កាលពីយប់ថ្ងៃអង្គារ ទី១ ខែតុលា កងទ័ពអ៊ីរ៉ង់ បានបាញ់ស្រោចមីស៊ីលចូលទឹកដីអ៊ីស្រាអែល ដោយប្រកាសថាការវាយប្រហារនេះគឺជាការសងសឹកចំពោះមរណភាពមេដឹកនាំហាម៉ាស មេដឹកនាំហេសបូឡា ព្រមទាំងមេបញ្ជាការអ៊ីរ៉ង់ ដែលត្រូវបានអ៊ីស្រាអែល សម្លាប់។
តាមការចេញផ្សាយដោយសារព័ត៌មានអង់គ្លេស The Sky News ដែលស្រង់ប្រភពព័ត៌មាននៃកងទ័ពអ៊ីស្រាអែល បានឱ្យដឹងថា កងទ័ពអ៊ីរ៉ង់ បានបាញ់មីស៊ីលបាលិស្ទីក ១៨០គ្រាប់ ចូលក្នុងទឹកដីអ៊ីស្រាអែល ហើយភាគច្រើននៃមីស៊ីលទាំងអស់នេះត្រូវបានស្ទាក់បំផ្លាញដោយប្រព័ន្ធការពារដែនអាកាស ខណៈកងទ័ពជើងទឹកសហរដ្ឋអាមេរិកនៅក្នុងតំបន់មជ្ឈិមបូព៌ា ក៏បានជួយបាញ់ស្ទាក់បំផ្លាញមីស៊ីលរាប់សិបគ្រាប់របស់អ៊ីរ៉ង់ ផងដែរ។
តែយ៉ាងណា ខាងកងកម្លាំងឆ្មាំបដិវត្តន៍អ៊ីរ៉ង់ អះអាងថា ៩០% នៃមីស៊ីលរបស់ខ្លួនបានវាយប្រហារចំគោលដៅ ហើយក៏បានបាញ់មីស៊ីលល្បឿនលឿនជាងសំឡេង Fattah ជាលើកដំបូងផងដែរនៅក្នុងការវាយប្រហារលើអ៊ីស្រាអែល ដើម្បីជាការសងសឹកឱ្យមេដឹកនាំហាម៉ាស លោក Ismail Haniyeh មេដឹកនាំហេសបូឡា លោក Hassan Nasrallah និងមេបញ្ជាការអ៊ីរ៉ង់ លោក Nilforoshan ដែលត្រូវបានស្លាប់ដោយការវាយប្រហាររបស់អ៊ីស្រាអែល។
ទូរទស្សន៍រដ្ឋអ៊ីរ៉ង់ នៅថ្ងៃពុធ ទី២ តុលា នេះ បានរាយការណ៍ថា អ៊ីរ៉ង់បានបាញ់មីស៊ីលរហូតដល់ ២០០គ្រាប់លើអ៊ីស្រាអែល ហើយជាមួយគ្នានេះ កងកម្លាំងឆ្មាំបដិវត្តន៍អ៊ីរ៉ង់ បានបាញ់មីស៊ីលដោយកំណត់គោលដៅមូលដ្ឋានយោធាចំនួន៣ របស់អ៊ីស្រាអែល នៅជុំវិញទីក្រុង Tel Aviv និងមូលដ្ឋានយោធាមួយចំនួនទៀត។
តែយ៉ាងណា អ៊ីស្រាអែលមិនបានរាយការណ៍លម្អិតពីទំហំនៃការខូចខាត ឬជនរងគ្រោះនោះទេ ចំពោះការវាយប្រហាររបស់អ៊ីរ៉ង់។
ប្រតិកម្មនឹងការវាយប្រហាររបស់អ៊ីរ៉ង់ នាយករដ្ឋមន្ត្រីអ៊ីស្រាអែល Benjamin Netanyahu បានព្រមានថា អ៊ីស្រាអែលនឹងធ្វើឱ្យអ៊ីរ៉ង់ស្គាល់ការឈឺចាប់ដូចនឹងក្រុមហាម៉ាស និងក្រុមហេសបូឡា ដែលលួចវាយប្រហារលើអ៊ីស្រាអែល។
លោក Benjamin Netanyahu បានព្រមានថា មេដឹកនាំអ៊ីរ៉ង់ នឹងមិនអាចរួចខ្លួនបានឡើយ ទោះនៅទីណា ក៏មីស៊ីលរបស់អ៊ីស្រាអែល អាចវាយទម្លុះបានដែរ។
ជាមួយគ្នានេះដែរ អ្នកនាំពាក្យសម្រាប់កងទ័ពអ៊ីស្រាអែល ឧត្ដមសេនីយ៍ Daniel Hagari បាននិយាយថា អ៊ីស្រាអែលបានរៀបចំផែនការសងសឹករួចហើយដោយនៅរង់ចាំពេលវេលាប្រតិបត្តិការតែប៉ុណ្ណោះ។
អ៊ីរ៉ង់ ដែលបើកការវាយប្រហារលើអ៊ីស្រាអែល លើកទី២ នេះ ក៏ចំពេលដែលកងទ័ពជើងគោករបស់អ៊ីស្រាអែល បានវាយលុកចូលខាងក្នុងទឹកដីលីបង់ ដែលជាការសំដៅបោសសម្អាតក្រុមប្រដាប់អាវុធហេសបូឡា នៅលើទឹកដីលីបង់។
