លោក នីកូឡា ម៉ាឌូរ៉ូ ដែលកាន់អំណាចនៅវេណេហ្ស៊ុយអេឡា តាំងពីឆ្នាំ២០១៣ បានស្បថចូលកាន់តំណែងជាប្រធានាធិបតីម្ដងទៀតកាលពីសប្ដាហ៍មុន ដែលជាការត្រួសត្រាយផ្លូវដឹកនាំប្រទេសហែកហួរដោយហិង្សា និងការរំលោភសិទ្ធិមនុស្សនេះ បន្តកាន់អំណាច ៦ឆ្នាំទៅមុខទៀត។
ពិធីស្បថចូលកាន់តំណែងប្រធានាធិបតីនៅវេណេហ្ស៊ុយអេឡា ទោះជាមានចែងនៅក្នុងរដ្ឋធម្មនុញ្ញប្រទេសនេះក្តី តែវាផ្ទុយនឹងប្រព័ន្ធប្រជាធិបតេយ្យសកល ព្រោះថាលោក ម៉ាឌូរ៉ូ កាន់អំណាច ២អាណត្តិកន្លងមក ហើយថែមមួយអាណត្តិទៀតនេះ សុទ្ធតែបានមកពីការវាយបំបាក់ស្មារតី ឆន្ទៈប្រជាជន ដែលមិនបានជ្រើសរើសជនផ្ដាច់ការរូបនេះឱ្យធ្វើមេដឹកនាំវេណេហ្ស៊ុយអេឡា នោះទេ។
លោក ម៉ាឌូរ៉ូ និងបក្សសង្គមនិយមរបស់លោក ឈ្នះឆ្នោតបានមកពីការលួចបន្លំការបោះឆ្នោត និងគាបសង្កត់សំឡេងប្រឆាំង។ ពិធីស្បថចូលកាន់អំណាចកាលពីថ្ងៃសុក្រ ទី១០ មករា ជាជ័យជម្នះរបស់ពួកផ្ដាច់ការ តែជាបរាជ័យនៃកម្លាំងប្រជាធិបតេយ្យសកល។
ពិធីស្បថចូលកាន់តំណែងរបស់លោក ម៉ាឌូរ៉ូ ប្រព្រឹត្តទៅនៅក្រោមបរិយាកាសរឹតបន្តឹងសន្តិសុខយ៉ាងខ្លាំង ព្រោះធ្វើឡើងបន្ទាប់ពីមនុស្សរាប់ម៉ឺននាក់បានចុះថ្នល់ធ្វើបាតុកម្មប្រឆាំងលោក ម៉ាឌូរ៉ូ ដែលពួកគេចោទប្រកាន់ថាបានប្លន់ជ័យជម្នះពីគណបក្សប្រឆាំង។ សមាជិកនយោបាយគណបក្សប្រឆាំងត្រូវចាប់ឃាត់ខ្លួនថែមទៀត ចំណែកការប្រមូលផ្ដុំធ្វើបាតុកម្មប្រឆាំងរដ្ឋាភិបាល ត្រូវហាមឃាត់។
យ៉ាងណា លោក ម៉ាឌូរ៉ូ អះអាងថា ខ្លួនជាអ្នកទទួលជ័យជម្នះនៅក្នុងការបោះឆ្នោតកាលពីខែកក្កដា ឆ្នាំ២០២៤ ខណៈដែលប្រទេសវេណេហ្ស៊ុយអេឡា ស្ថិតនៅក្រោមការដឹកនាំរបស់លោក ស្ថិតក្រោមការដាក់ទណ្ឌកម្មយ៉ាងធ្ងន់ធ្ងរពីក្រុមបស្ចិមប្រទេស មានសហរដ្ឋអាមេរិក អង់គ្លេស កាណាដា សហភាពអឺរ៉ុប រួមនឹងប្រទេសក្នុងតំបន់អាមេរិកឡាទីន ជាដើម ដោយចោទថាលោក ម៉ាឌូរ៉ូ ជាមេដឹកនាំខុសច្បាប់ ហើយប្រកាសដាក់ទណ្ឌកម្មលើគ្រួសារលោក ម៉ាឌូរ៉ូ មន្ត្រីជាន់ខ្ពស់ និងអ្នកជំនួញវេណេហ្ស៊ុយអេឡា ជាច្រើនរយនាក់។
សហរដ្ឋអាមេរិក ក្រោមរដ្ឋការរបស់លោក ចូ បៃដិន បានប្រកាសទាត់ចោលជ័យជម្នះរបស់លោក ម៉ាឌូរ៉ូ តែផ្ទុយទៅវិញ ទទួលស្គាល់បេក្ខជនមកពីបក្សប្រឆាំង គឺលោក Edmundo González ជាបេក្ខជនឈ្នះឆ្នោត ទោះបីជាលោក González រត់ចោលប្រទេសក៏ដោយ។ ក្នុងស្ថានភាពនេះ រដ្ឋការលោក បៃដិន ដំឡើងថ្លៃចាប់ខ្លួនលោក ម៉ាឌូរ៉ូ កើនដល់ជិតពីរដង។
