 ជុំវិញរឿងអាស្រូវបែកធ្លាយកិច្ចសន្ទនាតាមទូរសព្ទជាមួយប្រធានព្រឹទ្ធសភាកម្ពុជា និងករណីជម្លោះព្រំដែនជាមួយនឹងប្រទេសកម្ពុជា។){kind=link}
តុលាការធម្មនុញ្ញថៃ នៅថ្ងៃអង្គារ ទី១ ខែកក្កដា បានសម្រេចព្យួរតំណែងនាយករដ្ឋមន្ត្រីពីអ្នកស្រី ផែថងថាន ស៊ីណាវ៉ាត់ (Paetongtarn Shinawatra) ជុំវិញរឿងអាស្រូវបែកធ្លាយកិច្ចសន្ទនាតាមទូរសព្ទជាមួយប្រធានព្រឹទ្ធសភាកម្ពុជា និងករណីជម្លោះព្រំដែនជាមួយនឹងប្រទេសកម្ពុជា។
ការសម្រេចចិត្តរបស់តុលាការធម្មនុញ្ញថៃ ធ្វើឡើងតាមរយៈការទទួលយកញត្តិពីសមាជិកព្រឹទ្ធសភា ៣៦រូប ដែលបានចោទប្រកាន់អ្នកស្រី ផែថងថាន ថាគ្មានភាពស្មោះត្រង់ និងបំពានក្រមសីលធម៌ស្តង់ដា ដោយបំពានលើរដ្ឋធម្មនុញ្ញជុំវិញការបែកធ្លាយកិច្ចសន្ទនាតាមទូរសព្ទជាមួយប្រធានព្រឹទ្ធសភាកម្ពុជា លោក ហ៊ុន សែន។
ចៅក្រមទាំង ៩រូបនៃតុលាការធម្មនុញ្ញថៃ បានបង្គាប់ឱ្យអ្នកស្រី ផែថងថាន ផ្អាកការបំពេញតួនាទីជានាយករដ្ឋមន្ត្រីក្នុងសំឡេង ៧ ទល់ ២សំឡេង។
តាមសាលដីការបស់តុលាការធម្មនុញ្ញជាមួយសំឡេងភាគច្រើន ៧ ទល់នឹង ២ បានសម្រេចព្យួរចុងចោទ អ្នកស្រី ផែថងថាន ពីតំណែងជានាយករដ្ឋមន្ត្រីចាប់តាំងពីថ្ងៃទី១ ខែកក្កដា នេះតទៅ រហូតដល់តុលាការធម្មនុញ្ញថៃ ចេញសាលក្រមសម្រេចចុងក្រោយ។ នេះតាមសេចក្ដីប្រកាសព័ត៌មានរបស់តុលាការធម្មនុញ្ញថៃ ដែលកាសែតបាងកកប៉ុស្តិ៍ ចុះផ្សាយនៅថ្ងៃទី១ កក្កដា។
ក្រោយទទួលយកញត្តិ តុលាការធម្មនុញ្ញថៃ នឹងចាប់ផ្ដើមពិចារណាថាតើអ្នកស្រី ផែថងថាន បានបំពានរដ្ឋធម្មនុញ្ញដែរ ឬក៏យ៉ាងណា ជុំវិញការបែកធ្លាយកិច្ចសន្ទនាតាមទូរសព្ទដែលអ្នកស្រីបានប្រាប់លោក ហ៊ុន សែន ថាមេបញ្ជាការភូមិភាគ២ គឺជាពួកប្រឆាំងនឹងអ្នកស្រី។
តុលាការធម្មនុញ្ញថៃ នឹងត្រូវចេញសាលដីកាសម្រេចថាតើត្រូវដក ឬក៏ប្រគល់តំណែងជានាយករដ្ឋមន្ត្រីឱ្យអ្នកស្រី ផែថងថាន វិញនៅរយៈពេលក្រោយទៀត ខណៈតុលាការកំពូលមួយនេះរង់ចាំចម្លើយតវ៉ាលាយលក្ខណ៍អក្សរពីអ្នកស្រី ក្នុងរយៈពេល ១៥ថ្ងៃ។
ភ្លាមៗក្រោយពីសាលដីការបស់តុលាការធម្មនុញ្ញថៃ អ្នកស្រី ផែថងថាន បានចេញមុខនិយាយថា អ្នកស្រីទទួលយកការសម្រេចចិត្តរបស់តុលាការធម្មនុញ្ញ ដែលបានព្យួរអ្នកស្រីពីតំណែងជានាយករដ្ឋមន្ត្រី។
