ប្រធានាធិបតីបារាំង លោក Emmanuel Macron ព្រមានថា សន្តិភាពមិនអាចមានន័យស្មើនឹងបង្ខំអ៊ុយក្រែន ត្រូវទម្លាក់អាវុធចុះចាញ់ចំពោះអ្នកឈ្លានពានឡើយ។
ទីភ្នាក់ងារព័ត៌មានបារាំង AFP លោក Macron បានលើកឡើងដូចនេះនៅក្រោយជំនួបក្នុងសេតវិមានជាមួយប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទ ទី២៤ កុម្ភៈ ជាថ្ងៃគម្រប់ខួប ៣ឆ្នាំនៃសង្គ្រាមឈ្លានពានរបស់រុស្ស៊ី នៅអ៊ុយក្រែន និងស្របពេលដែលប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី អំពាវនាវឱ្យមានសន្តិភាពនៅចំថ្ងៃខួប ៣ឆ្នាំនៃសង្គ្រាមរបស់រុស្ស៊ី។
ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានជួបមេដឹកនាំអឺរ៉ុបជាច្រើននាក់នៅឯទីក្រុងគៀវ ហើយជំនួបនេះក៏ចំពេលមានការព្រួយបារម្ភថា លោក ត្រាំ កំពុងលម្អៀងទៅរករុស្ស៊ី ដោយវាយសំពងសម្ព័ន្ធមិត្តអឺរ៉ុប និងប្រមាថលោក ហ្សេឡេនស្គី ថាជាមេដឹកនាំផ្ដាច់ការ។
ក្នុងស្ថានភាពដូចនេះហើយដែលលោកប្រធានាធិបតីបារាំង បានប្រញាប់ប្រញាល់ធ្វើដំណើរទៅកាន់ទីក្រុងវ៉ាស៊ីនតោន បន្ទាប់ពីលោក ត្រាំ បានបង្កភាពភ្ញាក់ផ្អើលនៅពេលដែលលោកប្រកាសពីការត្រៀមលក្ខណៈបន្តការធ្វើទំនាក់ទំនងការទូតជាមួយរុស្ស៊ី ឡើងវិញ ហើយបានបើកកិច្ចពិភាក្សាដើម្បីបញ្ចប់សង្គ្រាមអ៊ុយក្រែន ជាមួយទីក្រុងមូស្គូ ដោយគ្មានវត្តមានអឺរ៉ុប និងអ៊ុយក្រែន។
ប្រភពព័ត៌មានដដែលនេះបន្តថា លោក ត្រាំ និងលោក Macron បានបង្ហាញពីភាពខុសគ្នាលើវិធីសាស្ត្រដោះស្រាយវិបត្តិអ៊ុយក្រែន ទោះបីជាយល់ព្រមលើគំនិតដាក់ពង្រាយកងរក្សាសន្តិភាពអឺរ៉ុបក៏ដោយ។
ប្រធានាធិបតី ត្រាំ ចង់បានបទឈប់បាញ់ឆាប់រហ័ស និងបង្ហាញពីលទ្ធភាពជួបជាមួយលោក ពូទីន តែលោក Macron បានជំរុញឱ្យមានដំណោះស្រាយដោយប្រុងប្រយ័ត្ន ហើយថាគេត្រូវរាប់ពីបទឈប់បាញ់ រហូតមានកិច្ចព្រមព្រៀងសន្តិភាព ត្រូវរួមបញ្ចូលការធានាសន្តិសុខ និងគោរពអធិបតេយ្យភាពអ៊ុយក្រែន ច្បាស់លាស់ និងរឹងមាំ។
បើតាមលោក Macron ពិតជាត្រូវការសន្តិភាពយ៉ាងឆាប់រហ័ស ប៉ុន្តែមិនចង់បានកិច្ចព្រមព្រៀងដែលងាយធ្លាក់ក្នុងភ្លើងសង្គ្រាមម្ដងទៀតនោះទេ។ នេះជាចំណុចខ្វែងគំនិតគ្នាមួយរវាងលោក ត្រាំ និងលោក Macron។
ទោះបីជាមានការខ្វែងគំនិតគ្នាក្ដី ក៏មេដឹកនាំទាំងពីរបានឯកភាពលើលទ្ធភាពនៃការដាក់ពង្រាយកងរក្សាសន្តិភាពអឺរ៉ុប ក្រោយការសម្រេចបាននូវកិច្ចព្រមព្រៀងសន្តិភាព។
លោក Macron បានប្រាប់លោក ត្រាំ ថា កងកម្លាំងទាំងនោះនឹងមិនដាក់ពង្រាយនៅជួរមុខឡើយ ប៉ុន្តែនឹងដើរតួនាទីក្នុងការធានាសន្តិសុខ។
ប្រធានាធិបតីសហរដ្ឋអាមេរិក ក៏បានអះអាងទៀតថា លោក ពូទីន ក៏បានយល់ព្រមចំពោះគំនិតនេះផងដែរ។ តាមលោក ត្រាំ លោក ពូទីន បានឆ្លើយដូចនេះចំពោះការសួររបស់លោកដែលធ្វើឡើងតាមខ្សែទូរសព្ទកាលពីសប្ដាហ៍មុន។
