 នោះទេ។){kind=link}
រដ្ឋមន្ត្រីការបរទេសសហរដ្ឋអាមេរិក លោក Marco Rubio កាលពីថ្ងៃអាទិត្យ បាននិយាយថា របបនៅទីក្រុងតេហេរ៉ង់ បានឆ្លងកាត់ហើយនៅពេលនេះនៃការវាយប្រហាររបស់សហរដ្ឋអាមេរិក ទៅលើទីតាំងនុយក្លេអ៊ែររបស់ប្រទេសអ៊ីរ៉ង់ ដែលលោកថាលោកប្រធានាធិបតី ដូណាល់ ត្រាំ មិនមែនលេងហ្គេម (Game) នោះទេ។
លោក Marco Rubio ពន្យល់ថាវាជាព្រឹត្តិការណ៍ដ៏កម្រណាស់ដែលអាមេរិកត្រូវសម្រេចការចូលរួមជាមួយអ៊ីស្រាអែល ដើម្បីបង្ខំអ៊ីរ៉ង់ ទៅទទួលយកកិច្ចព្រមព្រៀង ឬក៏ទីក្រុងតេហេរ៉ង់ សម្រេចសងសឹក។
លោក Marco Rubio បញ្ជាក់ដូចនេះថា៖ «យើងនឹងវាយអ៊ីរ៉ង់ បន្ថែមទៀត បើអ៊ីរ៉ង់ វាយប្រហារលើផលប្រយោជន៍ ឬពលរដ្ឋអាមេរិក បើទោះជាអ៊ីរ៉ង់ សងសឹកអាមេរិក ដោយប្រើកូនជឹង ក៏វាជាទង្វើរបស់អ៊ីរ៉ង់ ដែរ។ តែលោកសង្ឃឹមថា អ៊ីរ៉ង់នឹងមិនប្រថុយសងសឹកលើអាមេរិកទេ ហើយទីក្រុងតេហេរ៉ង់ នឹងមិនជ្រើសរើសផ្លូវដើរដូចនេះទេ។»
លោករដ្ឋមន្ត្រីការបរទេសសហរដ្ឋអាមេរិក បានបញ្ជាក់ដូចនេះនៅក្នុងបទសម្ភាសន៍ជាមួយបណ្ដាញទូរទស្សន៍ CSB ហើយត្រូវបានចុះផ្សាយដោយកាសែត The Washington Times នៅថ្ងៃចន្ទ ទី២៣ ខែមិថុនា ឆ្នាំ២០២៥។
ជាមួយគ្នានេះ លោក Marco Rubio គិតថា អ៊ីរ៉ង់ត្រូវដើរទៅរកតុចរចាវិញ ព្រោះដំណោះស្រាយការទូតនៅមានបន្ត។
ចំពោះលោក ដូណាល់ ត្រាំ វិញ លោកបានហៅការវាយប្រហារលើទីតាំងនុយក្លេអ៊ែររបស់អ៊ីរ៉ង់ ដែលវាយចំគោលដៅយ៉ាងល្អដោយការទម្លាក់គ្រាប់បែកពីយន្តហោះទម្លាក់គ្រាប់បែកយុទ្ធសាស្ត្រ B-2 ទៅលើទីតាំងនុយក្លេអ៊ែរចំនួន ៣ទីតាំង កាលពីរំលងអាធ្រាត្រចូលដល់ថ្ងៃអាទិត្យ ទី២២ មិថុនា ដែលហៅថាប្រតិបត្តិការញញួរកណ្ដាលយប់ គឺជាជោគជ័យប្រវត្តិសាស្ត្ររបស់កងយន្តហោះចម្បាំងសហរដ្ឋអាមេរិក ជាពិសេសក្រុមយន្តហោះ B-2។
លោក ត្រាំ ព្រមានថា នឹងវាយលើអ៊ីរ៉ង់ កាន់តែធ្ងន់ទៀត បើអ៊ីរ៉ង់ សងសឹកវាយប្រហារលើមូលដ្ឋានទ័ពអាមេរិក ហើយអាចឈានទៅរកការដោះដូររបបដឹកនាំនៅទីក្រុងតេហេរ៉ង់ ទៀតផង បើជាការចាំបាច់។
