាជនកម្ពុជារូបណាដែលត្រូវបិទទិដ្ឋាការបណ្ដោះអាសន្ន ដើម្បីកុំឱ្យពួកគេបន្លំខ្លួនជាអ្នកធ្វើបាតុកម្មគាំទ្រលោក ហ៊ុន ម៉ាណែត អំឡុងពេលនាយករដ្ឋមន្ត្រីខ្មែរចូលរួមកិច្ចប្រជុំអូស្ត្រាលី-អាស៊ាន នៅឆ្នាំក្រោយៗទៀត។
លោក ជា យូហ៊ន លើកឡើងថា ពួកគេអាចមកក្នុងនាមជាមន្ត្រីហែហមលោក ហ៊ុន ម៉ាណែត ប៉ុន្តែមិនត្រូវបន្លំធ្វើជាបាតុករគាំទ្រលោក ហ៊ុន ម៉ាណែត ទេ ព្រោះទង្វើនេះជាទង្វើបោកប្រាស់។ ជាងនេះទៀត លោកក៏នឹងដាក់ញត្តិឱ្យរដ្ឋាភិបាលអូស្ត្រាលី បិទទិដ្ឋាការមន្ត្រីគណបក្សប្រជាជនកម្ពុជា ដូចជា រដ្ឋលេខាធិការក្រសួងយុត្តិធម៌ លោក គឹម សន្តិភាព និងលោក ឡាវ វ៉ាន់ ជាដើម ដែលកំពុងលូកដៃយ៉ាងជ្រៅលើកិច្ចការផ្ទៃក្នុងសហគមន៍ខ្មែរនៅអូស្ត្រាលី ក្នុងនាមជាមន្ត្រីកងកម្លាំងប្រដាប់អាវុធរដ្ឋាភិបាលបរទេសផងដែរ ដែលទង្វើនេះគឺជាការបំបែកបំបាក់សហគមន៍ក្នុងតំបន់ទាំង ៧ នៅប្រទេសអូស្ត្រាលី យ៉ាងធ្ងន់ធ្ងរ។
អតីតអភិបាលក្រុងហ្គ្រែតធឺ ដាដេណង់ លោក ជា យូហ៊ន បញ្ជាក់ថា រដ្ឋាភិបាលអូស្ត្រាលី បានដាក់បញ្ចូលច្បាប់ដាក់ទណ្ឌកម្ម (Magnitsky Act) តាមលំនាំច្បាប់សហរដ្ឋអាមេរិក ចូលជាធរមាន បញ្ញត្តិក្នុងប្រទេសអូស្ត្រាលី រួចរាល់ហើយ ខណៈរដ្ឋាភិបាលអូស្ត្រាលី ក៏ត្រូវអនុវត្តច្បាប់នេះដែរ។ ដូច្នេះ ការដង្ហែញត្តិពីសហគមន៍ខ្មែរដាក់ជូនព្រឹទ្ធសភាអូស្ត្រាលី កាលពីពេលថ្មីៗនេះស្តីអំពីការជ្រៀតជ្រែកកិច្ចការផ្ទៃក្នុងប្រទេសអូស្ត្រាលី ជាពិសេសការបំបែកបំបាក់សហគមន៍ខ្មែរពីរាជរដ្ឋាភិបាលប្រទេសកម្ពុជា នឹងត្រូវអនុវត្តនៅពេលដែលរដ្ឋាភិបាលប្រទេសនេះមានភស្តុតាងផ្លូវច្បាប់គ្រប់គ្រាន់។
ការអះអាងនេះ ធ្វើឡើងស្របពេលដែលគេមើលឃើញថា មន្ត្រីគណបក្សប្រជាជនកម្ពុជាកំពុងរៀបចំបណ្ដាញអ្នកគាំទ្ររបស់ខ្លួននៅប្រទេសអូស្ត្រាលី ខ្វាត់ខ្វែងក្នុងបំណងឱ្យសហគមន៍ខ្មែរក្នុងប្រទេសនេះគាំទ្រគណបក្សប្រជាជនកម្ពុជាផង និងដើម្បីបំបែកបំបាក់សហគមន៍ខ្មែរដែលមិនគាំទ្រគណបក្សរបស់ខ្លួនផងដែរ។
