ប្រធានាធិបតីសហរដ្ឋអាមេរិក លោក ដូណាល់ ត្រាំ វាយប្រហាររិះគន់មេដឹកនាំរុស្ស៊ី លោក វ្ល៉ាឌីមៀ ពូទីន ដែលជាការប្រមាថ។ លោក ត្រាំ មើលឃើញលោក ពូទីន បានបាត់បង់ស្មារតីទាំងស្រុង គឺកំពុងតែឆ្កួតព្រោះតែចង់លេបយកប្រទេសអ៊ុយក្រែន តែជាមួយគ្នានេះ បានព្រមានថា ប្រសិនបើលោក ពូទីន ព្យាយាមដណ្តើមកាន់កាប់អ៊ុយក្រែន ទាំងអស់ វានឹងនាំទៅដល់ការដួលរលំនៃប្រទេសរុស្ស៊ី។ នេះបើយោងតាមទីភ្នាក់ងារព័ត៌មាន AFP ដែលស្រង់ទស្សនៈលោក ត្រាំ ដូចនេះពីប្រព័ន្ធផ្សព្វផ្សាយសង្គម Truth Social។
លោក ត្រាំ បានកត់សម្គាល់ថា គាត់តែងតែមានទំនាក់ទំនងល្អជាមួយលោក ពូទីន ប៉ុន្តែមេដឹកនាំរុស្ស៊ី រូបនេះ កំពុងផ្លាស់ប្ដូរជំហរដែលមើលទៅលោក ពូទីន ពិតជាឆ្កួតហើយ ព្រោះកំពុងសម្លាប់មនុស្សជាច្រើនពាន់ម៉ឺននាក់ដោយវាយប្រហារទៅលើទីក្រុងនានាក្នុងប្រទេសអ៊ុយក្រែន។
ទោះជាយ៉ាងណាក៏ដោយ លោក ត្រាំ មិនភ្លេចនិយាយពីប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី នោះទេ។ លោក ត្រាំ ក៏ចោទថា វោហារសាស្ត្ររបស់លោក ហ្សេឡេនស្គី នៅតែធ្វើឱ្យស្ថានការណ៍ស្មុគស្មាញតែប៉ុណ្ណោះ។ លោក ត្រាំ បានសង្កត់ធ្ងន់ថា៖ «អ្វីគ្រប់យ៉ាងចេញពីមាត់លោក ហ្សេឡេនស្គី ក៏ជាអ្នកបង្កបញ្ហាច្រើនដែរ។»
លោក ត្រាំ ប្រាប់អ្នកសារព័ត៌មានថា លោកមានការមិនពេញចិត្តជាខ្លាំងចំពោះសកម្មភាពរបស់លោក ពូទីន ដែលធ្វើឱ្យលោកមិនយល់ពីហេតុផលនៃសកម្មភាពរបស់មេដឹកនាំរុស្ស៊ី នាពេលនេះទេ។
ប្រតិកម្មរបស់លោក ត្រាំ ក៏ចំពេលកងទ័ពអាកាសអ៊ុយក្រែន បានរាយការណ៍ថា រុស្ស៊ីបានធ្វើការវាយប្រហារទៅលើអ៊ុយក្រែន នៅយប់ថ្ងៃទី២៤-២៥ ឧសភា ដោយប្រើប្រាស់អាវុធវាយប្រហារតាមអាកាសចំនួន ៣៦៧គ្រឿងដោយយន្តហោះដ្រូន និងបាញ់មីស៊ីលបាលិស្ទិកដល់ទៅ ១៤គ្រាប់ ភាគច្រើនវាយប្រហារចូលក្រុងគៀវ បណ្ដាលឱ្យអគារលំនៅឋានជាង ៨០ខ្នងបានរងការខូចខាត មនុស្ស ១២នាក់បានស្លាប់ និងជាង ៦០នាក់ផ្សេងទៀតរងរបួស។
ជាមួយគ្នានេះ ឯកអគ្គរដ្ឋទូតសហភាពអឺរ៉ុបប្រចាំនៅប្រទេសអ៊ុយក្រែន Katarína Mathernová និយាយថា រុស្ស៊ី កំពុងចំអកដាក់ពិភពលោក និងផែនការសន្តិភាពរបស់លោក ត្រាំ ដែលកំពុងតែបរាជ័យ។
ចំពោះរដ្ឋមន្ត្រីការបរទេសអាល្លឺម៉ង់ Johann Wadephul បានអំពាវនាវឱ្យលោកខាងលិចឆ្លើយតបយ៉ាងម៉ឺងម៉ាត់ចំពោះរលកថ្មីនៃការវាយប្រហារពីរុស្ស៊ី ប្រឆាំងនឹងអ៊ុយក្រែន។
ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានបង្ហោះសារលើបណ្ដាញសង្គមថា ព្រោះតែគ្មានសម្ពាធរឹងមាំពិតប្រាកដលើរុស្ស៊ី គឺអំពើសាហាវឃោរឃៅរបស់រុស្ស៊ី មិនអាចត្រូវបានបញ្ឈប់ឡើយ។
តែយ៉ាងណា គេថារុស្ស៊ី សម្រុកវាយប្រហារមកលើអ៊ុយក្រែន ខណៈការដោះដូរឈ្លើយសឹកទៅវិញទៅមកកំពុងដំណើរការរវាងភាគីទាំងពីរចំនួន ១០០០នាក់។
ការយល់ព្រមដោះដូរគ្នា ដែលជាលទ្ធផលកើតចេញពីការចរចាគ្នានៅទីក្រុងអ៊ីស្តាន់ប៊ុល រវាងក្រុមចរចាអ៊ុយក្រែន និងរុស្ស៊ី កាលពីថ្ងៃទី១៦ ឧសភា។ ដំណាក់កាលទី១ នៃការដោះដូរនេះ បានចាប់ផ្តើមកាលពីថ្ងៃសុក្រ ទី២៣ ឧសភា។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានច្រានចោលម្តងហើយម្តងទៀតចំពោះការអំពាវនាវពីទីក្រុងគៀវ និងក្រុមលោកខាងលិច ដែលចង់ឱ្យមានបទឈប់បាញ់រយៈពេលយូរភ្លាមៗដោយឥតលក្ខខណ្ឌ ដើម្បីបើកផ្លូវឆ្ពោះទៅរកការចរចាគ្នាបិទបញ្ចប់សង្គ្រាម។
សព្វថ្ងៃ រុស្ស៊ីកំពុងគ្រប់គ្រងប្រហែល ២០ភាគរយនៃទឹកដីរបស់អ៊ុយក្រែន ដោយរាប់បញ្ចូលទាំងឧបទ្វីបគ្រីមៀរ ដែលរុស្ស៊ី ក្រសោបយកតាំងតែពីឆ្នាំ២០១៤។ សង្គ្រាមឈ្លានពានរបស់រុស្ស៊ី ដែលផ្ទុះឡើងចាប់តាំងពីខែកុម្ភៈ ឆ្នាំ២០២២ បានសម្លាប់មនុស្សរាប់សិបម៉ឺននាក់ បង្ខំមនុស្សរាប់លាននាក់ផ្សេងទៀតព្រាត់ប្រាសពីផ្ទះសម្បែង ហើយបង្កការបំផ្លិចបំផ្លាញហិនហោច ជាពិសេសនៅតំបន់ភាគខាងត្បូង និងខាងកើតប្រទេសអ៊ុយក្រែន។
ទីក្រុងមូស្គូ អះអាងថា ខ្លួនត្រៀមខ្លួនសម្រាប់កិច្ចចរចាសន្តិភាព ប៉ុន្តែទាមទារឲ្យអ៊ុយក្រែន ប្រគល់ទឹកដីបន្ថែមទៀត ព្រមទាំងត្រូវរំសាយអាវុធ និងមិនចូលរួមសម្ព័ន្ធភាពយោធាលោកខាងលិច ដែលទីក្រុងគៀវ ចាត់ទុកថាស្មើនឹងការចុះចាញ់។ ជាការកត់សម្គាល់ ការវាយប្រហាររបស់លោក ត្រាំ ពេលនេះ លោក ត្រាំ ប្រមាថរុស្ស៊ី ថាអាចនឹងដួលរលំ។ ទំនងលោក ត្រាំ ចង់និយាយថា វាអាចដួលរលំដូចសហភាពសូវៀត។
គេរកឃើញកត្តាយ៉ាងតិចមានកត្តា ៦យ៉ាងដែលសហភាពសូវៀត ដួលរលំ គឺកត្តានយោបាយ កត្តាសេដ្ឋកិច្ច កត្តាយោធាសព្វាវុធការពារជាតិ ករណីប្រទេសអាហ្វហ្គានីស្ថាន កត្តាសង្គម និងកត្តាអាវុធនុយក្លេអ៊ែរ៕
© 2025, ឌឹ ខេមបូឌា ដេលី. All rights reserved.