នាយករដ្ឋមន្ត្រីនៃប្រទេសអ៊ីស្រាអែល Benjamin Netanyahu សច្ចាថានឹងត្រូវតែវាយសងសឹកលើអ៊ីរ៉ង់ វិញ ដែលថាជាការវាយការពារខ្លួន។
លោក Netanyahu បានបញ្ជាក់ថា បើទោះក្រុមសម្ព័ន្ធមិត្តអ៊ីស្រាអែល មានទាំងសហរដ្ឋអាមេរិក និងក្រុមបស្ចិមប្រទេសមួយចំនួនបញ្ចុះបញ្ចូលឱ្យអ៊ីស្រាអែល បន្តអត់ធ្មត់ក៏ដោយ ក៏វាយបកវិញរបស់អ៊ីស្រាអែល ត្រូវតែធ្វើ ប៉ុន្តែមេដឹកនាំអ៊ីស្រាអែលរូបនេះមិនបានបញ្ជាក់ពេលវេលានៃការវាយបកវិញទៅលើប្រទេសអ៊ីរ៉ង់ នៅពេលណា ហើយវាយប្រហារដោយប្រើអាវុធអ្វីខ្លះនោះទេ។
សហរដ្ឋអាមេរិក សហភាពអឺរ៉ុប និងក្រុមប្រទេសឧស្សាហកម្ម G-7 ស្នើឱ្យអ៊ីស្រាអែល កុំវាយសងសឹកអ៊ីរ៉ង់ អី ពីព្រោះវានឹងនាំទៅរកសង្គ្រាមដ៏ធំធេងរវាងប្រទេសទាំងពីរ ហើយបង្កអស្ថិរភាពយ៉ាងធ្ងន់ធ្ងរចំពោះតំបន់មជ្ឈិមបូព៌ា ប៉ុន្តែក្រុមប្រទេសលោកខាងលិចនេះសន្យាដាក់ទណ្ឌកម្មធ្ងន់ធ្ងរលើអ៊ីរ៉ង់។
សហរដ្ឋអាមេរិក គឺលោក ចូ បៃដិន ដែលជាប្រធានាធិបតី បានស្នើទៅលោកនាយករដ្ឋមន្ត្រីនៃប្រទេសអ៊ីស្រាអែល Netanyahu ថា អាមេរិកនឹងមិនជួយអន្តរាគមន៍ជួយអ៊ីស្រាអែល ទៀតនោះទេ បើអ៊ីស្រាអែល បើកការវាយប្រហារលើអ៊ីរ៉ង់។ នេះបើយោងតាមបណ្ដាញផ្សាយព័ត៌មាន The Telegraph របស់អង់គ្លេស។
ជាមួយគ្នានេះ រដ្ឋមន្ត្រីការបរទេសនៃប្រទេសហ្សកដានី បាននិយាយកាលពីថ្ងៃពុធ ទី១៧ ខែមេសា ថា ការសងសឹកណាមួយរបស់អ៊ីស្រាអែល ប្រឆាំងនឹងអ៊ីរ៉ង់ អាចនឹងរុញច្រានតំបន់ទាំងមូលទៅកាន់មាត់ជ្រោះនៃសង្គ្រាមដ៏បំផ្លិចបំផ្លាញមួយដ៏ធំបំផុត។
លោក Ayman Safadi រដ្ឋមន្ត្រីការបរទេសហ្សកដានី បាននិយាយថា ប្រទេសរបស់លោកបាននិងកំពុងប្រឹងប្រែងបញ្ចុះបញ្ចូលមហាអំណាចធំៗឱ្យជួយទប់ស្កាត់ការផ្ទុះរាលដាលជម្លោះដែលអាចនឹងបង្កជាផលវិបាកធ្ងន់ធ្ងរដល់ស្ថិរភាព និងសន្តិសុខក្នុងតំបន់មជ្ឈិមបូព៌ា។
