ប្រភពមន្ត្រីផ្ទៃក្នុងគណបក្សប្រជាជនកម្ពុជា បានទម្លាយថា មេដឹកនាំបក្សកាន់អំណាចលោក ហ៊ុន សែន មានផែនការតែងតាំងកូនប្រុសរបស់គាត់ គឺលោក ហ៊ុន ម៉ាណែត ជាប្រធានគណបក្សប្រជាជនកម្ពុជា ជំនួសរូបលោក ក្រោយសាងសង់ព្រែកជីកហ្វូណនដោយជោគជ័យ ខណៈលោក ហ៊ុន ម៉ានី ក៏ទំនងជាត្រូវតែងតាំងជាអនុប្រធានបក្សក្នុងពេលជាមួយគ្នាដែរ។
មន្ត្រីជាន់ខ្ពស់ក្នុងជួរបក្សកាន់អំណាច ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៧ ឧសភា នេះថា ប្រសិនបើផែនការសាងសង់ព្រែកជីកហ្វូណនទទួលបានការគាំទ្រកាន់តែច្រើនពីពលរដ្ឋ និងមជ្ឈដ្ឋាននានា ដូចជា ក្រុមអ្នកវិភាគ ឬអង្គការក្រៅរដ្ឋាភិបាល ជាដើម លោក ហ៊ុន សែន នឹងឆ្លៀតយកឱកាសនេះប្រកាសតែងតាំងលោក ហ៊ុន ម៉ាណែត ឱ្យកាន់តំណែងជាប្រធានគណបក្សប្រជាជនកម្ពុជាជំនួសគាត់តែម្តង។
ប្រភពដដែលបានរៀបរាប់ថា ដើម្បីជួយទប់លំនឹងអំណាចលោក ហ៊ុន ម៉ាណែត ក្នុងនាមជានាយករដ្ឋមន្ត្រី លោក ហ៊ុន សែន បានផ្លាស់ប្ដូរសមាសភាពមន្ត្រីរដ្ឋាភិបាលជាច្រើនដើម្បីឱ្យទៅនៅក្បែរលោក ហ៊ុន ម៉ាណែត ក្នុងបំណងជួយជ្រោមជ្រែង និងការពារអំណាចកូនប្រុសរបស់គាត់ ដូចជា ការផ្លាស់ប្ដូរអតីតមេអគ្គស្នងការនគរបាលជាតិលោក នេត សាវឿន ឱ្យកាន់តំណែងជាឧបនាយករដ្ឋមន្ត្រី និងការតែងតាំងលោក ហ៊ុន ម៉ានី ឱ្យកាន់តំណែងជាឧបនាយករដ្ឋមន្ត្រី ជាដើម។
មន្ត្រីដដែលបានឲ្យដឹងថា រដ្ឋាភិបាលកម្ពុជាបានកំណត់ការសាងសង់ព្រែកជីកហ្វូណនត្រឹមរយៈពេល ៥ឆ្នាំ ដូច្នេះក៏ដល់អាណត្តិបោះឆ្នោតជ្រើសតំណាងរាស្ត្រដែរ ក្នុងនោះ បើប្រជាប្រិយភាពគណបក្សប្រជាជនកម្ពុជាទទួលបានការគាំទ្រខ្លាំងដូចឆ្នាំ២០០៨ ដែលកម្ពុជាមានទំនាស់ជាមួយប្រទេសថៃ នោះក៏ជាវេលាសមរម្យសម្រាប់លោក ហ៊ុន សែន ក្នុងការផ្ទេរតំណែងប្រធានបក្សឱ្យកូនប្រុសរបស់គាត់ដែរ ហើយក៏ជាហេតុផលដែលឱ្យមន្ត្រីក្នុងបក្សរបស់ខ្លួនអាចទទួលយកបានថែមទៀត។
មន្ត្រីជាន់ខ្ពស់បក្សកាន់អំណាចដដែលនេះបញ្ជាក់ថា បញ្ហាចម្រូងចម្រាសជុំវិញការសាងសង់ព្រែកជីកហ្វូណនជាមួយនឹងវៀតណាម ក៏ជាហេតុផលនយោបាយដែលអាចជួយលោក ហ៊ុន ម៉ាណែត ស្វែងរកប្រជាប្រិយភាពពីពលរដ្ឋខ្មែរសម្រាប់ការបោះឆ្នោតនៅអាណត្តិខាងមុខទៀតដែរ គួបផ្សំនឹងមានការគាំទ្រលើការសាងសង់ព្រែកជីកនេះទៀតនោះ លោក ហ៊ុន សែន គិតថាកូនប្រុសរបស់គាត់ នឹងទទួលបានការគាំទ្រដោយពេញមុខនៅពេលបោះឆ្នោតខាងមុខ ដូច្នេះក៏ជាពេលវេលាដែលគាត់ត្រូវប្រគល់តំណែងប្រធានបក្សឱ្យទៅលោក ហ៊ុន ម៉ាណែត នៅពេលនោះដែរ។
