អគ្គលេខាធិការអង្គការយោធាណាតូ (NATO) លោក Jens Stoltenberg បាននិយាយថា វាមិនទាន់យឺតពេលពេកនោះទេដើម្បីឱ្យអ៊ុយក្រែន ទទួលបានជ័យជម្នះក្នុងសង្គ្រាម បើទោះជាអ៊ុយក្រែន កំពុងខ្វះសព្វាវុធចំពោះមុខការវាយលុកដ៏ខ្លាំងរបស់កងទ័ពរុស្ស៊ី ក៏ដោយ។
បើយោងតាមទីភ្នាក់ងារសារព័ត៌មាន AFP លោក Stoltenberg ធ្វើការកត់សម្គាល់ដូចនេះក្នុងសន្និសីទសារព័ត៌មានជាមួយប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃចន្ទ ទី២៩ ខែមេសា នាឱកាសលោកបំពេញទស្សនកិច្ចជាថ្មីម្ដងទៀតទៅកាន់ទីក្រុងគៀវ និងចំពេលកងទ័ពរុស្ស៊ី អះអាងពីជ័យជម្នះក្នុងការវាយដណ្ដើមបានភូមិជាច្រើននៅក្នុងតំបន់ដុនបាសភាគខាងកើតនៃប្រទេសអ៊ុយក្រែន។
ក្នុងសន្និសីទសារព័ត៌មានជាមួយលោក Zelenskyy លោក Stoltenberg ថ្លែងថា អ៊ុយក្រែនបានកំពុងប្រឈមមុខនឹងការខ្វះគ្រាប់កាំភ្លើងអស់រយៈពេលជាច្រើនខែមកហើយ ដោយត្រូវបង្ខំចិត្តប្រើប្រាស់យ៉ាងសន្សំសំចៃ ប៉ុន្តែវាមិនទាន់យឺតពេលពេកនោះទេដើម្បីឱ្យអ៊ុយក្រែន ទទួលបានជ័យជម្នះ។
លោក Stoltenberg បន្ថែមថា ការពន្យារពេលនៃការផ្គត់ផ្គង់អាវុធរបស់លោកខាងលិច ជាពិសេសពីសហរដ្ឋអាមេរិកទៅឱ្យអ៊ុយក្រែន បានបង្កជាផលវិបាកធ្ងន់ធ្ងរចំពោះកងទ័ពអ៊ុយក្រែន។ តែទោះជាបែបនេះក្ដី ប្រមុខ NATO នៅតែទទូចថា ការបន្ថែមអាវុធរបស់លោកខាងលិចកំពុងស្ថិតនៅតាមផ្លូវបញ្ជូនទៅឱ្យអ៊ុយក្រែន។
ប្រទេសអ៊ុយក្រែន ពឹងផ្អែកយ៉ាងខ្លាំងលើជំនួយយោធាពីលោកខាងលិច ជាពិសេសសហរដ្ឋអាមេរិក ដើម្បីអាចទប់ទល់នឹងការវាយលុករបស់កងទ័ពរុស្ស៊ី។
រុស្ស៊ី មានផែនការវាយយកឱ្យបានតំបន់ដុនបាសពីអ៊ុយក្រែន នៅអំឡុងខែមិថុនា ហើយយ៉ាងហោចណាស់វាយយកឱ្យបានខេត្តដូណែត។ តំបន់ដុនបាស ស្ថិតនៅភាគខាងកើតប្រទេសអ៊ុយក្រែន ដែលមានផ្ទៃដីជាង ៥ម៉ឺន ៣ពាន់គីឡូម៉ែត្រក្រឡា។ ដុនបាស មានខេត្តដូណែត និងលូហាន់។
តាមទីភ្នាក់ងារសារព័ត៌មាន AFP កទ័ពអ៊ុយក្រែន កំពុងប្រយុទ្ធទប់ការវាយលុករបស់កងទ័ពរុស្ស៊ី ដែលមានចំនួនដ៏ច្រើន។
ទ័ពអ៊ុយក្រែន កំពុងដកថយចេញពីទីតាំងនានានៅក្នុងផ្នែកខ្លះក្នុងខេត្តដូណែត ខណៈកងទ័ពរុស្ស៊ី វាយរុលកាន់តែខ្លាំង។ នេះបើតាមលោកឧត្ដមសេនីយ៍អ៊ុយក្រែន Oleksandr Syrskyi ជាអគ្គមេបញ្ជាការកងទ័ពអ៊ុយក្រែន ដែលបានថ្លែងកាលពីថ្ងៃអាទិត្យ ទី២៨ មេសា។
លោកឧត្ដមសេនីយ៍ Syrskyi បាននិយាយទៀតថា កងទ័ពអ៊ុយក្រែនមួយចំនួនបានដកត្រឡប់ចេញពីភូមិមួយចំនួននៅក្នុងខេត្តដូណែត ជាទីកន្លែងដែលរុស្ស៊ី បានដាក់ពង្រាយកងទ័ពដ៏ច្រើនសម្បើមវាយលុកលើភូមិទាំងនោះ។