កងកម្លាំងហេសបូឡា ក៏ជាក្រុមកម្លាំងដ៏ធំមួយដូចពួកហាម៉ាសផងដែរ ដែលប្រទេសអ៊ីរ៉ង នៅក្រោមការដឹកនាំរបស់លោក អាយ៉ាតូឡាខាមេនី គាំទ្រយ៉ាងខ្លាំង។
កងទ័ពអ៊ីស្រាអែល បានចេញសេចក្តីថ្លែងការណ៍ថា ខ្លួនបានចាប់ផ្តើមប្រតិបត្តិការសឹកក្រោយពីបានកំណត់គោលដៅជាក់លាក់ ដោយផ្អែកលើការស៊ើបការណ៍ច្បាស់ៗ ប្រឆាំងនឹងក្រុមហេសបូឡានៅតាមភូមិក្នុងតំបន់ភាគខាងត្បូងលីបង់ ជាប់បណ្តោយព្រំដែនដែលអាចបង្កការគំរាមកំហែងភ្លាមៗចំពោះសហគមន៍ប្រជាជនអ៊ីស្រាអែល នៅភាគខាងជើងប្រទេសអ៊ីស្រាអែល។
កងទ័ពអាកាសអ៊ីស្រាអែល បញ្ជាក់ថា យន្តហោះចម្បាំងកំពុងគាំទ្រប្រតិបត្តិការរបស់កងកម្លាំងជើងគោក។
ការវាយលុករបស់កងទ័ពអ៊ីស្រាអែល ចូលក្នុងប្រទេសលីបង់ បានរុញឱ្យមានការកើនឡើងជម្លោះកាន់តែខ្លាំងឡើងនៅតំបន់មជ្ឈិមបូព៌ារវាងអ៊ីស្រាអែល និងក្រុមចលនាប្រដាប់អាវុធគាំទ្រដោយអ៊ីរ៉ង់ ដែលបានចាប់ផ្តើមផ្ទុះឡើងដំបូងក្រោយក្រុមហាម៉ាស-ប៉ាឡេស្ទីន បានបើកការវាយឆ្មក់ទ្រង់ទ្រាយធំយ៉ាងប្រល័យចូលភាគខាងត្បូងអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ហើយបង្កទៅជាសង្គ្រាមនៅឯតំបន់ហ្កាហ្សា។
ភាពតានតឹងរវាងអ៊ីស្រាអែល និងក្រុមហេសបូឡា បានហក់ឡើងយ៉ាងគំហុកអំឡុងរយៈពេល ២សប្តាហ៍ចុងក្រោយ នៅពេលដែលអ៊ីស្រាអែល ត្រូវបានចោទថាជាអ្នកនៅពីក្រោយការបំផ្ទុះឧបករណ៍ទាក់ទងរាប់ពាន់គ្រឿងរបស់ក្រុមហេសបូឡា ហើយក្រោយមកបានបើកប្រតិបត្តិការវាយប្រហារតាមផ្លូវអាកាសឥតសំចៃដៃនៅលីបង់។
ការទម្លាក់គ្រាប់បែករបស់អ៊ីស្រាអែល បានផ្ដាច់ជីវិតមេបញ្ជាការហេសបូឡា ជាច្រើននាក់ ហើយកាលពីថ្ងៃសុក្រសប្តាហ៍មុន ក៏បានសម្លាប់មេដឹកនាំហេសបូឡា គឺលោក Hassan Nasrallah ដែលនាំឱ្យអ៊ីរ៉ង់ សរុបការសងសឹកជាលើកទី២ ម្ដងទៀតនេះ។
ការវាយប្រហាររបស់អ៊ីរ៉ង បានកំពុងបង្កការភ័យកាន់តែខ្លាំងក្នុងការអូសទាញសហរដ្ឋអាមេរិកចូលពាក់ព័ន្ធផ្ទាល់ជួយអ៊ីស្រាអែល បើអ៊ីស្រាអែលត្រូវប្រតិបត្តិការសងសឹកលើអ៊ីរ៉ង់ ដែលវាអាចនាំទៅរកសង្គ្រាមអ៊ីរ៉ង់ និងអ៊ីស្រាអែល។
នៅពេលនេះ សហរដ្ឋអាមេរិកបង្កើនវត្តមានទ័ពនៅតំបន់មជ្ឈិមបូព៌ាហក់ឡើង ៥ម៉ឺននាក់ ជាមួយនឹងនាវាចម្បាំងជាង ២០គ្រឿង និងនាវាផ្ទុកយន្តហោះ ២គ្រឿង កំពុងដាក់ពង្រាយនៅតំបន់សមុទ្រនៃមជ្ឈិមបូព៌ា។
នៅក្នុងការវាយប្រហារដោយមីស៊ីបាលិស្ទីករបស់អ៊ីរ៉ង់ កាលពីយប់ថ្ងៃអង្គារ ទី២ ខែតុលា សហរដ្ឋអាមេរិកបានបាញ់មីស៊ីលទប់ស្កាត់មីស៊ីលអ៊ីរ៉ង បានបាញ់ទម្លាក់រាប់សិបគ្រាប់ដែលហោះឆ្ពោះទៅលើលំហអាកាសនៃប្រទេសអ៊ីស្រាអែល។
លោកប្រធានាធិបតីសហរដ្ឋអាមេរិក បានហៅសកម្មភាពរបស់អ៊ីរ៉ង់ ថាកំពុងរុញតំបន់មជ្ឈិមបូព៌ាកាន់តែធ្ងន់ធ្ងរថែមទៀត ខណៈលោក បៃដិន សច្ចាជួយអ៊ីស្រាអែល៕
© 2024, ឌឹ ខេមបូឌា ដេលី. All rights reserved.