កងទ័ពជើងគោកនៃកងយោធពលខេមរភូមិន្ទ អះអាងថា កម្ពុជានិងវៀតណាម បានចុះកិច្ចព្រមព្រៀងលើកំណត់ហេតុចងសម្ព័ន្ធមេត្រីភាព ដើម្បីរឹតចំណងមិត្តភាព និងពង្រឹងកិច្ចសហប្រតិបត្តិការទ្វេភាគីបន្ថែមទៀត។
យោងតាមទំព័រហ្វេសប៊ុករបស់កងទ័ពជើងគោកនៃកងយោធពលខេមរភូមិន្ទ ដែលបានចុះផ្សាយនៅថ្ងៃទី២២ ខែមិថុនា ឆ្នាំ២០២៥ បានឲ្យដឹងថា ការចុះហត្ថលេខាលើកំណត់ហេតុចងសម្ព័ន្ធមេត្រីភាពរវាងកងពលតូចលេខ៧០ របស់កម្ពុជា និងកងពលធំថ្មើរជើងលេខ៣០១ និងបញ្ជាការដ្ឋានរដ្ឋធានីហាណូយ របស់វៀតណាម នេះ គឺទទួលបានការអនុញ្ញាតពីក្រសួងការពារជាតិកម្ពុជា និងអគ្គមេបញ្ជាការនៃកងយោធពលខេមរភូមិន្ទ។
ប្រភពខាងលើបានអះអាងថា ពិធីចុះហត្ថលេខានេះត្រូវបានធ្វើឡើងក្នុងអំឡុងពេលភាគីទាំងពីររៀបចំកិច្ចប្រជុំចុះហត្ថលេខាលើកំណត់ហេតុចងសម្ព័ន្ធភាពនេះ ចាប់ពីថ្ងៃទី១៨-២០ ខែមិថុនា នៅទីក្រុងហាណូយ ប្រទេសវៀតណាម។ ប្រតិភូកម្ពុជា ដឹកនាំដោយលោក ហែម ថា មេបញ្ជាការកងពលតូចលេខ៧០។
បើយោងតាមសារព័ត៌មានក្នុងស្រុកវៀតណាម Ha Noi បានឲ្យដឹងថា ក្រោយបញ្ចប់កិច្ចប្រជុំ ភាគីទាំងពីរបានចេញសេចក្ដីថ្លែងការណ៍រួមមួយអំពីគោលការណ៍រួមចំនួន ១០ចំណុច ដើម្បីអនុវត្ត រួមមាន៖
- គោលការណ៍នៃសកម្មភាពសម្ព័ន្ធមេត្រីភាព
- ទិសដៅនៃការភ្ជាប់ទំនាក់ទំនង
- រៀបចំក្រុមការងារ
- បទប្បញ្ញត្តិស្ដីពីការវាយតម្លៃ និងសង្ខេបលទ្ធផលការងារ
- ការធានាការងារ
- ទំនួលខុសត្រូវរបស់ភាគីទាំងពីរ
- ការដោះស្រាយចំណុចខុសគ្នា
- ការកែសម្រួលបន្ថែម ឬបញ្ចប់អនុស្សរណៈ
- ការរក្សាព័ត៌មានសម្ងាត់
- និងការអនុវត្តប្រកបដោយប្រសិទ្ធភាព។
ក្រៅពីជួបប្រមុខដឹកនាំកម្ពុជា លោកអនុរដ្ឋមន្ត្រីក្រសួងការពារប្រទេសវៀតណាម ក៏បានជួបពិភាក្សាការងារជាមួយលោក វង្ស ពិសេន អគ្គមេបញ្ជាការកងយោធពលខេមរភូមិន្ទដែរ ដោយផ្ដោតសំខាន់លើការពង្រឹង និងពង្រីកចំណងសាមគ្គីភាព មិត្តភាព កិច្ចសហប្រតិបត្តិការរវាងកងទ័ពនៃប្រទេសទាំងពីរ។
កាលពីថ្ងៃទី២៤ ខែវិច្ឆិកា ឆ្នាំ២០២៤ កម្ពុជា និងវៀតណាម ក៏បានចុះហត្ថលេខាលើកិច្ចព្រមព្រៀងដើម្បីបន្តពង្រឹងកិច្ចសហប្រតិបត្តិការលើវិស័យការពារជាតិរួមគ្នារយៈពេល ៥ឆ្នាំ ចាប់ពីឆ្នាំ២០២៥ ដល់ឆ្នាំ២០២៩ ដែរ។ នៅក្នុងកិច្ចព្រមព្រៀងនោះ ភាគីទាំងពីរបានប្ដេជ្ញារួមគ្នាពង្រឹងកិច្ចសហប្រតិបត្តិការលើវិស័យនយោបាយ ការពង្រឹងការគ្រប់គ្រងរដ្ឋ ការការពារបន្ទាត់ព្រំដែនរួម ការចែករំលែកព័ត៌មានស្ដីពីការប្រយុទ្ធប្រឆាំងនឹងឧក្រិដ្ឋកម្មឆ្លងដែន និងការប្ដេជ្ញាចិត្តគាំទ្រគ្នាទៅវិញទៅមកនៅក្នុងបញ្ហាតំបន់ និងអន្តរជាតិ៕
© 2025, ឌឹ ខេមបូឌា ដេលី. All rights reserved.