 ដែលមានមូលដ្ឋាននៅសហរដ្ឋអាមេរិក ចាត់ទុកថាវត្តមានរបស់លោក ហ៊ុន សែន ដែលចូលរួមក្នុងវេទិកាចំណេះដឹងពិភពលោកលើកទី២៥ នៅប្រទេសកូរ៉េខាងត្បូង នាពេលនេះ ស្មើនឹងលើកទឹកចិត្តឱ្យគាត់រំលោភសិទ្ធិមនុស្សនៅកម្ពុជាកាន់តែខ្លាំងបន្ថែមទៀត។){kind=link}
ចលនាខ្មែរដើម្បីប្រជាធិបតេយ្យ (KMD) ដែលមានមូលដ្ឋាននៅសហរដ្ឋអាមេរិក ចាត់ទុកថាវត្តមានរបស់លោក ហ៊ុន សែន ដែលចូលរួមក្នុងវេទិកាចំណេះដឹងពិភពលោកលើកទី២៥ នៅប្រទេសកូរ៉េខាងត្បូង នាពេលនេះ ស្មើនឹងលើកទឹកចិត្តឱ្យគាត់រំលោភសិទ្ធិមនុស្សនៅកម្ពុជាកាន់តែខ្លាំងបន្ថែមទៀត។
ប្រធានចលនាខ្មែរដើម្បីប្រជាធិបតេយ្យ (KMD) អ្នកស្រី មូរ សុខហួរ បានប្រាប់សារព័ត៌មាន The Cambodia Daily នៅថ្ងៃទី១០ កញ្ញា នេះថា អ្នកស្រីមានការខកចិត្តយ៉ាងខ្លាំងដែលមេដឹកនាំបក្សកាន់អំណាចលោក ហ៊ុន សែន ត្រូវបានអនុញ្ញាតឱ្យចូលរួមព្រឹត្តិការណ៍វេទិកាចំណេះដឹងពិភពលោកនៅប្រទេសកូរ៉េខាងត្បូង នាពេលនេះ។
អ្នកស្រី មូរ សុខហួរ លើកឡើងថា ការអញ្ជើញលោក ហ៊ុន សែន ឲ្យចូលរួមព្រឹត្តិការណ៍ដ៏មានកិត្តិយសមួយនេះ គឺស្មើនឹងផ្តល់ភ្លើងខៀវឲ្យរបបដឹកនាំផ្ដាច់ការនៅកម្ពុជាបន្តចាប់ខ្លួន និងបំភិតបំភ័យពលរដ្ឋស្លូតត្រង់កាន់តែខ្លាំងតាមទំនើងចិត្តបន្ថែមទៀតតែប៉ុណ្ណោះ។ ជាក់ស្តែង ខ្លួនអ្នកស្រីផ្ទាល់ត្រូវបានរដ្ឋាភិបាលកម្ពុជាបំបិទសិទ្ធិសេរីភាពគ្រប់បែបយ៉ាង ដែលមិនអាចធ្វើសកម្មភាពដើម្បីប្រជាធិបតេយ្យក្នុងប្រទេសកម្ពុជាបាន ព្រមទាំងប្រឈមនឹងការជាប់ពន្ធនាគារជាច្រើនឆ្នាំថែមទៀត ប្រសិនបើអ្នកស្រីវិលត្រឡប់ទៅប្រទេសកម្ពុជាវិញនោះ។
ប្រធានចលនាខ្មែរនៅក្រៅស្រុករូបនេះអះអាងថា ក្រៅពីគាបសង្កត់សិទ្ធិលើអ្នកនយោបាយប្រឆាំង និងគណបក្សប្រឆាំង លោក ហ៊ុន សែន ក៏បានធ្វើទុក្ខបុកម្នេញលើសកម្មជនសង្គមនានាយ៉ាងព្រៃផ្សៃផងដែរ ខណៈការរំលោភយកដីធ្លី ការធ្វើឃាតអ្នកនយោបាយ ការប្រើអំពើហិង្សាក្រៅប្រព័ន្ធតុលាការ និងការគាបសង្កត់ឆ្លងដែនលើជនភៀសខ្លួនដែលស្វែងរកសិទ្ធិជ្រកកោននយោបាយ បានកើតមានឡើងយ៉ាងអនាធិបតេយ្យ។
ប្រភពដដែលបន្តថា ប្រវត្តិរបស់លោក ហ៊ុន សែន តាំងពីនៅកម្មាភិបាលជាន់ខ្ពស់ក្នុងរបបខ្មែរក្រហមពីឆ្នាំ១៩៧០ ដល់ឆ្នាំ១៩៧៧ និងក្រោយឡើងកាន់តំណែងជានាយករដ្ឋមន្ត្រីកម្ពុជាក្រោមការលើកបន្តុបរបស់វៀតណាម ពីឆ្នាំ១៩៨៥ ដល់ឆ្នាំ២០២៣ ត្រូវបានគេកត់ត្រាពីការរំលោភបំពានសិទ្ធិមនុស្សដ៏ឃោរឃៅ។
