 កម្ពុជា និងថៃ បានចរចាគ្នាពីការបើកច្រកព្រំដែនមួយចំនួនតាមសំណើរដ្ឋាភិបាលជប៉ុន សម្រាប់ការដឹកជញ្ជូនទំនិញចាំបាច់ដើម្បីធានាដល់សង្វាក់ផ្គត់ផ្គង់។){kind=link}
រដ្ឋមន្ត្រីក្រសួងការពារជាតិកម្ពុជា អះអាងថា កិច្ចប្រជុំគណៈកម្មាធិការព្រំដែនទូទៅ (GBC) កម្ពុជា និងថៃ បានចរចាគ្នាពីការបើកច្រកព្រំដែនមួយចំនួនតាមសំណើរដ្ឋាភិបាលជប៉ុន សម្រាប់ការដឹកជញ្ជូនទំនិញចាំបាច់ដើម្បីធានាដល់សង្វាក់ផ្គត់ផ្គង់។
រដ្ឋមន្ត្រីក្រសួងការពារជាតិ លោក ទៀ សីហា ចេញសេចក្តីប្រកាសព័ត៌មានស្ដីពីលទ្ធផលនៃកិច្ចប្រជុំគណៈកម្មាធិការព្រំដែនទូទៅ (GBC) នៅថ្ងៃទី១០ កញ្ញា នេះថា ក្រៅពីពិភាក្សាពីការបើកច្រកព្រំដែន ភាគីទាំងពីរក៏បានព្រមព្រៀងគ្នាកាត់បន្ថយភាពតានតឹងតាមរយៈការកែសម្រួលយុទ្ធោបករណ៍ និងសម្ភារៈយោធានៅតាមព្រំដែនផងដែរ។
លោក ទៀ សីហា អះអាងថា កម្ពុជា-ថៃ ក៏បានឯកភាពគ្នាជាគោលការណ៍ទៅលើលក្ខខណ្ឌប្រតិបត្តិ (TOR) សម្រាប់ការបង្កើតក្រុមអ្នកសង្កេតការណ៍អាស៊ាន (AOT) ថែមទៀត ដោយរង់ចាំតែការអនុម័តពីរដ្ឋាភិបាលនៃប្រទេសទាំងពីរតែប៉ុណ្ណោះ។
លោកបន្តថា ក្នុងអំឡុងពេលរង់ចាំការបង្កើតក្រុមអ្នកសង្កេតការណ៍អាស៊ាន (AOT) ភាគីទាំងពីរបានទទួលស្គាល់នូវតួនាទីដ៏សំខាន់របស់ក្រុមអ្នកសង្កេតការណ៍បណ្ដោះអាសន្ន (IOT) និងឯកភាពគ្នាក្នុងការបន្តប្រើប្រាស់យន្តការនេះ ដើម្បីធានាការអនុវត្តបទឈប់បាញ់ឱ្យមានប្រសិទ្ធភាព។
រដ្ឋមន្ត្រីក្រសួងការពារជាតិរូបនេះបញ្ជាក់ថា ករណីទាហានខ្មែរទាំង ១៨នាក់ដែលកំពុងឃុំខ្លួនក្នុងប្រទេសថៃ ក៏ត្រូវបានលើកយកមកពិភាក្សាក្នុងកិច្ចប្រជុំនេះដែរ ដើម្បីស្នើឱ្យមានការដោះលែងស្របតាមអនុសញ្ញាទីក្រុងហ្សឺណែវ។
នៅថ្ងៃទី១០ ខែកញ្ញា ឆ្នាំ២០២៥ នេះ កិច្ចប្រជុំពិសេសនៃគណៈកម្មាធិការព្រំដែនទូទៅ (GBC) កម្រិតថ្នាក់រដ្ឋមន្ត្រី ត្រូវបានធ្វើឡើងនៅខេត្តកោះកុង ដែលក្នុងនោះ ភាគីកម្ពុជា តំណាងដោយរដ្ឋមន្ត្រីក្រសួងការពារជាតិ លោក ទៀ សីហា ខណៈភាគីថៃ តំណាងដោយអនុរដ្ឋមន្ត្រីការពារជាតិថៃ លោក ណាតាផុន ណាក់ផានិត (Nattaphon Narkphanit)។
