ថ្ងៃចន្ទ ទី២០ ខែមករា នេះ លោក ដូណាល់ ត្រាំ ប្រធានាធិបតីជាប់ឆ្នោតត្រូវស្បថសច្ចាប្រណិធានចូលកាន់តំណែងប្រធានាធិបតីសហរដ្ឋអាមេរិកអាណត្តិថ្មីទី៤៧ ក្រោយពីលោកបរាជ័យក្នុងការបោះឆ្នោតអាណត្តិទី២ កាលពីខែវិច្ឆិកា ឆ្នាំ២០២០ ដែលជ័យជម្នះបានទៅលើលោក ចូ បៃដិន ខាងបក្សប្រជាធិបតេយ្យ។
ប្រជាជន អ្នកនយោបាយ អ្នកជំនួញអាមេរិកាំង រួមនឹងមេដឹកនាំពិភពលោក ទន្ទឹងរង់ចាំការវិលវិញនៃលោក ត្រាំ ទៅសេតវិមានរយៈពេល ៤ឆ្នាំទៅមុខ ចាប់ពីថ្ងៃទី២០ ខែមករា នេះទៅ ថាតើនឹងមានគោលនយោបាយប្លែកដូចម្តេចខ្លះ។
លោក ត្រាំ ជាបេក្ខជនពីបក្សសាធារណរដ្ឋបែបថ្មីនៃក្រុមម៉ាហ្គា (MAGA=Make America Great Again) ដែលបានឈ្នះឆ្នោតលើបេក្ខជនស្ត្រីពីបក្សប្រជាធិបតេយ្យ គឺអ្នកស្រី កាម៉ាឡា ហារីស នៅក្នុងការបោះឆ្នោតប្រធានាធិបតីសហរដ្ឋអាមេរិក កាលពីថ្ងៃទី៥ ខែវិច្ឆិកា ឆ្នាំ២០២៤។ ក្រោយពីលោក ត្រាំ ឈ្នះឆ្នោត លោក ចូ បៃដិន បានជួបលោក ត្រាំ នៅសេតវិមានមុនផ្ទេរតំណែង ដោយសុំឲ្យលោក ត្រាំ ប្រកាន់ជំហររឹងមាំប្រឆាំងនឹងរបបក្រុងមូស្គូ ក្រោមការដឹកនាំរបស់លោក វ៉្លាឌីមៀ ពូទីន ដែលលើកទ័ពបង្កឱ្យមានសង្គ្រាមនៅក្នុងប្រទេសអ៊ុយក្រែន។
លោក បៃដិន ក៏បានសុំឱ្យលោក ត្រាំ បន្តគាំទ្រប្រទេសអ៊ុយក្រែន ដូចនឹងរដ្ឋការរបស់លោក គឺធ្វើយ៉ាងណាកុំឱ្យលោក ពូទីន ឈ្នះសង្គ្រាមនៅអ៊ុយក្រែន ឱ្យសោះ។ មិនថាឡើយតែលោក បៃដិន ម្នាក់ទេ តែជាមួយគ្នានេះ ឧត្ដមសេនីយ៍អាមេរិកាំងខ្លះបារម្ភក្រែងលោក ត្រាំ ត្រូវរ៉ូវជាមួយលោក ពូទីន ជ្រុលពេក ធ្វើឱ្យសហរដ្ឋអាមេរិកធ្លាក់ឥទ្ធិពលពីប្រទេសមហាអំណាចទី១ នៃពិភពលោក ដែលសហរដ្ឋអាមេរិកកាន់តំណែងនេះតាំងពីការបិទបញ្ចប់សង្គ្រាមលោកលើកទី២។
នៅថ្ងៃនេះ បណ្ដាញព័ត៌មានអន្តរជាតិជាច្រើនបានចុះផ្សាយនូវសម្រង់សម្ដីលោក Ben Hodges អតីតអគ្គមេបញ្ជាការកងទ័ពសហរដ្ឋអាមេរិកនៅអឺរ៉ុប ដែលឧត្ដមសេនីយ៍ជើងចាស់នេះបានព្រមានថា ប្រធានាធិបតីជាប់ឆ្នោតសហរដ្ឋអាមេរិក គួរតែជៀសវាងការចុះហត្ថលេខាលើកិច្ចព្រមព្រៀងសន្តិភាពជាមួយមេដឹកនាំរុស្ស៊ី លោក វ៉្លាឌីមៀ ពូទីន ជុំវិញការបញ្ចប់សង្គ្រាមនៅអ៊ុយក្រែន ព្រោះវាអាចប្រឈមមុខនឹងសង្គ្រាមពិភពលោកមួយផ្សេងទៀត។
តាមលោកឧត្ដមសេនីយ៍ Ben Hodges លោក ត្រាំ មិនត្រូវបង្ខំអ៊ុយក្រែន ឱ្យទទួលយកសន្តិភាពពីរុស្ស៊ី និងលោក ពូទីន ដែលលោកថាកិច្ចព្រមព្រៀងណាមួយដែលរុស្ស៊ី ឈ្នះអ៊ុយក្រែន នឹងធ្វើឱ្យរុស្ស៊ី មានអំនួត ព្រោះរុស្ស៊ី វាយយកបានទឹកដីពីអ៊ុយក្រែន។