តាមខ្លឹមសារច្បាប់អន្តោប្រវេសន៍សហរដ្ឋអាមេរិក រាជរដ្ឋាភិបាលគ្រប់គ្រងដោយគណបក្សប្រជាជនកម្ពុជាបច្ចុប្បន្ននេះ គេចាត់ទុកថាអនុវត្តតាមមាគ៌ារបបក្តោបក្តាប់ផ្ដាច់ការផ្ដាច់មុខ totalitarianism។
ចាប់តាំងពីឆ្នាំ២០១៥ មក គណបក្សប្រជាជនកម្ពុជាដែលជាអតីតបក្សកុម្មុយនីស្តវៀតណាម បានរៀបចំបណ្ដាញនៅប្រទេសអូស្ត្រាលីយ៉ាងសកម្មដែលមានលោក គឹម សន្តិភាព ជាមនុស្សជំនិតនឹងលោក ហ៊ុន ម៉ាណែត ជាអ្នកត្រួសត្រាយផ្លូវនៅពេលនោះ ក្នុងនោះ ពួកគេបានបែងចែកសមាជិកគណបក្សប្រជាជនកម្ពុជាគ្រប់គ្រងក្នុងតំបន់ទាំង ៧ នៅប្រទេសអូស្ត្រាលី និងពីរតំបន់ទៀត គឺតំបន់ ៨ និងតំបន់ ៩ នៅប្រទេសនូវែលហ្សេឡង់ រហូតដល់សព្វថ្ងៃនេះ។
សេចក្តីរាយការណ៍អំពីការចងក្រងជាចង្កោម ហៅថាបណ្ដាញក្រុមការងាររៀបចំចាត់តាំងយុវជនគណបក្សប្រជាជនកម្ពុជា ផ្សាយនាឆ្នាំ២០២១ បង្ហាញថា រាជធានីកង់ប៊ែរ៉ា ដែលជាតំបន់១ នៃប្រទេសអូស្ត្រាលី ត្រូវទទួលខុសត្រូវដោយឈ្មោះ រិន ឈួន រដ្ឋលេខាធិការក្រសួងសាធារណការ និងដឹកជញ្ជូន ចំណែកឯក្រុងមែលប៊ន រដ្ឋវិចតូរីយ៉ា (Melbourne, Victoria) ដែលជាតំបន់២ ត្រូវទទួលខុសត្រូវដោយឧត្ដមសេនីយ៍ទោ ឡាវ វ៉ាន់ មេបញ្ជាការរងកងពលតូចអង្គរក្សលេខ៧០ ខណៈក្រុងស៊ីដនី ដែលជាតំបន់៣ ត្រូវទទួលខុសត្រូវដោយឧត្ដមនាវីឯក ហួរ ហាប់ មេបញ្ជាការរងនៃបញ្ជាការដ្ឋានកងយោធពលនៃកងនាវាចរណ៍ខេមរភូមិន្ទផងដែរ។
ក្រៅពីនេះ ក្រុងប្រ៊ីស្បេន (Brisbane) ដែលជាតំបន់៤ ត្រូវទទួលខុសត្រូវដោយឧត្តមសេនីយ៍ទោយោធា វង្ស វិសិទ្ធ ប្រធានក្រុមការងារយុវជនបក្ស និងក្រុងអាដឺឡែដ (Adelaide) ដែលជាតំបន់៥ ត្រូវទទួលខុសត្រូវដោយលោក អ៊ិន មាត្រា ប្រធាននាយកដ្ឋានធានារ៉ាប់រង និងសោធននិវត្តន៍។
ដោយឡែកក្រុង Darwin ដែលជាតំបន់៦ ត្រូវទទួលខុសត្រូវដោយឧត្តមសេនីយ៍ទោប៉ូលិស សុខ វាសនា ប្រធាននាយកដ្ឋានអន្តោប្រវេសន៍ និងបច្ចេកវិទ្យា និងក្រុងភើត្ស៍ (Perth) ដែលជាតំបន់៧ ត្រូវទទួលខុសត្រូវដោយឈ្មោះ ខាន់ វណ្ណៈ អគ្គលេខាធិការរងនៃក្រុមប្រឹក្សាជាតិជាន់ខ្ពស់សេដ្ឋកិច្ច ជាប្រធានក្រុមការងារយុវជនបក្សប្រជាជនកម្ពុជាផងដែរ។
