មន្ត្រីជាន់ខ្ពស់បក្សប្រឆាំងចាត់ទុកការលើកឡើងពីនាយករដ្ឋមន្ត្រីខ្មែរ លោក ហ៊ុន ម៉ាណែត ដែលថាការចាប់បញ្ជូនឃាតករទៅឱ្យអាជ្ញាធរថៃ បង្ហាញថាកម្ពុជាមិនជាប់ពាក់ព័ន្ធនឹងការសម្លាប់តំណាងរាស្ត្រគណបក្សសង្គ្រោះជាតិ លោក លិម គិមយ៉ា គឺជាសម្ដីកូនក្មេងមិនទាន់ផ្តាច់ទឹកដោះ។
នាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា សរសេរលើគណនីហ្វេសប៊ុករបស់ខ្លួនកាលពីថ្ងៃទី២៦ ខែមករា ឆ្នាំ២០២៥ នេះថា ស្តាប់លោក ហ៊ុន ម៉ាណែត និយាយមួយភ្លែតដូចជាទំនងដែរ ប៉ុន្តែប្រសិនបើពិចារណាបន្តិចនោះ នឹងដឹងថាឃាតករជនជាតិថៃ រត់ចូលប្រទេសកម្ពុជាមិនមែនជារឿងចៃដន្យឡើយ។
លោក មុត ចន្ថា លើកឡើងថា គ្មានហេតុផលណាមួយដែលឃាតករជនជាតិថៃ រត់ចូលប្រទេសកម្ពុជាដើម្បីគេចខ្លួននោះទេ ប៉ុន្តែការដែលឃាតកររត់ចូលមកស្រុកខ្មែរបែបនេះ ទំនងជាអាចមានកិច្ចព្រមព្រៀងនៅមុនពេលអនុវត្តផែនការរវាងឃាតករ និងមេខ្លោងនៅពីក្រោយដោយសន្យាផ្តល់ការពារ ជាដើម។
លោកបន្តថា ប្រសិនជាគ្មានកិច្ចព្រមព្រៀងជាមួយគ្នាជាមុនទេ វាគ្មានហេតុផលគួរឱ្យជឿណាមួយដែលឃាតករបាញ់សម្លាប់អ្នកនយោបាយខ្មែរ ហើយរត់ចូលទឹកដីខ្មែរទេ ហើយថែមទាំងមានមនុស្សរង់ចាំជម្លៀសឃាតករចូលទៅកាន់ទឹកដីខ្មែរថែមទៀតផង។
លោកបន្តទៀតថា ការមិនចាប់ខ្លួនលោក ពេជ្រ គឹមស្រ៊ិន និងលោក លី រតនៈរស្មី បញ្ជូនឱ្យអាជ្ញាធរថៃ រឹតតែធ្វើឱ្យរាជាណាចក្រកម្ពុជាជាប់ឈ្មោះមិនល្អកាន់តែខ្លាំងក្នុងរឿងនេះ ដែលមិនអាចលាងជ្រះឡើយ ក្នុងនោះក៏ធ្វើឱ្យមានការសង្ស័យថាជនសង្ស័យទាំងពីរនាក់នេះប្រហែលក្លាយជាចំណីសត្វក្រពើ ឬកំពុងត្រូវបានលាក់បំពួនដោយនរណាម្នាក់ផងដែរ ទើបពួកគេមិនត្រូវបានចាប់ខ្លួនពីអាជ្ញាធរប្រទេសកម្ពុជាបែបនេះ។
លោក មុត ចន្ថា បញ្ជាក់ថា តុលាការបារាំង ក៏កំពុងស៊ើបអង្កេតសំណុំរឿងឧក្រិដ្ឋកម្មនេះយ៉ាងយកចិត្តទុកដាក់ដែរ ចំណែកឯរដ្ឋាភិបាលថៃ ក៏កំពុងស្ថិតក្រោមសម្ពាធពីរដ្ឋាភិបាលបារាំង និងគណបក្សប្រឆាំងថៃ ថែមទៀត ដែលទាមទារឱ្យរដ្ឋាភិបាលដឹកនាំដោយកូនស្រីរបស់លោក ថាក់ស៊ីន ស៊ីណាវ៉ាត់ អ្នកស្រី ផែថងថាន ស៊ីណាវ៉ាត់ ធ្វើការស៊ើបអង្កេតឱ្យបានហ្មត់ចត់ និងមិនលម្អៀងដើម្បីស្ដារកេរ្តិ៍ឈ្មោះប្រទេសថៃ ឡើងវិញ។
កាលពីថ្ងៃទី២០ ខែមករា លោក ហ៊ុន ម៉ាណែត បានចេញមុខបដិសេធថា ឪពុករបស់លោក គឺលោក ហ៊ុន សែន និងរដ្ឋាភិបាលនៃគណបក្សប្រជាជនកម្ពុជា មិនជាប់ពាក់ព័ន្ធក្នុងអំពើឃាតកម្មសម្លាប់លោក លិម គិមយ៉ា ឡើយ។ លោក ហ៊ុន ម៉ាណែត បញ្ជាក់ថា ប្រសិនបើលោក ហ៊ុន សែន និងរដ្ឋាភិបាលរបស់លោកនៅពីក្រោយសំណុំរឿងនេះមែន នោះអាជ្ញាធរកម្ពុជានឹងមិនបញ្ជូនជនដៃដល់ជាជនជាតិថៃ ឈ្មោះ អេកាឡាក់ ផែណយ (Ekkalak Phaenoi) ទៅឱ្យភាគីថៃ ដើម្បីសួរចម្លើយវិញទេ ព្រោះរដ្ឋាភិបាលមានលទ្ធភាពគ្រប់គ្រាន់ដើម្បីបំបិទរឿងនេះ។
ទោះជាបែបនេះក្តី គេសង្កេតឃើញថា ចាប់តាំងពីលោក លិម គិមយ៉ា ត្រូវបានឃាតករបាញ់សម្លាប់មក គឺមានរយៈពេល ២០ថ្ងៃហើយ ខណៈអាជ្ញាធរមានសមត្ថកិច្ចនៃរាជរដ្ឋាភិបាលប្រទេសកម្ពុជា នៅមិនទាន់ចាប់ខ្លួនជនសង្ស័យឈ្មោះ ពេជ្រ គឹមស្រ៊ិន និងឈ្មោះ លី រតនៈរស្មី បញ្ជូនទៅឱ្យអាជ្ញាធរថៃ សាកសួរដើម្បីវែកមុខអ្នកបញ្ជាពីក្រោយខ្នងនៅឡើយទេ ហើយជនសង្ស័យទាំងពីរនាក់នេះត្រូវគេដឹងថាកំពុងលាក់ខ្លួននៅក្នុងប្រទេសកម្ពុជាសព្វថ្ងៃនេះ៕
© 2025, ឌឹ ខេមបូឌា ដេលី. All rights reserved.