លោក ហេង សិទ្ធី ដែលកំពុងមានជម្លោះជាមួយត្រកូលហ៊ុន អះអាងថា អ្នកឧកញ៉ា ហ៊ុន តូ បានគំរាមសម្លាប់រូបលោក បើលោកមិនប្រគល់ទ្រព្យសម្បត្តិឱ្យគាត់ទេនោះ ខណៈលោក ហ៊ុន តូ បានប្រឌិតរឿងចោទប្រកាន់លោកថាជាអ្នកជំនួញបោកប្រាស់លើជនជាតិចិន ហើយលោកបានត្រៀមខ្លួនរួចជាស្រេចក្នុងការប្តឹងលោក ហ៊ុន តូ ទៅកាន់តុលាការអន្តរជាតិ។
អតីតអ្នកឧកញ៉ា ហេង សិទ្ធី បានសរសេរនៅលើគណនីហ្វេសប៊ុករបស់លោកនៅថ្ងៃទី៩ មករា នេះថា អស់រយៈពេល ២ឆ្នាំមកហើយដែលអ្នកឧកញ៉ា ហ៊ុន តូ ប្រើឧបាយកលប្រឌិតរឿង និងលាបពណ៌មកលើរូបលោកថាជាជនឆបោកអ្នកវិនិយោគជនជាតិចិន។ លោកថា លោកបានត្រៀមខ្លួនរួចជាស្រេចក្នុងការប្តឹងលោក ហ៊ុន តូ ទៅកាន់តុលាការអន្តរជាតិ ដូចជា តុលាការប្រទេសអង់គ្លេស អូស្ត្រាលី អាមេរិក និងតុលាការប្រទេសចិន ផងដែរ ដើម្បីស្វែងរកយុត្តិធម៌សម្រាប់ខ្លួនលោកដែលបានរងនូវការចោទប្រកាន់ទាំងបំពានពីអ្នកឧកញ៉ាត្រកូលហ៊ុនរូបនេះ។
លោក ហេង សិទ្ធី បញ្ជាក់ថា លោកលែងមានជំនឿលើប្រព័ន្ធច្បាប់របស់ប្រទេសកម្ពុជាទៀតហើយ ព្រោះរដ្ឋមន្ត្រីក្រសួងយុត្តិធម៌ លោក កើត រិទ្ធ បានគប់គិតជាមួយអ្នកឧកញ៉ា ហ៊ុន តូ មិនព្រមទទួលបណ្តឹងរបស់លោកដែលបានប្តឹងឧកញ៉ាត្រកូលហ៊ុនរូបនេះទេ។
កាលពីថ្ងៃទី៨ ខែមករា ឆ្នាំ២០២៥ អ្នកឧកញ៉ា ហ៊ុន តូ បានចេញលិខិតបំភ្លឺថា អំពើជាបន្តបន្ទាប់របស់លោក ហេង សិទ្ធី ដែលបានចោទប្រកាន់មកលើរូបលោក គឺជាការក្លែងប្រឌិតអង្គហេតុ ចោទប្រកាន់ដោយគ្មានភស្តុតាង ហើយលោកក៏ត្រៀមប្តឹងបកត្រឡប់ទៅវិញដែរដើម្បីការពារភាពត្រឹមត្រូវរបស់លោក។
លោក ហ៊ុន តូ បញ្ជាក់ថា ទង្វើរបស់អតីតឧកញ៉ា ហេង សិទ្ធី បានធ្វើឱ្យប៉ះពាល់សិទ្ធិឯកជនរបស់លោក និងប្រយោជន៍សង្គមជាតិកម្ពុជាទាំងមូលយ៉ាងធ្ងន់ធ្ងរចំពោះការផ្សព្វផ្សាយផ្ទុយពីការពិត ដើម្បីទម្លាក់កំហុសលើរូបលោកកន្លងមកនោះ។
ជុំវិញបញ្ហានេះ កាលពីថ្ងៃទី៨ មករា នេះ អតីតឧកញ៉ា ហេង សិទ្ធី បានទម្លាយថា ជនជាតិថៃម្នាក់ឈ្មោះ Pentor ជាមេឧក្រិដ្ឋជនអនឡាញខុសច្បាប់ដែលអាជ្ញាធរថៃ កំពុងតាមចាប់ខ្លួន ប៉ុន្តែត្រូវបានលោក ហ៊ុន តូ ទទួលការពារឲ្យរស់នៅក្នុងប្រទេសកម្ពុជា ដោយមិនចាប់បញ្ជូនទៅប្រទេសថៃ វិញ ជាថ្នូរនឹងការសូកលុយពីឧក្រិដ្ឋជនរូបនោះចំនួន ៦លានដុល្លារអាមេរិក។
ជាងនេះទៅទៀត ឧក្រិដ្ឋជនជនជាតិថៃ រូបនេះ ក៏បានទិញនាឡិកាម៉ាក Richardmille តម្លៃ ២លានដុល្លារឱ្យលោក ហ៊ុន តូ ថែមទៀត ជាថ្នូរនឹងការទទួលបាននូវលិខិតឆ្លងដែនសញ្ជាតិខ្មែរពីលោក ហ៊ុន តូ។
អតីតអ្នកឧកញ៉ា ហេង សិទ្ធី លើកជាសំណួរថា កម្ពុជាក៏មានកិច្ចព្រមព្រៀងបញ្ជូនជនល្មើសពីកម្ពុជាទៅថៃ ដែរ (បត្យាប័ន) ចុះហេតុអ្វីថៃ មិនសហការជាមួយកម្ពុជាចាប់បញ្ជូនឧក្រិដ្ឋជនរូបនេះទៅប្រទេសរបស់ខ្លួនវិញ?
