អតីតប្រធានអង្គការតម្លាភាពកម្ពុជាលោក ព្រាប កុល និងជារដ្ឋមន្ត្រីអមនាយករដ្ឋមន្ត្រីតពូជថ្មីនៅកម្ពុជា យល់ព្រមទទួលយកការសុំទោសរបស់ម្ចាស់គណនីហ្វេសប៊ុក Chivann Pen ដែលមានឈ្មោះពិតថា យ៉ង់ ប៉ាក់។ ការទទួលយកការសុំទោសពីលោក យ៉ង់ ប៉ាក់ នេះ ធ្វើឡើងក្រោយពីលោក យ៉ង់ ប៉ាក់ បានផ្ញើលិខិតសុំទោសមួយច្បាប់ចេញពីមន្ទីរឃុំឃាំងព្រៃស។
លោក ព្រាប កុល ព្រមានថា ទោះបីមានការសុំទោសយ៉ាងណាក៏ដោយ ក៏លោកមិនលើកលែងទោសក្នុងការអនុវត្តច្បាប់ជាដាច់ខាត ពីព្រោះលោកមិនមានឥទ្ធិពលដល់នីតិវិធីរបស់តុលាការនោះឡើយ។
លោក ព្រាប កុល បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី៧ ខែឧសភា ឆ្នាំ២០២៤ នេះថា លោកទើបបានទទួលលិខិតសុំទោសរបស់លោក យ៉ង់ ប៉ាក់ ពីក្នុងមន្ទីរឃុំឃាំងព្រៃស ដែលបានទទួលកំហុស និងបង្ហាញអារម្មណ៍សោកស្តាយចំពោះកំហុសរបស់ខ្លួនដែលបានចោទប្រកាន់លើរូបលោកកន្លងមក។
អតីតប្រធានអង្គការតម្លាភាពកម្ពុជារូបនេះលើកឡើងថា លោកជាមនុស្សមិនសូវប្រកាន់ទោសពៃរ៍អ្នកដទៃទេ ប៉ុន្តែការប្រឌិតព័ត៌មានចោទប្រកាន់លើរូបលោកពាក់ព័ន្ធនឹងការកិបកេងលុយក្នុងក្រុមហ៊ុន CIC កន្លងមក បានធ្វើឱ្យប៉ះពាល់ដល់គុណតម្លៃស្នូល និងកិត្តិយសរបស់លោកជាខ្លាំង ហើយលោក យ៉ង់ ប៉ាក់ ក៏ជាមនុស្សទីមួយដែរដែលលោកបានប្តឹងទៅតុលាការក្នុងមួយជីវិតនេះ។
លោក ព្រាប កុល រៀបរាប់ថា ការចោទមួលបង្កាច់នោះ គឺប្រៀបបានទៅនឹងការយកលំពែងមកចាក់ចំបេះដូងរបស់លោកដូច្នោះដែរ។ លោកបន្តថា ការមួលបង្កាច់នេះបានធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ និងសុវត្ថិភាពរបស់លោក និងក្រុមគ្រួសារ រួមទាំងប៉ះពាល់ដល់ស្ថាប័នដែលលោកកំពុងតែបម្រើការងារក្នុងរដ្ឋាភិបាលថែមទៀត។
មន្ត្រីជាន់ខ្ពស់នៃរដ្ឋាភិបាលរូបនេះបញ្ជាក់ថា ក្នុងក្របខ័ណ្ឌផ្ទាល់ខ្លួន លោកទទួលយកការសុំទោសរបស់លោក យ៉ង់ ប៉ាក់ ប៉ុន្តែក្នុងក្របខ័ណ្ឌច្បាប់ លោកមិនមានសិទ្ធិអំណាចធ្វើឱ្យមានឥទ្ធិពលដល់នីតិវិធីរបស់តុលាការនោះទេ ប៉ុន្តែលោកយល់ឃើញថា ប្រទេសកម្ពុជាក៏ត្រូវអនុវត្តច្បាប់ដើម្បីពង្រឹងនីតិរដ្ឋ និងប្រព័ន្ធយុត្តិធម៌ដែរ ដូច្នេះលោកសង្ឃឹមថា លោក យ៉ង់ ប៉ាក់ អាចស៊ូទ្រាំរស់នៅក្នុងគុកបន្តទៀតបាន។
កាលពីថ្ងៃទី២៧ ខែមេសា ឆ្នាំ២០២៤ ម្ចាស់គណនីហ្វេសប៊ុក Chivann Pen ដែលមានឈ្មោះពិតថា យ៉ង់ ប៉ាក់ បានសរសេរលិខិតសូមទោសមួយទៅកាន់លោក ព្រាប កុល ដោយរៀបរាប់ថា ការចោទប្រកាន់លោក ព្រាប កុល ថាបានលួចលុយក្នុងក្រុមហ៊ុន CIC បានធ្វើឱ្យលោកមានការសោកស្តាយយ៉ាងខ្លាំង។
ប្រភពដដែលបន្តថា ការចោទប្រកាន់ដោយគ្មានភស្តុតាងនេះ គឺដោយសារតែលោកជឿលើពាក្យចចាមអារ៉ាមពីអ្នកវិនិយោគក្នុងក្រុមហ៊ុន CIC ដែលបានផ្សព្វផ្សាយរឿងនេះឡើង ដែលជាហេតុធ្វើឱ្យប៉ះពាល់ដល់កិត្តិយសរបស់លោក ព្រាប កុល យ៉ាងធ្ងន់ធ្ងរ។