ប្រធានាធិបតីរុស្ស៊ី បាននិយាយកាលពីថ្ងៃចន្ទ ទី២៤ ខែកុម្ភៈ ថា បណ្ដាប្រទេសអឺរ៉ុប រួមទាំងប្រទេសដទៃទៀត អាចចូលរួមក្នុងកិច្ចចរចាដើម្បីដោះស្រាយជម្លោះនៅអ៊ុយក្រែន ចំពោះមុខការព្រួយបារម្ភរបស់អ៊ុយក្រែន និងអឺរ៉ុប ខ្លាចថាពួកគេអាចនឹងត្រូវបានផាត់ចេញពីកិច្ចចរចា។
នៅក្នុងបទសម្ភាសន៍មួយត្រូវបានចាក់ផ្សាយដោយទូរទស្សន៍រដ្ឋរុស្ស៊ី លោក ពូទីន បានបង្ហាញពីការយល់ស្របជាមួយលោកប្រធានាធិបតីអាមេរិក ដូណាល់ ត្រាំ លើចំណុចជាច្រើន ប៉ុន្តែបាននិយាយថាបណ្ដាប្រទេសអឺរ៉ុបក៏អាចដើរតួនាទីសំខាន់មួយក្នុងការជួយបិទបញ្ចប់សង្គ្រាមនៅអ៊ុយក្រែន ផងដែរ។
នៅពេលត្រូវបានសាកសួរថា តើរូបលោកយល់យ៉ាងណាចំពោះបណ្ដាប្រទេសអឺរ៉ុបដែលកំពុងទទូចពីតួនាទីរបស់ខ្លួនក្នុងកិច្ចចរចាស្ដីពីអ៊ុយក្រែន។ លោក ពូទីន បន្តថា ជាការពិតណាស់ គ្មាននរណាម្នាក់អាចទាមទារអ្វីមួយនៅពេលនេះពីរុស្ស៊ី បានទេ ប៉ុន្តែការចូលរួមរបស់ពួកគេក្នុងនីតិវិធីនៃកិច្ចចរចា គឺស្ថិតនៅក្នុងតម្រូវការចាំបាច់។ បន្ថែមទៀតនេះ លោក ពូទីន បានបញ្ជាក់ថា បណ្តាប្រទេសអឺរ៉ុបខ្លួនឯងទេដែលបានផ្តាច់ទំនាក់ទំនងជាមួយរុស្ស៊ី។
លោក ពូទីន បានសង្កត់ធ្ងន់ថា កិច្ចចរចារុស្ស៊ី-អាមេរិក កាលពីសប្តាហ៍មុន នៅប្រទេសអារ៉ាប៊ីសាអ៊ូឌីត ដោយគ្មានវត្តមានអឺរ៉ុប និងអ៊ុយក្រែន គឺមានគោលដៅពង្រឹងទំនុកចិត្តទៅវិញទៅមករវាងក្រុងមូស្គូ និងក្រុងវ៉ាស៊ីនតោន។
នៅក្នុងបទសម្ភាសន៍ដដែលនេះ មេដឹកនាំរុស្ស៊ី បានចាត់ទុកសមភាគីអ៊ុយក្រែន លោក វូឡូឌីមៀ ហ្សេឡេនស្គី ថាជាបុគ្គលពិសពុល។
លោក ពូទីន ចោទលោក ហ្សេឡេនស្គី ថាចេះតែគេចមិនព្រមចរចា គឺតាំងពីការចរចាកាលពីខែតុលា ឆ្នាំ២០២២។ លោក ពូទីន ថាពេលនោះ បើលោក ហ្សេឡេនស្គី នៅបន្តការចរចា គឺសង្គ្រាមក៏មិនរីករាលដាលខ្លាំងដូចនេះដែរ។ ទាំងលោក ពូទីន និងលោក ត្រាំ សុទ្ធតែបានហៅលោក ហ្សេឡេនស្គី ជាមេដឹកនាំខុសច្បាប់ ហើយបានទាមទារអ៊ុយក្រែន គួរតែមានការបោះឆ្នោតឡើងវិញ បើពុំនោះទេ មេដឹកនាំអ៊ុយក្រែន មិនមានភាពស្មើមុខនៅឯតុចរចានោះទេ។
កាលពីថ្ងៃទី២៥ ខែកុម្ភៈ ចំខួប ៣ឆ្នាំនៃសង្គ្រាមរបស់រុស្ស៊ី រដ្ឋសភាអ៊ុយក្រែន ជាថ្មីម្តងទៀតបានអនុម័តគាំទ្រថា ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានជាប់ឆ្នោតដោយសេរី តម្លាភាព និងប្រកបដោយប្រជាធិបតេយ្យនៅក្នុងការបោះឆ្នោតថ្ងៃទី២១ ខែមេសា ឆ្នាំ២០១៩។
សេចក្តីសម្រេចដែលគាំទ្រជាឯកច្ឆន្ទដោយសមាជិកសភាចំនួន ២៦៨នាក់ បានចេញផ្សាយនៅថ្ងៃទី២៥ ខែកុម្ភៈ ដោយបានបន្ថែមទៀតថា អាណត្តិរបស់លោក ហ្សេឡេនស្គី អាចបន្តរហូតសង្គ្រាមត្រូវបានបិទបញ្ចប់៕
© 2025, ឌឹ ខេមបូឌា ដេលី. All rights reserved.