អ្នកស្រី ផែថងថាន បានថ្លែងប្រាប់ក្រុមអ្នកសារព័ត៌មាននៅឯការិយាល័យរដ្ឋាភិបាលក្នុងទីក្រុងបាងកក ដែលមានសេចក្ដីថា៖ «សេចក្តីសម្រេចបានចេញមកហើយ។ ចំពោះខ្ញុំ យល់ព្រមទទួលយកការសម្រេចចិត្តរបស់តុលាការ ក៏ប៉ុន្តែខ្ញុំចង់បញ្ជាក់ថាជាចេតនារបស់ខ្ញុំជានិច្ច ក្នុងការធ្វើអ្វីៗដែលប្រសើរបំផុតដើម្បីប្រទេសខ្ញុំ និងប្រជាជនថៃ។»
ជាមួយគ្នានេះ តាមកាសែតបាងកកប៉ុស្តិ៍ ឧបនាយករដ្ឋមន្ត្រីថៃ និងជារដ្ឋមន្ត្រីក្រសួងដឹកជញ្ជូន លោក Suriya Jungrungreangkit ដែលមកពីគណបក្សភឿថៃ នឹងត្រូវឡើងកាន់តំណែងជានាយករដ្ឋមន្ត្រីស្ដីទី បន្ទាប់ពីការព្យួរតំណែងរបស់អ្នកស្រី ផែថងថាន។ ទោះបីជាត្រូវបានព្យួរតំណែងជានាយករដ្ឋមន្ត្រីក៏ដោយ ក៏អ្នកស្រី ផែថងថាន នៅមានតំណែងជារដ្ឋមន្ត្រីក្រសួងវប្បធម៌ ដែរ។
អ្នកស្រី ផែថងថាន ស៊ីណាវ៉ាត់ (Paetongtarn Shinawatra) កាន់តំណែងរដ្ឋមន្ត្រីក្រសួងវប្បធម៌ នៅក្នុងគណៈរដ្ឋមន្ត្រីថ្មីមួយដែលត្រូវបានប្រកាសនៅក្នុងព្រឹត្តិបត្ររបស់រាជវាំងថៃ Royal Gazette នៅថ្ងៃអង្គារ ទី១ ខែកក្កដា។
សមាសភាពរដ្ឋមន្ត្រីថ្មីរបស់អ្នកស្រី ផែថងថាន ទទួលបានការអនុម័តយល់ព្រមពីព្រះមហាក្សត្រថៃ ហើយពិធីស្បថចូលកាន់តំណែងនឹងត្រូវធ្វើឡើងនៅថ្ងៃព្រហស្បតិ៍ក្នុងសប្ដាហ៍នេះ។
ក្រុមអ្នកតាមដាននយោបាយថៃ បាននិយាយថា ការសម្រេចចិត្តរបស់អ្នកស្រី ផែថងថាន ក្នុងការកាន់តំណែងជារដ្ឋមន្ត្រីក្រសួងវប្បធម៌ គឺដើម្បីអាចបន្តស្ថិតនៅក្នុងជួរគណៈរដ្ឋមន្ត្រីថៃ ក្នុងករណីដែលតុលាការធម្មនុញ្ញព្យួរអ្នកស្រីពីតំណែងជានាយករដ្ឋមន្ត្រី។
ក្នុងថ្ងៃដែលតុលាការធម្មនុញ្ញថៃ សម្រេចព្យួរតំណែងអ្នកស្រី ផែថងថាន អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ជាឪពុករបស់អ្នកស្រី ផែថងថាន ត្រូវបង្ហាញខ្លួននៅតុលាការព្រហ្មទណ្ឌ ក្នុងសវនាការជំនុំជម្រះលើការចោទប្រកាន់ប្រឆាំងនឹងរូបលោកពីបទប្រមាថព្រះមហាក្សត្រថៃ ធ្វើឡើងអំឡុងកិច្ចសម្ភាសន៍ជាមួយប្រព័ន្ធផ្សព្វផ្សាយកូរ៉េខាងត្បូង កាលពីជាង ១០ឆ្នាំមុន។ នេះបើតាមបណ្ដាញផ្សាយព័ត៌មាន BBC។
មេធាវីរបស់លោក ថាក់ស៊ីន គឺលោក Winyat Chartmontree បានឱ្យដឹងថា លោក ថាក់ស៊ីន ចូលរួមក្នុងសវនាការជំនុំជម្រះនៅម៉ោង ៩ព្រឹក ថ្ងៃអង្គារ ទី១ ខែកក្កដា។ តុលាការព្រហ្មទណ្ឌថៃ នឹងបើកសវនាការជំនុំជម្រះរយៈពេល ៣ថ្ងៃជាប់ៗគ្នា ចាប់ពីថ្ងៃអង្គារ ទី១ ខែកក្កដា ដល់ថ្ងៃទី៣ ខែកក្កដា។