លោក យ៉ង់ ប៉ាក់ ស្នើសុំឱ្យលោក ព្រាប កុល សម្របសម្រួលនីតិវិធីច្បាប់ដើម្បីឱ្យលោកអាចនៅក្រៅឃុំបណ្ដោះអាសន្ន ចំពោះកំហុសឆ្គងរបស់លោកនាពេលកន្លងមក ប៉ុន្តែសំណើនេះត្រូវបានលោក ព្រាប កុល បដិសេធចោលទាំងស្រុង។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៨ ឧសភា នេះថា លោក យ៉ង់ ប៉ាក់ អាចនៅក្រៅឃុំបាន ឬមិនបាន គឺស្ថិតនៅត្រង់ថា លោក ព្រាប កុល មានចេតនាអធ្យាស្រ័យកម្រិតណាប៉ុណ្ណោះ។
លោកបន្ថែមថា នៅប្រទេសកម្ពុជាតែងតែមានវប្បធម៌អនុគ្រោះ ក្រោយមានការសុំអភ័យទោសពីសាមីខ្លួនដែលព្រមទទួលកំហុស ដូចជាករណីដែលលោក ហ៊ុន ម៉ាណែត និងលោក ហ៊ុន សែន ធ្លាប់បានធ្វើកន្លងមក ជាដើម។
លោក សេក សុជាតិ លើកឡើងថា បើលោក ព្រាប កុល ដាក់សំណើទៅកាន់លោក ហ៊ុន ម៉ាណែតឱ្យជួយអន្តរាគមន៍ ឬគាត់ខ្លួនឯងសម្រេចដកពាក្យបណ្ដឹង ក៏បង្ហាញពីចេតនាក្នុងការអភ័យទោសឱ្យលោក យ៉ង់ ប៉ាក់ ពិតប្រាកដដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា លោក យ៉ង់ ប៉ាក់ ជាបុគ្គលដែលមានពិការភាព ដូច្នេះគាត់ប្រាកដជាមានការពិបាកក្នុងការរស់នៅក្នុងពន្ធនាគារ ប៉ុន្តែបើលោក ព្រាប កុល ជួយសម្រួលឱ្យគាត់បាននៅក្រៅឃុំ ក្នុងការស្វែងរកការពិតជុំវិញដំណើររឿងនេះតាមរយៈតុលាការ ក៏បង្ហាញពីសមានចិត្តរបស់លោក ព្រាប កុល កាន់តែទូលំទូលាយដែរ។
កាលពីថ្ងៃទី១៥ ខែមករា ឆ្នាំ២០២៤ ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ បានរៀបរាប់លើបណ្ដាញសង្គមហ្វេសប៊ុកថា អ្នកក្លាហានម្នាក់ឈ្មោះ ព្រាប កុល ដែលធ្លាប់តស៊ូមតិខាង «តម្លាភាពសង្គម» បានកសាងស្នាដៃដ៏ធំមួយដោយបង្កើតក្រុមហ៊ុនអចលនទ្រព្យខ្នាតយក្សមួយដែលមានឈ្មោះថា Zillenium Group។
លោក យ៉ង់ ប៉ាក់ លើកឡើងថា មុននឹងបង្កើតក្រុមហ៊ុនអចលនទ្រព្យខ្នាតយក្ស Zillenium Group នេះ លោក ព្រាប កុល ក៏ត្រូវគេសង្ស័យថាបានលួចយកលុយប្រមាណ ៨០លានដុល្លារអាមេរិកពីក្រុមហ៊ុនគ្រប់គ្រងមូលនិធិ CIC ហើយដោយសារតែបញ្ហានេះ បានធ្វើឱ្យអ្នកវិនិយោគជាង ៥០០នាក់ (៥៤៦នាក់) ដែលបានបោះទុនវិនិយោគក្នុងក្រុមហ៊ុននេះ បាត់បង់ទ្រព្យធន លុយកាក់ និងក្ស័យធនគ្រប់ៗគ្នា។
នៅថ្ងៃទី១៩ ខែមករា ឆ្នាំ២០២៤ សាលាដំបូងរាជធានីភ្នំពេញ បានចេញដីកាបញ្ជាឱ្យចាប់ខ្លួនលោក យ៉ង់ ប៉ាក់ ក្រោមបទចោទ «ញុះញង់ឱ្យមានការរើសអើង និងបរិហារកេរ្តិ៍ជាសាធារណៈ» បន្ទាប់ពីរដ្ឋមន្ត្រីប្រតិភូអមនាយករដ្ឋមន្ត្រីលោក ព្រាប កុល ដាក់ពាក្យបណ្តឹងទៅតុលាការជុំវិញករណីនេះ។
ទោះជាយ៉ាងណាក៏ដោយ លុយជាង ៨០លានដុល្លារនេះ ពិតជាបានបាត់សូន្យឈឹងពីក្រុមហ៊ុន CIC ប្រាកដមែន ហើយដែលលុយទាំងនោះជាលុយវិនិយោគរបស់ឧកញ៉ា ពលរដ្ឋ ឬអ្នកជំនួញដែលបានប្រមូលយកទៅដាក់វិនិយោគក្នុងក្រុមហ៊ុននេះ ដើម្បីទទួលបានការប្រាក់ខ្ពស់ប្រចាំខែ។
ក្រុមជនរងគ្រោះរាប់រយនាក់ក្នុងក្រុមហ៊ុននេះ បានទាមទារឲ្យលោក គុយ វ៉ាត អតីតប្រធានក្រុមប្រឹក្សាភិបាលនៃក្រុមហ៊ុន ចេញមុខបកស្រាយ និងទទួលខុសត្រូវទៅលើលុយដែលបានបាត់ទាំងនោះ៕