លោក Marco Rubio ថាមុនការវាយប្រហារ រដ្ឋការលោក ត្រាំ ដាក់លក្ខខណ្ឌឱ្យអ៊ីរ៉ង់ មកចរចាហើយ ត្រូវតែមានកិច្ចព្រមព្រៀងបញ្ឈប់ផែនការផលិតនុយក្លេអ៊ែរ តែទីក្រុងតេហេរ៉ង់ ច្រានចោល ហើយសច្ចាវាយបកសហរដ្ឋអាមេរិក ដែលលោកថាទីក្រុងតេហេរ៉ង់ ចង់ទិញពេលវេលាលេងសើចជាមួយលោក ត្រាំ គឺជាល្បិចដែលគេចពីការមិនព្រមឱ្យមានកិច្ចព្រមព្រៀងបញ្ឈប់ផែនការផលិតនុយក្លេអ៊ែរ។
តាមលោក Marco Rubio ថាទីក្រុងតេហេរ៉ង់ ព្យាយាមទិញពេលវេលាលេងហ្គេមជាមួយលោក ត្រាំ ហើយចង់ឃើញថានឹងមានអ្វីកើតឡើង បើអ៊ីរ៉ង់ ប្រើពេលចរចាយូរទៅមុខទៀត។
លោកប្រមុខការទូតសហរដ្ឋអាមេរិក បញ្ជាក់ថា លោកប្រធានាធិបតីមិនមែនជាមេដឹកនាំសហរដ្ឋអាមេរិកលេងសើចនោះទេ។ អ្វីដែលលោក ត្រាំ ព្រមាន ឬនិយាយ គឺពិតណាស់ត្រូវតែធ្វើ និងនៅតែបន្តធ្វើរហូតដល់ដំណាក់កាលមួយ គឺត្រូវតែបង្ហាញថា សហរដ្ឋអាមេរិកអាចធ្វើបាន។ ចំពោះការលេចឮថាលោក ត្រាំ ចង់ដោះដូររបបដឹកនាំនៅអ៊ីរ៉ង់ សម្រាប់ក្រុងវ៉ាស៊ីនតោន មិនទាន់គិតដល់រឿងនេះទេ តែករណីចាំបាច់ក៏អាចទៅរួចដែរ។
តាមលោក Marco Rubio អ៊ីរ៉ង់មានផ្លូវត្រូវដើរទៅមុខទៀតជាមួយអាមេរិក គឺបិទទាំងស្រុងផែនការផលិតអាវុធនុយក្លេអ៊ែរ ហើយអ្វីដែលនឹងកើតមានទៅលើអ៊ីរ៉ង់ ថែមទៀត វាអាស្រ័យលើទីក្រុងតេហេរ៉ង់ តែអ៊ីរ៉ង់ ត្រូវតែធ្វើឱ្យមជ្ឈិមបូព៌ាមានសន្តិភាព គ្មានការភ័យខ្លាចពីការវាយបង្កអសន្តិសុខដោយគ្រាប់នុយក្លេអ៊ែរ ប្រជាជនអ៊ីរ៉ង់ល្អ ពិភពលោកមានសន្តិភាព។
យ៉ាងណា នៅចំពោះប្រទេសអ៊ីស្រាអែល វិញ នៅថ្ងៃចន្ទនេះបានបង្កើនយុទ្ធនាការរបស់ខ្លួនវាយប្រហារដោយកងយន្តហោះចម្បាំងទៅលើអ៊ីរ៉ង់។ ការវាយប្រហាររបស់អ៊ីស្រាអែល ចូលដល់ថ្ងៃទី១០ នេះ អ៊ីស្រាអែលបានហៅយុទ្ធនាការរបស់ខ្លួនថាជាប្រតិបត្តិការទម្លាក់គ្រាប់បែកដ៏ខ្លាំងក្លាបំផុតទៅលើរដ្ឋធានីតេហេរ៉ង់ ដោយបានវាយប្រហារចំគោលដៅដ៏សំខាន់បំផុត គឺទៅលើពន្ធនាគារ Evin។
ពន្ធនាគារ Evin ដែលត្រូវបានគេស្គាល់ថាជាកន្លែងឃុំខ្លួនអ្នកទោសនយោបាយ និងជាកន្លែងប្រហារជីវិត គឺជាផ្នែកមួយនៃនិមិត្តសញ្ញាដ៏មានឥទ្ធិពលបំផុតនៃប្រព័ន្ធគ្រប់គ្រងអំណាចផ្ដាច់ការរបស់មេដឹកនាំអ៊ីរ៉ង់ អាយ៉ាតូឡោះ អាលីខាមមេនី។