រដ្ឋការលោក បៃដិន បានប្រកាសបន្ថែមប្រាក់រង្វាន់ដល់ទៅ ២៥លានដុល្លារទៅឲ្យអ្នកណាដែលផ្តល់ព័ត៌មានឈានទៅចាប់ខ្លួន ឬកាត់ទោសលោក ម៉ាឌូរ៉ូ។ ជនផ្ដាច់ការវេណេហ្ស៊ុយអេឡា រូបនេះ ត្រូវសហរដ្ឋអាមេរិកចោទប្រកាន់ជាយូរមកហើយជាមេបណ្ដាញជួញដូរគ្រឿងញៀនដ៏ធំក្នុងតំបន់អាមេរិកខាងត្បូង។
ជាមួយគ្នានេះ សហរដ្ឋអាមេរិកបានប្រកាសផ្តល់រង្វាន់ ១៥លានដុល្លារដល់អ្នកផ្តល់ព័ត៌មាន និងការឈានដល់ការចាំខ្លួនលោករដ្ឋមន្ត្រីការពារជាតិវេណេហ្ស៊ុយអេឡា Vladimir Padrino ជារដ្ឋមន្ត្រីរបស់លោក ម៉ាឌូរ៉ូ។ របបលោក ម៉ាឌូរ៉ូ ឈរជើងបានមកដល់ពេលនេះ ដោយសារមានការគាំទ្រពីប្រទេសចិន រុស្ស៊ី និងអ៊ីរ៉ង់។
តើរដ្ឋការលោក ដូណាល់ ត្រាំ អាចផ្ដួលរបបលោក ម៉ាឌូរ៉ូ បានឬទេ?
កាលពីក្នុងអាណត្តិដំបូងពីឆ្នាំ២០១៦ ដល់ឆ្នាំ២០២០ លោក ត្រាំ បានដាក់សម្ពាធខ្លាំងណាស់ទៅលើរបបលោក ម៉ាឌូរ៉ូ ដែលសឹងតែលើកទ័ពចូលចាប់ខ្លួនលោក ម៉ាឌូរ៉ូ ទៀតផង។ តែនៅពេលបាត់បង់អាណត្តិ រដ្ឋការអាមេរិកាំងបានធ្លាក់ទៅលើលោក ចូ បៃដិន។ រដ្ឋការលោក បៃដិន មិនសូវគាបសង្កត់លោក ម៉ាឌូរ៉ូ ខ្លាំងពេកទេ ប៉ុន្តែនៅបន្តរក្សាឈ្មោះលោក ម៉ាឌូរ៉ូ ក្នុងបញ្ជីខ្មៅសហរដ្ឋអាមេរិកដែលជាមេខ្លោងជួញដូរគ្រឿងញៀនដ៏ធំចូលសហរដ្ឋអាមេរិក។
អ្នកសង្កេតការណ៍ថា បើតម្លៃលោក ម៉ាឌូរ៉ូ នៅតែមានតម្លៃទៀត ទំនងរដ្ឋការលោក ត្រាំ អាចបញ្ចប់របបលោក ម៉ាឌូរ៉ូ ព្រោះលោក ត្រាំ មានពេលដល់ ៤ឆ្នាំដើម្បីទូទាត់ជាមួយនឹងលោក ម៉ាឌូរ៉ូ ក្នុងផែនការទាញរបបផ្ដាច់ការនៅអាមេរិកខាងត្បូងមួយនេះពីអំណាច។ ជាការពិត លោក ត្រាំ ចាត់ទុកលោក ម៉ាឌូរ៉ូ ជាសត្រូវសហរដ្ឋអាមេរិករួចទៅហើយ។
គួរបញ្ជាក់ថា ប្រទេសវេណេហ្ស៊ុយអេឡា ជាប្រទេសផលិតប្រេងកាតដែលមានក្រុមហ៊ុនប្រេងអាមេរិកាំង ExxonMobil ធ្លាប់រកស៊ីជាមួយ មុនធ្វើជាតូបនីយកម្មឧស្សាហកម្មប្រេងឥន្ធនៈ ដោយប្រធានាធិបតី Hugo Chavez។ ប្រេងឥន្ធនៈដឹកពីប្រទេសវេណេហ្ស៊ុយអេឡា ទៅកាន់សហរដ្ឋអាមេរិក មានតម្លៃថោកជាងប្រេងដឹកពីមជ្ឈិមបូព៌ា៕
© 2025, ឌឹ ខេមបូឌា ដេលី. All rights reserved.