 ទៅដល់។){kind=link}
កងកម្លាំងយោធាថៃ ដាក់គ្រឿងចក្រចូលទៅឈូសឆាយដីធ្លី និងផ្ទះសម្បែងរបស់ពលរដ្ឋខ្មែរក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅថ្ងៃទី១០ ខែតុលា ឆ្នាំ២០២៥ នេះ ប៉ុន្តែសកម្មភាពឈូសឆាយនេះត្រូវបានផ្អាកទៅវិញ ក្រោយពីក្រុមអ្នកសង្កេតការណ៍អន្តរកាល (IOT) ទៅដល់។
កងកម្លាំងយោធាថៃ រាប់រយនាក់ប្រដាប់ដោយឧបករណ៍រាវមីន និងប្រើគ្រឿងចក្រ ត្រូវបានដាក់ពង្រាយនៅភូមិព្រៃចាន់ នៅថ្ងៃសុក្រនេះ បានធ្វើសកម្មភាពឈូសឆាយដី និងផ្ទះសម្បែងរបស់ពលរដ្ឋខ្មែរជាច្រើនគ្រួសារ នៅតំបន់ភូមិព្រៃចាន់ ដែលកងទ័ពថៃ បានព័ទ្ធយកចាប់តាំងពីថ្ងៃទី១២ខែសីហា កន្លងទៅ។
បន្ទាប់ពីកម្លាំងយោធាថៃ ចូលទៅឈូសឆាយដី និងផ្ទះសម្បែងរបស់ពលរដ្ឋខ្មែរក្នុងភូមិព្រៃចាន់ នៅវេលាម៉ោង ១២ និង ៣០នាទី ក្រុមអ្នកសង្កេតការណ៍អន្តរកាល (IOT) ដែលដឹកនាំដោយប្រទេសម៉ាឡេស៊ី ក៏បានចុះពិនិត្យទីតាំងជាក់ស្តែងដែរ ដើម្បីឃ្លាំមើលការឈូសឆាយរបស់យោធាថៃ ប៉ុន្តែពួកគេបានផ្អាកសកម្មភាពឈូសឆាយ និងដកគ្រឿងចក្រត្រឡប់ទៅវិញនៅម៉ោង ៣ និង ៥០នាទី។
កាសែត ខៅស៊ុត (Khaosod) របស់ថៃ បានស្រង់សម្ដីអភិបាលខេត្តស្រះកែវ លោក បិរិញ្ញា ពោធិសាត់ (Parinya Phothisat) នៅថ្ងៃទី១០ តុលា នេះថា ដល់ពេលវេលារបស់ភាគីកម្ពុជាហើយ ព្រោះថ្ងៃទី១០ ខែតុលា គឺជាថ្ងៃផុតកំណត់នៃពេលវេលាកំណត់សម្រាប់ភាគីកម្ពុជា ខណៈប្រតិបត្តិការរបស់ថៃ គឺធ្វើឡើងស្របទៅតាមច្បាប់ និងបទប្បញ្ញត្តិអន្តរជាតិ។
អភិបាលខេត្តស្រះកែវ រូបនេះ លើកឡើងថា បន្ទាប់ពីសកម្មភាពនេះ វានឹងក្លាយជាចំណុចចាប់ផ្តើមសម្រាប់ប្រទេសថៃ ក្នុងការប្រើប្រាស់នូវប្រតិបត្តិការ និងនីតិវិធី រួមទាំងបទប្បញ្ញត្តិអន្តរជាតិ ដើម្បីអនុវត្តច្បាប់ក្នុងប្រទេសថៃ។
លោក បិរិញ្ញា ពោធិសាត់ បញ្ជាក់ថា ច្បាប់អាជ្ញាសឹកកំពុងមានជាធរមាន ដូច្នេះសេចក្តីសម្រេចទាំងអស់ គឺស្ថិតនៅលើយោធា ខណៈច្បាប់ និងបទប្បញ្ញត្តិអន្តរជាតិ គឺជាការទទួលខុសត្រូវរបស់អង្គការអន្តរជាតិ និងក្រសួងការបរទេស ដែលនឹងបន្តពិភាក្សានៅក្នុងកិច្ចប្រជុំគណៈកម្មការចម្រុះព្រំដែនកម្ពុជា-ថៃ (JBC) រួមទាំងកិច្ចប្រជុំអាស៊ានផងដែរ។
កាលពីថ្ងៃទី១៣ ខែសីហា ឆ្នាំ២០២៥ រដ្ឋាភិបាលកម្ពុជា អះអាងថា ភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ស្ថិតនៅទល់នឹងខេត្តស្រះកែវ ប្រទេសថៃ ត្រូវបានកងកម្លាំងយោធាថៃ ចូលទៅដាក់លួសបន្លា សម្បកកង់ឡាន និងសំណាញ់ខ្មៅ ចាប់តាំងពីថ្ងៃទី១២ ខែសីហា រហូតដល់ពេលនេះ។
ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី១០ តុលា នេះថា ក្រុមអ្នកសង្កេតការណ៍អន្តរកាល (IOT) ដែលដឹកនាំដោយប្រទេសម៉ាឡេស៊ី បានចុះពិនិត្យទីតាំងជាក់ស្តែងនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដើម្បីសង្កេតការណ៍ ផ្ទៀងផ្ទាត់ និងរាយការណ៍នៅស្ថានភាពព្រំដែន ក្រោយពីបទឈប់បាញ់ចូលជាធរមាន។
ក្រសួងការពារជាតិ បញ្ជាក់ថា យោងតាមផែនការក្នុងរយៈពេលពេញមួយសប្តាហ៍នេះ ក្រុមអ្នកសង្កេតការណ៍អន្តរកាល (IOT) នឹងតាមដានសភាពការណ៍ និងចុះសង្កេតការណ៍ជាប្រចាំនៅភូមិទាំងពីរនេះ។
ជុំវិញបញ្ហានេះ អង្គភាពអ្នកនាំពាក្យរាជរដ្ឋាភិបាលកម្ពុជា បានចេញសេចក្តីថ្លែងការណ៍នៅថ្ងៃទី១០ តុលា ដោយចាត់ទុកសកម្មភាពទាហានថៃ ដែលបានចូលទៅឈូសឆាយក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ គឺជាការរំលោភបំពានលើដែនអធិបតេយ្យជាតិកម្ពុជា យ៉ាងកំរោល និងយ៉ាងគឃ្លើនបំផុត៕
© 2025, ឌឹ ខេមបូឌា ដេលី. All rights reserved.