រដ្ឋមន្ត្រីការពារជាតិអ៊ីស្រាអែល លោក Israel Katz បានបញ្ជាក់ថា ការវាយប្រហារនេះ អ៊ីស្រាអែលលែងកំណត់គោលដៅត្រឹមតែកម្មវិធីនុយក្លេអ៊ែរ និងមីស៊ីលទៀតហើយ ប៉ុន្តែនឹងវាយប្រហារលើគោលដៅនៃរបប និងស្ថាប័នផ្ដាច់ការរបស់រដ្ឋាភិបាលទីក្រុងតេហេរ៉ង់។
ការវាយប្រហារទៅលើពន្ធនាគារនេះ កើតឡើងតែមួយថ្ងៃប៉ុណ្ណោះ បន្ទាប់ពីសហរដ្ឋអាមេរិកបានចូលរួមក្នុងសង្គ្រាមដោយផ្ទាល់ តាមរយៈការទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។
ការវាយប្រហាររបស់អ៊ីស្រាអែល ចូលដល់ថ្ងៃទី១០ នេះ បានបង្ហាញថា សង្គ្រាមលម្ហអាកាសរវាងអ៊ីស្រាអែល និងអ៊ីរ៉ង់ បានឈានចូលដល់ដំណាក់កាលថ្មីមួយដែលកាន់តែគ្រោះថ្នាក់បំផុត។
គេពុំទាន់ដឹងថា អ៊ីរ៉ង់ចាប់យកការសងសឹកលើសហរដ្ឋអាមេរិកដោយវិធានការទៅលើមូលដ្ឋានទ័ពអាមេរិកនៅតំបន់មជ្ឈិមបូព៌ា ឬយ៉ាងណាទេ តែនៅពេលនេះ អ៊ីរ៉ង់ជ្រើសរើសយកការបិទច្រកសមុទ្រ Hormuz ជាវិធានការសងសឹក ដែលសភាអ៊ីរ៉ង់ បានអនុម័តវិធានការមួយនេះអាចឈានទៅដល់ការបិទច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់បំផុតមួយរបស់ពិភពលោក។ នេះគឺជាជំហានផ្លូវការដ៏សំខាន់មួយក្នុងការឆ្លើយតបទៅនឹងការវាយប្រហាររបស់អ៊ីស្រាអែល និងសហរដ្ឋអាមេរិក។
សមាជិកសភា និងជាមេបញ្ជាការកងឆ្មាំបដិវត្តន៍ លោក Esmail Kosari បានបញ្ជាក់ថា ការបិទច្រកសមុទ្រនេះ គឺស្ថិតនៅក្នុង «របៀបវារៈសងសឹក»។
ច្រកសមុទ្រ Hormuz ដែលស្ថិតនៅចន្លោះអ៊ីរ៉ង់ និងអូម៉ង់ គឺជាផ្លូវឆ្លងកាត់នៃកងនាវាដឹកប្រេង និងឧស្ម័នប្រមាណ ២០% នៃតម្រូវការទីផ្សារប្រេងអន្តរជាតិ។ ការបិទច្រកសមុទ្រ Hormuz នេះ អាចបង្កឲ្យមានការកើនឡើងយ៉ាងគំហុកនៃតម្លៃប្រេងជាសកល។
សហរដ្ឋអាមេរិកបានប្រាប់ទៅចិន ដែលជាសម្ព័ន្ធភាពជាមួយនឹងអ៊ីរ៉ង់ ថា កុំឱ្យអ៊ីរ៉ង់ ធ្វើដូចនេះ ព្រោះវាខាតបង់មិនមែនតែសហរដ្ឋអាមេរិកនោះទេ គឺប្រទេសក្នុងតំបន់មជ្ឈិមបូព៌ាទាំងមូល ហើយទីក្រុងវ៉ាស៊ីនតោន នឹងមានជម្រើសមួយទៀតក្នុងការវាយប្រហារលើទីក្រុងតេហេរ៉ង់៕
© 2025, ឌឹ ខេមបូឌា ដេលី. All rights reserved.