លោកបានបញ្ជាក់ថា ហានិភ័យគឺមានទំហំធំធេងណាស់។ វាអាចរុញច្រានឱ្យតំបន់ទាំងមូលទៅកាន់មាត់ជ្រោះនៃសង្គ្រាម ដែលអាចនឹងបំផ្លិចបំផ្លាញពួកយើងនៅក្នុងតំបន់ និងបង្កផលវិបាកដល់បណ្ដាប្រទេសផ្សេងទៀត រួមទាំងសហរដ្ឋអាមេរិកផងដែរ។
ហ្សកដានី ដែលជាសម្ព័ន្ធមិត្តដ៏សំខាន់មួយរបស់សហរដ្ឋអាមេរិក ក៏បានចូលរួមនៅក្នុងការជួយបាញ់ទម្លាក់ដ្រូន និងមីស៊ីលអំឡុងការវាយប្រហារសងសឹករបស់អ៊ីរ៉ង់ លើអ៊ីស្រាអែល ដែលហោះកាត់ប្រទេសរបស់ខ្លួនឆ្ពោះទៅកាន់ទីក្រុងហ្ស៊េរុយសាឡិម កាលពីយប់ថ្ងៃសៅរ៍សប្ដាហ៍មុន។
កាលពីរំលងអាធ្រាត្រថ្ងៃទី១៣ ចូលដល់ថ្ងៃទី១៤ មេសា អ៊ីរ៉ង់បានបើកការវាយប្រហារក្នុងកម្រិតសងសឹកទៅលើប្រទេសអ៊ីស្រាអែល ដោយបាញ់ដ្រូន និងមីស៊ីលដល់ទៅ ៣៥០គ្រាប់ ដែលនេះជាការបញ្ជាក់របស់កងទ័ពអាកាសអ៊ីស្រាអែល។
ការវាយប្រហារយ៉ាងសម្បើមរបស់អ៊ីរ៉ង់ ដូចនេះ គឺអ៊ីរ៉ង់ ប្រើប្រាស់រហូតដល់ទៅមីស៊ីលផ្លោងអន្តរទ្វីប ICBM ដោយបាញ់ចំនួន ១២០គ្រាប់។ មីស៊ីលនេះមានល្បឿនលឿនបំផុតដែល ១២នាទីប៉ុណ្ណោះវាហោះមកដលលំហអាកាសអ៊ីស្រាអែល ប៉ុន្តែអ៊ីស្រាអែល អះអាងថា ទាំងមីស៊ីល ICBM និងដ្រូនរបស់អ៊ីស្រាអែល គឺត្រូវបានបាញ់ទម្លាក់ស្ទើរតែទាំងអស់។ អ៊ីស្រាអែល ថាបានបាញ់ទម្លាក់ដល់ទៅ ៩៩ភាគរយ។ មិនតែប៉ុណ្ណោះ សហរដ្ឋអាមេរិកអះអាងថា បានបាញ់ស្កាត់ដ្រូនរបស់អ៊ីរ៉ង់ ដោយបាញ់ចេញពីនាវាចម្បាំងរបស់អាមេរិក គឺបានទម្លាក់ ៧៥គ្រាប់ ហើយបានបាញ់ទម្លាក់មីស៊ីល ICBM របស់អ៊ីរ៉ង់ ៣គ្រាប់។
មិនតែប៉ុណ្ណោះ អង់គ្លេស និងបារាំង ក៏បញ្ចេញនាវាចម្បាំងរបស់ពួកគេជួយអ៊ីស្រាអែល បាញ់ទម្លាក់មីស៊ីលរបស់អ៊ីរ៉ង់ ផងដែរ។
ការវាយប្រហាររបស់អ៊ីរ៉ង់ មិនបានបង្កការខូចខាតធ្ងន់ធ្ងរ ឬមានមនុស្សស្លាប់ក្នុងទឹកដីអ៊ីស្រាអែល នោះទេ ប៉ុន្តែអ៊ីស្រាអែល បាននិយាយថា ខ្លួនត្រូវតែសងសឹកចំពោះអ៊ីរ៉ង់ ដើម្បីថែរក្សាការពារការកំញើញទប់ស្កាត់សត្រូវមួយនេះ។