ជុំវិញកិច្ចប្រជុំនេះ កម្ពុជា-ថៃ បានព្រមព្រៀងគ្នារៀបចំកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅ (GBC) ក្នុងរយៈពេល ៣០ថ្ងៃទៀតបន្ទាប់ពីកិច្ចប្រជុំនេះ ដែលភាគីថៃ នឹងធ្វើជាម្ចាស់ផ្ទះវិញម្តង។
កាសែត ខៅស៊ុត របស់ថៃ (Khaosod) បានស្រង់សម្ដីអនុរដ្ឋមន្ត្រីក្រសួងការពារជាតិថៃ លោក ណាតាផុន ណាក់ផានិត (Nattaphon Narkphanit) នៅថ្ងៃទី១០ កញ្ញា នេះថា ក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) បានអនុម័តលើការដកអាវុធធុនធ្ងន់ចេញពីតំបន់ព្រំដែន ដើម្បីឱ្យវិលត្រឡប់ទៅសភាពធម្មតាវិញ។
លោក ណាតាផុន ណាក់ផានិត អះអាងថា ក្នុងកិច្ចប្រជុំ ភាគីកម្ពុជា-ថៃ បានពិភាក្សាអំពីការបន្ធូរច្រកព្រំដែន ប៉ុន្តែការបន្ធូរបន្ថយច្រកព្រំដែនរវាងប្រទេសថៃ និងកម្ពុជា មិនមែនសម្រាប់បុគ្គលណាទេ ប៉ុន្តែសម្រាប់ការដឹកជញ្ជូនទំនិញប៉ុណ្ណោះ ខណៈមនុស្សនៅតែមិនអាចឆ្លងកាត់បានដដែល។
អនុរដ្ឋមន្ត្រីការពារជាតិថៃ រូបនេះ បញ្ជាក់ថា មូលហេតុនៃការបើកច្រកជាមួយកម្ពុជា គឺដោយសារប្រទេសទី៣ មិនមែនមកពីថៃ និងកម្ពុជា ទេ ព្រោះប្រទេសទីបីបានអះអាងថា ជម្លោះរវាងថៃ និងកម្ពុជា កំពុងប៉ះពាល់ និងបង្កបញ្ហាដល់ពួកគេ។
ទាក់ទិននឹងបញ្ហានេះ កាលពីថ្ងៃទី២២ ខែសីហា ស្ថានទូតជប៉ុនប្រចាំកម្ពុជា បានលើកឡើងថា ជុំវិញដំណើរទស្សនកិច្ចរបស់លោក សឺហ្សឺគី ហ៊ីដេអូ (SUZUKI Hideo) ឯកអគ្គរាជទូតនៃកិច្ចសហប្រតិបត្តិការមេគង្គនៅប្រទេសម៉ាឡេស៊ី រួមទាំងកម្ពុជា និងថៃ គឺរដ្ឋាភិបាលជប៉ុន អំពាវនាវឱ្យមានការអនុវត្តដោយប្រាកដប្រជានូវកិច្ចព្រមព្រៀងបទឈប់បាញ់ ដើម្បីឆ្ពោះទៅរកការបន្ធូរបន្ថយភាពតានតឹង ព្រោះទំនាក់ទំនងល្អរវាងប្រទេសកម្ពុជា និងថៃ មានសារសំខាន់ខ្លាំងណាស់សម្រាប់ស្ថិរភាព និងការអភិវឌ្ឍក្នុងតំបន់៕
© 2025, ឌឹ ខេមបូឌា ដេលី. All rights reserved.