ក្រៅពីការចងក្រងអូសទាញឱ្យពលរដ្ឋខ្មែរដែលរស់នៅក្នុងប្រទេសអូស្ត្រាលី ចូលជាសមាជិកគណបក្សប្រជាជនកម្ពុជា អ្នកទទួលខុសត្រូវតាមតំបន់នីមួយៗ ក៏មានភារកិច្ចបញ្ចុះបញ្ចូលឱ្យពលរដ្ឋខ្មែរក្នុងប្រទេសនោះទៅទទួលស្វាគមន៍នាយករដ្ឋមន្ត្រីប្រទេសកម្ពុជា រាល់ពេលមានវត្តមានក្នុងប្រទេសអូស្ត្រាលី ម្តងៗ។ ឧទាហរណ៍ជាក់ស្តែង កាលពីថ្ងៃទី៣ ខែមីនា ឆ្នាំ២០២៤ ក្នុងពិធីជួបជុំជាមួយប្រជាពលរដ្ឋខ្មែរក្នុងប្រទេសអូស្ត្រាលី ជាមួយនឹងនាយករដ្ឋមន្ត្រី ហ៊ុន ម៉ាណែត ត្រូវមន្ត្រីបក្សកាន់អំណាចអះអាងថា មានអ្នកចូលរួមទទួលស្វាគមន៍លោក ហ៊ុន ម៉ាណែត ជាង ១០០០នាក់។
ទោះជាយ៉ាងណាក៏ដោយ តំណាងរាស្ត្របក្សប្រឆាំងលោក សួន សុរីដា ប្រាប់សារព័ត៌មាន The Cambodia Daily ក្នុងកិច្ចសម្ភាសន៍ពិសេសមួយនៅថ្ងៃទី៦ ខែមីនា ឆ្នាំ២០២៤ នេះថា ការជួបជុំរវាងនាយករដ្ឋមន្ត្រី ហ៊ុន ម៉ាណែត និងប្រជាពលរដ្ឋដែលរស់នៅប្រទេសអូស្ត្រាលី នោះ គឺសុទ្ធតែជាការបោកបញ្ឆោតពីក្រុមមន្ត្រីបក្សកាន់អំណាច ដែលបានកៀរគរពលរដ្ឋខ្មែរទាំងនោះឱ្យទៅចូលរួមទទួលលោក ហ៊ុន ម៉ាណែត ប៉ុណ្ណោះ មិនមែនពួកគេទៅចូលរួមដោយស្ម័គ្រចិត្តទេ។
លោក សួន សុរីដា អះអាងថា មុននឹងលោក ហ៊ុន ម៉ាណែត ធ្វើដំណើរទៅប្រទេសអូស្ត្រាលី បណ្ដាញមន្ត្រីគណបក្សប្រជាជនកម្ពុជាដែលរស់នៅក្នុងប្រទេសអូស្ត្រាលី បានធ្វើលិខិតបោកប្រាស់ជាច្រើនអញ្ជើញឱ្យប្រជាពលរដ្ឋខ្មែរដែលរស់នៅក្នុងប្រទេសអូស្ត្រាលី ទៅចូលរួមក្នុងពិធីជប់លៀងមួយ ប៉ុន្តែពេលទៅដល់ទើបពលរដ្ឋខ្មែរទាំងនោះដឹងថា តាមការពិត ខ្លួនត្រូវគេបោកបញ្ឆោតឱ្យចូលរួមពិធីនេះដើម្បីឱ្យពួកគេចុះឈ្មោះរបស់ខ្លួនទទួលស្វាគមន៍លោក ហ៊ុន ម៉ាណែត ប៉ុណ្ណោះ មិនមែនជាកម្មវិធីជប់លៀងដូចជាការបញ្ជាក់ក្នុងលិខិតអញ្ជើញនោះទេ។
មានមតិក្នុងមជ្ឈដ្ឋានខ្មែរខ្លះចោទសួរថា ហេតុអ្វីបានជាមានអ្នកដែលបណ្តោយខ្លួនឲ្យបណ្ដាញមន្ត្រីបក្សប្រជាជនកម្ពុជា កៀរគរបានដូចគោដូចក្របីទៅតាមលិខិតអញ្ជើញបោកប្រាស់អ៊ីចឹង?៕