យោងតាមលោក Ben Hodges តាមរយៈអំនួតនេះ លោក ពូទីន និងរុស្ស៊ី កាន់តែមានមហិច្ឆតាខ្លាំងថែមទៀត ហើយរយៈពេលពីរឆ្នាំទៀត រុស្ស៊ីអាចនឹងបើកការវាយប្រហារមិនត្រឹមតែអ៊ុយក្រែន ប៉ុណ្ណោះទេ ថែមទាំងវាយប្រហារទៅលើប្រទេសណាតូទៀតផង។
លោកឧត្ដមសេនីយ៍ Ben Hodges បានបង្ហាញទុទ្ទិដ្ឋិនិយមថា លោក ពូទីន ក៏នឹងកំណត់គោលដៅដឹកជញ្ជូន និងហេដ្ឋារចនាសម្ព័ន្ធទំនាក់ទំនងនៅទូទាំងទ្វីបអឺរ៉ុប ក៏ជាគោលដៅរងការវាយប្រហារដោយមីស៊ីលអន្តរទ្វីបពីក្រុងមូស្គូ ដែរ។
សម្រាប់លោក Ben Hodges មធ្យោបាយតែមួយគត់ដើម្បីបញ្ចប់សង្គ្រាម គឺបំផ្លាញសេដ្ឋកិច្ចរបស់រុស្ស៊ី ដែលសេដ្ឋកិច្ចរុស្ស៊ី កំពុងឈានទៅរកការដួលរលំព្រោះតែរងការដាក់ទណ្ឌកម្មរបស់សហរដ្ឋអាមេរិក និងសម្ព័ន្ធមិត្តយ៉ាងធ្ងន់ធ្ងរ។ សារព័ត៌មានបស្ចិមប្រទេសផ្សាយចុងសប្តាហ៍មុនថា ឃ្លាំងហិរញ្ញវត្ថុរុស្ស៊ី នឹងអស់ទុនយ៉ាងយូរបំផុតត្រឹមរដូវក្តៅឆ្នាំ២០២៥ នេះ។
លោក Ben Hodges ដែលលើកឡើងពីផលវិបាកសេដ្ឋកិច្ចរបស់រុស្ស៊ី ទំនងលោកផ្អែកលើការព្យាកររបស់សេដ្ឋវិទូជនជាតិអង់គ្លេសម្នាក់ គឺសេដ្ឋវិទូ Roger Bootle ដែលព្រមានថា សេដ្ឋកិច្ចរបស់រុស្ស៊ី នៅសល់ពេលរង់ចាំក្រឡាប់ប៉ុណ្ណោះ ព្រោះអត្រាអតិផរណាលើទីផ្សារកំពុងហក់ឡើងខ្លាំង ខណៈមនុស្សអត់ការងារកាន់តែកើនឡើង ស្របពេលទណ្ឌកម្មពីប្រទេសប្រឆាំងសង្គ្រាមដែលរួមគ្នាដាក់ទៅលើក្រុងមូស្គូ មានរហូតដល់ទៅ ២ពាន់គោលដៅ ទ្រព្យសម្បត្តិរុស្ស៊ី នៅបរទេសរាប់ពាន់លានដុល្លារ ក៏ត្រូវគេបិទខ្ទប់ ឬរឹបអូសយកទៅជួយប្រទេសអ៊ុយក្រែន ទៀត។
បន្ទាប់ពីជ័យជម្នះក្នុងការបោះឆ្នោត លោក ដូណាល់ ត្រាំ បានបញ្ចេញផែនការបង្កើតកិច្ចចរចាសន្តិភាពរវាងអ៊ុយក្រែន និងរុស្ស៊ី ដើម្បីឱ្យសង្គ្រាមឆាប់បិទបញ្ចប់។
ទោះជាបែបនេះក្ដី គេនៅតែមិនប្រាកដប្រជាថា តើលោក ត្រាំ នឹងបញ្ចុះបញ្ចូលទីក្រុងមូស្គូ ឱ្យទទួលយកការបញ្ចប់សង្គ្រាម ហើយប្រគល់សន្តិភាពទៅឱ្យអ៊ុយក្រែន តាមវិធីអ្វីខ្លះនោះទេ ខណៈមានការព្យាករថា លោក ត្រាំ អាចនឹងពិចារណាលើកិច្ចព្រមព្រៀងសន្តិភាព ដែលសម្របសម្រួលបូរណភាពទឹកដីរបស់អ៊ុយក្រែន ខ្លះទៅឱ្យរុស្ស៊ី នៅតំបន់ដែលទ័ពរុស្ស៊ី កំពុងវាយកាន់កាប់បានពីកងទ័ពអ៊ុយក្រែន៕
© 2025, ឌឹ ខេមបូឌា ដេលី. All rights reserved.