លោកឧត្ដមសេនីយ៍បានសរសេរសាររបស់លោកតាមតេឡេក្រាមថា ស្ថានភាពនៅឯសមរភូមិមានសភាពអាក្រក់បំផុត។ តំបន់ដែលពិបាកបំផុត គឺតំបន់ដែលរុស្ស៊ីត្រួតត្រានៅភាគខាងលិចភូមិ Maryinka និងក្រុង Avdiivka ស្ថិតក្នុងខេត្តដូណែត ដែលជាទីក្រុងយុទ្ធសាស្ត្រដ៏សំខាន់ដែលត្រូវបានកាន់កាប់ដោយកងទ័ពរុស្ស៊ី កាលពីខែកុម្ភៈ។
កងទ័ពអ៊ុយក្រែន ប្រឈមមុខនឹងស្ថានភាពដ៏អាក្រក់បំផុតនៅផ្នែកខាងកើតប្រទេស ខណៈដែលរង់ចាំការផ្តល់អាវុធរបស់សហរដ្ឋអាមេរិក បន្ទាប់ពីបានទទួលការអនុម័តដោយសភាសហរដ្ឋអាមេរិកនូវកញ្ចប់ជំនួយជិត ៦១ពាន់លានដុល្លារសម្រាប់អ៊ុយក្រែន កាលពីខែថ្ងៃទី២០ ខែមេសា។
ក្នុងសន្និសីទសារព័ត៌មានជាមួយលោក Jens Stoltenberg ប្រធានាធិបតីអ៊ុយក្រែន លោក Zelenskyy ក៏បានទទូចដល់សម្ព័ន្ធមិត្តឱ្យបញ្ជូនប្រព័ន្ធកាំជ្រួចការពារដែនអាកាស Patriot កាន់តែច្រើនឡើងថែមទៀត គឺឱ្យបានឆាប់រហ័សទៅតាមលទ្ធភាពដែលអាចធ្វើបាន ដែលលោកថាអ៊ុយក្រែន កំពុងរងការវាយប្រហារយ៉ាងខ្លាំងពីសំណាក់រុស្ស៊ី ដែលបាញ់មីស៊ីលស្រោចវាយប្រហារលើទីតាំងសំខាន់ៗរបស់អ៊ុយក្រែន។
សមរភូមិមុខនៅភាគខាងកើតនៃប្រទេសអ៊ុយក្រែន នៅក្នុងតំបន់មានការប្រយុទ្ធគ្នាយ៉ាងសាហាវក្នុងប៉ុន្មានសប្តាហ៍ថ្មីៗនេះ នៅពេលដែលកងទ័ពរុស្ស៊ី ស្វះស្វែងបង្កើនការត្រួតត្រាសមរភូមិមុខប្រវែងជាង ១ពាន់គីឡូម៉ែត្រ។
អគ្គលេខាធិការអង្គការ NATO លោក Jens Stoltenberg បានថ្លែងទទួលស្គាល់ថា ប្រទេសលោកខាងលិចពិតជាមិនបានធ្វើដូចតាមការសន្យាក្នុងការបញ្ជូនអាវុធទៅឱ្យអ៊ុយក្រែន ខណៈការសន្យារបស់សហរដ្ឋអាមេរិក ដែលនិយាយថា នឹងជួយបំពេញការខ្វះខាតអ៊ុយក្រែន ត្រូវការរយៈពេលដល់ទៅ ៦ខែ ទើបអាចមានការអនុម័តការផ្ដល់ជំនួយនេះ។
ជំនួយជិត ៦១ពាន់លានដុល្លារនៃជំនួយយោធារបស់សហរដ្ឋអាមេរិកចំពោះអ៊ុយក្រែន បើទោះបីជាសភាប្រទេសមហាអំណាចនេះបានអនុម័តឱ្យក៏ដោយ តែធ្វើឱ្យអ៊ុយក្រែន ខកខានខ្លាំងក្នុងការវាយទប់ការវាយលុករបស់កងទ័ពរុស្ស៊ី ធ្វើឱ្យស្ថានការណ៍សឹកនៅលើសមរភូមិមានការប្រែប្រួលជាខ្លាំង ហើយទ័ពរុស្ស៊ី កំពុងមានប្រៀបជាងកងទ័ពអ៊ុយក្រែន។
តែអគ្គលេខាធិការអង្គការ NATO នៅតែជឿជាក់ថា អ៊ុយក្រែននឹងវាយលុកវិញ ហើយអាចឈ្នះសង្គ្រាមទៀតផង ឱ្យតែសព្វាវុធ និងគ្រាប់កាំភ្លើងបានមកដល់ដៃកងទ័ពអ៊ុយក្រែន មានចំនួនគ្រប់គ្រាន់ដើម្បីប្រយុទ្ធ៕