លោក ថាក់ស៊ីន ត្រូវបានអនុញ្ញាតឱ្យនៅក្រៅឃុំ ជាមួយប្រាក់តម្កល់ ៥សែនបាត បន្ទាប់ពីត្រូវបានចោទប្រកាន់ជាផ្លូវការពីព្រះរាជអាជ្ញាថៃ កាលពីខែសីហា ឆ្នាំ២០២៤។ លោកត្រូវបានហាមឃាត់ចេញក្រៅប្រទេសដោយមិនមានការអនុញ្ញាតពីតុលាការ។
លោក ថាក់ស៊ីន ឪពុករបស់អ្នកស្រី ផែថងថាន ត្រូវបានពួកយោធាធ្វើរដ្ឋប្រហារទម្លាក់ពីតំណែងក្នុងឆ្នាំ២០០៦ ខណៈលោកកំពុងចូលរួមមហាសន្និបាតអង្គការសហប្រជាជាតិនៅទីក្រុងញូវយ៉ក។
ចំពោះប្អូនស្រីបង្កើតរបស់លោក ថាក់ស៊ីន អ្នកស្រី យីងឡាក់ ដែលជាម្ដាយមីងអ្នកស្រី ផែថងថាន ក៏ត្រូវបានតុលាការធម្មនុញ្ញថៃ ដកហូតតំណែងនៅថ្ងៃទី៧ ខែឧសភា ឆ្នាំ២០១៤ មុនប៉ុន្មានថ្ងៃប៉ុណ្ណោះក៏មានរដ្ឋប្រហារទម្លាក់គណៈរដ្ឋមន្ត្រីរបស់គណបក្សភឿថៃ ដែលអ្នកស្រី យីងឡាក់ ជាសមាជិកស្នូលរបស់បក្សនេះ។
តុលាការធម្មនុញ្ញថៃ សម្រេចព្យួរតំណែងនាយករដ្ឋមន្ត្រីពីអ្នកស្រី ផែថងថាន តើជាការបញ្ចៀសរដ្ឋប្រហារយោធាឬ?
ចាប់តាំងពីការផ្ដួលរំលំរបបរាជានិយមផ្ដាច់ការរបស់រាជាណាចក្រថៃ នៅឆ្នាំ១៩៣២ រាជាណាចក្រក្រោយទៀតនេះប្រកាន់យករបបប្រជាធិបតេយ្យ រាជានិយមអាស្រ័យរដ្ឋធម្មនុញ្ញ ប៉ុន្តែរាជានិយមថៃ បែបថ្មីនេះ បានឆ្លងកាត់ការធ្វើរដ្ឋប្រហារយោធាទម្លាក់នាយករដ្ឋមន្ត្រីដល់ទៅ ២០លើកមកហើយ។
រដ្ឋប្រហារចុងក្រោយនៅថ្ងៃទី២២ ខែឧសភា ឆ្នាំ២០១៤ រដ្ឋប្រហារទម្លាក់គណៈរដ្ឋមន្ត្រីរបស់គណបក្សភឿថៃ របស់អតីតនាយករដ្ឋមន្ត្រី ថាក់ស៊ីន ជាឪពុករបស់អ្នកស្រី ផែថងថាន។
អ្នកសង្កេតការណ៍ពិបាកប៉ាន់ស្មានណាស់ថាតើនាយករដ្ឋមន្ត្រីក្រោយអ្នកស្រី ផែថងថាន ជានាយករដ្ឋមន្ត្រីស្ដីទី មកពីក្រុមចម្រុះជាមួយនឹងបក្សភឿថៃ អាចគេចផុតពីរដ្ឋប្រហារដែរឬទេ ព្រោះដានជើងមិនទាន់លុបនៅឡើយ ដែលទីបំផុត ពួកយោធាថៃ បានធ្វើរដ្ឋប្រហាររំលាយគណៈរដ្ឋមន្ត្រីថ្មីរបស់បក្សភឿថៃ ក្រោយតែប៉ុន្មានថ្ងៃប៉ុណ្ណោះបន្ទាប់ពីអ្នកស្រី យីងឡាក់ ត្រូវបានតុលាការធម្មនុញ្ញដកហូតតំណែងជានាយករដ្ឋមន្ត្រី។
បើស្ថានការណ៍នយោបាយនៅទីក្រុងបាងកក នៅតែចលាចល អាចនឹងមានរដ្ឋប្រហារ ហើយពួកយោធាថៃ នឹងច្បាមយកអំណាចជាថ្មីម្ដងទៀត តែពួកយោធាថៃ ធ្វើរដ្ឋប្រហារកាន់អំណាចមិនដែលទុកឱកាសឱ្យរបបផ្ដាច់ការកើតមាននៅលើរាជាណាចក្រថៃ បានដាច់ខាត៕
© 2025, ឌឹ ខេមបូឌា ដេលី. All rights reserved.