កាលពីថ្ងៃទី១០ ខែធ្នូ ឆ្នាំ២០២៣ គណបក្សប្រជាជនកម្ពុជា បានប្រារព្ធមហាសន្និបាតវិសាមញ្ញរបស់ខ្លួន ដើម្បីបញ្ចូលសមាជិកគណៈកម្មាធិការនាយកជិត ៥០០នាក់ (៤៩៦នាក់) ក្នុងនោះ សមាជិកមហាសន្និបាតបក្សទាំងអស់ក៏បានអនុម័តជាឯកច្ឆន្ទជ្រើសរើសលោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន ជាអនុប្រធានគណបក្សប្រជាជនកម្ពុជាផងដែរ។
បន្ទាប់ពីត្រូវបានគណបក្សប្រជាជនកម្ពុជាជ្រើសរើសជាអនុប្រធានគណបក្សបាន ១ថ្ងៃ គឺនៅថ្ងៃទី១១ ខែធ្នូ ឆ្នាំ២០២៣ លោក ហ៊ុន ម៉ាណែត ក៏បានធ្វើដំណើរទស្សនកិច្ចនៅប្រទេសវៀតណាម ផងដែរ ហើយក្នុងដំណើរទស្សនកិច្ចនេះ លោក ហ៊ុន ម៉ាណែត បានជួបជាមួយមេដឹកនាំវៀតណាមជាច្រើននាក់ ដូចជា នាយករដ្ឋមន្ត្រីវៀតណាម លោក ផាម មីញជីញ លោក ង្វៀន ហ្វូចុង អគ្គលេខាធិការមជ្ឈិមបក្សកុម្មុយនីស្តវៀតណាម លោក វ៉ វ៉ាន់ធឿង ប្រធានរដ្ឋវៀតណាម និងលោក វឿង ឌិញហ្វេ ប្រធានរដ្ឋសភាវៀតណាម ផងដែរ ដើម្បីចុះហត្ថលេខាលើកិច្ចព្រមព្រៀងមួយចំនួនរវាងកម្ពុជា និងវៀតណាម។
ក្រោយលោក ហ៊ុន ម៉ាណែត ត្រូវបានជ្រើសរើសជាអនុប្រធានគណបក្សប្រជាជនកម្ពុជា នៅថ្ងៃទី២១ ខែកុម្ភៈ ឆ្នាំ២០២៤ ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ក៏បានចេញព្រះរាជក្រឹត្យតែងតាំងលោក ហ៊ុន ម៉ានី ជាឧបនាយករដ្ឋមន្ត្រីតាមសំណើរបស់លោក ហ៊ុន ម៉ាណែត ផងដែរ។
ទាក់ទិននឹងបញ្ហានេះ តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន ធ្លាប់ព្រមានកាលពីពេលថ្មីៗនេះថា ប្រទេសកម្ពុជាបានធ្លាក់ចូលទៅក្នុងការគ្រប់គ្រងផ្ដាច់មុខនៃគ្រួសារនិយមរបស់ត្រកូលហ៊ុនថែមមួយកម្រិតទៀត ក្រោយការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត និងការរៀបចំតែងតាំងសាច់ញាតិ និងបក្ខពួកខ្លួនឯងឱ្យចូលទៅកាន់តួនាទីខ្ពស់ៗដោយកម្ចាត់អ្នកដទៃឱ្យចេញផុតពីតួនាទីសំខាន់ៗក្នុងជួររដ្ឋាភិបាលថ្មីនេះ។
ជាក់ស្តែង ក្រោយរដ្ឋសភាជាតិបោះឆ្នោតផ្ដល់សេចក្តីទុកចិត្តលើរាជរដ្ឋាភិបាលថ្មី លោក ហ៊ុនម៉ាណែត បានតែងតាំងមន្ត្រីរដ្ឋាភិបាលតាមសែស្រឡាយបក្ខពួករបស់ខ្លួនជាបន្តបន្ទាប់ ក្នុងនោះ សមាជិករដ្ឋាភិបាលទាំងជាង ១ពាន់នាក់ (១៥៤៧នាក់) ត្រូវគេមើលឃើញថាសុទ្ធតែជាបក្ខពួក និងសែស្រឡាយសាច់ញាតិរបស់ត្រកូលហ៊ុនទាំងអស់ ខណៈស្ថាប័នកំពូលរបស់ប្រទេស ដូចជាស្ថាប័នរដ្ឋសភា ស្ថាប័នរដ្ឋាភិបាល និងស្ថាប័នតុលាការ ក៏ត្រូវបានក្តោបក្តាប់ដោយវង្សត្រកូលរបស់លោក ហ៊ុន សែន ដែរនៅពេលនេះ៕