 ដែលនឹងដឹកនាំដោយប្រទេសម៉ាឡេស៊ី។){kind=link}
ក្រសួងការពារជាតិកម្ពុជា អះអាងថា អាមេរិកនឹងបន្តរៀបចំផែនការយោធា គ្រឿងបរិក្ខារ ប្រព័ន្ធបញ្ជូនកម្លាំង ការឃ្លាំមើលតាមអាកាស និងសម្ភារៈបច្ចេកទេសទំនើបដទៃទៀតដើម្បីចូលរួមឃ្លាំមើលការអនុវត្តបទឈប់បាញ់រវាងកម្ពុជា-ថៃ ក្រោមគំនិតផ្ដួចផ្ដើមរបស់ប្រធានាធិបតីលោក ដូណាល់ ត្រាំ (Donald Trump) ដែលនឹងដឹកនាំដោយប្រទេសម៉ាឡេស៊ី។
ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី៧ សីហា នេះថា ក្នុងជំនួបរដ្ឋមន្ត្រីការពារជាតិ លោក ទៀ សីហា ជាមួយនាយឧត្ដមនាវី Samuel Paparo មេបញ្ជាការនៃបញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក (USINDOPACOM) និងឯកអគ្គរដ្ឋទូតសហរដ្ឋអាមេរិកប្រចាំនៅប្រទេសម៉ាឡេស៊ី លោក Edgard Kagan កាលពីថ្ងៃទី៦ ខែសីហា បានបញ្ជាក់ថា អាមេរិកនឹងតាមដានដោយយកចិត្តទុកដាក់បំផុត ដើម្បីឲ្យការអនុវត្តបទឈប់បាញ់ប្រកបដោយភាពជោគជ័យ និងមានប្រសិទ្ធភាពខ្ពស់។
ប្រភពដដែលអះអាងថា សហរដ្ឋអាមេរិកនឹងចូលរួមគាំទ្រផ្នែកភស្តុភារ និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន (AMT) ឲ្យបានលឿនបំផុត។ លើសពីនេះ សហរដ្ឋអាមេរិក ក៏បានបង្ហាញពីការអនុវត្តរបស់សហរដ្ឋអាមេរិកបន្តទៀតដែរ ដូចជា ការធ្វើផែនការយោធា គ្រឿងបរិក្ខារ ប្រព័ន្ធបញ្ជូនកម្លាំង ប្រព័ន្ធឃ្លាំមើលតាមអាកាស និងសម្ភារៈបច្ចេកទេសទំនើបជាច្រើនទៀត។
ក្រសួងការពារជាតិកម្ពុជា បញ្ជាក់ថា ជំហររបស់សហរដ្ឋអាមេរិកបែបនេះ គឺជាការបង្ហាញពីការតាំងចិត្តខ្ពស់ និងបានត្រៀមខ្លួនចូលរួមបញ្ចប់ជម្លោះរវាងកម្ពុជា-ថៃ ដើម្បីកសាងឱ្យមានសន្តិភាពកើតឡើងដោយពិតប្រាកដរវាងប្រទេសទាំងពីរ។
នៅថ្ងៃទី៧ ខែសីហា នេះ ស្ថានទូតអាមេរិកប្រចាំនៅកម្ពុជា បានសរសេរនៅលើទំព័រហ្វេសប៊ុករបស់ខ្លួនថា ក្នុងជំនួបដាច់ដោយឡែកជាមួយគណៈប្រតិភូថៃ និងគណៈប្រតិភូកម្ពុជា មុនពេលកិច្ចប្រជុំគណៈកម្មាធិការព្រំដែនទូទៅ (GBC) នៅទីក្រុងកូឡាឡាំពួរ អាមេរិកបញ្ជាក់ជំហរយ៉ាងច្បាស់ពីការគាំទ្រយ៉ាងពេញទំហឹងចំពោះបទឈប់បាញ់រវាងកម្ពុជា-ថៃ។
កាលពីថ្ងៃទី៥ ខែសីហា ឆ្នាំ២០២៥ រដ្ឋមន្ត្រីស្តីទីនៃក្រសួងការពារជាតិថៃ ឧត្ដមសេនីយ៍ Nattaphon Narkphanit បានលើកឡើងក្នុងសន្និសីទសារព័ត៌មានថា ប្រទេសថៃ បានដាក់ចេញនូវលក្ខខណ្ឌចំនួន ៨ចំណុចសម្រាប់កិច្ចចរចា GBC នៅប្រទេសម៉ាឡេស៊ី ក្នុងគោលបំណងដើម្បីធានាសន្តិភាព និងដោះស្រាយជម្លោះ។
លោក Nattaphon Narkphanit បានចោទថាកម្ពុជាបានរំលោភលើបទឈប់បាញ់រវាងកម្ពុជា-ថៃ រហូតមក។
ប៉ុន្តែអ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានថ្លែងនៅក្នុងសន្និសីទសារព័ត៌មាននៅថ្ងៃទី៧ សីហា នេះថា កម្ពុជាស្រងាកចិត្តខ្លាំងបំផុតចំពោះយុទ្ធនាការព័ត៌មានក្លែងក្លាយនៅប្រទេសថៃ ក្នុងចេតនាបំភ្លៃឆន្ទៈរបស់កម្ពុជា ដែលប្រាថ្នាចង់តែបាន «សន្តិភាព» និងតែងអនុវត្តនូវបទឈប់បាញ់រហូតមក។
អ្នកនាំពាក្យក្រសួងការបរទេសកម្ពុជា រូបនេះបញ្ជាក់ថា ទង្វើរបស់ភាគីថៃ ដែលខំបំភ្លៃផ្សព្វផ្សាយព័ត៌មានក្នុងចេតនាបង្កាច់បង្ខូចលើកម្ពុជាបែបនេះ គឺដើម្បីតែបង្វែរការចាប់អារម្មណ៍ពីសកម្មភាពឈ្លានពានរបស់ថៃ ខ្លួនឯងផ្ទាល់លើកម្ពុជា ប៉ុណ្ណោះ ខណៈកម្ពុជា ព្យាយាមការពារខ្លួនពីការឈ្លានពាននេះ ដើម្បីសន្តិភាពសម្រាប់ប្រទេសទាំងពីរតែប៉ុណ្ណោះ៕
© 2025, ឌឹ ខេមបូឌា ដេលី. All rights reserved.