តែយ៉ាងណា អ៊ីរ៉ង់ នៅតែប្រកាសថា ខ្លួនបានជោគជ័យ។ នៅក្នុងពិធីព្យុហយាត្រាមួយរបស់កងទ័ពអ៊ីរ៉ង់ កាលពីថ្ងៃទី១៧ មេសា ប្រធានាធិបតីអ៊ីរ៉ង់ លោក អ៊ីប្រាហីម រ៉ៃស៊ី បានថ្លែងសរសើរកងទ័ពរបស់អ៊ីរ៉ង់ ដែលសម្រេចបានក្នុងការវាយប្រហារលើអ៊ីស្រាអែល ប៉ុន្តែប្រធានាធិបតីអ៊ីរ៉ង់រូបនេះបានថ្លែងថា អ៊ីរ៉ង់បានវាយប្រហារអ៊ីស្រាអែល គឺត្រឹមតែការកំណត់ប៉ុណ្ណោះ ដោយមិនធ្វើឱ្យរីករាលដាលនៃការវាយសងសឹកនេះទេ។
តែបែបនេះក្ដី ប្រធានាធិបតីអ៊ីរ៉ង់រូបនេះព្រមានវិញថា បើអ៊ីស្រាអែល ហ៊ានតែបើកការវាយប្រហារមកលើអ៊ីរ៉ង់ ពេលនោះគឺអ៊ីរ៉ង់ត្រូវវាយប្រហារទៅលើអ៊ីស្រាអែលធ្ងន់ជាងនេះច្រើនដងទៅទៀត ហើយព្រមានថា សង្គ្រាមវាយលុកកម្ទេចអ៊ីស្រាអែល គឺជៀសពុំរួចនោះទេ។
ពិភពលោកកំពុងតែដាក់ការព្រួយបារម្ភយ៉ាងខ្លាំងថា តំបន់មជ្ឈិមបូព៌ាទំនងជៀសមិនរួចទេពីការផ្ទុះសង្គ្រាមអ៊ីស្រាអែល និងអ៊ីរ៉ង់។ អ៊ីស្រាអែល និងអ៊ីរ៉ង់ គឺជាសត្រូវប្រវត្តិសាស្ត្រជាមួយគ្នា។ ប្រទេសពីរនេះមិនមានព្រំដែនជាប់គ្នានោះទេ ប៉ុន្តែមានសក្ដានុពលយោធាប្រហាក់ប្រហែលគ្នា លើកលែងតែអ៊ីរ៉ង់ មានចំនួនប្រជាជនច្រើនជាងអ៊ីស្រាអែល ដល់ទៅជិត ១០ដង។ វាមានន័យថា អ៊ីរ៉ង់ មានប្រជាជនជិត ៩០លាននាក់ ហើយអ៊ីស្រាអែល មានប្រជាជនជាង ៩លាននាក់ប៉ុណ្ណោះ។
អ៊ីរ៉ង់ មានទ័ពសកម្ម និងទ័ពបម្រុង ១លាននាក់ ចំណែកឯអ៊ីស្រាអែល មានទ័ពសកម្ម និងទ័ពបម្រុងសរុបប្រមាណជា ៦០ម៉ឺននាក់ ប៉ុន្តែអ៊ីស្រាអែល មានសព្វាវុធដែលច្រើនជាងអ៊ីរ៉ង់ តែមួយប្រភេទប៉ុណ្ណោះ គឺយន្តហោះចម្បាំង។ ក្រៅពីនេះ អ៊ីរ៉ង់មានសព្វាវុធច្រើនជាងអ៊ីស្រាអែលទៅទៀត ប៉ុន្តែប្រទេសអ៊ីស្រាអែល មានក្បាលគ្រាប់នុយក្លេអ៊ែរដល់ទៅ ៩០គ្រាប់។ នេះបើតាមគេហទំព័រនៃសារព័ត៌មាន Global Power ចំណែកអ៊ីរ៉ង់ មិនច្បាស់ថាមានគ្រប់នុយក្លេអ៊ែរនោះទេ៕