មេដឹកនាំបក្សកាន់អំណាច លោក ហ៊ុន សែន ទម្លាយលិខិតជាទីប្រឹក្សារបស់លោក លី រតនៈរស្មី ក្រោយជាប់ចោទក្នុងអំពើឃាតកម្មលើសមាជិកសភាបក្សប្រឆាំង លោក លិម គិមយ៉ា ខណៈលិខិតនេះត្រូវបានធ្វើឡើងតាំងពីជិត ១ឆ្នាំមុនមកម្ល៉េះ។
លិខិតបញ្ចប់តំណែងលោក លី រតនៈរស្មី ជាទីប្រឹក្សា ត្រូវបានចុះហត្ថលេខាដោយលោក ហ៊ុន សែន ចុះថ្ងៃទី១៣ ខែមីនា ឆ្នាំ២០២៤ កន្លងទៅ ដែលទើបនឹងត្រូវបានផ្សព្វផ្សាយលើបណ្ដាញទំនាក់ទំនងសង្គមនៅថ្ងៃទី១៧ មករា នេះ ដោយបញ្ជាក់ថា បញ្ចប់តំណែងនេះព្រោះតែសាមីខ្លួនបានប្រព្រឹត្តកំហុសឆ្គងដែលផ្ទុយនឹងកម្មវិធីនយោបាយ និងលក្ខន្តិកៈរបស់គណបក្ស។
កាលពីថ្ងៃទី២៣ ខែមករា ឆ្នាំ២០២៤ លោក លី រតនៈរស្មី ដែលជាអតីតសកម្មជនបក្សប្រឆាំងប្រចាំប្រទេសថៃ ត្រូវបានលោក ហ៊ុន សែន តែងតាំងជាទីប្រឹក្សាផ្ទាល់ខ្លួន បន្ទាប់ពីលោកបានចុះចូលជាមួយគណបក្សប្រជាជនកម្ពុជា។
បើយោងតាមលិខិតមួយផ្សេងទៀតបញ្ជាក់ថា លោក លី រតនៈរស្មី ត្រូវបានលោក ហ៊ុន សែន បញ្ចប់តំណែងជាទីប្រឹក្សានេះតាំងពីថ្ងៃទី១៣ ខែមីនា ឆ្នាំ២០២៤ មកម្ល៉េះ ប៉ុន្តែលិខិតនេះមិនត្រូវបានផ្សព្វផ្សាយជាសាធារណៈឡើយ រហូតទាល់តែលោក លី រតនៈរស្មី ត្រូវបានរកឃើញថាជាប់ពាក់ព័ន្ធនឹងអំពើឃាតកម្មលើលោក លិម គិមយ៉ា ទើបត្រូវបានផ្សព្វផ្សាយនៅពេលនេះតែម្តង។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៧ មករា នេះថា លិខិតបញ្ចប់តំណែងជាទីប្រឹក្សារបស់លោក លី រតនៈរស្មី បង្កប់នូវមន្ទិលសង្ស័យជាច្រើនចំពោះអ្នកនៅពីក្រោយនៃអំពើឃាតកម្មលើលោក លិម គិមយ៉ា។
លោក ស៊ឹង សែនករុណា លើកឡើងថា បញ្ហាគឺស្ថិតនៅត្រង់ការចុះកាលបរិច្ឆេទនៃលិខិតបញ្ចប់តំណែងនេះ ព្រោះបើលិខិតនេះត្រូវចុះកាលបរិច្ឆេទតាំងពីឆ្នាំមុនមែន ហេតុអ្វីគណបក្សប្រជាជនកម្ពុជាមិនបានផ្សព្វផ្សាយជាសាធារណៈ បែរជាមកផ្សព្វផ្សាយក្រោយគេរកឃើញថាលោក លី រតនៈរស្មី ជាប់ក្នុងអំពើឃាតកម្មនាពេលនេះទៅវិញ។
ជាងនេះទៀត ដើម្បីឱ្យកាន់តែជាក់ច្បាស់ គេត្រូវត្រួតពិនិត្យក្បាលបញ្ជីរបស់គណបក្សថាពិតជាបានសរសេរចូលនូវកាលបរិច្ឆេទនេះមែនឬក៏អត់ នោះទើបអាចបញ្ជាក់បានថា កាលបរិច្ឆេទលើលិខិតនេះគឺជាការពិត។
ប្រធានអង្គការរូបនេះព្រមានថា បើមានការកែប្រែកាលបរិច្ឆេទមែន នោះគឺអាចបញ្ជាក់កាន់តែច្បាស់ថាមេដឹកនាំគណបក្សប្រជាជនកម្ពុជា គឺពិតជានៅពីក្រោយអំពើឃាតកម្មនេះប្រាកដមែន៕
© 2025, ឌឹ ខេមបូឌា ដេលី. All rights reserved.