 ប្រកាសធ្វើសមាជប្រជាពលរដ្ឋនៅសហរដ្ឋអាមេរិក នៅដើមខែធ្នូ ចុងឆ្នាំ២០២៤ នេះ ស្ដីពីតំបន់ត្រីកោណអភិវឌ្ឍន៍ (CLV-DTA) និងកិច្ចព្រមព្រៀងសន្តិភាពទីក្រុងប៉ារីស (PPA)។){kind=link}
ចលនាខ្មែរដើម្បីប្រជាធិបតេយ្យ (KMD) ប្រកាសធ្វើសមាជប្រជាពលរដ្ឋនៅសហរដ្ឋអាមេរិក នៅដើមខែធ្នូ ចុងឆ្នាំ២០២៤ នេះ ស្ដីពីតំបន់ត្រីកោណអភិវឌ្ឍន៍ (CLV-DTA) និងកិច្ចព្រមព្រៀងសន្តិភាពទីក្រុងប៉ារីស (PPA)។
ចលនាខ្មែរដើម្បីប្រជាធិបតេយ្យ (Khmer Movement for Democracy) ចេញសេចក្តីប្រកាសព័ត៌មានរបស់ខ្លួននៅថ្ងៃទី១៤ វិច្ឆិកា ថា ពិធីសមាជនេះនឹងធ្វើឡើងនៅថ្ងៃទី៨ ខែធ្នូ ឆ្នាំ២០២៤ នៅទីក្រុងឡងប៊ិច សហរដ្ឋអាមេរិក ចាប់ពីម៉ោង ២រសៀល រហូតដល់ម៉ោង ៦ល្ងាច។
ការប្រកាសធ្វើពិធីសមាជពលរដ្ឋខ្មែរក្រៅស្រុកនេះ ធ្វើឡើងដើម្បីបង្កើតក្រុមប្រឹក្សាជាតិក្នុងការតស៊ូរបស់ពលរដ្ឋខ្មែរដែលចង់បានប្រជាធិបតេយ្យពិតប្រាកដនៅកម្ពុជា។
កាលពីថ្ងៃទី១១ ខែវិច្ឆិកា ឆ្នាំ២០២៤ នាយករដ្ឋមន្ត្រីកម្ពុជា លោក ហ៊ុន ម៉ាណែត លើកឡើងថា ក្រុមប្រឆាំងខំនាំគ្នាបង្កើតចលនាមិនចេះចប់មិនចេះហើយនៅក្រៅស្រុក ស្របពេលដែលសមាជិករបស់ពួកគេបានចុះចូលជាមួយគណបក្សប្រជាជនកម្ពុជាជាបន្តបន្ទាប់។
លោក ហ៊ុន ម៉ាណែត បញ្ជាក់ថា ការបង្កើតចលនាជាបន្តបន្ទាប់របស់ពួកគេនៅពេលនេះ គឺគ្រាន់តែដើម្បីទាក់ទាញចំណាប់អារម្មណ៍របស់ប្រជាពលរដ្ឋកុំឱ្យដើរចេញពីខ្លួនប៉ុណ្ណោះ។
ប្រធានចលនាខ្មែរដើម្បីប្រជាធិបតេយ្យ អ្នកស្រី មូរ សុខហួរ បានលើកឡើងកាលពីពេលថ្មីៗនេះថា ពិធីសមាជដែលចលនាខ្មែរដើម្បីប្រជាធិបតេយ្យគ្រោងនឹងបង្កើតនៅពេលខាងមុខនេះ គឺជាវេទិកាមួយក្នុងការបង្កើតឱ្យមានក្រុមប្រឹក្សាជាតិមួយ ដែលមានឈ្មោះថា ក្រុមប្រឹក្សាជាតិបង្រួបបង្រួមកម្ពុជា។
អ្នកស្រី មូរ សុខហួរ អះអាងថា ការជួបជុំនេះ គឺជាវេទិកាដ៏ធំមួយដែលបង្រួបបង្រួមពលរដ្ឋខ្មែរនៅតាមបណ្តាប្រទេសនានា ដូចជា ប្រទេសថៃ ប្រទេសកូរ៉េខាងត្បូង ប្រទេសជប៉ុន អាមេរិក អូស្ត្រាលី បារាំង និងកាណាដា ជាដើម ដើម្បីឱ្យពលរដ្ឋខ្មែរបញ្ចេញមតិក្នុងការតវ៉ាទាមទារជុំវិញការដឹកនាំរបស់រដ្ឋាភិបាលសព្វថ្ងៃនេះ។
ប្រធានចលនាខ្មែរដើម្បីប្រជាធិបតេយ្យរូបនេះបញ្ជាក់ថា ក្រុមប្រឹក្សាជាតិនេះនឹងក្លាយជាតំណាងឆន្ទៈឱ្យពលរដ្ឋខ្មែរស្របច្បាប់ ដើម្បីតវ៉ាទាមទារទៅកាន់អន្តរជាតិឱ្យជួយពិនិត្យឡើងវិញលើការដឹកនាំរបស់រដ្ឋាភិបាលកម្ពុជា និងពិនិត្យរាល់សំណើនានាដែលពលរដ្ឋខ្មែរបានដាក់ជូនបរទេសទាំងនោះ ដើម្បីទាមទារឱ្យមានការស្ដារលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជាឡើងវិញ។
ជុំវិញបញ្ហានេះ សកម្មជននយោបាយបក្សប្រឆាំង និងអង្គការក្រៅរដ្ឋាភិបាល រួមទាំងពលរដ្ឋខ្មែរអាមេរិកាំងរាប់រយនាក់ បានបង្កើតវេទិកាមួយកាលពីពាក់កណ្តាលខែតុលា កន្លងទៅ ដើម្បីសម្ដែងមតិស្ដីពីកង្វល់នានារបស់ពលរដ្ឋខ្មែរពាក់ព័ន្ធនឹងស្ថានភាពនយោបាយនៅកម្ពុជា ក្នុងបំណងឆ្ពោះទៅបង្កើតក្រុមប្រឹក្សាជាតិបង្រួបបង្រួមកម្ពុជា។
ក្រុមប្រឹក្សាជាតិបង្រួបបង្រួមកម្ពុជាដែលគ្រោងនឹងបង្កើតឡើងនេះ គឺជាចលនានយោបាយថ្មីមួយរបស់ក្រុមអ្នកនិយមប្រជាធិបតេយ្យ ដើម្បីតស៊ូមតិឱ្យរដ្ឋាភិបាលកម្ពុជាងាកមករកការគោរពសិទ្ធិមនុស្ស ស្ដារលទ្ធិប្រជាធិបតេយ្យ និងផ្សះផ្សាជាតិឡើងវិញ ស្របពេលដែលគេមើលឃើញថា ប្រជាជាតិខ្មែរទាំងមូលកំពុងរងនូវការបែកបាក់សាមគ្គីជាតិកាន់តែធ្ងន់ធ្ងរទៅៗ ក្រោមការដឹកនាំរបស់គណបក្សប្រជាជនកម្ពុជាសព្វថ្ងៃនេះ៕
© 2024, ឌឹ ខេមបូឌា ដេលី. All rights reserved.