អ្នកឃ្លាំមើលនិយាយថា មាត្រាមួយចំនួននៃប្រកាសស្ដីពីបែបបទ និងនីតិវិធីនៃការធ្វើសម្ព័ន្ធភាពនយោបាយរបស់ក្រសួងមហាផ្ទៃ បង្កប់ចរិតនយោបាយ។
អ្នកឃ្លាំមើលនយោបាយ និងសង្គម លោក វ៉ន ចាន់ឡូត សរសេរនៅលើគណនីហ្វេសប៊ុករបស់លោកកាលពីយប់ថ្ងៃទី២៤ ខែមីនា នេះថា ចាប់ពីប្រការ ៤ រហូតដល់ប្រការ ៨ នៃប្រកាសស្ដីពីបែបបទ និងនីតិវិធីនៃការធ្វើសម្ព័ន្ធភាពនយោបាយដែលក្រសួងមហាផ្ទៃ ដាក់ចេញនៅពេលនេះ បានបង្កប់នូវចរិតនយោបាយ និងជាទម្រង់រំខានផ្នែករដ្ឋបាលក្នុងចេតនាបង្កភាពស្មុគស្មាញ។
លោក វ៉ន ចាន់ឡូត លើកឡើងថា ប្រកាសរបស់ក្រសួងមហាផ្ទៃ មួយនេះ ហាក់មានខ្លឹមសារផ្ទុយនឹងច្បាប់ស្ដីពីគណបក្សនយោបាយត្រង់មាត្រា៣៧ ដែលនិយាយពីសេរីភាពនៃការធ្វើសម្ព័ន្ធភាពរបស់គណបក្សនយោបាយនីមួយៗ។ ម្យ៉ាងវិញទៀត ច្បាប់ស្ដីពីគណបក្សនយោបាយ ក៏មិនបានហាមឃាត់ពីការលើកស្លាករួមគ្នាដោយមានឈ្មោះ និងសា្លកសញ្ញារបស់គណបក្សឡើយ។
អ្នកឃ្លាំមើលសង្គមរូបនេះបញ្ជាក់ថា ដោយសារគ្មានច្បាប់ចែងអំពីការហាមឃាត់ចំពោះការលើកស្លាករួមគ្នាដោយមានឈ្មោះ និងស្លាកសញ្ញារបស់គណបក្សបែបនេះ ដូច្នេះបើក្រសួងមហាផ្ទៃ ដាក់បម្រាម គួរតែធ្វើវិសោធនកម្មច្បាប់ស្ដីពីគណបក្សនយោបាយជាមុនសិន មិនអាចចេញប្រកាសបង្កភាពរំខាន និងបកស្រាយហួសពីស្មារតីច្បាប់ក្រោមហេតុផលថាដើម្បីជួយសម្រួលដល់សកម្មភាពនយោបាយនោះទេ។
លោក វ៉ន ចាន់ឡូត បញ្ជាក់ថា ប្រកាសរបស់ក្រសួងមហាផ្ទៃនៅពេលនេះ ក៏ជាការរៀនសូត្រដ៏ល្អដែរចំពោះបក្សក្រៅរដ្ឋាភិបាល ដើម្បីឱ្យពួកគេបង្កើនការប្រុងប្រយ័ត្នគ្រប់ជំហានមុននឹងឈានដល់ការបោះឆ្នោតអសកលឆ្នាំ២០២៧ និងការបោះឆ្នោតជាតិឆ្នាំ២០២៨ ខាងមុខ។
កាលពីថ្ងៃទី២៤ ខែមីនា ឆ្នាំ២០២៥ ក្រសួងមហាផ្ទៃ បានចេញប្រកាសស្ដីពីបែបបទ និងនីតិវិធីនៃការធ្វើសម្ព័ន្ធភាពនយោបាយដែលមាន ៤ជំពូក ១០ប្រការ ក្រោមហេតុផលថា ដោយយោងតាមការចាំបាច់របស់ក្រសួងមហាផ្ទៃ ក្នុងបំណងលើកកម្ពស់សិទ្ធិសេរីភាពរបស់គណបក្សនយោបាយដែលបានចុះបញ្ជីត្រឹមត្រូវតាមច្បាប់ក្នុងការធ្វើសម្ព័ន្ធភាពជាមួយគ្នា។
ប្រការ៤ នៃប្រកាសនេះ តម្រូវឱ្យគណបក្សនយោបាយដែលធ្វើសម្ព័ន្ធភាពត្រូវមានកិច្ចព្រមព្រៀងមួយជាក់លាក់ ដែលត្រូវមាននូវចំណុចសំខាន់ៗ ដូចជា ឈ្មោះ កិច្ចព្រមព្រៀង គោលបំណង វិសាលភាព សមាសភាពនៃគណបក្សនយោបាយធ្វើសម្ព័ន្ធភាព យន្តការគ្រប់គ្រង ដំណើរការការងារ នីតិវិធីដោះស្រាយវិវាទ និងរយៈពេលនៃការធ្វើសម្ព័ន្ធភាព។
ចំណែកប្រការ៦ កំណត់ឱ្យគណបក្សនយោបាយដែលបានធ្វើសម្ព័ន្ធភាពជាមួយគ្នា ត្រូវជូនដំណឹងជាលាយលក្ខណ៍អក្សរទៅក្រសួងមហាផ្ទៃ ក្នុងរយៈពេល ៣០ថ្ងៃ បន្ទាប់ពីថ្ងៃចុះហត្ថលេខាពីប្រធានគណបក្សនយោបាយដែលចូលរួមសម្ព័ន្ធភាពទាំងអស់ ហើយត្រូវភ្ជាប់មកជាមួយនូវកិច្ចព្រមព្រៀងនោះផងដែរ។
ជុំវិញបញ្ហានេះ ក្រុមអ្នកសង្កេតការណ៍មើលឃើញថា ប្រកាសនេះមានចេតនារឹតបន្តឹងសេរីភាពបក្សនយោបាយក្រៅរដ្ឋាភិបាលមួយកម្រិតទៀត និងមានបំណងពុះច្រៀកកម្លាំងនយោបាយកុំឱ្យប្រមូលផ្តុំគ្នាផងដែរ ហើយការធ្វើបែបនេះ គឺជាបំណងធំបំផុតរបស់គណបក្សប្រជាជនកម្ពុជាដែលកំពុងភ័យខ្លាចការរួបរួមរបស់ពលរដ្ឋដែលមិនពេញចិត្តនឹងរដ្ឋាភិបាលសព្វថ្ងៃនេះ៕
© 2025, ឌឹ ខេមបូឌា ដេលី. All rights reserved.