ជាងនេះទៅទៀត ហេតុអ្វីលោក ហ៊ុន តូ ជួយរត់ការផ្តល់អាជ្ញាបណ្ណកម្ចីអនឡាញខុសច្បាប់ជ្រកក្រោមឈ្មោះអាជ្ញាបណ្ណទូទាត់សងប្រាក់ ទៅឱ្យឧក្រិដ្ឋជនជនជាតិថៃ ដែលប្រទេសថៃ កំពុងតាមចាប់ខ្លួននេះទៅវិញ ដូច្នេះភស្តុតាងនេះបង្ហាញថា លោក ហ៊ុន តូ ពិតជាបានជាប់ពាក់ព័ន្ធនឹងអំពើឧក្រិដ្ឋរបស់ឧក្រិដ្ឋជនជនជាតិថៃ នោះមែន។
សារព័ត៌មាន The Cambodia Daily មិនទាន់អាចទាក់ទងលោក ហ៊ុន តូ ដើម្បីសុំការបំភ្លឺជុំវិញការចោទប្រកាន់របស់លោក ហេង សិទ្ធី បាននៅឡើយទេ។
ជុំវិញសង្គ្រាមតាមអនឡាញរវាងអ្នកឧកញ៉ា ហ៊ុន តូ និងអតីតអ្នកឧកញ៉ា ហេង សិទ្ធី នៅពេលនេះ គេនៅមិនទាន់ឃើញមានការប្រតិកម្មណាមួយពីលោក ហ៊ុន សែន អតីតនាយករដ្ឋមន្ត្រីដែលត្រូវជាពូបង្កើតរបស់លោក ហ៊ុន តូ នៅឡើយទេ។
នេះក៏ជាលើកទីមួយដែរក្នុងប្រវត្តិសាស្ត្រនៃរជ្ជកាលដឹកនាំរបស់លោក ហ៊ុន សែន និងត្រកូលហ៊ុនទាំងមូល ដែលមានបុរសម្នាក់តាំងខ្លួនជាអ្នកក្លាហានដូចជាលោក ហេង សិទ្ធី ហ៊ានចេញមុខ និងបកអាក្រាតក្មួយប្រុសរបស់លោក ហ៊ុន សែន គឺអ្នកឧកញ៉ា ហ៊ុន តូ ដែលជាបងធំលំដាប់កំពូលនៅកម្ពុជា ហើយដែលលោក ហេង សិទ្ធី ចាត់ទុកថាជាខ្លាក្នុងសួន ឬជាខ្លាលម្អសួនតែប៉ុណ្ណោះ។
លោក ហ៊ុន តូ ដែលត្រូវជាបងប្អូនជីដូនមួយលោកនាយករដ្ឋមន្ត្រី ហ៊ុន ម៉ាណែត និងជាក្មួយប្រុសបង្កើតប្រធានគណបក្សកាន់អំណាច លោក ហ៊ុន សែន បានជាប់ឈ្មោះក្នុងអំពើឧក្រិដ្ឋជាច្រើនទាំងនៅប្រទេសកម្ពុជា និងនៅបរទេស ដូចជាប្រទេសអូស្ត្រាលី ជាដើម។
ជាក់ស្តែង ក្រុមអ្នកស្រាវជ្រាវរូបិយប័ណ្ណគ្រីបតូ Chainalysis កាលពីចុងខែសីហា ឆ្នាំ២០២៤ បានចង្អុលមុខក្រុមហ៊ុន Huione របស់លោក ហ៊ុន តូ ថាបានជាប់ពាក់ព័ន្ធនឹងបទល្មើសឆបោករូបិយប័ណ្ណគ្រីបតូ ព្រមទាំងបានពាក់ព័ន្ធនឹងទីផ្សារឆបោករូបិយប័ណ្ណគ្រីបតូដ៏ខ្មៅងងឹតក្នុងតម្លៃទឹកប្រាក់រហូតដល់ជាង ៤៩ពាន់លានដុល្លារអាមេរិកតាំងពីឆ្នាំ២០២១ មក។
យ៉ាងណាក៏ដោយ គេមិនដែលឃើញរដ្ឋាភិបាលដែលដឹកនាំដោយត្រកូលហ៊ុន បើកការស៊ើបអង្កេតលើសាច់ញាតិរបស់ខ្លួនម្នាក់នេះឡើយ បើទោះបីជាលោក ហ៊ុន តូ ត្រូវសារព័ត៌មានអន្តរជាតិផ្សាយ និងបង្ហាញភស្តុតាងជាបន្តបន្ទាប់ក៏ដោយ៕
© 2025, ឌឹ ខេមបូឌា ដេលី. All rights reserved.