អ្នកស្រី មូរ សុខហួរ អំពាវនាវឱ្យវេទិកាចំណេះដឹងពិភពលោកក្នុងប្រទេសកូរ៉េខាងត្បូង ស្តាប់សំឡេងពលរដ្ឋខ្មែរដែលរស់នៅតាមបណ្តាប្រទេសនានាលើពិភពលោក ដែលកំពុងទាមទារឱ្យរដ្ឋាភិបាលកម្ពុជាអនុវត្តតាមលទ្ធិប្រជាធិបតេយ្យ បើកលំហសេរីភាពបញ្ចេញមតិ និងលើកស្ទួយសិទ្ធិមនុស្សនៅពេលនេះ។
ប្រធានចលនាខ្មែរដើម្បីប្រជាធិបតេយ្យរូបនេះបញ្ជាក់ថា អ្នកស្រីនឹងធ្វើដំណើរទៅកូរ៉េខាងត្បូង នៅចុងខែតុលា ឆ្នាំ២០២៤ នេះ ដើម្បីចូលរួមជាមួយពលករ និងពលរដ្ឋខ្មែរដែលកំពុងរងការគំរាមកំហែងបន្ទាប់ពីពួកគេសម្ដែងមតិប្រឆាំងនឹងគម្រោងអភិវឌ្ឍន៍ត្រីកោណជាបន្តបន្ទាប់ពីរដ្ឋាភិបាលកម្ពុជានៅពេលនេះ។
កាលថ្ងៃទី០៩ ខែកញ្ញា ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន បានចាកចេញពីប្រទេសកម្ពុជា ទៅកាន់សាធារណរដ្ឋកូរ៉េ ដើម្បីចូលរួមក្នុងវេទិកាចំណេះដឹងពិភពលោកលើកទី២៥ និងដើម្បីទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ផងដែរ។
នៅថ្ងៃទី១០ ខែកញ្ញា នេះ លោក ហ៊ុន សែន សរសេរលើទំព័រហ្វេសប៊ុករបស់លោកថា លោកបានជួបពិភាក្សាការងារជាមួយលោក អ៊ូ វ៉ន់ស៊ីក (Woo Won-Shik) ប្រធានរដ្ឋសភានៃសាធារណរដ្ឋកូរ៉េ។ លោកថា ប្រធានរដ្ឋសភាកូរ៉េ បានកោតសរសើរចំពោះការដឹកនាំរបស់លោកដែលបានដឹកនាំរាជរដ្ឋាភិបាលកម្ពុជាក្នុងឋានៈជានាយករដ្ឋមន្ត្រីអស់រយៈពេលដ៏យូរ ដែលនាំឱ្យកម្ពុជាសម្រេចបានសុខសន្តិភាព និងការរីកចម្រើនរហូតមក។
យ៉ាងណាក៏ដោយ អតីតមេដឹកនាំបក្សប្រឆាំងលោក សម រង្ស៊ី អះអាងថា រដ្ឋាភិបាលក្រោមការដឹកនាំរបស់លោក ហ៊ុន សែន គឺជាការដឹកនាំដោយការបោកប្រាស់ពលរដ្ឋខ្មែរប៉ុណ្ណោះ។
លោក សម រង្ស៊ី បញ្ជាក់ថា សន្តិភាពដែលលោក ហ៊ុន សែន អួតសព្វថ្ងៃនេះ គឺជាសន្តិភាពក្លែងក្លាយ និងជាប្រជាធិបតេយ្យក្លែងក្លាយ។ លោកបន្តថា ការបោះឆ្នោតដែលធ្វើឱ្យគណបក្សប្រជាជនកម្ពុជាឈ្នះរហូតឈានដល់ការតែងតាំងកូនខ្លួនឯងជានាយករដ្ឋមន្ត្រី ក៏ជាការបោះឆ្នោតក្លែងក្លាយ ខណៈការអភិវឌ្ឍដែលមានអគារធំៗសព្វថ្ងៃនេះ ក៏ជាការអភិវឌ្ឍក្លែងក្លាយដែរ ព្រោះជាការអភិវឌ្ឍក្រោមបំណុលចិនវ័ណ្ឌកតែប៉ុណ្ណោះ៕